Поиск по сайту:

Архив

Обратная связь (Газета - Читатель)

ЖУВАТАНЬ КИРДЕМАСЬ—ТЕВСЬ АФ ТЁЖДЯ

Кода содаф, велень трудсь фалу ульсь аф почетса. Лятфтасаськ оцязоронь пингть, советскяйть, мзярда велеряйти паспортка ашезь макссев, «сотнефоль» сон вели куломозонза. Сюдоф перестройкаське ашезь макса велеряйти цебярь эряф и оцю прават, машфтозе марстонь производствать велеса. Стака тевсь—жуватань кирдемась. «Скотник» профессиясь тячи од ломаттненди арась аеркс тевкс, «кяскав ярмактонга» синь эздост кивок аф моли постуфокс. Сяс велеса эрь кизоня пяк вишкста кирихть жувататнень лувкссна и од ломаттне ворьгодихть ошу—цивилизацияти, кржа кие ляды вели. И тяфта тевсь ащи марнек Россияса. Виде, республикасонк велень тефне лиятнень коряс молихть сяда лац. Спасиба республикань Оцюняти Н.И.Меркушкинонди, кона лац содасы велень эряфть, сяс и шарфни оцю мяль велеть лангс. Сонь пингстонза велезонк тифоль асфальтонь ки, нолдасть автобус, кармасть соксевома-витцевома паксяньке. Кудсонк ули газ, нолдафт телефотт, работай цифровой телевидениясь. Цебярь киге сидеста кизоньберьф лездома сашендыхть тядяснонды-аляснонды идьсна, велень ульцяванк, кода ошса, столба прява палыхть оцю лампочкат. Ламоцнень идьсна тядяснонды-аляснонды шувфнихть эшихть, етафтсть ведь кудозост. Мяльце—киртть пирьфсот жуватат-месть. Мийть государствати договорс коре, а государствась нинге тяда башка максы тейть дотацият и субсидият. Ломаттненди макссеви эсь тевонь панжемс 58 тежянь цалковай, аньцек тят нолгада. Мзярда тяфта ульсь?!

19.08.2010 №32

СЮКОНЯН ПЧКАФТЫНЕНДИ

Пара, мзярда шумбрат-тазат. Эста ули вийце трудендамс. А ваймама пингста сяват кядезот газета и пара мяльса эсь кяльсот-валсот лувсайть мекольдень кулятнень, пеетькснень и пеетькс пакшкятнень. А сярядезь машнят эсь лангозт.

Аф кунара оцю зиян лиссь и монь мархтон. Повонь республиканскяй больницянь вейхксоце отделенияв. Ниле частт тюрсть врачне эряфозень инкса, тисть стака операция. И тяни тейне тага пееди шинясь, якан эсь пильгонень лангса, вийс коре работан. Сяс пчкафтынень колга карман мяляфтома фалу. Кельгома газетазень вельде мялезе лятфтамс синь лемснон. Нят: отделениянь вятись К.Ю.Ермин, врачне Н.А.Анисимов, А.Ф.Пиянзин, О.Х.Байчорова, медсестратне Н.Е.Чибиркина, Т.П.Сульдина, И.В.Баранова, Л.А.Марданова, В.И.Наумкина, В.А.Исланкина, Е.В.Начаркина и ламотне лиятне. Спасибан теенть и карксэземга сюконян!

И.ПОВЕЛЯЙКИН,

Атюрьевскяй райононь

Од Кярьга

велень эряй.

12.08.2010 №31

ПЯЛЬКСТСТЬ СЕМЬЯТНЕ

Атюрьевскяй райононь кота инь цебярь семьятне примасть участия «Мама, папа, я—спортивная семья» праздникса, конань етафтозе Атюрьевскяй райононь администрациясь. Семьятнень седи ваксста поздравляндазень райононь оцюнять заместителец А.А.Сюняева.

