Поиск по сайту: 
 
Наши мокшанские сыновья и дочери
Свежий номер
Тема дня
Национальная тематика
Культура
Обратная связь (Газета - Читатель)
В Госсобрании РМ
В Правительстве РМ
События
Демография
Здоровье
Мокшане о мокшанах
Как жили и живут мокшане
Ветеранам о ветеранах
Молодежный клуб
Наша усадьба
Наука и жизнь
Спорт
Национальный проект
Образование
Доступное жилье
Благотворительность
Поговорим о создании единого литературного мордовского языка

Архив
 сентябрь 
 2010 
пн вт ср чт пт сб вс
  12345
6789101112
13141516171819
20212223242526
27282930   

 
 

 
Национальная тематика

П.В.Криворотов:

«ТЕЙНЕК УЛИ МЕЗЕНКСА МАРЯМС ГОРДОСТЬ»
 
Музыкань кельги ломаттненди лац содаф Саранск ошень Л.П.Кирюковонь лемса музыкальнай училищась, конань пцтай комсь киза ни вятьсы Мордовия Республикань Заслуженнай учительсь, мокшалясь П.В.Криворотов. Васенце шистокиге Петр Васильевич ладязе работанц стане, штоба васенце вастти тяса фалу лихневоль минценнесь, национальнайсь. Тонафнемань тя заведенияса од ломаттненди макссевихть крхка содамошит народнай фольклорть, мокшэрзянь краеньконь историянц колга. И аф най работаса, эряфсовок Петр Васильевич вестевок аф лядонды ширеса национальнай кизефкснень эзда. Аф кунара мархтонза васьфнесь минь корреспондентоньке  и эняльдсь отвечамс кизефксонзон лангс.
 
—Петр Васильевич, кодамот училищать тячиень тевонза-заботанза?
—Аф кунара нолдаме тага несколька од специалист. Сембоц 56 выпускниконьколь. Тяни аноклатама примамс од студенттнень. Тихтяма аф оцю ремонткя. Тияк арьсекшнетяма оцю реконструкциять колга, кона кармай училищаса 2012 кизоти. Тяда башка, учебнай заведенияньконь видеса строяви общежития, кона арай оцю кеняртьксокс велень и лия региононь студенттненди. Вдь тяда инголе эряма вастоньке ашель, сяс теест сашендовсь вешендемс квартират. Реконструкцияда меле училищаса эвондай органнай зал, конань лаца республикасонк нинге аш. Тянкса оцю спасиба азома республикань Правительствати и Культурань министерствати, конат фалу кирнесазь ширеньконь.
19.08.2010 №32

 

ВЕЛИКОБРИТАНИЯНЬ УЧЁНАЙХНЕ ТОНАФНЕСАЗЬ МОКШЭРЗЯТНЕНЬ ЭРЯФСНОН

Кода содаф, национальносттнень еткса соткснень квалма кизефксне занцесазь васенце вастть тячиень эряфоньконь политическяй ширесонза. Шарьхкотьф, башка мяль тянди шарфневи странасонк, коса эряйхть пяк лама национальностень ломатть. Тянь колга корхтайхть ламоц этническяй общественнай организациятнень улемасна. Синь пяк маласта работайхть властень башка оргаттнень мархта. Кепотьксонди, Мордовияса ня прябалатнень ванондсыне Национальнай политикань министерствась, федеральнай ширде—Региональнай развитиянь министерствась и стак тов.
 
