Поиск по сайту: 
 

Архив
 июль 
 2022 
пн вт ср чт пт сб вс
    123
45678910
11121314151617
18192021222324
25262728293031

 
 

 

Мокшень правде-100

Писательхне и газетась

Тячи ули кода азомс, што мокшень газетаньке сембе пингть пуропнезень эсь перьфканза мокша ломаттнень, конатнень ульсь асусна журналистикати, писателень тевти. «Од велесь», а сяльде «Мокшень правдась» арасть омбоце лямбе кудкс мокшень ламоц писательхненди, журналисттненди. Тяса синь варжазь и кельгозь шачема кяльть-валть таньфонц, тусть творческяй оцю кис, арасть валонь оцю мастеркс. Газетасонк васенцеда кайгсь фкя инь талантливай поэтть Михаил Ильич Безбородовонь цёфксонь вайгялец.
А вов мезе эсь пингстонза азондсь эсь колганза содаф поэтсь Яков Максимович Пинясов:

«Кда кизефтелемазь, кие тейне лездсь лисемс эряфонь кить лангс, и макссь тейне творческяй пацят, мон мярьголень: родной мокшень газетаньке, сонь цебярь вайме работниконза.
Васенце заметказе «Од велеса» лиссь 1926 кизоня, мзярда тейне ульсь аньцек 13 киза. Ётась мзярошка пинге и монь примамазь газетав сотрудникокс. Эстоньбере ётась лама киза, но мон редакциянь работать лувондыне и лувондса, кода инь родной тевонь. Мон сембе тя пингть тяшнень газетав заметкат, статьят, очеркт, стихт и расскаст». Лятфтасаськ: Яков Максимович—МССР-нь Государственнай премиянь васенце лауреатсь, Мордовиянь васенце Народнай писательсь. Книганзон эзда ламонцне ётафтфт аф аньцек рузонь, но и странань народонь колмогемоньда лама кяльс. Мокшень писательть книганза пачкотькшнесть Англиянь, Китаень, Венгриянь, Болгариянь, Румыниянь и лия странань иттненди.
Писательть В.И.Ардеевонь (Виардонь) васенце произведениянза стане жа печатлафтольхть минь газетасонк. Тяса жа ушедовсть, кода писательхть М.Л.Сайгин, П.И.Левчаев, Л.Ф.Макулов и М.А.Бебан. Аф фкя кизонь покодсть тяса И.М.Девин, С.А.Самошкин, В.Н.Радин, И.Ф.Чумаков, Г.А.Пьянзин, Ю.Ф.Кузнецов, И.П.Кишняков, И.Н.Кудашкин, Г.И.Пинясов, А.Ф.Ежов, Е.Я.Терешкина. «Мокшень правдав» кучсезень васенце стихонзон А.П.Тяпаев, кона сяльде аф фкя киза покодсь редакцияса, арась Мордовиянь Народнай писателькс и тячемс сёрмады и стихт, и прозань произведеният.
Аф кржа пинге трудендась газетасонк М.А.Кяшкин. Брестскяй крепостень воинць, журналистсь и писательсь, кона Мордовияса васенцекс сёрмадсь легендарнай лётчикть, Советскяй Союзонь Геройть Михаил Петрович Девятаевонь колга повесть.
Кие аф мяляфтсы газетасонк «Кячказть»? А виияфтозе сатирань и юморонь тя уженять журналистсь и писательсь М.С.Моисеев, кона стане жа лама киза ульсь «Мокшень правдаса» корреспондентокс и отделонь вятикс.
23.09.2021 №37

 

Нильгемоньда лама киза—мокшень журналистикати

«Мокшень правда» газетав васенцеда тяштьфозень кучине ётай веконь кафксогемонце кизотнень ушетксста. Эста тонафнень Атерь велень 1№ средняй общеобразовательнай школаса котоце класса. И ся пингста сявомок ушедонь тяшнема тядянь-алянь кяльса лисенди газетав. Сёрматкшнень и вузса тонафнемста, и армияса служамстовок. Эстонь кизотнень «Мокшень правдась» сидеста ётафнесь пуромкст велень, аф штатнай корреспондентонзон мархта, коза тернемазь моньге. Ня пуромкснень эса арань содафокс мокшень журналисттнень мархта: Н.И.Учватовонь, П.П.Кулешовонь, И.С.Лушкинонь, А.М.Терентьевонь, Н.Н.Морозкинонь и лиятнень. Тяса васенцеда васьфтине содаф писательхнень, учёнайхнень И.М.Девинонь, М.Г.Имярековонь, А.П.Тяпаевонь, С.В.Кинякинонь, А.В.Алёшкинонь, А.Г.Самошкинонь и лиятнень. Меле сембе синь арасть тейне цебярь учителькс и ялгакс.
 
Школать аделамда меле молень тонафнема Н.П.Огарёвонь лемса Мордовскяй государственнай университетонь филологическяй факультетонь журналистика отделенияв. Дипломонь получамда меле ваймосема ашень карма, а, вчёк, эстокиге 1991 кизонь васенце июльста ушедонь работама «Мокшень правда» газетать редакцияса.
Пингсь аф ащи фкя вастса, сянь эзда ётась ни колмогемонь киза. Эряфса тиевсть оцю полафткст. Эсь кяльсонк лисенди газетаське моли инголи, аф лядонды пингть вешфксонзон эзда.
Кирдемок мяльса аф штатнай корреспондентокс улемазень, мокшень журналистикати максонь нильгемоньда лама киза. Аф лувови, мзяра тя пингста ётаф вайгяльбе, мзяра сёрматф материалда.
Кодама кизефкс мархта лувихне аньцек  аф пшкятькшнихть тейне. Кепотьксонди, Атюрьевскяй райононь Пичепулоня велень эряйхнень пичефтьсыне ся, што тундань ловкс солай, срады-калады шачема-касома уженясна: совхозсна срадсь, школаснон сёлгозь, вели моли асфальтса ацаф кись тапаф. Торбеевскяй райононь Салазгорь велеса ёрайхть тиемс З.Ф.Дорофеевонь усадьбанц и лама лия эняльдемат. Мон сембонь тянь колга азондан «Мокшень правда» газетать эса.
Эрь шиня васьфнян лама лувиень мархта. И сембонь эзда марян аньцек шнамань валхт газетать колга. Мокшетне кельгсазь эсь кяльсост лисенди газетаснон и пяк учсесазь. Уленди, почтальоттне аф эсь пингстонза пачфнесазь газетать лувихненди. Эста телефонозе аф лоткси гайфтематнень эзда. Велеряйхне таколдыхть, толкавайхть, мес аш газетань свежай номерсь.
Монь, кода ломанень и кода журналистонь, «Мокшень правда» газетать мархта сотф сембе эряфозе. Тяса мон арань профессиональнай сёрмадыкс, тяста мон васьфтине журналисткать Л.К.Маркинать. Сон тяфта жа работась газетаса. Туме фкя-фкянь мяльс.  «Мокшень правдаса» тиеме свадьба. И вов ни 26 киза марсотама. Минь кафта цебярь цёраньке. Тяда оцю паваз аш!
И. Вешкин.
23.09.2021 №37

 

