Отрядть пуроптоманкса лама вийда путсь «Мокша» санаторийть генеральнай директороц А.Н.Грибанов и сонь заместителец П.Т.Танякина. Синь заботендасть сянь квалма, штоба тиемс парста ваймаманди сембе условиятнень, пяшкодезь безопасностень правилатнень сембе вешфкс­снон. Васендакиге оцю мяль шарфтфоль шабатнень ляйса эшелямста араламаснонды. Ведть малас иттне сашендыхть аньцек вожатайхнень мархта. Тяда башка, ляйть ваксса ули наблюдательнай пункт, маласонза латцефт венчт, спасательнай крукт.

Эрь шись идень отрядса етни пяк интереснайста. Воспитательхне, спортивнай инструкторхне фалу арьсекшнихть мезе-мезе одня. Етафнихть разнай мероприятият, аф фкя лацонь налхксемат, викторинат, пялькстомат, няфневихть театрализованнай представленият. Илять иттне весялготкшнихть дискотекаса. Эряви азомс, шабатнень мархта тяса работайхть тевонь содай, идень кельги ломатть, конат лац содасазь, мезсь тушенды синь мялезост, мезьса сяда пара занямс пингснон. Етксост вожатайхне О.С.Панасюк, О.А.Кожаева, Т.А.Солдатова. Спортивнай программатнень етафнесыне спортонь инструкторсь В.В.Галяткин. Иттнень шумбрашиснон петеманц колга заботендайхть медицинскяй работникне Л.В.Загороднова, Н.С.Киреева В.Е.Рудяева и лиятне. Кельгсазь иттне оздоровительнай отрядонь начальникть А.Е.Милешкинонь, кона арась теест пара ялгакс.

Пси шитневок аф арсихть перяфксокс иттнень парста ваймамаснонды. Отрядса ладяфт ведень душт, искусственнай пизепт, Мокша ляйть трваса тиф пляж. Иттне, конат ульсть лия курортса, корхтайхть, што тя отрядса ваймамась сяда пара Анапать коряска.

—Морамазень кельгине ет шачень. И тя етась тейне родительнень эзда. Алязевок, тядязевок пяк кельгозь морамаснон. Моразевольхть кафонест и най кулхцондолить. Семейнай ансамблькс можнатолеме лемдемс, сяс мес, касомок, миньге сазоронь-брадонь келеса полаткшнеме теест. Нинге нюрямняса улемстон тядязе шарьхкодезе—касы певица, стама, кле, вииель вайгяльце. А меле, мзярда аф ламода венемонь, кармань морсема ульцяса, ялга еткса. Лятфнеса, сувайхть ширезонк шабраньке или лия курнянь эряйхне, коса, кизефтихть, артистканте? А монь ни сяшкава пара мялезон, мес тяфта лемнесамазь. Афкукс прязень маряйне оцю сценаса ащикс. Школаса тонафнемста фалу примсень участия сембе концерттнень эса. И аф най велень школаса, сидеста выступандакшнень и районнай мероприятияса. Мяляфтса,  и тракторса, и машинаса сайхть инксон, аф весть Перхляйста Рузаевкав сашендовсь ялга якамс. А тя аф фкя вайгяльбе. И вдь ашемань эвфне тя, ускозь-усковонь сценати.

Тя фкя ширесь. И нинге монь творчествазти кинь няфтикс арасть родительне. Синь фалу кошярясть эсон виияфнемс, аф кадомс мадома асувонь толнязень. Нинге емла класса тонафнемста рамасть тейне фортепиано, а 9 классть шумордамда меле прважамазь тонафнема Саранскяень музыкальнай школа-интернату. Меле шумордань музыкальнай училища. И вов ни 33 кизода лама сценасан.

Ня шитнень Эстонияса, Таллинн ошса, лиссь мокшэрзянь содаф поэтессать Рая Орловать од книгац. Сонць авторсь, Россиянь Писателень союзонь членць и Мордовиянь Заслуженнай поэтессась, макссь «Кулемасть, Шкайават, моньге—авать» стихонь од сборниконцты пяк символическяй лем, кона, улема, шарфтсы эсь лангозонза эстонскяй лувить.

Авторсь тя книгати сувафтозень инь цебярь стихонзон, конатнень сон сермадозень, кирдемок ваймоса-мяльса мокшэрзянь фольклорть кунардонь пингонь образонзон. Минь надиятама, што эстонскяй содаф поэтти Арво Валтонти, кона етафтозень Рая Орловать произведениянзон эстонскяй кяльс, удалась ванфтомс синь лямбоснон и валда ваймоснон, штоба эстонскяй лувись няелезе и шарьхкоделезе мокшэрзянь афкуксонь поэзиять мазышинц.

Тяса нинге эряви азомс, што «Кулемасть, Шкайават, моньге—авать» стихонь сборниксь васенцекс лихтезе мокшэрзянь поэзиять омба масторонь финно-угорскяй миру. Конешна, мокшэрзянь поэттнень стихсна тяда инголивок лисендсть, мярьктяма, Финляндияса. Но башка книгаса мокшэрзянь поэтсась эсь творчестванц омба масторонь финно-угорскяй мирса няфнесы васенцетнень еткса! И минь надиятама, што тя поэтическяй кить лангс, конань панжезе Рая Орлова, шятяйхть мокшэрзянь лия поэттневок. И мокшэрзянь афкуксонь поэзиясь кайгозеви сембе финно-угорскяй мирть келес! 

 

Ня шитнень Мордовия Республикань Культурань министерствась республикань Государственнай камернай хорть мархта аноклай етафтомс Мордовияса Международнай хоровой музыкань фестиваль.

Кода корхтай камернай хорть директороц, Россиянь культурань Заслуженнай работниксь, мокшэрзянь содаф композиторсь и общественнай деятельсь В.Н.Башкиров, тя фестивальсь арай творческяй текшекс Россиянь музыкальнай искусстваса. И аф аньцек Россияннеса. Тя Международнай фестивальса эсь музыкальнай культураснон няфтьсазь Украинань, Молдавиянь, Финляндиянь, Венгриянь и лия странань содаф коллектифне.

Тяса нинге эряви азомс, Камернай хорсь, эсь искусстванц вельде, цебярьста содаф аф аньцек Россияса, но и омба масторса. Государственнай камернай хорсь эсь пингстонза арась Мордовиянь и Россиянь, омба масторонь музыкальнай фестивалень лауреатокс. И искусствань лия содаф коллектифне 2011 кизонь октябрьста кеняртьфтьсазь Саранск ошень зрительть эсь искусстваснон мархта. И аф аньцек сонь.

Международнай фестивальсь ули лемтьф мокшэрзянь народть 1000 кизонь иланцты! И сонь етафтомстонза афкукс няеви Россиянь нароттнень афкуксонь ялгаксшисна!

Выставкать етафтозь и пуроптозь Россиянь Армянонь союзсь, Россиянь армянонь Федеральнай национально-культурнай автономиясь, Мордовия Республикань Культурань министерствась, «Ташир» компаниянь группась, Мордовия Республикань Национальнай политикать коряс министерствась, С.Д.Эрьзянь лемса изобразительнай искусствань музейсь, Армения Республикань Диаспорань министерствась, Ереван ошень мэриясь, Мордовия Республикаса Армянонь союзть региональнай отделенияц, Армениять мархта ялгаксшить и сотрудничествать коряс Российскяй обществась, Армянскяй культурань развитиянь фондсь, Мордовия Республикань Художниконь союзсь.

Армянскяй народть ламоц представителензонды Мордовиясь арась омбоце родинакс. Армениять и Мордовиять еткса культурнай и экономическяй сотксне пяк кунардоннет.