Финно-угорскяй нароттнень и государстватнень еткса кунара и пяк маштозь етафневихть эряфс марстонь проектт. Кепотьксонди, 2005-2008 кизотнень арьсефоль и эряфс етафтфоль «О положении финно-угорских народов России» Российско-Финляндскяй марстонь проектсь. Тя тевса оцю участия примасть Мордовскяй госуниверситетонь Россиянь нароттнень новейшай историянь кафедрасна, а стане жа Мордовскяй университетть видеса финно-угроведениянь Межрегиональнай научнай центрать историянь и этнографиянь сектороц. Тяка учреждениятне няфтьсазь пряснон финно-угорскяй народонь аф правительственнай организациятнень представительснон тонафнемаснон коряс 2009-2011 кизонь Российско-Финляндскяй проектса.
12.08.2010 №31

 

ТЯСА ЛЯМБОСТА МАЛАТКШНИХТЬ МИНЦЕННЕТИ, НАЦИОНАЛЬНАЙТИ

Саранск ошень 42 № идень садикти нильгемоньда лама киза. Тя пингста тяса касфтфоль-воспитандафоль аф кржа стирня и цераня. Шабанятне кельгсазь тяза сашендомаснон, сяс мес пингсь «Ягодкаса», тяфта ляпоняста лемнесазь садикть, вестевок аф етни шавос. Тевонь содай, идень кельги воспитательницатне эрь шиня тонафтыхть мезень-бди одняс. Башка мяль тя кудса шарфневи минценнети, национальнайти. И, аф ваномок сянь лангс, што садику сашендыхнень ламошкасна руст, иттненди тонафневи мокшень кяльсь. Стирнятне-церанятне тонадсть ни садику сувамста азонкшнемс «шумбратада» валть. Нльне сембода емланятне содасазь, што «хлеб» валсь мокшекс «кши», «дом»—«куд» и стак тов. А сембонди тянди тонафтсыне иднятнень мокшавась А.В.Беляева, конань седисонза палы и мзярдовок аф мадонды национальнайти кельгомань толнясь.
 
Анна Васильевна работай идень садикса аф фкя киза, а сяс эсь тевонц содасы пяк лац. Сон лама тиенди сянкса, штоба шабатне кельголезь мокшэрзянь культурать, содалезь койхнень-обуцятнень, тонафнелезь тядянь-алянь кяльть. Ветеце кизось ни А.В.Беляевась вяти тяса «Коволня» лем ала мокшэрзянь кружок.
—Мзярда сань садику работама, пяк кенярдень, што тяса шарфневи оцю мяль национальнайти,—мярьгсь Анна Васильевна.—Тястонь руководствась мярьгсь тейне арамс вятикс мокшэрзянь кружокти. Согласиндань оцю мяльса, аньцек пелень, што родительхне арайхть тянди каршек. Но пингонь етазь шарьхкодине—пелемане шавос.
05.08.2010 №30

 

Марса Россиять мархта

Мордовиянь Общественнай палатань сопредседательсь, Россиянь Общественнай палатань членць, историческяй наукань докторсь, профессорсь В.А.Юрчёнков:
 
«1000 КИЗОНЬ ИЛАСЬ ВИИЯФТСЫ РОССИЯНЬ ГРАЖДАНСКЯЙ ОБЩЕСТВАТЬ!»
 