—Пара, што ашеде ляда шири тя пуромксть эзда,—мярьгсь Алла Алексеевна.

Лама цебярь вал азсь семьятнень лемс администрациять видеса од ломанень комитетть вятиец А.С.Кашаев. Сонць Алексей Семенович касфтсь колма итть. Сембе арасть цебярь ломанькс.

Спортивнай пялькстомаса оцю сатфкст няфтсть Вешкиттнень, Гераськиттнень, Вергасофнень и лиятнень семьясна.

Сембе семьятнень райононь администрациясь казезень Почетнай грамотаса.

И.ПЕТРОВ.

Снимкаса: Семьятне, конат примасть

участия спортивнай праздникса.

05.08.2010 №30

ШАЧЕМА УЖЕНЯЗЕ, АРАЛАВАТ, ШТА, ЮМАМАДА-АРАМАДА?!

Эрь ломанть ули сон-цень шачема-касома уженяц. Кда тяконь колга кизефтелемазь монь, эстокиге отвечалень: «Мон Кяшалоннян, шачема-касома велезень кельгса седи ваксста, пефтома». И мезенкса сонь тяшкава кельгса? Да сембонкса! Вдь мон тяса шачень, тиине васенце тумонятнень, тонафнень. Кяшалста аськолдань оцю эряфонь кити. Тяса эряйхть тядязе, алязе, бабазе, радня и содаф ломанне. А нинге кельгса велезень природанц мазышинц, арудонга ару кожфканц, сетьме илядензон и раса ведьса пиндолды-вандолды шобдаванзон.

Веленьконь сонцень коенза, культурац. Праздниконь шиня или свадьбаста аватне наряжакшнихть мокшень нарядса. Престольнай праздникстонк, Покравста, сембе весялготкшнихть. Шра лангс тя шиня васендакиге путнесазь позать и суронь пачатнень. Якайхть фкя-фкянь пяли инжикс.

А нинге Кяшалсь содаф эсь писателенц А.С.Малькинонь мархта. Сон тяса шачсь, эрясь, сермадозень произведениянзон, конатнень эса лямбоста азондови родной уженянц колга.

Цебярьхть велень ломаттне. Синь лямбе седихть, паронь арьсихть. Эряйхть фкя-фкянь мархта ладязь, лезнезь...

Фкясь аньцек коль сяда и сяда пяк колсесы мялезень: шачема-касома веленязе «сярятькстсь» стака урмаса, конань пчкафтомац аф теждя. Тя педи урмась фатязе марнек Россиять.

Несколька кизода инголе эсь сельминголен полафтсь велезе: арась аф содавиксокс, мярьгат, прокс родфтома-плямафтома ломань, конань аш ширенц кирдиец, ужяльдиец. Бта вишке давал етась ланганза, кадомок эсь мельганза шава кутт, веляфнеф шуфтт. Катф юрхттнень перьф касыхть аньцек сор тишет: палакст, марошт да кумбарафт.

Кафкса кизода инголе Кяшал велеса ульсь «Кишалинский» совхоз, кона сувсесь Атюрьевскяй райононь инь вии хозяйстватнень еткс, каннесь аф кальдяв прибыль. Эста велень эряйхне ашесть ризносе покодема вастонкса. Совхозса работа ульсь сембонди: кие дояркань тевса заняфоль, кие—механизаторонь, ламотне озсесть тракторонь, машинань рульхнень ваксс, кизонда, паксянь тефнень пингста, сявондезь кядезост комбайнань штурвалть. Велеть келес шобдаваста илядьс марявсь кодама повсь техникань увф. Тяни сетьмось.

Срадсь-каладсь совхозсь, а тяста и лия прябалатне: аш коса трямс пря, добувамс ярмаконя. Мес тяфта лиссь?

