Поиск по сайту: 
 
Наши мокшанские сыновья и дочери
Свежий номер
Тема дня
Национальная тематика
Культура
Обратная связь (Газета - Читатель)
В Госсобрании РМ
В Правительстве РМ
События
Демография
Здоровье
Мокшане о мокшанах
Как жили и живут мокшане
Ветеранам о ветеранах
Молодежный клуб
Наша усадьба
Наука и жизнь
Спорт
Национальный проект
Образование
Доступное жилье
Благотворительность
Поговорим о создании единого литературного мордовского языка

Архив
 сентябрь 
 2010 
пн вт ср чт пт сб вс
  12345
6789101112
13141516171819
20212223242526
27282930   

 
 

 
Демография

ОЖУДА, ТИНЦЬКЕ СИРЕТТЯДА...

Эряфкшу ломаттнень эзда сидеста кулендевихть пеняцямат идьснон лангс. Кле, шачфнеськ-касфнеськ синь, ашеськ ужяля сускомняньконь, мекольце цалковаеньконь макссеськ, а синь аф сайхть варжамонк. Учихть-учихть атятне-бабатне идьснон самаснон, а меле синць гайфтихть теест. А трубкаса кулихть: «Монь тяни аш пингозе. Сембось лац. Кода шумбрашице?» И... сембе. Сянь, што тядясь пичеди—юкстазь. А меле тядясь лятфнесы, кода етай тялоть васта лангс прафнезе оцю температурась и стирец сашендсь мельганза якама, вакссонза ащесь пчкамозонза. Лямбоськоды тядять седисонза—«Кельгсамань иднязе...»
Ламоц эряфкшуфне апрякайхть идьснон, мес эсь пингстост виень апак ужяльтть касфтозь, путозь пильге лангс, а тяни шабатнень аш кодамовок благодарностьсна шачфтыснонды. Тяфтама пеняцяматне аньцек аерфтсазь иттнень эздост, кяжияфтсазь.
Кулень история фкя од авать эзда. Азондсь, што лиссь семьясонза зиян: васенда сонць урмаськодсь, меле—емла цераняц. Авась «сязендевсь» работама вастонц, кудть и больницять еткса. Шарьхкотьф, тядянцты инжикс молемс пингоц ашель. Мзярда ковда меле мольсь пялонза, тядяц шумбракстома вастс «керозе» казяма валса, панезе кудстонза.
Но ламос кяжиякшнема авась ашезь карма—тядяц вдь.
Ужяль, но ламотне аф сявсазь примеронди Кавказть. Тоса сиретнень аф юкснесазь, аф кадондсазь. Тянкса марнек плямати визькс арай. А миньцонк пачкодсть нльне сянди, што телевизорса эняльдихть гайфтемс тядятненди-алятненди. Шарьхкотьф, од ломаттнень эряфсна бта вишке ляй—лаказь-лакай: улихть синцень прябаласна, а пинге аш. Сяс эрявихть шарьхкодемс оттневок.
А вов мала ломанентенди гайфтеда тяникиге.
 
В.КУДАШКИН,
Трудонь ветеран.
Рузаевскяй районць. 
19.08.2010 №32

 

СЕМЬЯНЬ ШИТЬ ВАСЬФТЕЗЬ СЕМЬЯНЬ КЕЛЕСА

Аф кунара странасонк пяк келиста отмечазь семьянь шить. Аф кржа цебярь семьяда и Атерьса. Кепотьксонди, Коммунистическяй ульцяса эряй-ащи Сяткиттнень семьясна. Петр Ильич и Екатерина Васильевна шачфтсть и касфтсть колма итть: цера и кафта стирьхть. Сембе илатнень пингста синь пуромкшнихть тядянь-алянь лямбе «пизонязост».
Вов и семьянь шитьке васьфтезь-етафтозь марса. Сяткиттнень кудса марьтивок ашель коза прамс. Сафтольхть идьсна, сембе рьвянясна, овсна, уноксна. Екатерина Васильевна пидесь пачат, пярякат, каванязень идензон мокшень позада. Идьсновок, уноксновок шумос ашесть ляда. И стихса поздравляндазь кельгома родительснон, и кштисть-морасть. Азсть тядяснон и аляснон лемс лама лямбе валда касфтоманкса, виде кис-тевс водендаманкса, трудонь кельгоманкса.
Петр Ильич и Екатерина Васильевна марсот ни нильгемоньда лама киза. Пяк куватьс эрясть мархтост Петр Ильичень сире родителенза Илья Васильевич и Федосья Егоровна. Екатерина Васильевна ульсь теест и стирькс, и кельгома рьвянякс. Вестевок ашезень обжакшне сиренятнень.
—Семьяса сембот улендихть,—корхтай шабрасна, трудонь ветеранць О.А.Сяткина.—Но синь кодямост ладяй, фкя-фкянь кельги ломатть аф сидеста васьфтят. Васенда примеркс ульсть сире Сяткиттне, тяни ламотненди сельмонь каяма вастокс арасть Екатерина Васильевна и Петр Ильич. А синь эздост етась идьснонды и унокснонды. Катк фалу тяфта и ули.
И.Вешкин.
 
Снимкаса:
Сяткиттнень 
семьясна.
12.08.2010 №31

 

«МИНЬ НАДИЯМА ВАСТОНЬКЕ»

«Единая Россия» партиянь региональнай отделениянь руководительхне ульсть Васенце республиканскяй  од ломанень политическяй форумса.
Форумсь етафтфоль Старошайговскяй районца. Сонь эсонза примась участия 300 лама студент и старшеклассник Мордовиянь сембе райоттнень эзда. Оцю пуромксу сафнень седи ваксста приветствовандазь Мордовия Республикань Госсобраниять Председателец, «Единая Россия» партиянь Региональнай политсоветть секретаренц васенце заместителец Валентин Конаков и партиянь Региональнай политсоветть секретаренц васенце заместителец—Региональнай исполкомть руководителец Александр Ушанов. Валентин Конаков азозе, што государственнай од ломанень политикаса главнай задачакс ащи од ломаттнень социальнай воспитаниясна. «Тейнек эряви касфтомс-анокламс социально-ответственнай и инициативнай од ломатть, странань и республикань патриотт, конат маштольхть сатфксонь сатнема»,—азозе Госсобраниянь спикерсь.
В.В.Конаков марса форумонь участникнень мархта ванондозь ситуациять, кона тиевсь велень хозяйстваса засухать сюнеда. Республикань райоттнень эзда саф од ломаттненди тя темась ульсь пяк малакс.
Оцю мяльса од ломанень активса ванондовсь и темась, кона сотф мордовскяй народть Россиянь нароттнень мархта ладязь эрямаснонды 1000 кизонь топодемати анокламать мархта.
Валентин Конаков шарфтсь мяль сянь лангс, кодама роль макссеви од ломаттненди межнациональнай мирть и согласиять кемокстамаса. Именна ялгаксшись и фкя-фкянь мархта кеме сотксонь кирдемась лездсть Россиянь нароттненди етамс инь оцю стакатнень-сталмотнень и аф максомс пря Отечестваньконь сембе врагонзонды.
Од ломанень лагерть рамкаса етафтфоль «IT-прорыв» всероссийскяй проектть презентацияц.
Странать инновационнай виияфнемаса, азфоль пуромксса, основной перяфксокс ащи специалистонь аф сатнемась, конат маштольхть инновационнай работань вятема, а стане жа ся, што населениять оцю талекац аф кода содасы компьютернай тевть. Од проектть целец—мушендомс и сембе ширде шнакшнемс IT-технологиянь инноваторхнень, тиемс единай информационнай пространства.
Меколи Валентин Конаков и Александр Ушанов серьгядезь од ломаттнень активнайста участвондамс общественно-политическяй эряфса, сяда лац няфтемс эсь пряснон созидательнай проекттнень эса.
29.07.2010 №29

 

ЭРЯФОНЬ КУВАЛМОСА КИ

Краснослободскяй райононь Колапа велень эряйхне лямбе, пара валхт азонкшнихть Москвиттнень лемс. И ули мезенкса.
Иван Владимирович (сон тяни аш шиса) и Вера Федоровна шачсть-кассть шабрань Мокшень Полянка велеса. А сембе эряфснон етафтозь Колапаса. Идькс пингсна савсь аф теждя пингонди—Великай Отечественнай войнада ингольдень кизотненди. Иван Владимирович кассь учителень семьяса. Виде, грамотнаель аляц Владимир Яковлевич, а тядяц—кудазораваль. Василиса Осиповнань лафту лангсотольхть тядянь заботатне, а ниле идень воспитандамась, шарьхкотьф, аф теждя. Иван еткстост оцюнясь. Мзярда фашистскяй захватчикне врьгятсть странаньконь лангс, теенза мольсь кеветиеце кизось. Васенце шитненькиге аляц тусь аеркс врагть каршес тюрема. Кудъетконь сембе тефне лаподсть Иванонь лангс. Покодсь аф аньцек пирьфса-переса. Нинге сон кемокстафоль тракторист- тненди помощникокс: веть сокась паксят, шить пяшкотькшнесь грузчиконь тефт.
22.07.2010 №28

 

КИНЬ УЧСЕТЯДА: СТИРНЯ ИЛИ ЦЁРАНЯ?


 

ТЯДЯНЬ КАПИТАЛСЬ МАКССЕВИ ШАБАТИ КОЛМА КИЗОНЬ ТОПОДЕМСТА

—Ся виде-аф, што тяни тядянь капиталсь можна сявомс, мзярда шабати топоди кафта пяле-мархта киза?
О.Королева.
—Тя аф виде. Шабати кафта пяле-мархта кизонь топодемста можна пшкядемс эряма вастсонт Пенсионнай фонду заявления мархта аньцек сянь коряс, кодама целенди ератада карьхцямс тядянь капиталть. А средстватне етафтовихть эрявикс направлениять коряс сяда меле, кодак идняти топоди колма кизот.
Тядянь капиталсь можна тевс нолдамс эряма вастонь цебярьгофтомс, шабатнень тонафнемаснонды или тядять пенсиянц накопительнай пяльксонцты.
Кда тинь ератада сявомс средстватнень сай кизоть васенце пялестонза, то документсь эряви кандомс 1-це октябрть самс.
24.06.2010 №24

 

АРАЛАЗЬ ШАБАТЬ ЭРЯФОНЦ

Врачть Борис Васильевич Пьянзинонь лемоц содаф ламотненди. Кочкуровскяй районца колганза корхтайхть аньцек шнама валса. «Штоба сатомс главнай врачть вастсонза, эряви самс рана»,—мярьгсть тостонь эряйхне.
Сисем частста улень Кочкуровскяй районнай больницяса. Борис Васильевич Пьянзин вастсонзоль, корхнесь телефонца.
Эряви азомс, колмогемонь кизоста сонь пингстонза строяф ниле этажса поликлиника, больниця, эряма кутт.
Азондоманц ушедозе медперсоналть эзда. Миньцонк, кле, работайхть тевонь содай, цебярь специалистт. Синь тиендьсазь семботь, штоба петемс ломаттнень шумбрашиснон, а кой-коста и араламс эряфснон. Тянкса лама тиендихть врачне М.И. Колесникова, Н.В.Курина, медсестратне Мария Князькина, Ирина Тюлюкова и ламотне лиятне.
Кулине, што аф кунара Кочкуровскяй больницяса аралафоль шабань эряф. Кода тя ульсь? Тя кизефксть максыне главнай врачти Б.В.Пьянзинонди. Вов мезе сон пачфтсь тянь колга.
«Кочкурова велень эряйсь кадозень апак ватт кафта емла идензон. Артем церанясь велясь и прась пяк пси батареять лангс. Больницяв ускозь III и IV степенень ожог мархта. Медикне тиезь семботь, штоба араламс церанять. Нльне Саранскяйста тердеме реаниматолог. Кочкуровскяй больницяса шинек-венек шабать пчкафнезь врачне М.Ф.Начаркин, В.Б.Букинина. Колма суткада меле шабати арась сяда теждя и сон прважафоль Саранскяи 1 № Идень республиканскяй больницяв».
Шарьхкотьф, што шабать эряфонц араламаса лама тись Кочкуровскяй районнай больницянь главнай врачсь Б.В.Пьянзин. Сон макссесь эрявикс инструкцият, командат, тернесь эрявикс специалистт. Тянкса теенза оцю спасиба!
А.ЧЕТЫРКИН.
Снимкаса: Б.В.Пьянзин.
17.06.2010 №23

 

ШАЧФТСЬ КАФТАСТЬ 67 КИЗОСА

Румыниянь эряйть Адриана Илиескунь эряфоньберьф мялецоль шачфтомс иднят. Но кальдяв шумбрашинц сюнеда тя ашезь удалсе. Мзярда теенза 60 кизода ламоль и юмасть сембе надияматне идень шачфтомати, сон ушедсь Шкайти пяк верондама. Ашезь етне фкявок ши, штоба Адриана несколька частонь афоль озонкшне Шкабавазти, эняльтькшнесь, штоба шачель идня. И чуда лиссь! Вдруг сембе сярятьфне кадозь сонь и 67 кизоса шачфтсь стирнят-кафтаськат, арамок мирса инь сиреста шачфтыхнень еткса васенцекс. Тяда инголе рекордсменкс шачфтомаса ульсь Индияста авась Сатьябама Махапарта, кона шачфтсь 65 кизоса.
03.06.2010 №21

 

ОД АЛЯНЬ АЛЛЕЯ

Кода корхтави валмуворксса, аляти эряфсонза строяма куд, касфтома идь и озафтома шуфта. Кирдемок тянь мяльса, Саранск ошень 2№  родильнай кудонь коллективсь «МегаФон» компаниять лезксонц вельде Мордовияса маень васенце шитнень етафтсь «Зеленый субботник» лем ала экологическяй акция. Целец—шарфтомс общественностть мяленц ошса экологическяй ситуацияти, ваймамань васт- тнень благоустройстваснонды, прирорднай козяшитнень ванфтомаснонды, семьяса соткснень кемокстамаснонды.
Фкя еткшиня роддомть ваксс пуромсь пяк лама ломань. Синь щафтольхть МегаФон тяштьфкс мархта сянгяря фартукса. Тевс нолязь граблятнень и каймотнень, тиендемок перьфпяльса аруши. Нльне роддому сайхнень эзда кой-кит лезнесть теест тя тевса.
Од алятне (отцы) озафнесть голубой кузнят шачф идьснон лемс. Эрь шуфтонясь мазоптьфоль шабать фамилиянц и лемонц мархта лентаняса. Тя шиня од алятне озафтсть комозьда лама шуфтоня. Тя тевса теест лезнесть идьсна, конат тонадсть васенце аськолксонь тиема. «МегаФон» компаниять эзда получасть лятфнембяленди казнет.
—Мялезе азомс благодарностень валхт 2№ роддомонь персоналти сянкса, мес синь лездсть иденьконди шачемс белай свету,—мярьгсть Ваня церанять аляц Дмитрий Глухов.—Арьсян субботникс сайхненди арамс пяк цебярь тядякс и алякс, аф лотксемс сатфть лангс, самс роддому омбоце и колмоце иднянкса.
Ширенц кирдезе «Подарил жизнь—посади дерево» акциянь участницась Наталья Леушкина: «Карман сей сашендома Ульяна стирнязень мархта. Тя арай семейнай цебярь традициякс—ваномс, кода касыхть эсь кядьса озафтф кузнятне, а мархтост—и шабаньке. Надиян, тя аллеясь арай скверкс».       
Г.ПРЕКИН.
27.05.2010 №20

 

ВАСЕНЦЕ ВАСТСА—СЕМЬЯСЬ

Миньцонк республикань Общественнай палатась кемокстась сотрудничествать колга соглашения «Святость материнства» всероссийскяй демографическяй программань попечительскяй советть мархта, конань вятьсы Н.В.Якунина.  14 майста Москувонь инжихне васьфнесть Мордовия Республикань Оцюнять Н.И. Меркушкинонь мархта.
Тяда меле Республикань кудса етафтфоль «круглай шра» ваксса васедема, кона лемтьфоль семьяти. Тяса примасть участия властень органонь, общественнай организациянь, Рузонь православнай церькавонь представительхть, социальнай работникт.

20.05.2010 №19

 
 

 
НОВОСТИ

МИНЬ ЗЕМЛЯКОНЬКЕ АЛЕКСЕЙ АЦАПКИН—ОЛИМПИЙСКЯЙ ЧЕМПИОН

17 августста кизонь I-це Юношескяй олимпийскяй налхкоматнень эса Сингапурса вольнай стильса ведьса уендихнень еткса 4х100 метрас эстафетаса сяськсь Россиянь командась: Андрей Ушаков, Илья Лемаев, Антон Лобанов и минь Мордовиянь спортсменоньке Алексей Ацапкин. Россияттне етазь китайскяй сборнайть 0,55 секундада. Уемаса пялькстыхне—австралиецне—лиссть нилеце вастти, пачфни олимпийскяй турниронь сайтсь.
19.08.2010  № 32
 

Мольфтеви «2010 кизонь урожайсь» оперативно-профилактическяй операциясь

МВД-нь СОТРУДНИКНЕ ВАНЫХТЬ СЁРОНЬ УРЯДАМАТЬ МЕЛЬГЕ
 
Мордовияса 270 предприятиясь заняф велень хозяйствань культурань касфнемаса. Марстонь площадсь 1659 тежянь гектар.
Сянкса, штоба ванфтомс тяддень и мелянь урожайть, 2010 кизонь 15 июльста сявомок республикасонк мольфтеви «Урожай-2010» оперативно-профилактическяй операциянь омбоце этапсь, мезть пингста республикань внутренняй тевонь органонь сотрудникнень мархта муфоль 41 административнай правонарушения, 483 преступления.
Мордовия Республикава Внутренняй тевонь министерствась оцю работа мольфти сянь коряс, штоба перямс кить велень хозяйствань продукциянь, жуватань-мезень саламати, ваныхть сянь мельге, штоба назначенияс коре нолявольхть засухать сюнеда эвондаф зияттнень машфтомс государствать мархта макссеви бюджетнай средстватне, мольфтихть контроль серонь, тишень, ГСМ-нь, удобрениянь, техникань-мезень ванфтома васттнень мельге.
Внутренняй тевонь органонь сотрудникненди лездомс ули кода кажнайти. Кда приметаф саламань-коламань случай, пачфтеда 47-70-60 номерс коре.
 