—Валерий Анатольевич, Мордовия Республикань Общественнай палатаса ефси аф кунара келиста вановсть гражданскяй обществать виияфтоманц коряс кизефксне. Синь тяфта жа сидеста ванондовихть Россиянь Общественнай палатать заседаниянзон эса. Кода содаф, федеральнай Общественнай палатань Гражданскяй обществать виияфтоманц коряс комитетса тон вятят оцю работа. Сяс азк, мезе тя стамсь, афкуксонь гражданскяй обществась?
—Сонь колганза лама мезе можна азомс. Васенцекс, гражданскяй обществась—тя ломанень стама структура, кона аф сувси государственнай властень органц или кодамовок партияс. Лиякс мярьгомс, ащи эздост башка вастса, вятемок эсь тевонзон эса.
Сявсаськ, мярьктяма, любой политическяй партиять. Сонь инь оцю целец—сявомс властть. А гражданскяй обществань структуратнень задачасна ефси лият. Кепотьксонди, ладямс властть и ломаттнень еткса сотрудничествать, ладямс синцень ломаттнень еткса афкуксонь ялгаксшить, лездомс уроз шабатненди, ветераттненди, инвалиттненди и стак тов. И сембе ня тефнень тиемасна тяниень Россияса, улема, аф пяк теждя. Сяс мес кой-кит корхтайхть, што афкуксонь гражданскяй обществать виияфтомац миньцонк моли стакаста. И вов мес.
Нинге 20-це векть ушетксста польскяй содаф историксь Каземир Валишевский азсь тянь колга еню мяль. Сермадомок Россиянь «смутнай пингть» колга, сон мярьгсь: кле, Европаса гражданскяй обществась эвондась нинге средняй векнень пингста. А мес? А сяс, мес тоса модада эрямс кржа. Мярьктяма, ломанць сялондсь шабранц мархта, а тумс эздонза аш коза. Сяс сашендовсь теест латцемс эсь етковаст «седнят». А миньцонк—сялондсь ломанць шабранц мархта, кильдезе алашанц и—Сибири! Модада Россияса лама...
Но, эряви азомс, што тячи государствась тиендьсы семботь, штоба миньцонк ломаттне эрьгавста виензафтольхть гражданскяй обществать эса.
29.07.2010 №29

 

«НАЦИОНАЛЬНОСТСЬ АФ ЭРЯВИ СЁПОНДОМС»

Всероссийскяй  переписьта ингольдень  интервью

Аф весть ни пачфнеме сянь колга, кода республиканьке аноклай населениянь Всероссийскяй переписти. Газетаньконь тячиень номерсонза азонттама, кода тя ширдень тефне ладяфт Атюрьевскяй районца. Мезе тиф, мезе нинге сави тиемс переписть етафтоманкса. Тянь и ламоть лиять колга корреспондентоньконди азондсь Атюрьевскяй районца Мордовиястатонь отделениянь руководительсь И.В.Горин.
08.07.2010 №26

 

Н.П.Огаревонь лемса госуниверситетонь Научнай библиотекать директороц, культурологиянь кандидатсь И.В.Отставнова: «1000 кизонь илась: кода эряви эрямс лама нациянь государстваса!»

—Ирина Владимировна, конашка козяшиц литератураса Научнай библиотекать? И фалу ли студенттне, аспиранттне и преподавательхне мушендсазь библиотекань фондста сянь, мезсь теест эрявксни?
—Сембе синь библиотекастонк мушендсазь семботь, мезсь теест эрявксни научнай работань анокламста. А конашкава козя разнай  литератураса научнай библиотекась, тянь колга азонды ся, што мекольдень вете кизоста библиотеканьконь фондонц мархта  фалу работайхть М.Е.Евсевьевонь лемса пединститутонь, Саранскяй кооперативнай институтонь, ошень техникумонь колледжонь студенттне, преподавательхне, а тяфта жа—гуманитарнай-наукань НИИ-нь, Гуманитарнай институтонь аспиранттне и ученайхне. Конешна, сембе ня услугатне теест макссевихть договоронь вешфкснень коряс, конат ладяфт-серматфт библиотекать и ня учебнай и научнай  структуратнень еткса.
24.06.2010 №24

 

Мокшэрзянь народонь Межрегиональнай советть Исполкомонц председателец, профессорсь М.В.Мосин:

«НАРОДОНЬКЕ КАСЫ И ВИЕНЗАЙ!»
 
