Мордовия Республикань Государственнай Собраниять постановлениянц коряс, комсь ветиеце сессиять шинь повестказонза сувафтфтольхть кота кизефкст. Васенцесь лемтьфоль 2010 кизонди и 2010-2012 кизотнень плановай периодснонды Мордовия Республикань республиканскяй бюджетть колга Мордовия Республикань Законти полафтксонь сувафтомати. Тянь квалма пуромфнень инголе корхтась Мордовия Республикань финансонь министрть васенце заместителец С.С.Кандеев. Шарьхкотьф, башка мяль шарфтсь ся ломаттненди лезксонь максомать лангс, конатненди оцюдонга оцю зиян тисть вирень пожархне. Азфоль, материальнай конашка лезкс максови кажнайти эздост. Васендакиге, эрь ломанти—10 тежятть цалковай, имуществань юмафтыхненди—200 тежянь цалковай. Сятненди, кинь семьяста вирень пожархнень сюнеда кулость или шавовсть ломатть—миллион цалковаень эрь кулофть инкса. Бюджетса улихть средстват, конатнень вельде строявихть эряма од вастт сятненди, кит лядсть кудфтома вирень пожархнень сюнеда. Республиканскяй бюджетть расходнай пяльксоц федеральнай бюджетста нолдаф ярмакнень и местнай поступлениятнень вельде кассь пцтай 288 миллион цалковайда. Ня ярмакне, кирдемок мяльса погорелецнень, пяк курокста поступасть казначействазонк.

Сембоц сессияса арьсефоль ваномс кота кизефкст, но уликс чрезвычайнай ситуациять инкса пцтай пялесна катфтольхть лия пингонди.

Мордовия Республикань Оцюнять Н.И.Меркушкинонь выступленияц лемтьфоль вирень пожархненди, синь инголдамаснонды, матомаснонды, эряма вастфтома лятф ломаттненди лезксонь максомати, семботь тянь мархта сотф лия ширетненди. Тяда башка, Николай Иванович крхкаста лоткась сянь лангс, кинди ули кода получамс вяре аф весть лятфнеф лезксть, государствать эзда компенсациять:

—Лезкссь максови сятненди, мзярда государствась, аф ваномок семботь лангс, ашезь лездов ломаттненди, ашесть аралав синь кудсна. Тосоль МЧС-сь, лия вийхне. Но толсь пяк вишкста етнесь вастста вастс, крьвязькшнесть велет и сембось палондсь. А кда, мярьктяма, ломанць банянц ваксса водендась тол, а маласа тишесь коськоль и крьвязсь, а меле толсь тусь сяда тов и плхтазе кудть—тя ситуациясь ефси лия.

Н.И.Меркушкинонь валонзон коряс, вирьса пожархне пяк и пяк сидеста, пцтай фалу эвондакшнихть ломаттнень инкса. Тянь лангс нинге сядонга оцю мяль шарфтома райоттнень эса:

—Пожарда меле сембось равжа: шуфттне, китне, модась и марнек велесь, конань эзда мезевок ашезь ляда. Тяфтама пингста температурась пачкотькшни 1500 градусс.

Маластонь пингть строительхне ушедыхть вирень пожархнень сюнеда эряма вастфтома лятф ломаттненди кудонь строяма. Эряви тя тевть шумордамс тяддень 1 ноябрти.

Ся райоттненди, коса азорондай толсь, кучема лездома ломатть.

 

 

Арьсефоль тиемс ушеткс. Государственнай Собраниять фкя сессиясонза кой-кона предприятиянь руководительхне макссть согласия ковти весть ширесост етафнемс эсь лацонь «панжада кенкшень ши». Лиякс азомс, пингстонза республикань общественнай организациянь представительхненди, да и целайнек общественности, ули кода кочкавомс группас и азф шиня молемс тя или тона предприятияв. Тоса лац-ряц няфтеви и азондови, кода тиеви тя или тона ярхцамбяльсь.

Тя акциясь арьсефоль сянкса, штоба населениясь содалезе, мезьда сон ярхцай и мезенкса панни питне магазиттнень и рынкатнень эса. Кепотьксонди, прилавкать лангса сояста тиф колбаса—тянь аш месть сепондомс. Кда эвондай мяль сявомс, рамайсь содасы, што сон—соянь, сяс ламода сяда уцез сиволеннеть коряс.

Ламоц вастова мишендевихть салу калхт и калонь пресерват. Кода синь салыяфневихть, керсевихть, марсевихть кядьгонява—кивок аф содасы. Но содамс и няемс анокламань тя процессть эряволь. Улихть надиямат, што ламоц емла предприятиятне синць азыхть мяль етафнемс ширесост «панжада кенкшень шит».

Васенце аськолкссь тифоль. Етай недялять общественнай организациянь представительхне тернефтольхть «Талина» предприятияв.

Вяре азф акциясь арьсеф сянкса, штоба ванфтомс ломаттнень шумбрашиснон, кона пяк кемоста сотф ноляви ярхцамбяльхнень мархта.

Республикасонк ульсь РФ-нь Государственнай Думань депутатсь В.С.Романов. 21 майста сон етафтсь пресс-конференция массовай информациянь средствань представительхнень мархта.

Валентин Степанович азондсь странать социально-экономическяй положениянц колга. Корхтась экономическяй кризисть и мархтонза сотф стакатнень-сталмотнень квалма. Главнайсь, кле, штоба тя аф теждя пингть ломаттне афольхть ляда работафтома, получальхть цебярь зарплата. Сяда тов лоткафоль демографическяй кизефксть лангс. Кода азозе В.С.Романов, сон тяни ащи инголенк аф стама оржаста, но кой-кодама прябалат тянь ширде нинге улихть.

Башка лятфнефоль образованиять колга. Таколдома, кле, эвондафни ся, мес лама вастова селгондовихть школатне. Шарфтфоль мяль «Об изменении статуса государственных и муниципальных учреждений» федеральнай законть лангс. Меле В.С.Романов и МР-нь Государственнай Собраниянь депутаттне Л.А.Башмаков и А.Г.Артемова отвечасть журналист­тнень кизефксснон лангс.