19.08.2010 №32
19.08.2010  № 32
 

РОССИЯНЬ ПРЕЗИДЕНТСЬ Д.А.МЕДВЕДЕВ ПОЗДРАВЛЯНДАЗЕНЬ МИНЬ СПОРТСМЕНОНЬКОНЬ САТФКССНОН МАРХТА

Ётай недялять Россиянь Президентсь Д.А.Медведев васетькшнесь легкай атлетикаса Европань XX чемпионатонь чемпиоттнень и призерхнень мархта. Сон поздравляндазень легкоатлеттнень оцю сатфксснон мархта. Барселонаса  спортсметтне сатсть 24 медаль: кемонь золотань, кота сиянь и кафкса бронзовайхть. Казнетнень оцюшкаснон сатозь Мордовиянь спортсметтне.
 
Ольга Каниськинась сембе легкоатлеттнень лемста благодарностень валхт азсь Президентти ширень кирдеманкса.
Васедемста Каниськинась пачфтсь, што Мордовияса ушетф Олимпийскяй подготовкань центрать колмоце очереденц, 400 метранди вельхкс ала манежть, бассейнать строямасна.—Тя тейнек башка пяк эряви 2012 кизоня Лондонца Олимпиадада инголе,—мярьгсь спортсменкась.
Ольга Каниськина васедемань участникненди лятфтась и сянь колга, што 2012 кизоня Саранскяйса етафтови спортивнай якамаса Миронь кубкась. И нинге фкя пяк оцю мероприятия—мордовскяй народть Российскяй государствань нароттнень мархта ладязь эрямаснон 1000 кизонь топодемань праздновандамась. Тияк сон лямбе валхт азсь тренерхнень лемс.
Д.А.Медведев поладозе:
—Оля видеть азозе тренерхнень колга. Тя шарьхкотьф. Но аф фалу шарьхкотьф тянь коряс региононь руководительхнень позициясна. Мордовияса, мон лац содаса, кда кодама поручения максат республикань руководительти, сон фалу старандай тиемс лац-ряц, оцю качестваса.
И тянь эряви азомс аф аньцек спортть колга.
12.08.2010  № 31
 

УШЕДОВСЬ ТОЛТЬ ЭЗДА ЗИЯНЦ ПОВФНЕНДИ КУДОНЬ СТРОЯМАСЬ

Мордовияса вирень пожархнень сюнеда кудфтома лятфненди строяви 81 эряма васта. Лядыксне, а сембоц республикаса палсь 157 куд, азсть мяль сявомс ярмакса. Виде, педа-пес нинге лац-ряц аф содаф, мзяра куд сави строямс. Но, кода азозь МР-нь Строительствань и архитектурань министерстваса, строительхне тисазь сембе эрявиксть, штоба кенеремс строямс синь 1 ноябрти, тя пингть ладязь Россиянь Президентсь Д.Медведев и странань премьер-министрсь В.Путин.
 
Сянкса, штоба эреклафтомс строямань тевть, странань руководствась примась решения, што эряма васта зиянц повфненди кармай строяма единай поставщик. Тя корхтай сянь колга, што муниципальнай заказчикти ули кода тиемс подрядонь договорхт конкурсонь апак етафтт, кона таргави 45 шис.
Тяка пингть, пожархнень сюнеда зиянц кой-кона повфне азсть мяль строяфтомс од кутт аф сяка васттнень эса, а лия населеннай пунктова—Саранскяйса, Зубова Полянаса. Кепотьксонди, Свеженькая, Подлясова и Вад.Селищи велень кой-кона эряйхне пачфтезь, што мяльсноль етамс райцентрав—Зубово-Полянав. Строительхне арьсихть строямс теест од ульця. Ламотнень мяльсна лядомс сяка васттненди. Строяви куттне улихть ефси лият палфнень коряс. Эсост кармай улема сембось: свет, газ, лямбе и кельме ведь, канализация.
Мордовияса строямань тевсь кемокстаф 8 организация мельге. Ня компаниянь представительхне ульсть ни райоттнень эса, васетькшнесть велень Советонь оцюнятнень мархта. Тяни специалисттне анокласазь проектно-сметнай эрявикс документациять. 6 августста строительхне прважазь районга эрявикс техникать и решандазь кизефксть рабочайхненди работань пингонди эряма вастонь максомать коряс. Подлясоваса арьсекшневи панжемс палаточнай лагерь. Ваймама шитнень ускфт стройматериалхт, а 9 августста рабочайхне кярьмодсть од кудонь строяма.
 