Ламоль инголи Кяшалса эряйда. Эрь семьяса лувондовсь вете-кота ломань. Пингонь етазь населениять лувксоц кармась кирема. Кда варжакстомс кунардонь документтненди, няйсаськ, 1953 кизоня Кяшалса шачсь 91 шаба: 36 стирня и 55 цераня. А тяни фкя идть шачемацка оцю праздник. Тихтяма тяфтама сравнения. 2000 кизоня тяса лувондовсь 764 ломань, а тяни лядсь 560. Кепотьксонди, тядде шачсь 5 итть, а кулось 12 ломань.

Мзярда сань васенце классу, школасонк лувондовсь 200 малава тонафни, тяни лядсь 44 стирня и цераня. Оттне срадондыхть кие-коза, ворьготькшнихть ошу. А вдь велеса улихть эряманди сембе условиятне: етафтф газ, китне ацафт асфальтса. Райцентрав якай автобус. Виде, кда инголи сон якась шити кафксть, то тяни аньцек недяляти колмоксть.

Марьсевсть корхнемат, бта, Кяшалонь средняй школась маластонь пингть арьсеви сёлгомс, а иттнень усксемс тонафнема шабрань вели. Палозь палы тянкса велеряйхнень седисна. Кда селгсазь, кле, сонь, велесь юмамада ни аф аралави.

Тяфтама веледа Россияса пефтома. А мезе ули сяда тов, кда шамихть велетне, кит кармайхть серонь и жуватань касфнема? Коса ванфтови и виияфтови ару мокшень кяленьке?

Виде, кизонда, сядонга пяк Святой Тройцянь шиста, веленьке эреклакшни. Эста эсь шачема уженязост сашендыхть шири туф ломаттне. Васьфнихть радняснон, содафснон мархта, етафнесазь фкя-фкянди пси лажадомаснон. Велесь пяшкотькшни идень весяла вайгяльда, седиень токай мокшень морода. И тя пингть седисон крьвязькшни надиямань цятконя. Аф, аф юмай сон, седиень петема уженязе. Эреклай, кочкай вийхть и одукс мрдафтсы ингольдень эрекшинц.

О.ЕВДОКИМОВА.

29.07.2010 №29

ЭРЯФОНЦ ЛЕМДЕЗЕ РАЙОНТИ

Шумордавсь газетас и журналс серматфтомась тяддеть омбоце пяленцты. Атерень кинь строяма управленияса работайхне серматфтсть лама экземпляр «Сельские вести» районнай, «Известия Мордовии» республиканскяй газетат. Ашезь юкста эсь кяльсонк лисенди «Мокшень правда» газетать. Васенцекс серматфтсь ДРСУ-нь начальниксь А.Ф.Шумкин, лездсь серматфтомс лиятнендивок. Васенце июльста сявомок почтальоттне «Мокшень правда» кармайхть каннема О.И.Чудаевати, И.К.Паркинати, В.М.Сургаевонди, О.П.Шумкинати, П.П.Надинати и лиятненди.

Кефкие киза Атерень ДРСУ-ть вятьсы А.Ф.Шумкин. Пуроптсь цебярь коллектив. Тяса аш васта нолатненди, дисциплинань колсихненди. Сембе трудендайхть совестьс коре. Александр Федоровичень пингста строяф лама цебярь ки, петьфт уликсне. Лац кирдевихть сеттне, тялонда урятцевихть китне. Мзяра лия цебярь тевда тиендеви кинь строяма управленияса. И эрь тевть эшксса А.Ф.Шумкинонь трудоц.

22.07.2010 №28

АПАК ЮКСТАК ЖУРНАЛИСТОНЬ ВАЛОЦ

Великай Победать 65 кизонцты

Великай Отечественнай войнать ушедомда меле народоньконь политическяй активностец пяк кассь. Эряфське пяшкодсь лама аф фкя лацонь событияса. Семботь тянь эрявсь пяк курокста няфтемс-азондомс народти. Сяс мес сон учсь кулят фронтста. А тяфта жа учсь кулят странаньконь эряфонц колга.
Печатсь, кодак ушедсь войнась, эзк занязе эсь вастонц идеологическяй фронтса. Сон арась ся пингонь летописекс. Печатсь эсь валонц вельде пуроптсь марс миллиотт ломань. Тердсь и кошардсь эсост Родинать аралама. Аф стак нинге 1942 кизоть ушетксста армияса ушедсь лисендема 13 фронтовой, 93 армейскяй, 70 морской и сядот дивизионнай газета.

08.07.2010 №26

ЗАНЯФ КЕЛЬГОМА ТЕВСА

Мокшавать А.И.Аникинать сембе эряфоц сотф мишендемань тевть мархта. Лама киза покоди сон «Стрельниковское» ограниченнай ответственностень обществать Кяшалонь магазинца.

—Анна Ивановнань работанц квалма азан аньцек шнама валхт,—корхтай предприятиянь директорсь Ф.Д. Ивашкин.—Тейнек сидеста сашендови улендемс ярмаркаса-коса. И сембонь эса уленди Аникинась. И тя аф стак. Кучсесаськ ся ломанть, кона мушенды марстонь кяль рамайхнень мархта.

24.06.2010 №24

«МОКШЕНЬ ПРАВДАТЬ» КЕЛЬГИНЕ И КЕЛЬГСА»,—

мярьгсь Рузаевка ошень 3 номер музыкальнай школань преподавательсь Галина Васильевна Сараева.

—Эсь кяльсонк-валсонк лисенди газетать—«Мокшень правдать»—лувондса пара ялгакс и мяльне-арьсемане колганза пяк цебярьхть. Апрякамс журналисттнень, конат аноклакшнесазь газетать, койсон, аш мезенкса. Тядянь кяльса-валса лисенди изданиять страницанзон эса макссеви материалхне серматкшневихть лямбоста, оцю маштомошиса. Морафтсак тя или тона статьять и шарьхкодьсак, што синь етафневихть тяштихнень седиснон-ваймоснон пачк. Газетать цебярец сянь эса, мес нолявихть-аноклавихть целевой полосат. Материалхнень тяфта полосас-полосас латцемасна аньцек шнама. Кда, мярьктяма, мяльце лувомс семьять, од ломаттнень колга, варжакстт газетать кучкань лопанянзонды, коста мусак тейть сембе эрявиксть. Ся, мезе ульсь республикасонк недяляста, морафтсасть газетать официальнай отделстонза.

17.06.2010 №23

ШАЧЕМ ШИРЕЗЕ, ШАЧЕМ КРАЕЗЕ!

Краезе!

Кельгома Руссь и

Мордвась!

Пачкодеть тячити

тон ёфксонь лаца.

С.Есенин.

Мокшэрзянь народсь шинь стяма ширдень Европань ломаньтналса инь кунардоннетнень эзда фкясь, конань историяц тушенды ичкози. Мокшэрзятнень юрсна крхкат, синь етасть историческяй оцю ки, лама мезе няйсть, кирдсть, но ванфтозь эсь кяльснон, пуроптсть козя материальнай и духовнай культура. Тя козяшись ашезь юма, сон касы-виияй тянивок. Ульсть маласост кунардонь лия пляматка (муромтне, буртасне, мещерань ломаттне), конатненди ашезь ванфтов прясна, аф сембонди ни содафт лемсновок. Валом валом пингсь нардазень пильгокиснонга. Мокшетне ашесть юма лия пляматнень еткса, ванфтозь пряснон.

Эрь ломанть улихть раднянза, мала ломаненза. Улихть раднясна нароттненьге. Лемдьсаськ тянь этническяй, историческяй малаксшикс, а сяда келиста варжакстозь—сувсетяма уральскяй народонь семьяти. Кялень ширде тя оцю кярьмазсь явондови финнонь, угрань и самодийскяй тарадга-пяльксова.

10.06.2010 №22

Мокшетне—«Мокшень правдать» колга

КЕЛЬГСАСЬК, ЛУВОНДСАСЬК, СЁРМАТФНЕСАСЬК

Б.М.ПЕТЯЙКИН,
Мордовия Республикань велень хозяйствань Заслуженнай работник.
—Велень хозяйствати мон максонь ведьгемоньда лама киза. Трудендань Курташкань хозяйстваса, сембе эряфозе сотфоль техникать мархта. Ульсть и стака, и теждя кизот. Но мезе ба афоль уле, паксяньке апак видек ашесть лядонда. И фалу ульсь мархтонк «Мокшень правда» газетась, кона азонкшнесь аф теждя трудоньконь, пара ломаненьконь, хозяйстваньконь колга. А монць сембодонга пяк кельгсайне пеетькшнемань-сингорямань уженятнень. Мяляфтса, канды кивок бригадав газета и ушеттама рахсема пеетьксонь морафтомста. А кие-бди механизатороньконь эзда мярьги: «А вдь тя историясь Курташкань».
Васенце кизось пенсиясан. Но «Мокшень правдать» мархта аф яван. Кельгса сонь и оцю мяльса серматфнеса. Тяштьфтьса и тяддеть омбоце пяленцты.

06.06.2010 №21

НОВОСТИ

МИНЬ ЗЕМЛЯКОНЬКЕ АЛЕКСЕЙ АЦАПКИН—ОЛИМПИЙСКЯЙ ЧЕМПИОН

17 августста кизонь I-це Юношескяй олимпийскяй налхкоматнень эса Сингапурса вольнай стильса ведьса уендихнень еткса 4х100 метрас эстафетаса сяськсь Россиянь командась: Андрей Ушаков, Илья Лемаев, Антон Лобанов и минь Мордовиянь спортсменоньке Алексей Ацапкин. Россияттне етазь китайскяй сборнайть 0,55 секундада. Уемаса пялькстыхне—австралиецне—лиссть нилеце вастти, пачфни олимпийскяй турниронь сайтсь.

19.08.2010 № 32

Мольфтеви «2010 кизонь урожайсь» оперативно-профилактическяй операциясь

МВД-нь СОТРУДНИКНЕ ВАНЫХТЬ СЁРОНЬ УРЯДАМАТЬ МЕЛЬГЕ

Мордовияса 270 предприятиясь заняф велень хозяйствань культурань касфнемаса. Марстонь площадсь 1659 тежянь гектар.

Сянкса, штоба ванфтомс тяддень и мелянь урожайть, 2010 кизонь 15 июльста сявомок республикасонк мольфтеви «Урожай-2010» оперативно-профилактическяй операциянь омбоце этапсь, мезть пингста республикань внутренняй тевонь органонь сотрудникнень мархта муфоль 41 административнай правонарушения, 483 преступления.

Мордовия Республикава Внутренняй тевонь министерствась оцю работа мольфти сянь коряс, штоба перямс кить велень хозяйствань продукциянь, жуватань-мезень саламати, ваныхть сянь мельге, штоба назначенияс коре нолявольхть засухать сюнеда эвондаф зияттнень машфтомс государствать мархта макссеви бюджетнай средстватне, мольфтихть контроль серонь, тишень, ГСМ-нь, удобрениянь, техникань-мезень ванфтома васттнень мельге.

Внутренняй тевонь органонь сотрудникненди лездомс ули кода кажнайти. Кда приметаф саламань-коламань случай, пачфтеда 47-70-60 номерс коре.

19.08.2010 №32

19.08.2010 № 32

РОССИЯНЬ ПРЕЗИДЕНТСЬ Д.А.МЕДВЕДЕВ ПОЗДРАВЛЯНДАЗЕНЬ МИНЬ СПОРТСМЕНОНЬКОНЬ САТФКССНОН МАРХТА

Ётай недялять Россиянь Президентсь Д.А.Медведев васетькшнесь легкай атлетикаса Европань XX чемпионатонь чемпиоттнень и призерхнень мархта. Сон поздравляндазень легкоатлеттнень оцю сатфксснон мархта. Барселонаса спортсметтне сатсть 24 медаль: кемонь золотань, кота сиянь и кафкса бронзовайхть. Казнетнень оцюшкаснон сатозь Мордовиянь спортсметтне.

Ольга Каниськинась сембе легкоатлеттнень лемста благодарностень валхт азсь Президентти ширень кирдеманкса.

Васедемста Каниськинась пачфтсь, што Мордовияса ушетф Олимпийскяй подготовкань центрать колмоце очереденц, 400 метранди вельхкс ала манежть, бассейнать строямасна.—Тя тейнек башка пяк эряви 2012 кизоня Лондонца Олимпиадада инголе,—мярьгсь спортсменкась.

Ольга Каниськина васедемань участникненди лятфтась и сянь колга, што 2012 кизоня Саранскяйса етафтови спортивнай якамаса Миронь кубкась. И нинге фкя пяк оцю мероприятия—мордовскяй народть Российскяй государствань нароттнень мархта ладязь эрямаснон 1000 кизонь топодемань праздновандамась. Тияк сон лямбе валхт азсь тренерхнень лемс.

Д.А.Медведев поладозе:

—Оля видеть азозе тренерхнень колга. Тя шарьхкотьф. Но аф фалу шарьхкотьф тянь коряс региононь руководительхнень позициясна. Мордовияса, мон лац содаса, кда кодама поручения максат республикань руководительти, сон фалу старандай тиемс лац-ряц, оцю качестваса.

И тянь эряви азомс аф аньцек спортть колга.

12.08.2010 № 31

УШЕДОВСЬ ТОЛТЬ ЭЗДА ЗИЯНЦ ПОВФНЕНДИ КУДОНЬ СТРОЯМАСЬ

Мордовияса вирень пожархнень сюнеда кудфтома лятфненди строяви 81 эряма васта. Лядыксне, а сембоц республикаса палсь 157 куд, азсть мяль сявомс ярмакса. Виде, педа-пес нинге лац-ряц аф содаф, мзяра куд сави строямс. Но, кода азозь МР-нь Строительствань и архитектурань министерстваса, строительхне тисазь сембе эрявиксть, штоба кенеремс строямс синь 1 ноябрти, тя пингть ладязь Россиянь Президентсь Д.Медведев и странань премьер-министрсь В.Путин.

Сянкса, штоба эреклафтомс строямань тевть, странань руководствась примась решения, што эряма васта зиянц повфненди кармай строяма единай поставщик. Тя корхтай сянь колга, што муниципальнай заказчикти ули кода тиемс подрядонь договорхт конкурсонь апак етафтт, кона таргави 45 шис.

Тяка пингть, пожархнень сюнеда зиянц кой-кона повфне азсть мяль строяфтомс од кутт аф сяка васттнень эса, а лия населеннай пунктова—Саранскяйса, Зубова Полянаса. Кепотьксонди, Свеженькая, Подлясова и Вад.Селищи велень кой-кона эряйхне пачфтезь, што мяльсноль етамс райцентрав—Зубово-Полянав. Строительхне арьсихть строямс теест од ульця. Ламотнень мяльсна лядомс сяка васттненди. Строяви куттне улихть ефси лият палфнень коряс. Эсост кармай улема сембось: свет, газ, лямбе и кельме ведь, канализация.

Мордовияса строямань тевсь кемокстаф 8 организация мельге. Ня компаниянь представительхне ульсть ни райоттнень эса, васетькшнесть велень Советонь оцюнятнень мархта. Тяни специалисттне анокласазь проектно-сметнай эрявикс документациять. 6 августста строительхне прважазь районга эрявикс техникать и решандазь кизефксть рабочайхненди работань пингонди эряма вастонь максомать коряс. Подлясоваса арьсекшневи панжемс палаточнай лагерь. Ваймама шитнень ускфт стройматериалхт, а 9 августста рабочайхне кярьмодсть од кудонь строяма.

12.08.2010 №31

12.08.2010 № 31

ПАЛЫХНЕНДИ МАКСФ ВАСЕНЦЕ ЛЕЗКССЬ—1,5 МИЛЛИОН ЦАЛКОВАЙСЬ

Нинге аф кунара ня васттне ульсть Мордовияса инь цебярьхне. Но стихиясь нардазь нардазе тя мазышить и кадсь мельганза седиень ацергофты картина. Сянгяря вирьхнень вастс лама километра кить кувалмова таргавсть равжа палф шуфтт, а велетнень вастс—кулуфт. Колма ломанень жертват, 150 палф куд—тяфтама тячиень пожаронь пелькс статистикась республикань Зубово-Полянскяй районца.

Мордовиянь Оцюнясь Н.И. Меркушкин и РФ-нь региональнай развитиянь министрть заместителец К.Ю.Королевский ваймама шитнень ульсть районца.

Тевсь тяса ащи пяк кальдявста. Ломаттне эвотьфт, но тяни валом валом сашендыхть эсезост. Н.И.Меркушкин азозе: ламось тяни ащи местнай властть эзда. Эряви куроконе анокламс сембе эрявикс документтнень. Августста палф куттнень вастс ушедома од стройка.

Районца тиф оперативнай штаб, конанди вятикс Государственнай Думань депутатсь В.Б.Кидяев. Эрь палф велеса работай комиссия: медикт, райсобессь, милициясь и районнай администрациянь представитель. Ломаттненди, кит юмафтозь сембе имуществаснон, пяк стака. Но лезкссь сай. Понедельникти палыхне получазь васенце 1,5 миллион цалковайть Мордовиянь Оцюнять резервнай фондстонза. Ломаттненди явондови пси ярхцамбяль и сухой паек.

Пуромомок Мордовиянь Оцюнять перьф, велеряйхне корхтайхть теенза: Мордовиясь колганк заботендай, пси ярхцамбяль анокласть, сухой паек усксихть. Синь валснон полаткшнесазь Вад. Селища велень эряйхне: Спасиба, што тейнек тняра техника панеде, спасиба што вертолеттне, самолеттне пожар матсть, сюкпря теенть. Меркушкин отвечась: Васендакиге спасиба странань руководствати.

Вад. Селищаса толонь даволсь етась ляйть туркс кожфка пяле километра вастс, кона явфнезе велеть вирть эзда и валгсь куттнень лангс. Тяфтама пелькс тяса ашесть няенде нльне кунардонь эряйхне. Но, кода фалу, трагедиять улихть аф аньцек жертванза, но и эсь героенза. Ся велеряйхне, конатнень кудсна ни палсть, эсь прянь аф ужяльдезь (тя видекс тяфта) матсть шабраснон кудснон эса. Толть мархта тюрсть нльне школьникне. Емлатне каннесть ведь мархта ведаркат, оцюфне—кие кода маштсь.

Н.И.Меркушкин люпштазе тястоконь школань выпускникть Сергей Левштановонь кяденц. Сон васенцекс няезе толть, кеподезе пильге лангс сембе велеть. Тядде Сергей поступай университетонь историческяй факультету.

Историясь аф юкстасы тя страшнай кизоть.

Тяни, 2 августста, аньцек Зубово-Полянскяй районца 8 оцю вирень пожар. Качамти ляпиякшнихть животнайхне, палы вирсь. И эрь тяфтама бедати ушетксокс арси—кинь-бди мархта ердаф папироса песь, крьвястьф сардонясь. Мезти нинге эряви лисемс, штоба кажнайсь эздонк, мекпяли, тянь шарьхкоделезе?

05.08.2010 №30

05.08.2010 № 30

МАРЯТАМА ИНКСОНТ ГОРДОСТЬ!

Испанияса ётафтови Европань чемпионатса Россиянь сборнайсь сатсь 5 медальхть и сембе синь—миннет.

Испаниянь Барселона ошса моли легкай атлетикать коряс Европань чемпионатсь. Васенце шиня пялькстсть 20 километрань дистанцияса ялга якамать коряс инь вии спортсметтне. Тя мезть синь етксост аньцек ашель тяниень миронь чемпионць Валерий Борчин, сяс мес сон получась травма. Но сембе мирти содаф тренероньке Виктор Чегин мусь теенза достойнай полафтыхть. Васендакиге надияматне ульсть сотфт од талантливай спортсменть Станислав Емельяновонь мархта. И тя аф стак.

29.07.2010 №29

29.07.2010 № 29

ГРАНТТ—ЕВРО- ПАРЛАМЕНТТЬ ЭЗДА

Мордовиянь Образованиянь министерствась получась Европарламентть эзда кафта грантт. Кажнайсь синь эздост тейнек максы фкя миллион 300 тежянь цалковаень. Министерствань сотрудникне анокласть кафта проектт, конат шнафтольхть.

Васенце проектсь—этнокультурнай направлениянь кизонь лагерсь, коса республикастонк и мокшэрзянь диаспораста шабатне кармайхть сяда крхкаста тонафнемост родной кяльть и сяда маласта знакомондайхть эсь народснон культуранц мархта. Лагерьса ваймамась питнефтома, родительхне пандсазь аньцек кить. Главнай условиясь—штоба шабась мяль вельде тонафнелезе эсь родной кяленц.

Омбоце проектсь—электроннай библиотекань тиемась, коза сувайхть учебникне и методическяй изданиятне мордовскяй (мокшень, эрзянь) кяльхнень тонафнемаснон коряс.

22.07.2010 №28

22.07.2010 № 28

ВАСЕНЦЕДА МОРДОВИЯСА!

12-15 июльста республикасонк етафтови легкай атлетикать коряс Россиянь чемпионатсь.
Минь тячи гордостень марязь азондсаськ, што Мордовияньке лемневи сембодонга спортивнай республикакс. И тя аф стак. Тянь можна кемокстамс лама примерса. Ваносте, мзяра мекольдень кизотнень Саранскяйса эвондась од спортивнай объектта! Сембе райоттнень эзгавок строяф (или строяви) физкультурно-оздоровительнай комплекст.

08.07.2010 № 26

ШИРЕЗОНК САЙ ТЁЖЯНЬ СПОРТСМЕН

Пресс-конференцияста

Понедельникста, 5 июльста, Саранскяйса Печатень кудса ульсь легкай атлетикать коряс Россиянь чемпионатти лемтьф пресс-конференция. Эсонза примасть участия Мордовия Республикань спортонь, физическяй культурань и туризмань министрсь В.Г.Киреев, сонь заместителец В.В.Цыбусова, Мордовия Республикань легкай атлетикань Федерациять президентоц, высшай спортивнай мастерствань республиканскяй школать директороц М.Л.Храмов, тренерхт, спортсметт, официальнай лия ломатть.

08.07.2010 № 26

УДАЛАЗА КИНТЕ, МЕДАЛИСТТ!

Исяк, 23 июньцта, Саранскяйса Республикань кудса Мордовия Республикань Оцюнясь Н.И.Меркушкин васьфнесь республикань школань ся выпускникнень мархта, конат шумордазь тонафнемаснон золотань медальса.
Арась цебярь традициякс кизоста кизос получсемс тя казнеть республикань Оцюнять кядьста.

24.06.2010 № 24

Учредительхие:

Мордовия Республикань Государственнай Собраниясь и Правительствась;

Главнай редакторсь: И. С. Лушкин

Сайт разработан в студии web-дизайна
Филиал в Республике Мордовия ОАО "ВолгаТелеком".