Мордовиянь Оцюнясь Н.И. Меркушкин примась участия перинатальнай центратнень строямаснон коряс совещанияса. Российскяй региононь руководительхнень мархта видеоконференциянь режимса совещаниять етафтозе Россиянь Правительствать Председателец В.В.Путин.

Перинатальный центрать строямац Мордовияса эряви аделамс 2010 кизоть пенцты. Тяниень пингонь медицинскяй технологиятнень вельде аралави тядятнень и синь одс шачи идьснон эряфсна и шумбрашисна, нльне кда стака патология мархтот.

Тячи ни мордовскяй медикне тонадсть одс шачихнень эряфснон аралама, конатнень сталмосна шачемстост ульсь 500 граммаста сявомок 1 килограммати молемс. Республикаса одс шачихнень еткса кулыень лувкссь—фкя инь емлась странаса. Од перинатальнай центрась нинге сядонга касфтсыне региональнай медицинать возможностензон. Оцю технологичнай оборудованияса кармайхть работама врачне, конат аноклавихть Москувонь инь цебярь медицинскяй центратнень эса.

Пси шитне Мордовияса вятсть пожархненди-месненди. Республикань Зубово-Полянскяй районца палсь ни несколька веле. Стаки эвондакшнихть пожархт населеннай лия пункттнень эса, пцтай фалу туфталкс арси фкясь—толть мархта аф осторожнайкс улемась.

24 июльста Краснослободск ошень эряйсь тусь лоткть малас, кона аф ичкозель ошть эзда. Алять мялецоль лядемс тише. Эрявикс вастти пачкодсь ВАЗ-1102  сонцень машинасонза. Кадозе автомобильть аф ичкози и ушедозе тевонц. Етась ефси кржа пингта, мзярда няезе: машинанц ваксса крьвязсь коське тишесь. Эстокиге пачфтсь пожарнай службав. Толть матозь, но автомобильсь палсь. Эксперттнень валснон коряс, пожарсь эвондась машинать вельф пси коллекторонц инкса, кона токась коське тишети—тяфтама псиста тя сатомшка, штоба крьвязель тол.

Шить 27 июльста Краснослободскяй райононь Преображенский поселкаса палсть тостонь эряйть кудоц и пирьфоц. Пожарнайхть и милиция тердсть шабратне. Эрь службась эстокиге кярьмодсь тевозонза—толонь матомати и азорть вешеманцты. Ульсь-аш кивок кудса крьвяземста, апак содаколь. Пожарнайхненди удалась матомс толть и аф максомс теенза етамс шабрань куттненди. Милиционерхне ся пингть вешезь азорть, кона, павазонди, ульсь содафонзон ширеса. Тяни дознавательхне мяль шарфтсть кафта версиятнень лангс. Васенцеть коряс, пожарти туфталкс арасть вальмять лангс катф сельмованоматне. Шить сюролданза валдоптсть лангозост и тя вятсь толть эвондаманцты. Омбоце туфталсь—кудть маласа ердафоль сигаретань песь. Тяни мольфтеви работа пожаронь лисемати афкуксонь туфталть вешеманц коряс.

Шить 29 июльста Сивинь велеть маласа крьвязсь деревообрабатывающай цехсь—тяфтама сообщения поступась 14 частста 40 минутаста Краснослободскяй муниципальнай районть ОВД-нь ПДН-ть отделениянц инспекторонц эзда. Толсь плхтась вете строеният, фкясь эздост—административнай здания.

Содафоль, што толсь лиссь шинь стяма ширде, шуфтонь перяфксть маласта.

Ся вастса муфтольхть клянцень пакшт, конат пяк шарфтсть шобда тюсонь сюлекань пяльксонь лангс. Тяда башка, ульсть ЛЭП проводонь пакшт. Семботь тянь коряс етафтови пожарно-техническяй исследования.

Штоба афольхть лисе зиятт ваймоси од ломаттнень мархта, кафта частс эвакуация тифоль «Орленок» пионерскяй лагерьса. Сонь и пожарть еткса 250 метрашкаль.

Милициянь сотрудникне нинге и нинге весть кошярясазь сембонь ванфтомс пожарнай безопасностень правилатнень и мератнень. Аф мярьгондеви крьвяснемс толмархт вирьхнень, населеннай пункт­тнень маласа, аф еряма сигаретань пет. Тяддень псиста эрь цятксь вяти оцю зиянц. Россияса пожархнень инкса кулыхнень лувкссна аф фкя кемотть ни.

...Саранск ошень ульцятне, площаттне и проспекттне тя шиня няевсть сядонга арукс, сядонга наряднайкс, синь вайсесть разнай тюснень потмос. Перьфпяльге кайгсь музыка, сембе вастова кулевсть весяла вайгяльхть, шутендамат... Но, кода фалу, сембода мазыель ошть главнай площадец—Советскяйсь. Сон пиндолдсь-вандолдсь. Тяса праздниксь ушедсь ошень марстонь зарядкать эзда. Тяда меле етафтовсь «Оттнень творчествасна» искусствань фестивальсь. Од художникне рисавасть ошть эса, од вокалисттне казендсть морот Саранскяйти.

Художниконь фестивальда меле ломаттнень мяльснон салазь моронь народнай ансамбльхне. Келиста няфтьфтольхть народнай промыслатне, национальнай щапне. Ошэряйхне и инжихне пара мяльса ванондозь рузонь, мокшэрзянь, татаронь, армянонь и лия народонь культуратненди лемтьф стенттнень.

Пара койс коре Советскяй площадьге етасть од мирдень-рьвянь паратне.

Торговлянь работникне мишендсть танцти ярхцамбяльхть и симомбяльхть.

Ламоль ломаньда и пяк весялаль праздниконь шиня и А.С.Пушкинонь лемса паркса. Тяса стане жа етафтфоль лама культурно-развлекательнай мероприятия.

Шоуть песта ульсь праздничнай фейерверк. А тяда инголе площади пуромфнень инголе корхтась Мордовия Республикань Оцюнясь Н.И. Меркушкин. Сон седи ваксста поздравляндазень синь Россиянь шить и Саранск ошть шачема шинц мархта, арьсесь сембонди кеме шумбраши, паваз, сатфкст сембе тевса, а кельгома Саранскяйти—панчфокс панжема!

2 июньцта кармась содавома Мордовиянь налоговай службать од начальниконц лемоц. Россиянь ФНС-ть Приказонц коряс, Республиканскяй Управленияти руководителькс кемокстаф Мария Григорьевна Лушенкова, кона тяда инголе работась Саранск ошень Ленинскяй районть эзга налоговай службань инспекциянь начальникокс.