ВАЙМОНЦ ЭЖНЕЗЕ ТВОРЧЕСТВАСЬ

М.Н.Бычковонь лемоц мокшэрзянь крайса содаф пяк цебярьста. Сон Великай Отечественнай войнань ветеран, содаф журналист и писатель. Журналистикати лемдсь 70-да лама киза. «Мокшень правдась» аф весть макссесь мялень кеподи статьят тя ару вайме, панжада седи ломанть колга. Ули мезе азомс Михаил Николаевичень, кельгома учителезень колга и тейне. Сон лувондомань ялгакс. Васьфнеме аф сяшкава сидеста, илатнень и оцю пуромкснень эса. А вов телефонца гайфнеме шинь ётазь. Мялень кеподи сёрмат тяшнесь тейне содаф журналистсь. Эрь сёрмац—тя оцю праздниколь эряфсон. Сон шнась, улендсь и сялдсь, тонафтсь эсон. Ашельхть аф пеняцямат, аф кяжиямат. Сембе тонафтоматне, пара мяльхне-арьсематне сявондевсть пера алу, нолявсть тевс. Сонць Михаил Николаевич, куломозонза сёрмадсь. Сёрмадсь лама и седиень токазь. Кодама афоль уле шумбрашиц, фалу гайфнесь. А кда мон гайфнень, вестевок ашезь атказакшне сявомс трубкать. И фалу шутендась, мезень-бди лангса рахсесь.
М.Н.Бычковонь кармань содамонза нинге школаса тонафнемста, ётай веконь кафксогемонце кизотнень ушетксста. Эстонь кизотнень «Мокшень правдась» сидеста ётафнесь оцю пуромкст велень корреспонденттнень мархта, коза тернемазь моньге. А меле сань Саранскяи, тонафнень вузса. Васедемада ульсь аф кржа. А мзярда кармань работама эсь корреспондентокс «Мокшень правдаса», Михаил Николаевич кучсь тейне сёрма, коса азондозень эсь мялензон-арьсеманзон сёрматфонень колга, макссь афкуксонь питне. И ся пингста сявомок, сидеста тяшнеме фкя-фкянди сёрмат, кучсеме поздравления мархта открыткат, гайфнеме телефонца. Эрь корхтаманьке ушеткшнесь тяфта: —Кода шумбрашись, Михаил Николаевич?
—Кизос коре, атякс. А тонь кода, ялгай?
—Од цёракс.
—Катк фалу тяфта и ули.
М.Н.Бычков сёрмадсь пяк лама. Тя печатлакшневсь и «Мокшень правдаса», и «Мокша» журналса. Лиссть книганза. Фкять лемоц «Потмаксфтома эши». Сонь нолдазе Мордовскяй книжнай издательствась 1987 кизоня. Эсонза ёфкст, легендат, азкст. Сонь казезе тейневок тяфтама сёрматфкя мархта: «Илья Вешкинонди, смузю журналистти, конань сёрматфонза сядонга касфтсазь «Мокшень правдать» авторитетонц. Верондан, тон сатат нинге лама-лама! Паронь арьсезь, тонь сире ялгаце Михаил Бычков. Февраль ковсь, 2003 кизось».
1992 кизоня тяка издательстваса лиссь М.Бычковонь, Ю.Сухоруковонь, Г.Чиняевонь «Мадам Му-Му» марстонь стихонь пусмосна рузонь кяльса. Тя книганятьке Михаил Николаевич казезе тейне. Лангозонза сёрмадсь: «Дельному собкору «Мокшень правды», журналисту, обладающему острым пером, Илье Вешкину, от журналиста, который водится и с поэзией, в том числе критического направления. С наилучшими пожеланиями М.Бычков. 2003 г».
Лямбе, седиень токай, мялень кеподи сёрмат тяшнесь Михаил Николаевич. Вестевок ашель стама, штоба афоль отвеча сёрмазень лангс. Или кда фкя-фкянь ашеме шарьхкотькшне  телефонца корхтамста, эстокиге эсь мялензон-арьсеманзон азондолезень сёрмаса. Вов, кепотьксонди, мезе сёрмады 2010 кизонь 2 апрельста кучф сёрмасонза:
«Шумбрат, Илья Петрович! Тон кизефнеть землякцень Р.Р.Федькинонь колга. Содайне сонь или аш. Мзярда улень «Мокшеса» ответственнай секретарькс, кирдень соткст тя поэтть мархта и старандань максомс ки кой-кона произведениянзонды. Отвечакшнень сёрманзонды. Москувонь адресонц эзда мяляфтса аньцек Бескудниковскяй переулкать. Кда тя ломанць эряль Мордовияса, то лисендельхть и сонь книганза. А стак… Пара мяльса ванан творчествацень мельге. Дивандан, кода кенерькшнят тняра сёрмадомс. Радован, мзярда лисендихть удалаф вещатне. Морафнесайне оцю мяльса. Кода корхнихть русне: «Так держать!» Эсь колган. Сиренян ни, ялгай, пяк сиренян. Шумбрашись кальдяв, урмадон дюжинашка. Но пря аф макссян. Кода няйсак, нинге урафтан мезе повсь.
Тядде топоди 70 киза, кода журналистикасан. Козк аделайне Кадошкинаса средняй школать, кармань покодема райгазетаса литсотрудникокс. Сяльде тя лездсь армияса служамстон: тосовок сёрматкшнень и стихт, и очеркт, и фельетотт. Мана Мордовиянь Оцюнясь Н.И.Меркушкин вручандазе тейне «Золотое перо» дипломть. Тя инь оцю казнесь монь эряфсон. Удаласт тоньге тефне, ялгай! Паронь арьсезь Михаил Бычков».
Михаил Николаевич лувондозень сёрматфонень «Мокшень правдаста», «Мокша» журналста. Макссесь теест афкуксонь питне, ялгань советт. Азонкшнезень афсатыксснон, лафча вастснон, мезень лангс шарфтома мяль. 2009 кизонь 6 июньцта М.Н.Бычков сёрмасонза тяшти: «Мокша» журналста лувине «Шавача» повестцень. Произведениясь удалась, пяк мялезон, морафтыне оцю мяльса. Кяльсь эсонза сочнай, афкукс мокшень велень кяль, кодамса корхтайхть, васендакиге, эряфкшу аватне-бабатне. Лама цебярь валмуворкста. Синь пиндолдыхть аф оцю алмаскя лаца. Сёрматт, ялгай, сёрматт. Тя тонь лисенди аф кальдявста. И тят кяжиякшне замечаниянень лангс. Вдь синь азфт кельгомга, паронь арьсемга. Сире ялгаце мзярдовок тейть кальдяв аф арьси».
Михаил Николаевич лувозе «Шавача» повестезень пяк удалафокс. Шназе и мярьгсь кандомс издательствав. Пингонь ётазь лиссь «Пееди кургсь мазы» книгасон.
Мялезе лятфтамс М.Н.Бычковонь нинге фкя сёрманц, конань кучезе тейне 2008 кизонь 10 февральста:
«Тячи ванондыне папканень, коса «Мокшень правдаса» лисьф материалне. Аф содаса, кода тон, но мон ванфтсайне сембе публикациянень. И нинге ули журналозе, коза тяшнесайне, мезе и мзярда печатлаф «Мокшень правдаса». Тянь вельде, кода корхнихть, кирдьсайне контроль ала сембе сёрматфонень. И аф весть мртцень сятненди, конат печатлафтольхть и 40, и 50 кизода инголе. Кой-коста нолясайне тевс тостонь факттнень.
Фкя папкастон муйне тоньге фкя статьяцень. Лиссь сёрматфозень мархта фкя рубрика ала. Сёрмадыть университетса тонафнемстот. Кучса тейть. Тяшнек сяда сиденяста «Мокшень правдав». Тяшнек сяда оржа, мялень кеподи материалхт, тяк шямонияфне перацень. Тонь васенце лувицян. Сёрматфнень морафнесайне пара мяльса. Эсост тёждя, мокшень велень кяльсь. Кой-коста, мярьгат, аф статья лувоть, а тонць улеть Кяшалса, Курташкаса, Мокшень Козловкаса, седикс-ваймокс корхнеть велеряйхнень мархта. Фалу тяфта киртьк! И вестевок тяк ноля пряцень. Эряфса лама сталмода, аф видешида. Но эряви кирдемс, ялгай. Сёрмадомань тевсь аф тёждя, пяк стака. Соньфтемонзонга аш кода. Лувихне учихть од материалхт. И сембось тиема сянкса, штоба аф коламс синь мяльснон, надиямаснон. «Мокшень правдась» тянь ширде машты, шарьхкодьсы, кода кеподема ломаттнень мяльснон, мезе максома эсь лопанянзон лангса».
М.Н.Бычков куломозонза кирдсь кеме соткст «Мокшень правдать» мархта. А кодама оцю кенярдемасель, мзярда сонць сашендсь редакцияв. Тя коллективть эряфса оцю праздниколь. Сон и лятфнесь, и шутендась, и азондсь газетаса покодеманц квалма, и журналист ялганзон колга. Азондома маштсь. А конашкава цебярель ялгась, морафтысь. Эрь сёрманц учелине. Сон сёрмадсь мялень салайста, мялень петиста-кеподиста. И вестевок ашезь оцюлгофне, ашезь касфне питне, шнафне пря. А кда гайфтель телефонца, тя цебярь настроения шиньберьф. Мярьгат, аф корхнесь, а макссесь пацят лиемс, верондамс эсь журналистонь вийхненди. Да и видеста азомс, тяфтама лувихненди, кодамкс ульсь М.Н.Бычков, кальдявста сёрмадомс ашель кода. Но пингсь полафни. Сиренятне тушендыхть. И тяни ни кассь лувиень од поколения. Михаил Николаевич тянемс мялямсон. «Мокшень правдань» тяфтама кельгида аф сяшкава и лама. Сон ульсь пильгонек-прянек мокшень журналистокс, кялень, коень-обуцянь кельгикс. Тяфтама ломаттне тяниень стака пингть тейнек пяк аф сатнихть. Сяс газетать 100 кизонь топодеманц карша М.Н.Бычковонь лаца афкуксонь патриоттнень колга эряви азондомс сяда ламоня и сяда сиденяста.
Илья ВЕШКИН,
Россиянь Писателень
союзонь член.
26.08.2021 №33

 

Эрясь Сочиса мокшень поэт

Атюрьевскяй районца шачсь-кассь лама талантливай поэтта. Фкясь синь эздост Мокшень Козловкань цёрась В.А.Волков. Кодамоль сон ломанць? Тя кизефксть лангс фкя лацонь ответ стака максомс. Финцне шнасазь сонь. Кле,  тя пяк ару вайме, панжада седи ломанель, вестевок ашезе кяшенде кши сускомнянц эстедонза ашуфнень эзда. Омбонцне лувондозь сонь «политиканкс». Мзярда ётай веконь ведьгемонце кизотнень кучкаста сашендсь Мокшень Козловкав, Боражу, ламонцне пякснезь кенкшснон. Велеса маштыхть инжиень примама. Но тя инжись эсь лацоннель. Нльне тюрьмада мелевок, кода аньцек маштсь, сюцесь странань вятихнень эса, аф пяк мялезонзоль эряфсь, странань порядкатне.
—Василий Афанасьевич пяк лац содазе алязень,—корхтай Бораж велень эряйсь, педагогическяй трудонь ветеранць Е.В.Пятина.—Мзярда сашендсь вели, вестевок ашезь ётне кудоньконь вакска. Примсеськ кода мала раднянь. Ширесонк симсь-ярхцась, лядондсь удома. Алязень мархта веньберьф корхнесть, спорсесть. Хуш И.В.Сталин ашель шиса ни, но странаса аф сетьмоль. Велесовок ульсть кальдяв ломатть, «доносонь» тяшнихть. Ломаттне сяка пельсть. Волковонь мархта алязе спорсесть, а минь тя пингть шарондоме кудоньконь перьфке, аш ли кивок кулхцонды. А то мусак вастть.
Тяфтама историяда Боражса кулендень лама. И аф аньцек Елена Васильевнань эзда.
Но Василий Афанасьевич  монь мялямозон лядсь  афкуксонь мокшень поэтокс, кялень кельгикс. А кода сон кельгозе эсь мокшэрзянь краенц, шачема веленц, тя эрявсь кулхцондомс сонць, морафтомс сёрманза. Фалу тейне телефонца корхнель: «Мокшень правдафтома» аш тейне эряф. Сон монь корхтай ялгазе, кулянь пачфниезе, кардаезе-тонафтыезе, шнаезе-сялдыезе. И тя афкукс тяфта. Мзярда «Мокшень правдась» ульсь Российскяй каталогса, Василий Афанасьевич марязе прянц инь павазу ломанькс. Сёрматфнезе эсь кяльсонк лисенди газетать оцю мяльса, лувондозе васенце лопаняста сявомок мекольцети молемс. А мзярда  макссезь сонь стихонзон, лия сёрматфонзон, поэтть эряфса тя оцю событияль, кенярдеманцты  ашель пе. Эстонь кизотнень стихта и нльне поэмада авторхне кучсесть пяк лама. Аф сембе синь лисендсть газетать лопанянзон лангса. Литературань и искусствань отделонь вятись, СССР-нь Писателень союзонь членць, Мордовиянь Заслуженнай поэтсь И.Н.Кудашкин сидеста газетаса макссесь, тиендсь обзорхт. Цебярь стихнень шнакшнезень, кальдяфнень сялнезень. Ня обзорхненди повондсть аф аньцек ушеды поэттне, но и содафневок. Иван Никитович ашезь ётне и Волковонь творчестванц вакска. А кинь мяльс тушендсь тя афсатыксонь азомась. Василий Афанасьевичка улендсь кяжиякшнесь. Но кяжиямась—тя фкя, а азф, тиф замечаниятне видетольхть. И Василий Афанасьевич старандась тяштемс цебярь стихт, перанц мзярдовок ашезе шямонияфне. Печатлаф стихонзон лувихне васьфнезь пара мяльса. И мзярда юмась Россиянь каталогста «Мокшень правдась», поэтсь коза аньцек ашезь тяшне эняльдемань сёрмат.
—Лездода тяштьфтемс «Мокшень правда»,—эняльдсь  тейне кучф сёрмасонза.—Газетась Сочиса эрязь тейне пяк эряви. Сон мокшекс корхтай ялгазе.
И эняльдеманц «Мокшень правдаса» кулезь. Поэтсь кучсесь ярмаконя аф аньцек газетань сёрматфтомс, но и сявондезень эсь лангозонза кучсемань карьхцьненге. Сёрмань отделонь вятись Д.А.Любимкин кучсезе Сочив «Мокшень правдать» эрь номеронц. Волков морафнезе газетать, азонкшнезень колганза эсь мялензон-арьсеманзон, кучсезень од стихонзон, лия произведениянзон.
В.А.Волков сувси репрессированнай поэттнень ёткс. Кода азонкшнезе сонць, пякснезь аш мезенксовок. Колхозонь пуромксса сюцезень баярнятнень, азондозе эсь мяленц-арьсеманц колхозса, велеса порядкатнень колга. А омбоце шиня састь инксонза.  Эста сон покодсь Мокшень Козловкань школаса учителькс, вятезень мокшень кялень и литературань урокнень. Ученикокс теенза ульсть П.К.Торопкин, М.В.Кондрашкин, И.И.Кичкаев и ламонцне лиятне.
—Саме омбоце шиня школав, а учителеньке аш,—лятфнесь войнань и педагогическяй трудонь ветеранць М.В.Кондрашкин.—Коса сон? Мезе мархтонза? Эста ня кизефксне лядсть ответфтома. Ломаттне тянь квалма пельсть корхтамаснон. Меле ни содаськ, што учителеньке тюрьмаса оржа кяленц инкса.  И лиси аф курок. А школать колга корхтамска ашель мезе. Кись теенза сёлкфоль.
Мельганза сявозь и учениконц,   содаф поэтть П.К.Торопкинонь. Сянь  сянкса, мес ашезь макса каршек показаният Василий Афанасьевичень колга.
В.А.Волковонь эряфонц-ащефонц, творчестванц колга минь содатама пяк кржа. Сонь биографияц аш нльне «Писатели Мордовии» биографиянь библиографическяй справочникса, кона лиссь Мордовскяй книжнай издательстваса 2015 кизоня. И тя шарьхкотьф. Хуш и сон пильгонек-прянек мокшель, сёрмадсь тядянь-алянь кяльса, но эрясь Сочиса. А панжезе тейнек сонь, макссь афкуксонь питне творчестванцты содаф учёнайсь, поэтсь и литературоведсь М.Г.Имяреков. «Писательсь и эряфсь» книгасонза, кона лиссь 1992 кизоня Мордовскяй книжнай издательстваса, сон макссь оцю и козя материал В.А.Волковонь колга «Страназе—тя ваймозе монь» лем ала. Поэтсь Сочисовок эрясь пяк ашуста, нужашиса. Но вестевок ашезе кадонда сёрмадомань тевонц.
В.А.Волков кирдсь кеме соткст и Атерень эряйхнень мархта. Гайфнесь телефонца. Тяшнесь сёрмат, кучсесь открыткат. Сёрманзон эса оцю кельгома мокшэрзянь краенцты, Атерь аймакти, Мокшень Козловка (Каргоньжяй) веленцты. Эрь сёрмасонза тяштсь «Мокшень правдать» колга, конань куломозонза сёрматфнезе, кельгозе, сонь смекаензонды-арьсиензонды азонкшнесь лама цебярь мяльда-арьсемада.
Илья Вешкин,
Россиянь Писателень
союзонь член.
29.07.2021 №29