—Михаил Васильевич, кодама работа Всероссийскяй переписьта инголе вяти мокшэрзянь народть еткса и Мордовияса, и диаспораса Межрегиональнай советть Исполкомоц?
—Монь койсон, Всероссийскяй переписсь и мокшэрзянь народть 1000 кизонь илац сотфт эсь етковаст политическяй и национальнай сотксса. И вов мес.
Минь тячи сембе пичеттяма сянкса, мес минь народоньконь лувксоц кирсь. И, кода няфтезь 2002 кизонь Всероссийскяй переписть итогонза, сон юмафтозе миллионнай народонь статусть. Но, арьсян, минь государствасонк киньге аш мялец, штоба мокшэрзянь народть лувксоц кирель сяда товга. Вдь минь народоньконь ули козядонга козя национальнай и духовнай культурац, конанди сембе масторлангса аналокт аш! Сяс, улема, Россиянь руководствась ладязе 1000 кизонь илать, штоба кеподемс минь народоньконь самосознаниянц и лемонц од уровеньц. Сяс сембе мокшэрзятненди Всероссийскяй переписть пингста эряви тиемс семботь, штоба мрдафтомс эсь народоньконди миллионнай народонь статусть.
17.06.2010 №23

 

Мордовия Республикань Национальнай политикань министрсь, профессорсь А.С.Лузгин:

«ТЕЙНЕК ПИТНИ ЭРЬ ЛОМАНЦЬ!»
 
—Александр Степанович, мес тейнек тяшкава эряви 2010 кизонь Всероссийскяй переписть етафтомста кочкамс 1 миллион мокшэрзя? И коса ся резервась, тонь койсот, конань вельде пяшкодеви-сатови тя лувкссь?
—Пяк ужяль, но 1989 кизоста сявомок и 2002 кизоти молемс минь народоньконь лувксоц кирсь 21 процентс. Эздонк лядсь 843 тежянь ломань. Тянь няфтезь 2002 кизонь Всероссийскяй переписть итогонза. И ня итокне тячемс пичефтихть эсонк: мокшэрзятне юмафтозь миллионнай народонь статусть.
Лувксонь киремати туфталда ульсь лама. Но васенце вастса ащихть ня факттне. Васенцесь: мокшэрзятне эряйхть пяк дисперснайста. Лиякс мярьгомс, эряйхть Россиянь пцтай эрь регионца аф пяк оцю группаса, конатнень еткса этническяй сотксне аф пяк кемот. Сяс ня группатне валом валом юмафнесазь эсь кяльснон и национальнай культураснон. А тяда меле ни юмафнесазь эсь национальностьснонга. Омбоцесь: кинь лангс лия национальностень аватнень эзда мокшень или эрзянь алясь афоль рьвяя—шабатне сидеста мес-бди арсихть рузкс. Тяфта жа сидеста лисенди мокшэрзянь аватнень шабаснонга мархта.
10.06.2010 №22

 

ДОРОФЕЕВОНЬ НАСЛЕДИЯЦ ЦЕБЯРЬ КЯДЬСА

Салазгорьса ётафтовсь оцю ила
Мокшэрзянь масторсонк лац содаф мокшень васенце поэтть,  письменнай литературать ушедыенц, народнай учительть  и просветительть З.Ф.Дорофеевонь лемоц. А Торбеевскяй райононь Салазгорь велети сон арась гордостекс и прянь шнафтома вастокс. Аф стак 2009-2010 тонафнема кизось лемтьфоль З.Ф.Дорофеевонди, конанди мартста топодсь 120 киза. Аф аньцек Салазгорень, но и Торбеевскяй райононь школатнень, велень библиотекатнень эса етафтовсь лама оцю и интереснай илада. Нят Захар Федоровичень творчестванц коряс литературнай илятть, викторинат, рисункань и сочинениянь конкурст. Ашель районца стама мероприятия, коса афольхть кайге содаф землякснон стихонза, моронза. А сембодонга оцю илась етась Салазгорь велень средняй школаса, коза сашендсть оцю инжихть Саранскяйста, Торбеевскяй районцта. Аньцек райононь делегацияса сизьгемоньшка ломанель: администрацияса, культурань кудса, библиотекаса покодихть, мокшень кялень и литературань, историянь тонафтыхть, школань ученикт.
03.06.2010 №21

 

1000 киза Россиять мархта

Филологическяй наукань докторсь, профессорсь, Финно-угорскяй народонь культурань Поволжскяй центрать директороц Ю.Мишанин:
 
«МОРДОВИЯСЬ—ФИННО-УГОРСКЯЙ МИРТЬ ЦЕНТРАЦ!»
 
