Поиск по сайту:

Архив

Наши мокшанские сыновья и дочери

БИОГРАФИЯСТА СТРОЧКАТ...

Захар Фёдорович Дорофеев шачсь 1890 кизонь 24 мартста Салазгорь оцю велеса. Мокшень поэт, учитель, кяльста кяльс ётафты, фольклоронь исследователь, историк, этнограф, общественнай деятель. Мокшень литературать ушедыец. «Валда ян» букварть автороц. Сонь вельденза Мордовияса и Пензенскяй областьса ульсть панчфт национальнай школат и училищат.

17.05.2019

ЭРЬ МОРОЦ ЭЖДИ ВАЙМЕ

Мордовиянь Заслуженнай артисткать Любовь Князьковать лемоц республикасонк содаф пяк лац. Стака мумс стама ломань, кинди афоль кельгов сонь творчествац. Лисемок сценать лангс, артисткась васенце минутаста ни салсесы ваныть мяленц седиста-ваймоста моли вайгяленц, эсь мазышинц и публикать инголе прянь вятеманц мархта. Сон, мярьгат, нолни ши валдоня—лямбе вайме и паронь арьси, эрь кулхцондыть-ваныть мархта мушенды эрявикс кяль, кажнайть токасы седиенц. Природать мархта максф асушись и оцю трудса-вийса сатф профессионализмась лездсть артисткати сатомс Мордовиянь фкя инь цебярь морсиень лемть.

Сят, кинди удалсесь корхнемс Любовь Князьковать мархта, лац содасазь, кодама сон пара и панжада вайме ломанць. Фалу весяла, эрьгав, сельмонза крфайхть марнек перьфпяльти оцю кельгомаса.

Аф кунара Любовь Петровна васьфтезе эсь юбилеенц. Тя и арась туфталкс артисткать мархта од васедеманьконди. Седикс-ваймокс корхнемста морсись лятфтазе идькс пингонц, творческяй кинц ушедоманц, азондсь сай пингонди арьсеманзон колга.

17.05.2019

«ЭСОН УЛИ ОЦЮ КЕЛЬГОМА ЭРЯФТИ»

28 апрельста эсь шачема шинц васьфтезе мокшэрзянь содаф языковедсь С.З.Деваев. Теенза топодсь 88 киза. Мокшалять эряфонц оцюшка пяльксоц сотф мокшень кяльть тонафнеманц мархта. Колмогемонь ветие киза Семён Захарович работась М.Е.Евсевьевонь лемса Мордовскяй государственнай педагогическяй институтса, а пенсияс лисемдонза меле и тячиень шити самс заняф научнай работаса. Ня шитнень Семён Захарович ульсь редакциясонк и пара мяльса отвечась корреспондентоньконь кизефксонзон лангс.
—Семён Захарович, пара улель, кда азондолеть аф лама эсь колгат, коса шачеть-касоть, лятфталить идькс пингцень.
—Эряфонь крнязень орадомац ушедсь Зубово-Полянскяй райононь Сире Потьма велеста. Семьясонк колма шабатольхть. Браднень еткста мон ёмлась. Аляньке, Захар Филиппович, тяка веленнель, ётазе Великай Отечественнай войнать, повсь пленц, а войнать шумордамда меле, кода и сембе пленнайхне, прважафоль Колымав. Мзярс мольфтевсь следствия и алязе кирдевсь тюрьмаса, тядязе, Александра Петровна, работцесь Москуса. А сяс касфтомазь атязе и бабазе. Атязе, Филипп Ермолаевич, стане жа войнань участник, етазень Васенце мировой войнань толу-качаму китнень, лама пинге кирдевсь пленца Германияса.

30.04.2019 №17

ЭРЯФОНЬ КИНЦ УШЕДОЗЕ МАЛЫШЕВАСТА

Юрий Фролович Юшкинонь лемоц лац содаф республикасонк. Мокшалясь лама киза вятезе Мордовиянь Культурань министерствать, меле—Республиканскяй архивнай службать. Юрий Фролович путсь оцю путкс республикань нароттнень историко-культурнай козяшиснон, самодеятельнай народнай творчествать ванфнемаснонды. Сон Мордовиять культуранц колга аф фкя сборниконь автор, «Саранск-Ботевград», «Маршал Ахромеев: роковой август», «Солдатские письма», «Михаил Девятаев», «Письма из войны», «Недаром помнит вас Россия…», «Маршал Ахромеев» и лия книгатнень аноклайснон эзда фкясь.

28.03.2019 №12

Сире Шайгавса

—Тоса обезьянатне комотнихть шуфттнень прява, ломаттнень лангс сельгондихть,—корхтась сяда тов Сараев.—Индияса ули каста, коса ладяф: эрь кафта алятненди—фкя рьвя. И эряйхть ладязь.

Сяльде корхтазевсь Девятаев. Мон, кле, пцтай эрь кизоня улендян омба масторса. И сань, кле, мяльти: хуш тоса ланга-лунга ванозь и эряфсна пиндолды, а миндедонк пара васта аш. Западнай странатнень эса тяни кожфське пачк суваф качамса, симомс ведське ярмак лангс макссеви. —Михаил Петрович, тон васетькшнеть и улеть пара ялгакс Отечественнай войнань содаф летчикнень Кожедубонь, Маресьевонь, Покрышкинонь мархта... Синь колгаст азонкшнеть, тяшнеть. А нинге кодама содаф летчиконь мархта васетькшнеть или ялгалеть?

28.03.2019 №12

ЖУРНАЛИСТ, РЕДАКТОР И ПИСАТЕЛЬ

Николай Иванович Учватов—мокшень содаф журналист, редактор и писатель. Сонь перанц алда лиссть кафта роматт, вете повестть, нолдась стихонь аф кржа сборник. А мзяра сон сермадсь статьяда, очеркта, зарисовкада, репортажда, рассказда нльне лувомска стака. Шачсь Н.И.Учватов Рузаевскяй райононь Левжа мокшень велеса 1935 кизонь 1 январьста. Тонафнема ушедсь рана—6 кизоса. Хуш и стакаль эстонь эряфсь, Коля Учватов тонафнесь пяк лац. Сисем класснень аделамда меле сай Саранскяи и поступай тонафнема медучилищав, но мялезонза медиконь профессиясь ашезь ту. Сяс кадсы тя училищать и сай тонафнема Рузаевка ошень 15№ железнодорожнай средняй школав кафксоце классу. Средняй школать аделамда меле фкя киза работась эсь колхозсост, а 1954 кизоня ушедсь тонафнема Мордовскяй педагогическяй институтонь физико-математическяй факультетса. Тяса тонафнемста кармась васенда тяшнема заметкат, а сяльде—расскаст и стихт газетатненди и журналхненди.

14.03.2019 №10

ТЁЖДЯСТА МЕЗСЬКЕ АФ САТНЕВИ

Аф кунара Россиянь и Мордовиянь Заслуженнай юристть, РФ-нь Прокуратурань почетнай работникть, МР-нь ингольдень прокурорть, мокшалять П.Е. Сенькинонь лиссь книгац. Книгась сембоса салси мяль. Кяльсь тёждя, лац шарьхкодеви и оцюфненди, и ёмлатненди. «Жизнь в строчках»—тя автобиографическяй очерк. Авторсь эсонза азонды эсь аф тёждя, но павазу одкс пингонц колга, сянь, кода тонафнесь школаса, мезень колга арьсекшнесь, кода лезнесь тядянц мархта алянцты, кода мольсь-аськолясь эряфонь киге-янга, кода кассь-кеподсь служебнай куцеманява.

28.02.2019 №8

МОРОСЬ ЭРЯЙ СОНЬ ВАЙМОСОНЗА

Мокшавать Нина Михайловна Прынзинать сембе эряфоц сотф мороть мархта. Сон, кода мяляфтсы эсь прянц, фалу морась. Морось эряй ваймосонза, и бта ару лихтибрянь ведь лаца, мазы вайгялец максси эрьгя лиятненди. Ару лихтибрякс теенза арась шачема-касома уженяц—Ковылкинскяй райононь Сире Пшень велесь. Тяни тоса пяк сидеста азорондай сетьмошись, а Нина Михайловнань шабакс пингстонза ульсь меколанкт: сетьмошить колселезь горняй пайгонякс кайги мокшэрзянь моротне, гармониянь коряс кштиматне. Тя сембось емластокиге кельговсь Нина Михайловнанди.

28.02.2019 №8

ЭРЯФОНЦ ЛЕМДЕЗЕ ЖУРНАЛИСТИКАТИ

Данил Александрович Любимкин шачсь 1937 кизонь 8 мартста Ковылкинскяй райононь Ёжка мокшень велеса. Тястонь средняй школать аделамда меле работась эсь велень библиотекасост библиотекарькс. Аф лама пингонь етазь сай Саранскяи и поступай покодема «Мокшень правдав». 1962 кизоня примафоль СССР-нь Журналистонь союзу. 1970 кизоня заочна шумордазе Мордовскяй госуниверситетонь историческяй факультетть. Сермань отделть вятемста Данил Александрович газетать перьф маштозь пуропнезень рабселькорхнень, мушендсь газетав сермады и газетань серматфты од ломатть. Сон фалу мольфтсь и общественнай оцю работа.

21.02.2019 №7

СИНЬ ПЯШКОДЕЗЬ ИНТЕРНАЦИОНАЛЬНАЙ ДОЛГСНОН

15 февральста топоди 30 киза ся пингста, кода Советскяй войскатне лихтьфтольхть Афганистанть территорияста. Войнась, конань официальнайста примафоль лемнемс «интернациональнай долгонь пяшкодемакс», мольсь вейхкса кувака кизот. Тя пингста советскяй войскатне примасть участия 416 плановай боевой операцияса. Од ломаттне тушендсть служама армияв, и ламоц тядятне-алятне ашезь сода, што церасна прважафт ичкоздень Афганистану. Ламотне, пяк ламотне ашесть мрда тюремань паксяста, прасть душманонь пулятнень ала. Но синь, ёфси од цератне, мекольце минутас молемс аф пелезь, афкуксонь геройкс пяшкодсть воинскяй долгснон эса. Синь повондсть засадас и палсть БТР-хнень эса, нилендезь пульть пулеметтнень ляцендемаснон ала, эсь эряфонь аф ужяльдезь тарксезь тюремань паксяста ранендаф ялгаснон, лядондсть ськамост врагть каршес, кяшендемок эсь мархтост ялгаснон меки потамаснон. Тейнек, тячиень од ломаттненди, арьсемска стака, мезе савсь няемс-кирдемс советскяй солдаттненди. И аньцек кой-конашкада ся кизотнень мархта содафокс тиендьсамазь войнань участникнень лятфнемасна.

14.02.2019 №6

НОВОСТИ

«МОКШЕНЬ ПРАВДА»—УЦЕЗ (ЛЬГОТНАЙ) ПИТНЕСА

Кельгома ялгат! Пара мяльса теенть пачфнесаськ, што Мордовия Республикань почтовай связень сембе отделениятнень эса 16 майста сявомок 26 майти молемс ётафтови «Подпискань Всероссийскяй декада». Тя пингонди 20 процентта кирьфтави «Мокшень правдати» сёрматфтомать питнец. Панттада аньцек 289 цалковай 76 трёшник и пяле киза карматада получсема родной кяльса лисенди газета.

17.05.2019

ЛЯМБЕ ВАСЕДЕМА РЕСПУБЛИКАНЬ КУДСА

Мордовиянь Оцюнясь Владимир Волков ётафтсь Республикань кудть параднай Колоннай залсонза войнань ветераттнень и тылонь труженикнень лемс праздничнай приём.

17.05.2019

НАРОДТЬ ПОДВИГОЦ АФ ЮКСТАВИ

Репортаж Мордовиять столицаса Победань шить честьс ётафтф парадста и праздничнай шествияста

Сизьгемонь ниле киза минь эрятама и работатама, касфнетяма итть мирнай менель ала. Сизьгемонь ниле киза валдопнесы странаньконь Великай Отечественнай войнаса сатф Победать валдоц. Стакаста сон сатовсь тейнек.

Республиканьконь столицац, Саранск ошсь, ваясь якстерь кумацть и сянгярять потмос. Перьфпяльге кайги музыка, моравихть военнай и тяниень пингонь моротне, конат азондыхть Великай Отечественнай войнаса воиноньконь подвигснон колга.

Сембе ширде аськоляйхть ошень эряйхне Победань площадьса войнаса шавфненди памятникть ваксс, штоба нинге весть няфтемс-азомс: кивок апак юкстак, мезевок апак юкстак!

17.05.2019

Эряскодода!

Стаки моли 2019 кизоть омбоце пяленцты минь тинь мархтонт «Мокшень правда» газетаньконди сёрматфтомась. Нюрьхкяняста няфтьсаськ, коса и кода ладяф тя тевсь. 30 апрельти сембода лама мокшень газета сёрматф Ковылкинскяй районца. Тястонь мокшень ломаттне кельгсазь родной кяльса лисенди газетать и оцю мяльса лувондсазь и тяштьфнесазь сонь.

13.05.2019

КАЗЬФТ ПРОФЕССИЯС КОРЕ СЕМБОДА ЦЕБЯРЬХНЕ

Васенце маень карша, 30 апрельста, Республикань Кудса чествовандафтольхть «Профессияс коре инь цебярсь» республиканскяй конкурсонь лауреаттне. Казьфнень ётксотольхть промышленнай и велень хозяйствань предприятиянь, ЖКХ-нь работникт, воспитательхть, библиотекарьхть, продавецт, почтальотт, социальнай работникт. Торжественнай пуромксть вятезе Мордовия Республикань Правительствать Председателец В.Ф.Сушков.

13.05.2019

Владимир Волков ётафтсь рабочай васедема Саранск ошень округонь мэрть Пётр Тултаевонь мархта

Мордовиянь Оцюнясь Владимир Волков ётафтсь рабочай васедема Саранск ошень округонь мэрть Пётр Тултаевонь мархта. Ванондовсть кизефксне, конат сотфт ошень хозяйствать и инфраструктурать виияфтомаснон мархта.

13.05.2019

Мордовия Республикань Оцюнять В.Д.Волковонь

Кельгома соотечественникт! Кельгома ветератт, Великай Отечественнай войнань участникт, тылонь труженикт! Седи ваксста поздравляндатядязь тинь сембе народонь праздникть Великай Победать мархта!

13.05.2019

Тундань и трудонь праздникс Саранскяйса пуромкшнесь пцтай 5 тёжятть ломань

1 майсь—Тундань и Трудонь праздниксь—келиста васьфтьфоль-ётафтфоль Саранскяйса. Ошеряйхне кельгсазь и учендсазь тя праздникть. Шобдавакиге ломаттне наряжафста эряскодсть праздничнай шествияс, кона ушедозе эсь кинц Святой Праведнай воинть Феодор Ушаковонь Кафедральнай Соборонц маласта. Ламонцне кирдсть кядьсост флакт и транспарантт. Шествиять пуроптыец—Мордовия Республикань профсоюзонь Федерациясь.

13.05.2019

Полафтови пенсиятненди социальнай доплатань максомась

Ня шитнень Мордовия Республикать эзга Россиянь Пенсионнай фондть Отделениясонза ётась пресс-конференция, конань вятезе Управляющайсь В.И.Василькин.
Пуромксть панжемста Владимир Ильич азозе, што аф кунара Россиянь Пенсионнай фондсь тись итокт 2018 кизонь работать коряс ПФР-нь инь цебярь территориальнай органть кочкаманкса конкурсти. Мордовиянь Отделениясь азф инь цебярькс Приволжскяй федеральнай округса и сувафтф ПФР-нь фкя инь цебярь отделениятнень лувксс Российскяй Федерацияса.
Сяда тов пачфтьфоль аф работай пенсионерхненди, конатнень пенсиясна регионца ладяф прожиточнай минимумда кржа, социальнай доплататнень максомаснон полафтоманц и пенсияснонды индексациянь тиемать колга. «Государственнай социальнай лезксть колга» и «Российскяй Федерацияса прожиточнай минимумть колга» федеральнай закоттненди сувафтф полафткснень мяльс сявозь прожиточнай минимумда кржа пенсияти индексациясь тяни тиеви тяфта. Васенда аф работай пенсионерть доходоц пачфтеви прожиточнай минимумть лувксс пенсияти социальнай доплатать вельде (кда сявомс Мордовиять, пенсиясь касфтови 8522 цалковайс) и аньцек тяда меле тиеви индексация пенсияти и эрь ковонь ярмаконь выплататненди (кда тяфтамот пандовихть пенсионерти). Тяфта, индексациять вельде сатф суммась кармай сяда оцю регионца ладяф прожиточнай минимумть коряс. Мордовияса пенсиятнень перерасчетсна тиеви майста ни. Республикаса прибавка получайхть 24 тёжянь пенсионерсь.

30.04.2019 № 17

Владимир Сушков ульсь Кочкуровскяй районца

24 апрельста Мордовиянь Правительствать Председателец Владимир Сушков ульсь рабочай поездка мархта Кочкуровскяй районца, коса ванозень «Агрофирма «Норов» ООО-нь хозяйстваса тундань паксянь тефнень мольфтемаснон. Тячи агрофирмась лувондови бюджетонь тии инь оцю предприятиякс Кочкуровскяй районца: тяса тиф 500-ть малава рабочай васта.
—Аграрийхне аделазь ни яровой серонь культуратнень видемаснон. Очередьса—тишетне, тяфта жа эряви одукс видемс 1200 гектар лангса озимойхнень, конат тядде прендасть. Предприятиясь марнек обеспечендаф удобренияса и эсь пингстонза видемать аделаманц инкса ГСМ-са,—отмечазе «Агрофирма «Норов» компаниянь группать правлениянц председателец Александр Поздняков.

30.04.2019 № 17

Учредительхие:

Мордовия Республикань Государственнай Собраниясь и Правительствась;

Главнай редакторсь: И. С. Лушкин

Сайт разработан в студии web-дизайна
Филиал в Республике Мордовия ОАО "ВолгаТелеком".