 

Эряфонц лемдезе журналистикати

«Мокшень правдать» 100 кизонцты
Старошайговскяй райононь Сарга велесь маряй гордость цебярь тевса содаф цёранзон и стирензон инкса. Ули кода тянь азомс и Россиянь Журналистонь союзонь членть, «Мокшень правда» газетать ингольдень ответственнай секретаренц В.В.Пьянзинонь колга. Можна мярьгомс, сон сембе эряфонц лемдезе журналистикати, национальнай печатти.

А шачсь Владимир Васильевич 1952 кизонь 1 октябрьста простой служащаень семьяса. Аделазе Сарга велень кафкса классонь школать. Нинге шабакс пяк кельгозе родной кяльса книгань, газетань и журналонь лувондоманц и ульсь оцю мялец варжамс эсь творческяй виензон. 8-це класста сявомок ушедсь васенда «районкав», а сяльде «Мокшень правдав» и лия республиканскяй газетатненди аф оцю заметканянь тяшнема. Няемок Владимиронь сёрмадомань асувонц, редакциятне кучсесть теенза сёрмат, тернезь рабселькоровскяй совещанияс, лия васьфтематненди.
Тя ульсь цебярь школакс од цёрати тонадомс сяда келиста ваномс эряфть лангс, сяда марямонза родной кяльть-валть таньфонц, сяда лац шарьхкодемс народоньконь ваймонц, няемс сонь мазышинц.
1969 кизоня Сире Шайгавонь средняй школать аделамда меле 17 кизоса Владимир Пьянзин сай Саранскяи и макссыне эсь документонзон Н.П.Огаревонь лемса Мордовскяй госуниверситетонь филологическяй факультету. Студенческяй кизотне теенза ётасть пяк вишкста. Тонафнесь тёждяста, кепотьф мяльса, старандась сяда ламоня содамс и сяда крхкаста. Хуш тонафнесь филологокс, но най мяльсонза кирдезе журналистикать. Сяс 1974 кизоня дипломонь получамда меле сась работама «Мокшень правдав». Сон сявфоль редакцияв литсотрудникокс. Прянц маштыкс няфтезе васенце шитненькиге. Курокста ётафтови сяда ответственнай вастс—секретариату, ответственнай секретарти Григорий Ильич Пинясовонди лездыкс. Тя оцю мастерть, пяк цебярь наставникть видеса сонь маштомошиц касондсь шиста-шис. Аф стак пингонь ётазь Владимир Васильевич кемокстави ответственнай секретарькс, «штабонь начальникокс» и тя вастса покоди лама киза мельцек.
Эрь шиня—кизоста кизос! Владимир Васильевич Пьянзин участвовандась эрь номерть анокламаса и нолямаса, сявондемок эсь лангозонза аф ёмла ответственность печатлаф эрь валть инкса.
Эряви азомс сяньге, што ся кизотнень секретариатть лангс прашендсь лама сталмода. «Мокшень правдась», лятфтасаськ, эста лисендсь недяляти колмоксть и оцю форматса. Пяк ни сизефнесть вень-вень учсематне—типографиясь ашезь кенерькшне кочксемс номерти аноклаф материалхнень—наборнай цехть ашесть сатне виенза. А мзярс аф аделави версткась, ответственнай секретарти ащема и учема. Аф шуроста теенза куду сашендовсь тумс пяле веста.
Эряфстонза В.В.Пьянзин родной кяльса лисенди газетати макссь комозьда лама киза. ХХ векть вейхксогемонце кизотнень кучкаста газетаста ётай «Мокша» журналу. Тосонга ульсь ответственнай секретарькс, и стане жа покодсь седикс-ваймокс. И сембе пингть кирдсь кеме соткст мокшень газетать мархта.
Кода аф ужяль, Владимир Васильевич Пьянзин эряфста тусь пяк рана. Теенза ульсь аньцек 56 киза. Сон пяк кельгозе эряфть, эсь мокшэрзянь краенц, эсь шачема-касома вастонянц—Сарга велеть. Минь тячи макссаськ лувихненди В.В.Пьянзинонь азксонц тя мазыдонга мазы уженять колга.
И.ЛУШКИН.
Кувань шуди Санга ляйсь
Веленьконь лемоц Сарга. А ляйняти, кона шуди пачканза, мярьгихть Санга. Тя сяс, мес трванза сёвонюфт и лебонюфт, сан лацот. А нинге кувалманза касыхть сери акшуфт1 , алняня кальнят и исат.
Кда варжакстат веленьконь лангс вярьгак вастста, мярьктяма, Камазей пандть пряста, кона аф сяшкава ни сери (хуш шабакс пингста, мяляфтса, тейне сяда сери васта масторть лангсовок ашель), то сельмозт пови вирь лаца касы калень пора, конань кафцьке ширьганза пиндолфтсазь-вандолфтсазь вальмаснон и жестень пряснон куттне. А ся вирть ёткова кандсыне ведензон ляйняньке, кона пси кизотнень васток-васток коськонди. Мяляфтомган, ляень томбаняста кунцекшнеме карасят и щуканят. Виде, тяни ни кржа мезе кундат.
Ульцядонк кафта. Фкяти сувсихть Алапесь, Кучкавидесь, Вярепесь. Омбоце ульцять лемнесазь Од порядкакс. Васенцети петфнефт эсь лацонь эряма вастт: Алабоконя, кона ёфси ляйть лангса, сире и топаз акшуфнень ёткса; Фтала пеня, а кода ламотне лемнесазь Нахаловка или Воркурня. Сон Камазейть эзда види ширеса, фкя пец пцтай пачкотькшни вирти, мезьда миньцонк аф кржа. Веленьконь сон кружазе колма пяльде.
ТРЯЙ И ЭЖНИ ВАЙМОТ
Андомонк, а сяда ладяй симдемонк, вирсь ушеткшни рана тунда, мзярда аньцек-аньцек кармай солама ловсь. Васенда туйхть шудема уштор веттне, а мзярда ни ловть эзда шамф пакшкятнень эса эвондайхть васень панчфкятне,—келу веттне.
Солась ловсь, ётась васень лямбе пиземнясь, вирьса эвондайхть сура панкне. Куватьс таргави тялода меле, мзярда моли мяльце салу капстатнень-меснень эзда, тя пангсь арси эсь лацонь деликатесокс. Сура пангта меле вирсь аф ламос ваймяй. Кочкайхть вий тишетне, кусторксне, шуфттне. Июнть песта ни эвондайхть васень кстыхне, тяса аньцек кенерькшнек каннемс. Кстыда меле туйхть нормальхне, инезихне.
Тяса аш кода аф лятфтамс Великай Отечественнай войнань кизотнень. Саргаса сёронь касфнемс модатне аф кодапт. Сембе кочкафкясь усксевсь государствать утомс. Фронтти эрявсь лама кши. Сяс ломаттненди прянь тряма и щама-каряма вастокс ляткшнесть эсь пересна и вирсь. Имошне, панкне, почкне, церятне, пяше лопатне—сембось мольсь ярхцамбяленди, а пильгс щамс котцесть од пяшенянь и сяли ленгянь карьхть.
