Поиск по сайту: 
 

Архив
 сентябрь 
 2018 
пн вт ср чт пт сб вс
     12
3456789
10111213141516
17181920212223
24252627282930

 
 

 

Закон и порядок

МУВОРУВАТ—ОТВЕЧАК!


 

ЗАКОНЦЬ СЕМБОНДИ ФКЯ

Ня шитнень Мордовиянь МВД-са етафтовсь васедема республикань журналисттнень мархта. Эсонза МВД-нь старшай следовательсь Игорь Щебнев пачфтезе пуромфненди, што аф кунара Мордовиянь внутренняй тевонь сотрудникне кирдсть мошенник. Сон, (фамилияц апак аст) васькафтозе республикань фкя предпринимательть оцю сумма ярмаконц.
Тевсь ащесь тяфта. Предпринимательсь колазе законть и эводсь наказавомада. Тя пингть теенза маладсь мошенниксь, кона ярмак лангс надияфтсь лездомс лисемс тя прябаласта. Мошенникть валонзон коряс, республикань МВД-са сонь улихть «сонцень» ломаненза. И синь ярмак лангс селгсазь коммерсантть лангс панчф тевть.
Но МВД-нь оргаттне эсь пингстонза кундазь ломанень васькафнить. И лангозонза ушетф уголовнай тевсь кучф суду. Аферистсь, кона ерась пяцькамс МВД-нь сотрудникнень, получай Законц коре!
Сяс, кода мярьгсь брифингть аделамста И.Щебнев, ломаттненди, кинди малаткшнихть тяфтама аферистт, колгаст эряви пачфнемс правоохранительнай оргаттненди.
13.12.2012 №49

 

СОВЕЩАНИЯСЬ ЛЕМТЬФОЛЬ ПРАВОПОРЯДКАТЬ ВАНФТОМАНЦТЫ

3 декабрьста Мордовиянь Оцюнясь В.Д.Волков етафтсь республикаса правопорядкать ванфтоманц коряс координационнай совещания.
Эсонза ванфоль преступностть каршес тюремать ви­ияфтоманц, терроризмать, экстремизмать и эряфонь правилатнень коламаснон инголдамаснон коряс республиканскяй комплекснай программать эряфс етафтомац.
Совещаниянь участникне тяфта жа ванозь республиказонк наркотиконь пачфтемань китнень сяда товолдонь инголдамаснон коряс мератнень. Шинь повесткань фкя темакс арась нинге хозяйственнай субъекттнень рейдерскяй захваттнень лоткафтомаснон и инголдамаснон коряс дополнительнай мератне.
Ня кизефкснень коряс доклатт тисть республикань внутренняй тевонь министрть заместителец И.В.Понкратов, наркотиконь оборотть мельге контрольть коряс РФ-нь федеральнай службать управлениянц региональнай начальникоц А.И.Гришнев, республикань прокурорсь В.М.Мачинский. Совещаниять работаса примасть участия Мордовиянь Государственнай Собраниять Председателец В.В.Чибиркин, республикань Правительствать Председателец В.Ф.Сушков, Мордовия Республикать эзга главнай федеральнай инспекторсь А.М.Пыков, Мордовиянь Оцюнять администрациянц руководителец Н.С.Крутов, Саранскяень администрациянь оцюнясь П.Н.Тултаев, силовой структурань и профильнай министерствань руководительхть.
06.12.2012 №48

 