12.08.2010 №31
12.08.2010  № 31
 

ПАЛЫХНЕНДИ МАКСФ ВАСЕНЦЕ ЛЕЗКССЬ—1,5 МИЛЛИОН ЦАЛКОВАЙСЬ

Нинге аф кунара ня васттне ульсть Мордовияса инь цебярьхне. Но стихиясь нардазь нардазе тя мазышить и кадсь мельганза седиень ацергофты картина. Сянгяря вирьхнень вастс лама километра кить кувалмова таргавсть равжа палф шуфтт, а велетнень вастс—кулуфт. Колма ломанень жертват, 150 палф куд—тяфтама тячиень пожаронь пелькс статистикась республикань Зубово-Полянскяй районца.
 
Мордовиянь Оцюнясь Н.И. Меркушкин и РФ-нь региональнай развитиянь министрть заместителец К.Ю.Королевский ваймама шитнень ульсть районца.
Тевсь тяса ащи пяк кальдявста. Ломаттне эвотьфт, но тяни валом валом сашендыхть эсезост. Н.И.Меркушкин азозе: ламось тяни ащи местнай властть эзда. Эряви куроконе анокламс сембе эрявикс документтнень. Августста палф куттнень вастс ушедома од стройка.
Районца тиф оперативнай штаб, конанди вятикс Государственнай Думань депутатсь В.Б.Кидяев. Эрь палф велеса работай комиссия: медикт, райсобессь, милициясь и районнай администрациянь представитель. Ломаттненди, кит юмафтозь сембе имуществаснон, пяк стака. Но лезкссь сай. Понедельникти палыхне получазь васенце 1,5 миллион цалковайть Мордовиянь Оцюнять резервнай фондстонза. Ломаттненди явондови пси ярхцамбяль и сухой паек.
Пуромомок Мордовиянь Оцюнять перьф, велеряйхне корхтайхть теенза: Мордовиясь колганк заботендай, пси ярхцамбяль анокласть, сухой паек усксихть. Синь валснон полаткшнесазь Вад. Селища велень эряйхне: Спасиба, што тейнек тняра техника панеде, спасиба што вертолеттне, самолеттне пожар матсть, сюкпря теенть. Меркушкин отвечась: Васендакиге спасиба странань руководствати.
Вад. Селищаса толонь даволсь етась ляйть туркс кожфка пяле километра вастс, кона явфнезе велеть вирть эзда и валгсь куттнень лангс. Тяфтама пелькс тяса ашесть няенде нльне кунардонь эряйхне. Но, кода фалу, трагедиять улихть аф аньцек жертванза, но и эсь героенза. Ся велеряйхне, конатнень кудсна ни палсть, эсь прянь аф ужяльдезь (тя видекс тяфта) матсть шабраснон кудснон эса. Толть мархта тюрсть нльне школьникне. Емлатне каннесть ведь мархта ведаркат, оцюфне—кие кода маштсь.
Н.И.Меркушкин люпштазе тястоконь школань выпускникть Сергей Левштановонь кяденц. Сон васенцекс няезе толть, кеподезе пильге лангс сембе велеть. Тядде Сергей поступай университетонь историческяй факультету.
Историясь аф юкстасы тя страшнай кизоть.
Тяни, 2 августста, аньцек Зубово-Полянскяй районца 8 оцю вирень пожар. Качамти ляпиякшнихть животнайхне, палы вирсь. И эрь тяфтама бедати ушетксокс арси—кинь-бди мархта ердаф папироса песь, крьвястьф сардонясь. Мезти нинге эряви лисемс, штоба кажнайсь эздонк, мекпяли, тянь шарьхкоделезе?
 
05.08.2010 №30
05.08.2010  № 30
 

МАРЯТАМА ИНКСОНТ ГОРДОСТЬ!

Испанияса ётафтови Европань чемпионатса Россиянь сборнайсь сатсь 5 медальхть и сембе синь—миннет.
Испаниянь Барселона ошса моли легкай атлетикать коряс Европань чемпионатсь. Васенце шиня пялькстсть 20 километрань дистанцияса ялга якамать коряс инь вии спортсметтне. Тя мезть синь етксост аньцек ашель тяниень миронь чемпионць Валерий Борчин, сяс мес сон получась травма. Но сембе мирти содаф тренероньке Виктор Чегин мусь теенза достойнай полафтыхть. Васендакиге надияматне ульсть сотфт од талантливай спортсменть Станислав Емельяновонь мархта. И тя аф стак.
 
29.07.2010 №29
29.07.2010  № 29
 

ГРАНТТ—ЕВРО- ПАРЛАМЕНТТЬ ЭЗДА

Мордовиянь Образованиянь министерствась получась Европарламентть эзда кафта грантт. Кажнайсь синь эздост тейнек максы фкя миллион 300 тежянь цалковаень. Министерствань сотрудникне анокласть кафта проектт, конат шнафтольхть.
Васенце проектсь—этнокультурнай направлениянь кизонь лагерсь, коса республикастонк и мокшэрзянь диаспораста шабатне кармайхть сяда крхкаста тонафнемост родной кяльть и сяда маласта знакомондайхть эсь народснон культуранц мархта. Лагерьса ваймамась питнефтома, родительхне пандсазь аньцек кить. Главнай условиясь—штоба шабась мяль вельде тонафнелезе эсь родной кяленц.
Омбоце проектсь—электроннай библиотекань тиемась, коза сувайхть учебникне и методическяй изданиятне мордовскяй (мокшень, эрзянь) кяльхнень тонафнемаснон коряс.
 
22.07.2010 №28
22.07.2010  № 28
 

ВАСЕНЦЕДА МОРДОВИЯСА!

12-15 июльста республикасонк етафтови легкай атлетикать коряс Россиянь чемпионатсь.
Минь тячи гордостень марязь азондсаськ, што Мордовияньке лемневи сембодонга спортивнай республикакс. И тя аф стак. Тянь можна кемокстамс лама примерса. Ваносте, мзяра мекольдень кизотнень Саранскяйса эвондась од спортивнай объектта! Сембе райоттнень эзгавок строяф (или строяви) физкультурно-оздоровительнай комплекст.
08.07.2010  № 26
 

ШИРЕЗОНК САЙ ТЁЖЯНЬ СПОРТСМЕН

Пресс-конференцияста

Понедельникста, 5 июльста, Саранскяйса Печатень кудса ульсь легкай атлетикать коряс Россиянь чемпионатти лемтьф пресс-конференция. Эсонза примасть участия Мордовия Республикань спортонь, физическяй культурань и туризмань министрсь В.Г.Киреев, сонь заместителец В.В.Цыбусова, Мордовия Республикань легкай атлетикань Федерациять президентоц, высшай спортивнай мастерствань республиканскяй  школать директороц М.Л.Храмов, тренерхт, спортсметт, официальнай лия ломатть.
08.07.2010  № 26
 

УДАЛАЗА КИНТЕ, МЕДАЛИСТТ!

Исяк, 23 июньцта, Саранскяйса Республикань кудса Мордовия Республикань Оцюнясь Н.И.Меркушкин васьфнесь республикань школань ся выпускникнень мархта, конат шумордазь тонафнемаснон золотань медальса.
Арась цебярь традициякс кизоста кизос получсемс тя казнеть республикань Оцюнять кядьста.
24.06.2010  № 24
 

 

 

Учредительхие:
Главнай редакторсь: И. С. Лушкин