Эряви азомс, ленгада ватксевсь пяк лама. Войнада меле кеветиешка киза од ленгакст стакаль мумс вирьста. Сон эрявсь, кода корхнихть тяни, бартеронди—мезень-мезень лангс полафтомс. Тядязе азонкшнезе (войнать ушедомста теенза ульсь кемонь кизот), кода эсь лангсост аватне и шабатне усксекшнесть ленгат и карьхть Поцинкав (тяфта мярьгихть миньцонк Нижегородскяй областень Починки райцентрати), кона веленьконь эзда нильгемоньшка вайгяльбень вастса. Полафнезь тоса почф, сиволь, вай, модамарь, сал, котф лангс. А мезе тият, ярмаксна ломаттнень ашельхть. Да и улельхть, лангозост лама афолеть рамав, кда базарса буханка кшить питнецоль кафта-колма сядошка цалковай—тняронь получсесть ковти заводса-коса работайхне.
КОЗА ТУШЕНДЫХТЬ ЮРОНЬКЕ
Кода сёрматф топономическяй словарьхнень эса, Саргась эвондась XVIII векть омбоце пялеста. Сон сувафтф эстонь Пензенскяй губерниянь велетнень списказост. «Сар» валсь финно-угорскяй кяльхнень эзда ётафневи кода шяю, пезкс васта. Мордовиянь велетнень колга книганяса сёрматф, кле, Саргась лиссь аф ичкоздень Лемдяйть эзда. Но вов мезсь аф кемокснесы тя мяльть. Велесонк эряйхнень ёткса инь лама Алямкин, Пьянзин, Чалдаев фамилиянь каннида. Виде, улихть и Орлофт, Резаефт, Десяефт, Чудаефт, но эздост кржа. Лемдяйса тяфтама фамилият пцтай аф васьфневихть. А вов Атерень, Ельникань, Зубова Полянань райоттнень эса Алямкитт, Пьянзитт улихть. Сяс афоли ся ширде састь тяза эряма атянь атяньке?
Велесь ульсь государственнайкс. Лиякс азозь, оцязорть кядялоль, а аф помещиконнель. Тястонь эряйхне касфнесть сёра, кирдсть жуватат, тиендсть нуртт и крандаст, куйгорста нолясть кяше, ламотнень ульсть нешксна. Вирське государственнаель. Вирень азорхненди     макссевсть эздонза пакшт. Тяфта, ХХ векть ушетксста нинге и мянь колхозонь пуроптомати (миньцонк сон тифоль 1935 кизоня) Рощать трваса уженяса ульсь Тимоха атянь нешкоперец. Тянемс ся маласа лоткть и эшинять лемнесазь тя ломанть лемса.
А тяни эрьда арьсезефтяма вов мезть колга:  мес юкснесаськ атяньконь и щятяньконь пяк цебярь койснон-иласнон? Тя кизефксть лангс отвечамс фалу стакаль, а тяни сядонга. Бта сембоньке ули, а эрятама аф кода.
Ушедсаськ вов мезть эзда. Инголи (30-це кизотнень самс) мокшень велетнень эса кржа кие прафнесь винада симондемати. Ломаттне сембе вийснон-эрьгаснон макссезь паксянь и кудъётконь тефненди—вдь пцтай сембось тиендевсь кядь вельде. Виде, оцю праздникнень, а синь улендсть ётафневсть сёронь видемать ушедомда инголе али паксянь тефнень аделамда меле и тялонда, велетнень эзга куватьс, кой-мзярда недяляньберьф кайгондсть моротне, кштишендсть оттне и сиретне, нльне ётафневсть тянь коряс инь маштыень илат. И фалу почётсотольхть сире ломаттне, конатнень оттне кулхцондозь. Сиретнень эзда ульсь мезти тонафнемс, ульсь мезе содамс.
Кода ни азыне, стакшитнень винада симондихть пцтай ашельхть. И праздникстонга маштсть копоряма. Мярьктяма, сайхть Саргав Покравс раднятнень эзда кемоньшка-кеветиешка ломань шабрань велетнень эзда, ингольдень кудонь шрать ваксс озайхть эряфкшу и сире алятне. Лядыксне пштетькшнесть мргава-куване. Сускомбяльда башка, тя шрать лангс путнесть четверть водка, конань рамсезь лавкаста, мзяра кельк пива и медень пуре. Щятязе лятфнезе: мзярда  теенза ульсь ни комсь ветиеда лама киза, кафтоль стирьшабанза и якамшкаль ни цёраняц, тя шрать ваксс сонь и лацонзотнень ашезь озафне, кле, нинге оттада. Да и цярканявок исть канне. Симомс сяда  оттненди макссесть аньцек пива и поза. Сянкса ярхцамбяльсь сембонди фкяль: суронь пачат,  пидеф и пуштф сиволь, шяняпт, суронь и люкшя ямксонь пярякат, сиволень пяряканят, алонь пачанят, салу куярхт, капстат-месть, цёмарат, валоньзюлот...
Атятнень мархта фкя шрать пес озсесть сире бабатне—кудботмонь койхнень ванфтысна, а стирьхне и рьвянятне тяфта жа оттнень ётксотольхть. Кда ни зздост кона машты моронь ушедома али вяри вайгялень таргама, сянь весть-аф весть тернезь малазост, и сяка шрать ваксса сон ащекшнесь стяда.
И нинге кой-мезсь юкстаф и юксневи велесонк. 60-це кизотнень ушедомс миньцонк ульсь «Валда ян» промартель. Эсонза покайда аф ламоль—комозьшка ломанель. Синь тиендсть нуртт, крандаст, шарыхть, парьнят, вальмя рамат, шапондсть срупт, аноклакшнесть левож, керсть вирь. Тифснон инкса сашендсть маластонь и ичкоздень                васттнень эзда. Мзярда велесь азфоль «аф перспективнайкс», артельсь срафтфоль-калафтфоль, пяле питнеса мифоль пилорамаське.
«Валда янда» меле кафта-колма кизонь ётазь «Красное знамя» колхозоньке шовордафоль Сире Шайгавонь «Россиять» мархта, вастозонза тифоль отделения. Велеряйхнень ламосна лядсть тонатф тевфтома. Финцне кармасть покодема Сире Шайгавса, нльне ётасть тоза эряма, а омбонцне керсть вирь, шапондсть срупт. Вов самай эста и ушедсь велесь «сиредема».
Стака, пяк стака няемс сянь, кода юмси-арси шачема вастце. И сяка минь, ошева-куване эряйхне, надиятама—веленьке аф кулы, вирень, кели лугань и панчфонь тя уженясь кармай казендема тейнек и уноконьконди валда лятфнемат.
1. Акшу—каль.
08.07.2021 №26

 

Казезе Шкайсь МАЗЫ вайгяльса

Кода-бди лувонь заметка, конань тяштезе Атяшевскяй райононь Сабанчеева велеста ава, и эсонза сон корхтась, бта Лидия Андреевна Руслановась шачсь синь велесост, но нинге ёмланякс тусь Москуву. Тянь колга, тяштсь сон, содайхть сире ломаттне. Мон сяшкава кяжиянь тяштить лангс, што ёрань эстокиге кучемс сёрма редакцияв и сюцемс синь аф видешить инкса.
Но сяльде арьсезевонь: «А вдь тя пяк пара, мзярда тонь сембе лувонттядязь эсь велень ломанькс».
Фкаса авась ашезь эльбяде. Руслановась мордовка и шачсь Пензенскяй областень Лопатинскяй райононь Даниловка велеса, фамилияцоль Лейкина Прасковья Андреевна.
Шачсь 1900 кизонь 27 октябрьста.
А тяни кой-кодама одня. Работань Камешкирскяй районнай газетаса и кельголине краеведениять. Васенце велекс, конань уставайне тонафнемс, ульсь Порзовась (рьвязень велец). Арьсень, што кочкайне семботь колганза и максыне машинкас. Ванондса печатлафть и ся пингть сувась Женя ялгазе. Сон лувозе «шачфозень» и мярьгсь:
—Тяштьфце лувови лац, но юкстайть ся велень инь оцю ломанть.
—Ся кинь?
—Лидия Андреевна Руслановать.
—А сон тяса мезенди?
—А сянди, што ёмлакс пингонц ётафтозе Порзовань Любавцов помещикть ширеса.
Мон тетькине сельмонень. Омбоце шиня тунь вели. Кизефтине матказень тядянц, виде ли ся, што тяса эрясь Руслановась?
—Аделечкась, штоли? А кода мле. Мон сонь мяляфтса...
И кармась азондома тейне, кодама сон ульсь моронь кельги и яла арнесь алаша лангса. Лоткафтсы алашанц аватнень ваксс и мярьги: «Аряда, моратама моронят».
Сяка шиня улень тага кой-кинь ширеса и сембе синь азондсть Руслановать колга лама цебярьда.
Вов кода лиссь тя историясь. Мзярда теенза ульсть кафта кизонят, кулось тядяц, а сисем кизоса лядсь аляфтома. Ёрдаф шабанясь якась велеть келес и кочксесь кши сускомнят. Стирнясь пяк отькорель и нинге эста содась лама мора и морсезень синь коса повсь. Ломаттне ашезь када шабанять и коза афоль моле, макссесть теенза кие алня, кие лофцоня каяй карьхкас, кие андсы пси лямняда.
—Морак, Панечка, «Валенки» мороняцень,—мярьгихть теенза.— И сон морай.
Моли Панечкась курнява и то морай, то аварди. А ся пингть арды тройкаса Порзовань помещиксь Любавцов рьванц мархта. Марязе помещикть рьвац ёмла стирнять авардиень вайгяленц и мярьгсь мирденцты: «Лоткак, мес авардезь морай иднясь?» Ся лоткафтозе тройкать и сергядезе Панечкать.
—Сака сей, стирняй. Мес тяфта авардят?
—Монь, баяр, кулость шачфтыне-касфтыне и тяни аф содаса мезе тиемс.
Любавцевонь рьвац нарнезень идть сельмоведензон, а сонць помещиксь корхтай: «А мес аф сявомс тейнек стирьшабанять!»
Любавцев кеподезе Панечкать каретазонза, озафтозе рьванц ваксс. Ся удерязе иднять, корхтась мезе-бди. Шарфтозе поме-щиксь тройканц, тусь меки Порзовав. Тоса стирнять эшелязь, сеендезь шяярензон, щафтозь-каряфтозь.
Стане Панечкась арась Аделечкакс. Помещикть рьвац максозе тя французскяй лемть и кармась тонафнемонза сонь пианинаса налхкома, тонафнезе и французонь кяльти. Аделечкась курокста семботь шарьхкотькшнезе. Весть од алянцты и корхтай: «Тонафтомак, аляй, ластя арнема».
—Мон тейть, Аделечка, раман цебярь лишме и тон кармат лангсонза арнема.
И курок арнесь велева цебярь алаша лангса. Арды курнява и морай, няи морай ават, малады ваксозост и мярьги:
—Эрьда моратама марса.
И уставай морама. Вайгялец пайгонякс горняй, аватне нарнесазь сельмоведьснон.
...Россияса крьвязсь Великай Октябрьский революциясь. Помещикть кудонц плхтазь. Аделечкась ворьгодсь шачема велезонза. Ки лангса васьфтезь красногвардеецне. Аделечкать аралазе сонць командирсь.
—Мярьгат, маштат морама?—кизефтезе стирнять.
—Рузоннетнень.
—Эрь, уставак.
И Аделечкась уставазе кельгома моронц—«Валенки». Мзярда пачкодсь ся вастти, коса азондови, кода сон веленява кяпе ласькондсь кельгоманц шири, якстерь командирсь таргазе зепстонза руцянянц и уставась нарнема сельмоведензон.
—Петька,—пшкядсь сон.—Тяштьк моронь морсить ярхцамбялень спискати.
—Кулхцонтте, командир ялгась.
Тяфта Аделечкась повсь кавалериянь отряду и красноармеецнень мархта ётазе сембе Саратовскяй губерниять.
—Аделечка,—тя кальдяв лемсь. Кодама-бди пинень лем,—мярьгсь весть командирсь.—Эрь макстама тейть лия лем. Мярьктяма, Лидочка. Тя маряви видекс-мялькс рузкс. Стане Аделечкась арась Лидочкакс.
—Вов тапасаськ контрать и кучтядязь тонь Москуву тонафнема артисткакс.
Но теенза ашезь удала тапамс контрать. Фкя бойса керсефоль шашкаса.
Аделавсь войнась. Стирнять кучезь тонафнема Москуву.
—Кодама мор моратама?—кизефтезе сонь экзаменца комиссиянь председательсь.
«Меж высоких хлебов затерялося...»
Ашель кашт моли. А мзярда сон аделазе моронц, няезе, кода галош пря атянясь нарнесыне сельмоведензон.
—Тейть и тонафнемска аф эряви,—мярьгсь сон.—Архт тяникиге масторланга морсема.
Но тонафнемс сяка савсь и тонафнесь Лидия Андреевна лац. А сяльде сась теенза славась. Сонь моронза кайгсть коса повсь и ломаттне пяк кельгозь, тердсть эсонза. Коса аньцек ашель, а вов шачема-касома вастсонза ашель вестьке, хуш фалу тердсть эсонза. Лядихть мялезонза, кода наругасть алянц и тядянц лангса и уставай авардема. Вдь Любавцев хуш и помещиколь, но ломанць пяк цебярель и киндиньге кальдяв ашезь тие. Лидия Андреевна лувозень синь видекс-мялькс тядякс-алякс. Ашезь яка сон Пензавга. А вов Саратовса ульсь. Сась тоза мирденц, кавалериянь офицерть В.В.Крюковонь мархта. Ся сявсь мархтонза комозьшка кавалерист. И вов Саратовса морсемда инголе Лидия Андреевна мярьгсь мирденцты, штоба сон ардоль Порзовав и усколь тоста баяравань шуфтонянь панчфт. Любавцов, азондомать коряс, ульсь пяк грамотнай ломань, содась лама лия масторонь кяль и эсь имениясонза, садсонза озафнесь французскяй шуфтонят, панчфт. Аделечкась (Лидия Андреевна) пяк кельголезе ся садса ваймосеманц.
И вов концертсь уставась. Моротне шудезь шудесть Руслановать седиста и эрь морода меле сценась пяшкотькшнесь панчфта, конатнень ускозень мирдец. А сон усксь аф кемонь-комозь букет, а пяшксе автобус.
Сембе Советскяй Союзть ётазе Лидия Андреевна и васьфнезь сонь инь маластонь инжикс, тернезь тага и тага. И мзярдовок ашезе кайсе лангстонза мокшэрзянь щамонц.
Войнань кизотнень ётазень сембе фронттнень.
Кулось Лидия Андреевна 1973 кизоня.
Сон кунара аш минь ётксонк, но вайгяленц минь кулендьсаськ сидеста то радиоса, то телевиденияса. Сон эряй ломаттнень ёткса и аф юкстави мзярдовок. Вов тяфтамоль сон эрзянь стирсь.
24.06.2021 №24

 

80 киза газетать мархта

Лятфнемат журналист ялганьконь М.Н.Бычковонь колга
Кунара тя ульсь, эстоньбере ётась аф кржа киза. Но тя васедемась стаки шары прясон, да и, улема, мзярдовок ни аф юкстави. Сёксень фкя шиня мокшень газетаньконь редакцияса ётафтфоль рабселькоронь совещания. Оцю и эрявикс корхтама ульсь тяса. Ламоль пуромксса цебярь мялень-арьсемань, питни предложениянь азыда. Но минь, эстонь од журналисттнень и студенттнень, сембода пяк тусь мялезонк эряфкшу журналистть Михаил Николаевич Бычковонь выступленияц.
—Максови вал «Мокшень правда» газетать собкоронцты Бычков ялгати,—азозе совещаниять вятиец.
Михаил Николаевич панжезе блокнотонц, но, варжакстомок залти, мярьгат, визделгодсь, путозе блокнотонц зепозонза. Залсь пяшксель ломаньда, ламоль ётксост и од сёрмадыда. Улема, сявомок тянь мяльс, сон эсь выступлениянц оцю талеканц лемдезе тейнек, оттненди. Васендакиге конкретнай примерса и фактса няфтезе, кодама ся вийсь—печатнай валсь, кодама оцю трибунась—газетась. Но, кле, аф кажнай ломанць может улемс журналистокс. Редакциянь кенкшне васендакиге панчсевихть сятненди, кинь оржат сельмонза, кинь ули асувоц приметнемс и пачфнемс газетать страницанзонды ломаттнень мяльснон, арьсемаснон, вешфксснон.
—Кда образнайста азомс,—сяда тов корхтась фронтовиксь Бычков,—журналистсь—тя разведчик. А разведчиксь, кода содаф, фалу моли наступлениянь вяти войскатнень инголе, приметнесы фронтть кинц лангста сембе важнайть и тянь колга пачфни штапненди.
Сяльде сон пачфтсь инь цебярь журналист ялганзон колга и тердезень од сёрмадыхнень тонафнемс и сявомс пример синь эздост.
А тонафнемс афкукс ульсь кинь эзда. И, конешна, васендакиге сонцень М.Н.Бычковонь, кода талантливай, козя  опыт мархта журналистонь и национальнай печатень патриотонь.
Эста мон нинге маласта ашине сода Михаил Николаевичень, но сонь статьянзон, очерконзон, фельетононзон, юморесканзон пара мяльса лувондыне, сяс мес сёрматфтольхть седиень токазь, профессиональнай оцю уровеньца. И лувондозь ламотне: и оттне, и эряфкшуфне. Эздост няевсь кельгомась мокшэрзянь крайти, ломанти, оцю мяльсь лездомс кажнайти. Шарьхкотьф, М.Н.Бычковонь лемоц, кода журналистонь, тянемс лац содаф республикасонк.
Но тячи, арьсетяма, аф ули лишнайкс  нинге весть нюрьхкяняста лятфтамс: коса сон шачсь-кассь, эряфонь и трудовой кодама ки ётась.
Инголькиге азсаськ: Михаил Николаевичень, кода и «Мокшень правда» газетаньконь, тядде юбилеец, теенза стане жа топодель 100 киза. А шачсь сон 1921 кизонь 21 ноябрьста Рузаевскяй райононь Куликовка мокшень велеса, сокаень-видиень семьяса. 1940 кизоня аделазе средняй школать и тертьфоль работама литсотрудникокс Кадошкинань районнай газетав. Сяка кизонь ноябрьста сявфоль Якстерь Армияв, служась Литваса. Тоса жа васьфтезе войнать. Содазе, мезе стамсь окружениясь и сянь мархта сотф сталмотне. Ульсь артиллеристокс, пулемётчикокс, санинструкторкс. Войнада меле работась дивизионнай газетаса.
Куду мрдась 1946 кизоня. Сёрмадомань промозонц ашезе када. Ульсь Болдунь, Инсаронь, Кадошкинань райгазетава ответственнай секретарькс, а Сире Шайгавоннеса—редакторкс.
—Но сембода лац маряйне эсь прязень «Мокшень правдаса», коза 1957 кизоня сявомазь собкоркс,—лятфнесь Михаил Николаевич.—Тяса покодемста сашендовсь машинаса, алашаса, ялга туркс-нучк ётнемс марнек Мордовиять, васетькшнень лама цебярь и интереснай ломань мархта. Собкорти эрявсь фалу улемс ломаттнень ёткса.
Поладсаськ азфти: Бычков  Инсарскяй, Кадошкинскяй, Рузаевскяй  и Старошайговскяй райоттнень эса, конат кемокстафтольхть мельганза, шамас и лемс содазень ламоц рядовой труженикнень, пцтай сембе колхозонь и совхозонь бригадирхнень, фермань заведующайхнень, клубонь работникнень. Обжафненди эряскодсь лездомс, оцю тевонь тиихнень шнамс. И кда лятфтамс сембе лепнень, конатнень шназень, кинди лездсь, лисель аф фкя газетнай страница.
Вов аньцек фкя кепотькс. Рузаевскяй райононь Трускляй велеса ульсь «Мазы знамя» колхоз. Хозяйствась ни аф кодамоль, сон сидеста сялневсь, а тястонь оцюнятне коль надияфнесть цебярьгофтомс положениять. Пингсь мольсь, а тефне  стаки исть петнев. И весть тя хозяйстваса улемста Бычковонди фкя ломанць салава пачфтсь:
—Корреспондент ялгась, содасак, мес тевоньке аф молихть?
—И мес?
—Кда ули пингце, ащек велесонк илядти. Тонць няйсак, кода тяста ворьгодихть сембе оцюнятне…
М.Н.Бычков учезе илядть. И няезе: колхозонь председательсь, парторгсь, главнай бухгалтерсь, экономистсь и нинге кой-кит озсесть «газикти» и тушендсть Рузаевкав.
Тянь квалма корреспондентсь сёрмадсь фельетон «Кочевникт», конань  газетаса лисемдонза меле колхозонь председательсь валхтфоль работаста, а лядыкс оцюнятненди мярькфоль эрямс Трускляйса. И тя няевиста лездсь марстонь тевти.
М.Н.Бычков работась аф пелезь, фталу апак варжакснек. Сёрмадсь оржаста, лангу лихнезень афсатыкснень,  сялнезень, визделгофнезень сятнень, кит юмафнезь эсь совестьснон, кода эряви ашезь пяшкотькшне эсь гражданскяй и служебнай долгснон.
Михаил Николаевич тяштсь разнай темас. Но башка мяль шарфнесь военнай тематикати, од ломаттнень патриотическяй воспитанияснонды. Теенза удалась «мрдафтомс» Мордовиянь ся ломаттнень лемснон, конатнень квалма республикасонк кивок ашезь сода: Советскяй Союзонь Геройхнень А.П.Рубцовонь, П.Ф.Федотовонь и лиятнень. Сонь публикациянзон вельде республикасонк тёжятть ломань кармасть содама ламоц фронтовикнень подвигснон колга.
Киньге ашезь кадонда озадонь седихть  Бычковонь материалонза национальнай темас. И тя аф стак. Синь эсост кепсевсть инь таколфты и пичефти кизефксне. Аф секрет, ётксонк ульсть и нинге улихть стамот, конат сёпондсазь эсь национальностьснон, виздихть тядянь-алянь кяльса корхтамаснон и стак тов. Михаил Николаевичень целецоль—сяда келиста азонкшнемс родной кяленьконь, эсь культураньконь, коеньконь-иланьконь колга, мокшень ломанть эряфса синь эрявиксшиснон колга. Лиякс мярьгомс, семботь тиендезе сянкса, штоба лездомс нацияньконь сонцень шамаликонц ванфтомаса, кялень и культурань сярятьфоньконь лоткафтомаса, ваймонь козяшиньконь касфтомаса.
М.Н.Бычковонди удалась сяськомс лама конкурсса. 1967 кизоня сон арась лауреатокс конкурсса, кона лемтьфоль Польшать 1000 кизонцты, тернефоль кафта недяляс Польшав, няезень тя странать лама ошензон. Васетькшнесь тостонь рабочайхнень, студенттнень, интеллигенциять мархта. Азондсь Мордовиять колга. Корхтась мархтост поляконь кяльса, конань лац содазе. Ульсь лауреатокс Мордовиянь МВД-нь конкурсса «Служба милицейская» моронц инкса, конанди музыкать сёрмадозе странань содаф композиторсь Александр Аверкин. Бычковонь стихонзон лангс музыка сёрматкшнесть композиторхне Г.И.Сураев-Королев, Г.Павлов, Н.Кошелева, Н.Митин.
Нинге вов мезть колга аш кода аф лятфтамс. М.Н.Бычков вестевок ашезь юксне ся ломаттнень колга, кит мезьса-аф мезьса лезнесть теенза, кит марса покодсть мархтонза. Тяфта, сон лама лямбе вал азондсь «Мокшень правдать» ингольдень главнай редакторонц В.М.Сурковонь колга. Сонь пингстонза, кле, мокшень газетась арась журналистонь анокламань школакс. Василий Михайлович ульсь ломанць пяк честнай и порядочнай, мзярдовок ашезь мяндев кодамовок оцюнянь инголе, кда няезе, што видешись сонь. Тяконди тонафтсь и тяконь вешсь лиятнень ширдевок.
Стане жа аньцек шнамань валса Михаил Николаевич кунцезень  работас коре ялганзон А.П.Тяпаевонь, В.Г.Шеяновонь, Ю.Ф.Кузнецовонь,Г.И.Пинясовонь,П.Т.Вельматовонь, М.С.Моисеевонь и лиятнень лемснон, кода перань оцю мастеронь и пара ломанень.
М.Н.Бычков сембе эряфонц лемдезе  национальнай печатти, сонь виияфтоманцты. 80 лама киза кирдсь кеме соткст мокшень газетаньконь мархта. Нльне тумок пенсияс, сон ёфси ашезе кадонда кядьстонза ручкать, сёрмадсь, сёрмадсь и сёрмадсь, кеняртьфнемок «Мокшень правдань» и «Мокша» журналонь лувихнень эсь творчестванц мархта.
Стака корхтамс Михаил Николаевичень колга ётай пингста. Сон бта тянемс ётксонк, бта седикс-ваймокс корхни мархтонк, шутендай, максси пара советт. Кле, фалу эряда марняса, ладязь, аньцек марса сяськовихть сембе стакатне-сталмотне.
Иван Лушкин.
20.05.2021 №19

 

ТОНАФТОМАЗЬ «ЩАВАНЬКЕ»

1947 кизоня, июльста,  Ковылкинав, партиянь райкому, сась распоряжения: нолдамс работаста редакциянь ответсекретарть Радинонь и прважамс ВКП(б)-нь обкому. Тя пингть кочксесть курсантт областной партийнай школав и сяс оцю мяльса  аноклань тоса  тонафнема.

 

Но кода ацергодсь седиезе, мзярда обкомса азозь: тердедязь аф тонафнема, а работама «Мокшень правда» газетав. Нолдаф прят аськолянь Печатень куду, аф мяль вельде сувань редакторть Горькинонь шири. Андрей Дмитриевич корхтась-тись мархтон, шназе фкя заметказень, конань пялес мокшекс, пялес рузкс сёрмадозь кучсине ковда инголе Ковылкинаста, и сёрмадсь приказ: путомс монь велень хозяйствань отделонь заведующайкс.

 

Виденц азомс, васенда дивандазевонь: пяк ни оцюкс, аф содамошинень коряс ульсь тя должностсь. А меколи содайне, мезьса тевсь. Войнань пингть мокшетнень газетасна лисендсь шуроста и ёмланяста, работась перьфканза кафта-колма ломань. А тяни  кармась лисендема сяда сидеста, а журналистт ашельхть. Тяконь лангс сонць редакторсь Горькин срхкась тонафнема Москуву, высшай партийнай школав. А обкомса мярьгсть теенза: редакцияв муят сатомшка работник—эста тонафнема нолдатядязь. И кармась Андрей Дмитриевич вешендема райоттнень эзга журналистт, конатнень анкетаса сёрматф «мордвин». Тяфта монга повонь «Мокшень правдав». Кода тяни няйса, Горькинонди ашель месть надиякшнемс монь лангозон: марса тейнек афи савсь работамс. Эстокиге  сон сявсь отпуск, а сяльде тусь Москуву тонафнема.

 

 
14.05.2021 №18

 

МАШТСЬ СОНЦЬ, ТОНАФТСЬ ЛИЯТНЕНЬ

Семен Аверьянович Самошкин шачсь Зубово-Полянскяй райононь Тархан Потьма велеса, мокшень оцю семьяса. Аньцек шабадост кафксоль. Трудовой биографиянц ушедозе учителькс. Васенда работась Валовскяй начальнай школаса, сяльде—Булдыгина велень сисем классонь школаса. Ульсь Зубово-Полянскяй рононь инспекторкс, аф ламос покодсь комсомолонь Ширингушскяй райкомса. 1938 кизоня Семён Аверьянович ётась Саранскяи. Работась корректоркс, литсотрудникокс, «Якстерь галстук» пионеронь журналса редакторкс.

 

Великай Отечественнай войнань кизотнень лафча шумбрашинц сюнеда фронту ашезь сяве. Сон седикс-ваймокс покодсь «Мокшень правда» газетасонк. Васенда ульсь пропагандань и агитациянь отделонь вятикс, сяльде—ответственнай секретарькс и кизода лама пинге пяшкотькшнезень редакторонь тефнень…

 

Трудонь кельги, покоень аф содай тя ломанць заняфоль оцю тевса войнада мелевок: ульсь главнай редакторкс и председателень заместителькс Мордовскяй радиокомитетса, тоста ётафтфоль меки «Мокшень правдав». 1952 кизоня кармась заочна тонафнема аспирантураса, конань шумордазе 1955 кизоня. Сёрмадсь мокшэрзянь идень литературать колга кандидатскяй диссертация. Филологическяй наукань кандидатонь лемонь получамда меле вете кизот работась преподавателькс Н.П.Огарёвонь лемса университетса, аноклась журналистт. Маштсь сонць, тонафтсь лиятнень.

Тяда башка, С.А.Самошкин нолдась стихонь и очерконь лама книга. Оцюфт сонь сатфксонза и переводчиконь тевса.

 

Алува печатласаськ Семён Аверьяновичень лятфнеманзон «Мокшень правдаса» покодеманц колга.

 

22.04.2021 №15

 

ПИСАТЕЛЬ, КОНА МАШТСЬ ПЕЕТЬКШНЕМА


 

 
 
 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин