Ангинаса сярядемста инь цебярь средствась—прополисонь пакшкясь, кона путневи щекать фталу венцлангс. Курокста лезды аньцек цебярь качествань прополиссь. Тяфтамось бта пидесы курга потмоть и аф ламода шуфтомфтсы кяльть.

Прополисонь пяштешка пакшкятне рямшамат валом. Шиньберьф порендема 5-шка грамма прополис. Кафта шида меле ангина бта и ашель.

 

 

Кда эвондакшнихть эсонт копт (фурункулат), сявода фольга, вадендесть постнай вайса и путость копть лангс. Сон пчкяй.

«Шумбрат иттне—шумбра нациясь». Тя шарьхкотьф кунара ни. Сяс марнек странаса здравоохранениянь системати сувафневи лама одняда, мезсь лезды араламс од поколениять тя или тона урматнень эзда.

Мекольдень кизотнень Россияса кассь шабатнень лувкссна, конатнень аф шумбрат пичемарьсна. Статистикань даннайхнень коряс сотцеви, што 1991-2000 кизотнень «острая почечная недостаточность» урмаса сярядихнень лувкссна ульсь 13,5 процент миллион идень населенияти. Кемонь кизоста тя цифрась, кода аф ужяль, ламода кассь и пачкодсь мянь 44,9 процентс. Аф кржа тяфтама урмаса муцси шабада Мордовиясовок. Тяда инголе пчкафтомань кувака процедуратне, конатнень эрявсь етафнемс кизоти несколькаксть, тиендевсть Москуса или лия регионца. Маластонь пингть тянь ули кода тиемс Саранскяйса. Сексенда республиканьконь столицаса панжеви идень Диализнай центра.

«Создание детских диализных центров» проектсь етафневи эряфс миньцонк мелянь сексеста. Проектть арьсиец «Единая Россия» партиясь. Тяда башка, оцю лезкс максси «Мы вместе» благотворительнай фондсь. Кода азозе 2№ республиканскяй идень клиническяй больницянь главнай врачсь, проектонь кураторсь О.М. Солдатов, республикаса идень диализнай центрать панжеманц колга мяльсь эвондась нинге кизода инголе, мзярда Саранскяйса панчфоль Гемодиализонь профильнай центра. Тя клиникаса пчкафневсь острай почечнай недостаточностсь эряфкшу ломаттнень еткса. Эста эвондась кизефкс: а кода улемс шабатнень мархта, конатненди стане жа эряви тяфтама медицинскяй лезкс? Эвондасть мяль, 2№ республиканскяй идень клиническяй больницять видеса панжемс диализнай центра иттненди и подросткатненди.

Тяни центрась пцтай анок ни примамс васенце пациенттнень. Тяса ладяф медицинскяй оборудованиясь тиф Германиянь «Фрезениус» компанияса. «Искусственная почка» тяниень пингонь аппараттне тиендьсазь пичемарень функциятнень. Васендакиге синь аруяфнесазь верть ся веществатнень эзда, конат кандыхть зиян сембе организмати. Кода азозе О.М.Солдатов, острай или хроническяй почечнай недостаточностсь сидеста вяти пичемарень пересадкати. А эрявикс донорскяй органонь вешемась заняй аф кржа пингта. Эста пичемарьхнень работаснон эсь лангозонза сявондьсы центраса ладяф тячиень инь од оборудованиясь.

Диализнай центраса работаманди улихть эрявикс специалисттка. Тяса кармайхть заняфт колма врачт и вете медсестрат.

Идень диализнай центрась Саранскяйса анок примамс пациенттнень. А минь надиятама, што эздост ули кода можна сяда кржа.

Капстась козя аминокислотаса, эсонза лама минералда и минеральнай веществада. Сон козя Д, В1, В2, В3, В6, В9, С, Р, РР, Н, К витаминца и сембода пяк U витаминца, конань лемнесазь «противоязвеннай факторкс».

Капстань соксь лувондови противомикробнай и противогрибковай средствакс.

Капстаса ули виннокаменнай кислота.

Салу капстась лезды касфтомс пищеварительнай сокть повареннай салть и пряносттнень вельде.

Содаф, што салу капстаса лама С витаминда, мезсь араласы ломанть, сембода пяк тялонь пингть, инфекционнай урмада. Тяда башка, витамиттне, конат улихть капстаса, кемокстасазь мялямть.

 

 

Кда кашкомсь или юмась вайгяленте, лезды тяфтама симомбяльсь: пурьхкянь сокть шорямс лямбе лофца мархта (1:3 пялькс). Симондемс пялень стакан колмоксть шити. Вайгяльсь эвондай омбоце шиня ни.

 

 

Палаксонь тяльмоть валомс лакай ведьса и парямс мархтонза баняса—тя лезды пчкафтомс карязонь и копорень урматнень, ревматизмать.

Столовай куцю мелкайста керсеф палаксонь и кумбарав лопатнень лакафтомс стакан ведьса и кадомс 30 минутас. Штаф шяярьхнень оргалямат тяфтама отварса—тя кемокстасыне шяярьхнень юрснон и шяярьхне лоткайхть пяяремда.

Палакс лопаста витаминнай чайсь ладяй сембонди кода профилактическяй и тонизирующай средства. Несколька палакс валомс стакан лакай ведьса. Симондема тяфтама чайда пялень стакан колмоксть шити.

 

 

Шовамс 2 столовай куцюфт хозяйственнай сапонь, каямс лофца (штоба вельхтяволь сапонць). Пидемс снярс, мзярс аф лиси эмульсия. Кельмофтемс, вадемс сяряди васт­тнень.

 

 

Эрь кизоня мирса 40 миллион ава тифни аборт. Мяляфтома, што тя операциясь сидеста канни зиян шумбрашити. Ламоц аватне тяда меле «кайсесазь» идьснон или ефси лядондыхть идьфтома.

Тяда башка, абортта меле сидеста урмаськоткшнихть маткась, маткань трубатне, яичникне, ушеткшнихть воспалительнай процессне. Кой-коста колсеви менструальнай циклась.

Инь пельксокс лувондови аф больницяса тиф, а салавань (криминальнай) абортсь, сяс мес тяда меле аф лоткафтови шудемда версь, сепсис—верти пови инфекция, лия урмат, конатнень эзда авась может куломс.

Тяниень пингть авань консультациятнень и гинекологическяй больницятнень эса тиендеви емла сроконь вакуумнай аборт (отсасывания). Тя методсь сяда цебярь. Пингстонза аф токсеви маткась и лия оргаттне. Операциясь етни сяда курокста, аф тии кальдяв шумбрашити.

Операцияда инголе молема гинекологти и етама обследования. Вакуумнай абортсь аф тиендеви острай инфекционнай и воспалительнай урматнень пингста. Кда синь улихть, васенда савихть пчкафтомс.

Абортта меле ванфтома эрявикс режим: цебярьста утцемс, якамс ару кожфкава, ярхцсемс калорийнай ярхцамбяльда. Аф эряви кельмофневомс, эшелякшнемс эрьхкса, ваннайса, якамс баняс. Шташендомс эряви лямбе душ ала и аф юкснемс личнай гигиенать колга.