—Юрий Александрович, тя кизоть ушетксста сявомок кодама мероприятият етафтсь тя пингс Финно-угорскяй народонь культурань Поволжскяй центрась?
—Сембе оцю и аф оцю мероприятиятне, конатнень   етафнесазь Мордовияса и Россиянь  лия регионца республикань общественнай и государственнай структуратне, сотфт мокшэрзянь народть Российскяй государствань лия нароттнень мархта ладязь  эрямаснон 1000 кизонь праздновандаманц мархта. Поволжскяй финно-угорскяй народонь культурань центраське, эсь виензон коряс, вяти оцю работа илать анокламаса.
Мекольдень пингть Поволжскяй центрась Национальнай политикать коряс министерствать, культурань и образованиянь министерстватнень мархта марса етафтсть лама мероприятия кода Мордовияса, стане и диаспораса. Кепотьксонди, ефси аф кунара етафтовсть Мордовия Республикань шит Омскяй, Челябинскяй областьса и Приморскяй крайса.
Мялень салайста етасть сембе ня васедематне. Сембода пяк—Челябинскяй областьса. Тоса эряй 9000 тежяньда лама мокшэрзя.
27.05.2010 №20

 
 

 
НОВОСТИ

МИНЬ ЗЕМЛЯКОНЬКЕ АЛЕКСЕЙ АЦАПКИН—ОЛИМПИЙСКЯЙ ЧЕМПИОН

17 августста кизонь I-це Юношескяй олимпийскяй налхкоматнень эса Сингапурса вольнай стильса ведьса уендихнень еткса 4х100 метрас эстафетаса сяськсь Россиянь командась: Андрей Ушаков, Илья Лемаев, Антон Лобанов и минь Мордовиянь спортсменоньке Алексей Ацапкин. Россияттне етазь китайскяй сборнайть 0,55 секундада. Уемаса пялькстыхне—австралиецне—лиссть нилеце вастти, пачфни олимпийскяй турниронь сайтсь.
19.08.2010  № 32
 

Мольфтеви «2010 кизонь урожайсь» оперативно-профилактическяй операциясь

МВД-нь СОТРУДНИКНЕ ВАНЫХТЬ СЁРОНЬ УРЯДАМАТЬ МЕЛЬГЕ
 
Мордовияса 270 предприятиясь заняф велень хозяйствань культурань касфнемаса. Марстонь площадсь 1659 тежянь гектар.
Сянкса, штоба ванфтомс тяддень и мелянь урожайть, 2010 кизонь 15 июльста сявомок республикасонк мольфтеви «Урожай-2010» оперативно-профилактическяй операциянь омбоце этапсь, мезть пингста республикань внутренняй тевонь органонь сотрудникнень мархта муфоль 41 административнай правонарушения, 483 преступления.
Мордовия Республикава Внутренняй тевонь министерствась оцю работа мольфти сянь коряс, штоба перямс кить велень хозяйствань продукциянь, жуватань-мезень саламати, ваныхть сянь мельге, штоба назначенияс коре нолявольхть засухать сюнеда эвондаф зияттнень машфтомс государствать мархта макссеви бюджетнай средстватне, мольфтихть контроль серонь, тишень, ГСМ-нь, удобрениянь, техникань-мезень ванфтома васттнень мельге.
Внутренняй тевонь органонь сотрудникненди лездомс ули кода кажнайти. Кда приметаф саламань-коламань случай, пачфтеда 47-70-60 номерс коре.
 
19.08.2010 №32
19.08.2010  № 32
 

РОССИЯНЬ ПРЕЗИДЕНТСЬ Д.А.МЕДВЕДЕВ ПОЗДРАВЛЯНДАЗЕНЬ МИНЬ СПОРТСМЕНОНЬКОНЬ САТФКССНОН МАРХТА

Ётай недялять Россиянь Президентсь Д.А.Медведев васетькшнесь легкай атлетикаса Европань XX чемпионатонь чемпиоттнень и призерхнень мархта. Сон поздравляндазень легкоатлеттнень оцю сатфксснон мархта. Барселонаса  спортсметтне сатсть 24 медаль: кемонь золотань, кота сиянь и кафкса бронзовайхть. Казнетнень оцюшкаснон сатозь Мордовиянь спортсметтне.
 
Ольга Каниськинась сембе легкоатлеттнень лемста благодарностень валхт азсь Президентти ширень кирдеманкса.
Васедемста Каниськинась пачфтсь, што Мордовияса ушетф Олимпийскяй подготовкань центрать колмоце очереденц, 400 метранди вельхкс ала манежть, бассейнать строямасна.—Тя тейнек башка пяк эряви 2012 кизоня Лондонца Олимпиадада инголе,—мярьгсь спортсменкась.
Ольга Каниськина васедемань участникненди лятфтась и сянь колга, што 2012 кизоня Саранскяйса етафтови спортивнай якамаса Миронь кубкась. И нинге фкя пяк оцю мероприятия—мордовскяй народть Российскяй государствань нароттнень мархта ладязь эрямаснон 1000 кизонь топодемань праздновандамась. Тияк сон лямбе валхт азсь тренерхнень лемс.
Д.А.Медведев поладозе:
—Оля видеть азозе тренерхнень колга. Тя шарьхкотьф. Но аф фалу шарьхкотьф тянь коряс региононь руководительхнень позициясна. Мордовияса, мон лац содаса, кда кодама поручения максат республикань руководительти, сон фалу старандай тиемс лац-ряц, оцю качестваса.
И тянь эряви азомс аф аньцек спортть колга.
12.08.2010  № 31
 

УШЕДОВСЬ ТОЛТЬ ЭЗДА ЗИЯНЦ ПОВФНЕНДИ КУДОНЬ СТРОЯМАСЬ

Мордовияса вирень пожархнень сюнеда кудфтома лятфненди строяви 81 эряма васта. Лядыксне, а сембоц республикаса палсь 157 куд, азсть мяль сявомс ярмакса. Виде, педа-пес нинге лац-ряц аф содаф, мзяра куд сави строямс. Но, кода азозь МР-нь Строительствань и архитектурань министерстваса, строительхне тисазь сембе эрявиксть, штоба кенеремс строямс синь 1 ноябрти, тя пингть ладязь Россиянь Президентсь Д.Медведев и странань премьер-министрсь В.Путин.
 
Сянкса, штоба эреклафтомс строямань тевть, странань руководствась примась решения, што эряма васта зиянц повфненди кармай строяма единай поставщик. Тя корхтай сянь колга, што муниципальнай заказчикти ули кода тиемс подрядонь договорхт конкурсонь апак етафтт, кона таргави 45 шис.
Тяка пингть, пожархнень сюнеда зиянц кой-кона повфне азсть мяль строяфтомс од кутт аф сяка васттнень эса, а лия населеннай пунктова—Саранскяйса, Зубова Полянаса. Кепотьксонди, Свеженькая, Подлясова и Вад.Селищи велень кой-кона эряйхне пачфтезь, што мяльсноль етамс райцентрав—Зубово-Полянав. Строительхне арьсихть строямс теест од ульця. Ламотнень мяльсна лядомс сяка васттненди. Строяви куттне улихть ефси лият палфнень коряс. Эсост кармай улема сембось: свет, газ, лямбе и кельме ведь, канализация.
Мордовияса строямань тевсь кемокстаф 8 организация мельге. Ня компаниянь представительхне ульсть ни райоттнень эса, васетькшнесть велень Советонь оцюнятнень мархта. Тяни специалисттне анокласазь проектно-сметнай эрявикс документациять. 6 августста строительхне прважазь районга эрявикс техникать и решандазь кизефксть рабочайхненди работань пингонди эряма вастонь максомать коряс. Подлясоваса арьсекшневи панжемс палаточнай лагерь. Ваймама шитнень ускфт стройматериалхт, а 9 августста рабочайхне кярьмодсть од кудонь строяма.
 
12.08.2010 №31
12.08.2010  № 31
 

ПАЛЫХНЕНДИ МАКСФ ВАСЕНЦЕ ЛЕЗКССЬ—1,5 МИЛЛИОН ЦАЛКОВАЙСЬ

Нинге аф кунара ня васттне ульсть Мордовияса инь цебярьхне. Но стихиясь нардазь нардазе тя мазышить и кадсь мельганза седиень ацергофты картина. Сянгяря вирьхнень вастс лама километра кить кувалмова таргавсть равжа палф шуфтт, а велетнень вастс—кулуфт. Колма ломанень жертват, 150 палф куд—тяфтама тячиень пожаронь пелькс статистикась республикань Зубово-Полянскяй районца.
 
Мордовиянь Оцюнясь Н.И. Меркушкин и РФ-нь региональнай развитиянь министрть заместителец К.Ю.Королевский ваймама шитнень ульсть районца.
Тевсь тяса ащи пяк кальдявста. Ломаттне эвотьфт, но тяни валом валом сашендыхть эсезост. Н.И.Меркушкин азозе: ламось тяни ащи местнай властть эзда. Эряви куроконе анокламс сембе эрявикс документтнень. Августста палф куттнень вастс ушедома од стройка.
Районца тиф оперативнай штаб, конанди вятикс Государственнай Думань депутатсь В.Б.Кидяев. Эрь палф велеса работай комиссия: медикт, райсобессь, милициясь и районнай администрациянь представитель. Ломаттненди, кит юмафтозь сембе имуществаснон, пяк стака. Но лезкссь сай. Понедельникти палыхне получазь васенце 1,5 миллион цалковайть Мордовиянь Оцюнять резервнай фондстонза. Ломаттненди явондови пси ярхцамбяль и сухой паек.
Пуромомок Мордовиянь Оцюнять перьф, велеряйхне корхтайхть теенза: Мордовиясь колганк заботендай, пси ярхцамбяль анокласть, сухой паек усксихть. Синь валснон полаткшнесазь Вад. Селища велень эряйхне: Спасиба, што тейнек тняра техника панеде, спасиба што вертолеттне, самолеттне пожар матсть, сюкпря теенть. Меркушкин отвечась: Васендакиге спасиба странань руководствати.
Вад. Селищаса толонь даволсь етась ляйть туркс кожфка пяле километра вастс, кона явфнезе велеть вирть эзда и валгсь куттнень лангс. Тяфтама пелькс тяса ашесть няенде нльне кунардонь эряйхне. Но, кода фалу, трагедиять улихть аф аньцек жертванза, но и эсь героенза. Ся велеряйхне, конатнень кудсна ни палсть, эсь прянь аф ужяльдезь (тя видекс тяфта) матсть шабраснон кудснон эса. Толть мархта тюрсть нльне школьникне. Емлатне каннесть ведь мархта ведаркат, оцюфне—кие кода маштсь.
Н.И.Меркушкин люпштазе тястоконь школань выпускникть Сергей Левштановонь кяденц. Сон васенцекс няезе толть, кеподезе пильге лангс сембе велеть. Тядде Сергей поступай университетонь историческяй факультету.
Историясь аф юкстасы тя страшнай кизоть.
Тяни, 2 августста, аньцек Зубово-Полянскяй районца 8 оцю вирень пожар. Качамти ляпиякшнихть животнайхне, палы вирсь. И эрь тяфтама бедати ушетксокс арси—кинь-бди мархта ердаф папироса песь, крьвястьф сардонясь. Мезти нинге эряви лисемс, штоба кажнайсь эздонк, мекпяли, тянь шарьхкоделезе?
 
05.08.2010 №30
05.08.2010  № 30
 

МАРЯТАМА ИНКСОНТ ГОРДОСТЬ!

Испанияса ётафтови Европань чемпионатса Россиянь сборнайсь сатсь 5 медальхть и сембе синь—миннет.
Испаниянь Барселона ошса моли легкай атлетикать коряс Европань чемпионатсь. Васенце шиня пялькстсть 20 километрань дистанцияса ялга якамать коряс инь вии спортсметтне. Тя мезть синь етксост аньцек ашель тяниень миронь чемпионць Валерий Борчин, сяс мес сон получась травма. Но сембе мирти содаф тренероньке Виктор Чегин мусь теенза достойнай полафтыхть. Васендакиге надияматне ульсть сотфт од талантливай спортсменть Станислав Емельяновонь мархта. И тя аф стак.
 
29.07.2010 №29
29.07.2010  № 29
 

ГРАНТТ—ЕВРО- ПАРЛАМЕНТТЬ ЭЗДА

Мордовиянь Образованиянь министерствась получась Европарламентть эзда кафта грантт. Кажнайсь синь эздост тейнек максы фкя миллион 300 тежянь цалковаень. Министерствань сотрудникне анокласть кафта проектт, конат шнафтольхть.
Васенце проектсь—этнокультурнай направлениянь кизонь лагерсь, коса республикастонк и мокшэрзянь диаспораста шабатне кармайхть сяда крхкаста тонафнемост родной кяльть и сяда маласта знакомондайхть эсь народснон культуранц мархта. Лагерьса ваймамась питнефтома, родительхне пандсазь аньцек кить. Главнай условиясь—штоба шабась мяль вельде тонафнелезе эсь родной кяленц.
Омбоце проектсь—электроннай библиотекань тиемась, коза сувайхть учебникне и методическяй изданиятне мордовскяй (мокшень, эрзянь) кяльхнень тонафнемаснон коряс.
 
22.07.2010 №28
22.07.2010  № 28
 

ВАСЕНЦЕДА МОРДОВИЯСА!

12-15 июльста республикасонк етафтови легкай атлетикать коряс Россиянь чемпионатсь.
Минь тячи гордостень марязь азондсаськ, што Мордовияньке лемневи сембодонга спортивнай республикакс. И тя аф стак. Тянь можна кемокстамс лама примерса. Ваносте, мзяра мекольдень кизотнень Саранскяйса эвондась од спортивнай объектта! Сембе райоттнень эзгавок строяф (или строяви) физкультурно-оздоровительнай комплекст.
08.07.2010  № 26
 

ШИРЕЗОНК САЙ ТЁЖЯНЬ СПОРТСМЕН

Пресс-конференцияста

Понедельникста, 5 июльста, Саранскяйса Печатень кудса ульсь легкай атлетикать коряс Россиянь чемпионатти лемтьф пресс-конференция. Эсонза примасть участия Мордовия Республикань спортонь, физическяй культурань и туризмань министрсь В.Г.Киреев, сонь заместителец В.В.Цыбусова, Мордовия Республикань легкай атлетикань Федерациять президентоц, высшай спортивнай мастерствань республиканскяй  школать директороц М.Л.Храмов, тренерхт, спортсметт, официальнай лия ломатть.
08.07.2010  № 26
 

УДАЛАЗА КИНТЕ, МЕДАЛИСТТ!

Исяк, 23 июньцта, Саранскяйса Республикань кудса Мордовия Республикань Оцюнясь Н.И.Меркушкин васьфнесь республикань школань ся выпускникнень мархта, конат шумордазь тонафнемаснон золотань медальса.
Арась цебярь традициякс кизоста кизос получсемс тя казнеть республикань Оцюнять кядьста.
24.06.2010  № 24
 

 

 

Учредительхие:
Главнай редакторсь: И. С. Лушкин