АФ НОЛДАМС ЭКСТРЕМИЗМАТЬ И КСЕНОФОБИЯТЬ

25 октябрьста «Мордовия» спорткомплексса Мордовия Республикава РФ-нь Юстициянь министерствась етафтсь  «Роль религиозных организаций в профилактике экстремизма и терроризма» темать коряс «круглай шра». Пуромксса примасть участия государственнай властень оргаттнень, правоохранительнай оргаттнень представительсна, религиознай и общественнай объединениятне. «Круглай шрань» участникне корхтасть инь оржа кизефкснень колга, конат васьфневихть обществасонк.
Кизефкснень эзда фкясь, конань колга корхтасть пуромфне, тя «исламскяй терроризмань» прябалась. Тянь квалма «круглай шрать» участниконзон мяльсна-арьсемасна ульсть фкат. Синь пачфтезь, што ся ломанць, кона сявсь кядезонза оружия, аш кода сувафтомс тя или тона религияти.
—Межнациональнай конфликттнень эвондамаса васенце туфталсь—обществаса уликс духовнай ширдень норматнень мяльс аф сявомасна, разнай верань представительхнень аф фкя лацонь вероисповеданиянь аф шарьхкодемасна,—мярьгсь культурань, культурнай и духовнай наследиять ванфтоманц и благотворительностть виияфтомаса-касфтомаса Общественнай палатань комиссиять председателец Александр Пелин.
Экстремистскяй тевть инголдамаса, сонь аф нолдамасонза оцю рольсна властень оргаттнень и СМИ-тнень. Тяконь лувксса, Интернетть вельде пачфневи информациясь эвондафни од ломаттнень еткса этническяй, расовай и религиознай аф шарьхкодемат. Тянь коряс оцю работа мольфти Мордовия Республикать эзга МВД-сь.
Целайнек, республикасонк межэтническяй кизефкснень коряс аш шамордомат. Но сембе сяка, кода азозь мероприятиянь участникне, эряви сембось тиемс сянкса, штоба аф нолдамс экстремизмать сяда тов.
Л.РЕЗОВА.
 
01.11.2012 №43

 

МОРДОВИЯ РЕСПУБЛИКАТЬ ЭЗГА МВД-ть РУКОВОДСТВАЦ ВАСЬФНЕСЬ ВЕДОМСТВАНЬ ВЕТЕРАТТНЕНЬ МАРХТА

Эряфкшу ломанень месячникть рамкаса, кона эрь кизоня етафневи октябрь ковста, Мордовия Республикать эзга Внутренняй тевонь министерствать руководствац васетькшнесь ведомствань ветераттнень мархта.
Мероприятияс тертьфоль 25 ломань, кинь сембе эряфоц сотфоль внутренняй тевонь оргаттнень эса служамать мархта. Васедемась етась седи ваксстонь ялгаксшиса, праздниконь шра ваксса. Министерствань творческяй коллективсь ветераттненди казсь патриотическяй морот, конат морсевсть синь одкс пингстост. Сембе тертьфненди максфтольхть мяляфтови казнет и панчфт. Кой-кие отмечаф «МВД по Республике Мордовия» знакса, а сят, кинь октябрьста шачема шиц, получасть казненди бытовой техника.
Министрть заместителец—МР-ть эзга МВД-нь полициять начальникоц, полициянь полковниксь Игорь Панкратов, мярьгсь, кле, тяфтама мероприятиятне етай поколениять опытонц и сятнень еткса соткс, кие тяни ванфтсы законть и порядкать. А тевонь поладомась минь работасонк—инь важнайсь.
 
25.10.2012 №42

 

МВД-са ТИСТЬ ИТОКТ «УРОЖАЙ» ОПЕРАЦИЯТИ


 

ЗИЯНТЬ СЯДА ТЁЖДЯ ИНГОЛДАМАЦ

Уштомань од сезонць ушедсь, и пяк важна аф максомс ки пожархненди. Тянкса, шарьхкотьф, эрявихть ванфтомс безопасностень правилатне. Пожаронь эвондамати туфталкс арсихть и соттне, конат пуромкшнихть вытяжной каналхнень потмоса. Сяс инженерно-техническяй персоналти и печникненди-трубань аруяфтыхненди содамат и ванфтомат пожархненди кинь перямать коряс эрявикс правилатне.
Шуфтонь и курокста крьвязи зданиятнень эса эждемань приборхне-месне улест ширеса стенать эзда. Качамонь «шокши» и вентиляционнай каналхне стане жа улест плотнайхть, штоба пачкаст афольхть ета качамсь и цяткне. Трубатнень уша ширдень стенатнень и дымовой и вентиляционнай каналхнень еткса улеза аф 0,5 кирпиць. Трубатне, конат лихтьфт ся вастова, коза теждяста может «кярьмодемс» толсь, ашкодомат металлическяй сеткаса, коза катфт аф 5 миллиметрада оцю варят.
11.10.2012 №40

 

ЗАКОНТЬ ВЕШФКСОНЗОН МЯЛЬС СЯВОЗЬ


 

ПУТСТЬ КЯДЬГЕ ШТРАФОНДИ ЯРМАКОНЬ КОЧКАМС

Украинаса пенсионерхненди маршруткась арась аф пеетькшнемань тевкс.
Лисемок льготнай автобусста, эряфкшу авась пувордазе пильгонц. Мельганза моли алясь азозе прянц юристокс и мярьгсь пенсионеркати, што автобуснай паркть кядьста ули кода вешемс цебярь компенсация. Сембоц 30 гривнанкса (120 цалковайть малава) азсь мяль сермадомс заявления, и ся макссь согласия. Но пенсионеркась ашезь арьсе, што пеняцяманц инкса водительть сявсазь праванзон, а льготнай маршруткать, кодамда ошса аньцек кафта, арестовандасазь.
Бабанясь, конань инкса пенсионерхне тяни несколькань част учендсазь питнефтома фкя сяка маршруткать, сявозе эсь заявлениянц. Праватнень водительти мрдафтозь, но автобуссь лядсь ГАИ-ть штраф-площадказонза, а пандомс стоянканц инкса паркть ашельхть ярмаконза. Кяжияфтф пенсионерхне састь марстонь мяльс катф автобусти путомс кядьге, маршруткать инкса штрафонди ярмаконь кочкамс.
Ся шиня, мзярда кочкаф трешникнень пенсионерхне макссазь ГАИ-в, арьсекшнихть тердемс журналистт. Нинге пенсионерхне ерайхть вешемс ся юристть, конань инкса сембось ушедсь и максомс лангозонза судс.
04.10.2012 №39

 

ГРАЖДАНСКЯЙ ОБОРОНАТИ—80 КИЗА

4 октябрьста отмечави странань Гражданскяй оборонать—государственнай системать, кона тиф населениять араламанц инкса, пуроптомань шиц. Тя шиня 80 кизода инголе СССР-нь Совнаркомсь примазе СССР-ть противовоздушнай оборонанц квалма Положениять, конань эса азфтольхть населениять и кожфста противникть врьгятнеманзон эзда странань территориятнень араламаса пуромксне и средстватне. Великай Отечественнай войнань кизотнень управлениянь оргаттне, тя системать виенза и средстванза тиезь семботь, штоба араламс населениять и народнай хозяйствань объекттнень гитлеровецнень кожфста врьгятнемаснон эзда. Тяда башка, МПВО-сь примсесь участия толонь оборонительнай сооружениятнень, противотанковай и противопехотнай перяфкснень тиемаса, шоссейнай китнень и трамвайнай путьтнень ремонтса и лия тевса. Войнать пингста МПВО-ть вельде удалась кяшемс сембоц 25,5 миллион ломань, тянь мархта ванфтовсь ламоц советскяй граждаттнень эряфсна. Оцю работа етафтсь МПВО-ть личнай составоц территориятнень минатнень эзда ароптомаснон, апак сясть бомбатнень, артиллерийскяй снаряттнень, взрывоопаснай лия предметтнень аф пельксокс тиемасост.
«Кельме войнать» пингста, конань вихца эцезь 40-це кизотнень песта Западонь военнай стратекне, государстваньконь ширде эрявсь тиемс семботь, штоба фалу улемс анококс араламс пря империализмать пелькс тевонзон эзда. Возможнай ядернай войнать пингста населениять и территориятнень араламаснон коряс оцю аськолкс тифоль 1961 кизоня, мзярда МПВО-ть видеса тифоль общегосударственнай од система—СССР-ть гражданскяй оборонац.
Странаса эрявсь ломань, конанди улель кода арамс оцюнякс од системати—Гражданскяй оборонати. Тяфтамкс кочкафоль сухопутнай войскатнень главнокомандующайсна Советскяй Союзонь Маршалсь Василий Иванович Чуйков.
Тяфтама система тифоль и Мордовияса. Республикаса Гражданскяй оборонань васенце начальникокс арась Правительствать Председателец Иван Павлович Астайкин. Мордовиянь ГО-нь Штабонь васенце начальникокс путфоль Иван Данилович Валуев, кона лама тись гражданскяй оборонань системать виияфтоманкса.
Тяконь мархта ряцок гражданскяй оборонась ламода аф стамоль тястонь противовоздушнай оборонать лаца. Васендакиге ГО-нь мероприятиятне тифтольхть общегосударственнайкс. Васенце вастти путфоль ся, кода цебярьста работафтомс экономикать военнай пингста.
Но ся, што гражданскяй оборонась водендафоль аньцек войнань пингста работати, тиендезе сонь фкя ширденнекс. Чернобыльскяй АЭС-са авариясь, Арменияса землетрясениясь (1988 к.) няфтезь, што сон аф анок араламс населениять и территориятнень оцю ЧС-нень пингста. Эряфсь вешсь од, тяниень пингонь система, кона лездоль авариятнень и катастрофатнень пингста.
И вов 1990 кизоня пуроптфоль государственнай комитетонь праваса спасателень Российскяй корпус. А 1992 кизоня ЧС-са (РСЧС-са) эвондась инголдамань и действиянь Российскяй система. Кой-кодама полафткста меле спасателень корпуссь 1994 кизоня арась РФ-нь Гражданскяй оборонань, чрезвычайнай ситуациятнень и стихийнай бедствиятнень последствияснон машфтомаснон коряс министерствакс.
Россиянь МЧС-ть вельде гражданскяй оборонась арась тяниень пингоннекс и тянивок кочкси вийхть Россиять государственнай устройстванц, экономическяй и социальнай ширетнень мяльса кирдезь.
Гражданскяй оборонась тяниень пингть—тя Российскяй Федерациять территорияса населениять, материальнай и культурнай питнишитнень араламасна ся пельксть эзда, кона эвондакшни военнай действиятнень пингста или сяда меле, а стане жа природнай и техногеннай ситуациятнень эзда.
Странань гражданскяй оборонань системати оцю путкс­сна гражданскяй оборонань ветераттнень. Синь лездыхть касфтомс шабатнень патриотокс. Поздравляндасаськ сембонь гражданскяй оборонати 80 кизонь топодемать мархта. Шумбраши, паваз и сатфкст.
Л.КУРГАНОВА,
«УМЦ по ГО и ЧС» Мордовия Республикань ГКОУ ДПО-сь,
информациянь и пропагандань отделениянь начальник.
27.09.2012 №38

 

 
 
 

 
НОВОСТИ
 
 
 
 

Александр Воробьев посетил новый завод по производству мороженого в Кочкуровском районе

Александр Воробьев посетил новый завод по производству мороженого в Кочкуровском районе
В рамках региональной недели депутат Государственной Думы РФ, член комитета ГД по аграрным вопросам Александр Воробьев побывал с рабочим визитом в Кочкуровском районе.
Он встретился с руководителем агрофирмы «Норов» Александром Поздняковым. «Норов» является крупным сельскохозяйственным предприятием Республики Мордовия. Это многопрофильное предприятие занимается животноводством и растениеводством, переработкой и строительством. В начале августа здесь запустили новую линию по производству мороженого.
Как отметил Александр Поздняков, было выпущено пять пробных партий мороженого. Их уже можно найти в продаже в местных магазинах. Сейчас идет выпуск фирменной этикетки, и буквально через несколько дней новое мороженое появится в магазинах Саранска и республики.
Александр Воробьев осмотрел оборудование и пообщался с сотрудниками завода. По словам заместителя директора завода по глубокой переработке Вячеслава Гузнаева, здесь будет налажено производство пяти наименований продукта: мороженое в вафельном стаканчике, маленький и большой рожки, эскимо, пломбир. Ассортимент будет постоянно расширяться.
«Новый завод – новые перспективы», - говорят молодые специалисты. Зарплата здесь составляет от 30 тысяч рублей, поэтому рабочие приезжают сюда из соседних сел и мордовской столицы.
В этот же день Александр Воробьев посетил социальный центр в селе Семилей. Он пообщался с местными жителями. В разговоре была затронута тема изменений в пенсионной системе. Депутат отметил, что Президент России Владимир Путин в своем обращении сказал, что с 1 января 2019 года предлагается начать выплаты 25% надбавки к фиксированной выплате страховой пенсии для неработающих пенсионеров, живущих на селе, со стажем не менее 30 лет в сельском хозяйстве. Эта инициатива была внесена комитетом Госдумы РФ по аграрным вопросам, и была одобрена Президентом.
31.08.2018
 
 

МАРСТОНЬ САТФКСНЕ КЕНЯРТЬФТИХТЬ

Ковылкинскяй муниципальнай районцта
24 августста Мордовия Республикань Государственнай Собраниять Председателец В.В.Чибиркин рабочай визит мархта ульсь Ковылкинскяй муниципальнай районца. Тяса сон ванозень социальнай, культурнай и  спортивнай  од  объекттнень, конаса пяк козя районць.
Васенда В.В.Чибиркин Ковылкинскяй муниципальнай райононь оцюнять В.И.Ташкинонь мархта ванозь Кочелаево велеса физкультурно-оздоровительнай комплексть. Эсонза спортивнай и тренажернай оцю залда, тенниснай кортта башка, тяфта жа ули тя пингонь бассейна, конаса аф аньцек уендема, но и сай пингонь рекордонь путома тонафнихть велень 200 шаба. Синдедост башка, кода бассейнаса, стане и спортивнай залса недяляти колмоксть кемокснесазь эсь шумбрашиснон Российскяй армиянь военнослужащайхне и правоохранительнай органонь сотрудникне.
30.08.2018  № 34
 

Шумордавсь «Шумбрат, школа!» акциясь

29 августста Саранскяйса Мокшэрзянь национальнай театраса ётась «Шумбрат, школа!» акциять финалоц. Пингстонза школьнай принадлежностень комплектт получасть Саранск ошень лафчста обеспечендаф семьятнень эзда васенце классу моли сяда стирня и цераня.
«Шумбрат, школа!» акциясь кемонь кизот моли «Единая Россия» Всероссийскяй политическяй партиять Мордовскяй региональнай отделениянц, Партиять социальнай платформанц, Мордовия Республикань Государственнай Собраниять депутатскяй корпусонц и  Саранск ошень округонь депутатонь Советть, Мордовия Республикань Населениять заняфшинц, социальнай араламань, трудонь министерствать, «Милосердиянь и шумбрашинь российскяй фонд» Общероссийскяй благотворительнай общественнай фондть Мордовскяй республиканскяй отделениянц, Мордовия Республикань Профсоюснень Федерацияснон, а стане жа индивидуальнай предпринимательхнень, предприятиятнень и общественнай организациятнень патронажснон ала.
Акциять етафтыенза кочксихть школьнай принадлежностть лафчста обеспечендаф и лама идень семьятнень эзда васенце классу моли шабатненди. Акциясь уленди республикань сембе райоттнень эса.
Национальнай театрав  пуромфнень Содамошинь малаткшни шить мархта поздравляндазень «Единая Россия» Всероссийскяй политическяй партиять Мордовскяй региональнай отделениять Секретарец, Мордовия Республикань Государственнай Собраниять Председателец В.В.Чибиркин.
—Несколька шида меле республикань школатне панчсазь эсь кенкшснон шабатненди. Мордовияса лама тиендеви образованиять виияфтоманц инкса. Панчсевихть од школат, арьсеви строямс школат нинге. Школатнень эса сембось тиф тяниень пингонь вешфкснень  коряс, иттненди макссевихть питнефтома учебникт,—мярьгсь Владимир Васильевич.
Тя шиня васенце классу молихнень поздравляндазь Мордовия Республикань Профсоюснень Федерацияснон председателец С.В.Борисов, «Новотроицкий» Агрохолдинг» ООО-ть директороц, «Единая Россия» Партиять Мордовскяй региональнай отделениянц Региональнай политическяй советонц членоц В.В.Руженков, лиятне.
Эрь идсь получась канцелярскяй принадлежностень набор, лия казнет.
Меколи ульсь «Эдельвейс» шоу-группать концертоц.
Т.Альшина.
30.08.2018
 

ШКОЛАСА ТОНАФНИХНЕНЬ КАЗЕЗЬ ПУТЁВКАСА «АРТЕКУ»

МР-нь Госсобранияса ульсь «Единая Россия» партиять и партиять патриотическяй платформанц «Здоровое будущее» федеральнай проектонц рамкаса «Вода и здоровье» Всероссийскяй акциять региональнай этапонц сяськиензон каземасна.
МР-нь Госсобраниять Председателенц заместителец Иван Москаев шарфтсь мяль сянди, што «Вода и здоровье» акциясь сявсь ушеткс 2018 кизонь январьста. Сонь итогонзон коряс—активнай участиянь примаманкса и тиф оцю работанкса—Мордовиясь тага арась примеркс Россиянь лия региоттненди. Акциять мяльса кирдезь республикаса ётась 3 тёжянть малава экологическяй урок школатнень эса и МР-нь Гигиенань и эпидемиологиянь центрать видеса. Школаса тонафнихне аруяфнезь эшинятнень и кочксезь кархчнень лихтибрятнень перьф, тиендсть исследованият ведти. Акциянь участникокс арасть Мордовиянь 387 образовательнай учреждения и 53 тёжяньда лама школаса тонафни. Акциянь «лидеркс» азфоль 2 тёжяньда лама стирня и цёраня.
И вов МР-нь Госсобранияса казезь цебярьдонга цебярьхнень. 15 «лидерсь»—Мордовияста школаса тонафнихне—казьфтольхть «Артек» идень Международнай центрав путевкаса. А кирдемок мяльса Мордовиять акцияса активнайста участиянь примаманц, сонь федеральнай штабоц макссь дополнительна 5 путевкат «Артеку». Тя недялять 13 регионцта 20 школьник молихть идень Международнай центрав 10-це сменати.
МР-нь Госсобранияса чествовандазь аф аньцек школаса тонафнихнень, но и наставникнень. «Единая Россия» партиять региональнай отделениянц Секретаренц, МР-нь Госсобраниять Председателенц Владимир Чибиркинонь Благодарностензон мархта «Вода и здоровье» Всероссийскяй акциять ётафтомаса лезксонкса казьфтольхть «Сделаем вместе!» Всероссийскяй движениять МР-са региональнай штабть членоц, штабть секретарец, Саранск ошень округонь администрациять Социальнай политикать коряс департаментть директоронц заместителец Ольга Ручина, «Сделаем вместе!» Всероссийскяй движениять МР-са региональнай штабонц членоц, РФ-нь Госдумань депутатть Василий Пискаревонь помощникоц Ольга Суродеева, министерстватнень и ведомстватнень представительсна.
30.08.2018
 

Ванфтольхть пенсионнай системать цебярьгофтоманц мархта сотф кизефксне

Ванфтольхть пенсионнай системать цебярьгофтоманц мархта сотф кизефксне
21 августста Саранскяйса «Единая Россия» Всероссийскяй политическяй партиять Мордовскяй региональнай отделениянц секретарец, Партиять Генеральнай Советонц членоц В.В.Чибиркин ётафтсь пресс-конференция. Владимир Васильевич макссь комментарийхть «Единая Россия» партиять Генеральнай Советонц и фракциянзон руководительснон Советснон марстонь заседанияснонды, конань пингста корхтамась мольфтевсь пенсионнай системать цебярьгофтоманц колга.
В.В.Чибиркинонь валонзон коряс, пенсионнай системать цебярьгофтоманц мархта сотф кизефкссь пяк эрявикс, сон таколфтсыне сембе ломаттнень. Инь оцю задачакс ащи пенсиятнень касфтомасна. Ся системась, кона ули тяни, веши лац-ряц арьсеф корректировка. Инь оцю стакась-сталмось сянь эса, што эрь кизоня пенсионерхнень лувкссна касы миллион пяле мархта ломаньда, а работайхнень лувкссна кири. Эрь кизоня Пенсионнай фонду федеральнай бюджетста поступай колма триллионда лама цалковай. Ня средстватнень улель кода нолдамс ламоц отраслятнень и структуратнень виияфтомаснонды.
Мордовияса келиста ванфоль пенсионнай системась и сонь цебярьгофтоманц мархта сотф ширетне. Тя тевса примасть участия общественностть представителенза, депутаттне, эксперттне. Поступасть предложеният, сембе синь пуроптфт марс.
Вяре азф заседанияса примафоль решения, конань эса азфоль мяль Российскяй Федерациянь Государственнай Думань депутаттнень и Федерациянь Советонь члеттнень пенсионнай сембе преференцияснонды отменань тиемать, а стане жа алятненди 60 кизонь и аватненди 55 кизонь топодемста эрь ковонь ярмаконь пандоматнень, ЖКХ-нь услугатнень инкса пандоматнень коряс компенсациять, медикаментонь рамамста компенсациять и ширень кирдемань лия мератнень ванфтомаснон коряс.
«Единая Россия» партиясь ащи сянкса, што коррупционерхнень и взяткань сявихнень кядьста сявф сембе ярмакне кучевольхть видеста Пенсионнай фонду.
Пресс-конференцияса ванфтольхть и лия кизефкст.
Т.АЛЬШИНА.
22.08.2018
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин