Поиск по сайту: 
 
Наши мокшанские сыновья и дочери
Свежий номер
Тема дня
Национальная тематика
Культура
Обратная связь (Газета - Читатель)
В Госсобрании РМ
В Правительстве РМ
События
Демография
Здоровье
Мокшане о мокшанах
Как жили и живут мокшане
Ветеранам о ветеранах
Молодежный клуб
Наша усадьба
Наука и жизнь
Спорт
Национальный проект
Образование
Доступное жилье
Благотворительность
Поговорим о создании единого литературного мордовского языка

Архив
 сентябрь 
 2010 
пн вт ср чт пт сб вс
  12345
6789101112
13141516171819
20212223242526
27282930   

 
 

 
Наши мокшанские сыновья и дочери

Лятфнемат Г.Я.Меркушкинонь колга

МЯЛЯМСЬ КОЛГАНЗА ФАЛУ ЭРЯЙ ЛОМАТТНЕНЬ СЕДИСА-ВАЙМОСА
 
Лувондса прязень павазукс аф аньцек сяс, мес Великай Отечественнай войнаста 1950 кизоня мрдань шумбраста-тазаста, но и сяс, мес эряфонь кибрясон сидеста васьфнень еню, пара вайме ломатть, конатнень инкса тяни маряй гордость марнек Мордовиясь. Лемсна сембе пингс лядсть историяв. Тя Г.Меркушкинонь, М.Девятаевонь, А.Матросовонь и лиятнень поколениясна. Нинге мялезе лятфтамс емла Мордовияста Советскяй Союзонь 107 Геройхнень поколенияснон квалма.
 
Тячиень материалса азондан боевой действиянь участникть Григорий Яковлевич Меркушкинонь квалма. Сон стакаста ранендафоль. Кода содаса, войнать колга корхтась кода афкуксонь патриот. Ашезь пеняця стакаста ранендаманц лангс, башка мяль шарфнесь дивизиянь штабть коллективонц цебярьста ладяф тевонцты, коса майорсь Меркушкин дивизиянь штабонь начальникть лездыецоль. Оцю мяльса пачфнесь Советскяй Союзонь Геройть, дивизиянь командиронц Е.Кобелидзень квалма, конань мархта и сяськомада меле лядсть цебярь ялгакс.
Г.Я.Меркушкин ашезень кельге сятнень, кит одукс азондозь войнань факт­тнень, полафнезь историять. Сембось тя «рдаскофнезе» ся поколениянь геройхнень подвигснон, конат тифтольхть Советскяй Родинати кельгоманкса.
Григорий Яковлевичень валонзон коряс, афкуксонь патриотти аш кода улемс фальсификаторкс, васькафникс, валондомс рдазса эсь Родинанц. Кепотьксонди можна азомс легендарнай земляконьконь М.Девятаевонь. Вестевок мяльсонзовок ашель, штоба кальдявста корхнемс странанц колга. Улендемок республикань ламоц ошнень и велетнень эса, да и лия странаса, азонкшнесь, кода воявасть сонць и фронтовой ялганза. Васьфнесь немецкяй ся летчикть мархта, кона ерась сатомс ворьгодемстонза, но тевоц ашезь лисе.
12.08.2010 №31

 

Николай Антошкин, Советскяй Союзонь Герой, РФ-нь Заслуженнай летчик, генерал-полковник:


 

КИСЬ КЯЛЕВИ МОЛИТИ

Юбилей
30 июньцта 50 кизонь юбилеенц васьфтьсы Финно-угорскяй народонь культурань Поволжскяй центрать исполнительнай директороц, филологическяй наукань докторсь, профессорсь, Н.П.Огаревонь лемса Мордовскяй государственнай университетонь филологическяй факультетонь региональнай журналистикать теориянц и практиканц коряс кафедрать заведующаец, Мордовия Республикань Государственнай премиянь лауреатсь, газетаньконь кунардонь ялгац, мокшалясь Юрий Александрович Мишанин.
24.06.2010 №24

 

Петр Васильевич Шавензовонь шачема шиста 95 кизонь топодемати

СЛУЖАСЬ ЭСЬ НАРОДОНЦТЫ
 
Петр Васильевич Шавензов шачсь Ковылкинскяй райононь Сире Сомай мокшень велеса, ашу крестьянинонь семьяса. Тонафнесь школаса, сяльде работась учителькс и колхозонь председателькс. 1937 кизоня Петр Шавензовонь сявозь Советскяй Армияв служама. Тоса ульсь курсантокс, подразделениянь политрукокс и частень ВЛКСМ-нь бюроти секретарькс. 1940 кизоня мрдай армияста и кармай работама Мордовскяй радиокомитетса главнай редакторкс. Войнань васенце шинякиге Петр Васильевич мольсь военкомату и анась пря фронту. Воявась эсь прянь аф ужяльдезь, ульсь тоса, коса сембода стакаль. Лиссь стане, што фкя атакать пингста лиссь стройста командирсь. Капитанць Шавензов сявозе командованиять эсь лангозонза. Подразделениясь сонь кядялонза машфтсь 71 фашист. Петр Шавензовонь колга сермадсть газетатне. «Мордовскяй народть церац Петр Шавензов,—тяштсь 1943 кизонь июньцта «Красная Мордовия» газетав действующай армиянь гвардии капитанць В.Алексеевский,—тапай-машфты немецнень эса. Улемок комсомольскяй организациянь вятикс, сон личнай примерса няфнесы лиятненди, кода эряви тюремс врагть каршес, кода эряви кельгомс эсь Родинаце. Мордовскяй народти ули кода марямс гордость эсь церанц инкса. Сон честь мархта пяшкотькшнесы эсь долгонц Родинать инголе».
Стака ранань пчкафтомда меле подполковниксь Шавензов мяштьсонза орден и медаль мархта мрдась эсь шачема-касома вастозонза. Кенярдезь васьфтезь сонь земляконза. Мордовскяй госпединститутонь коммунисттне кочказь партбюронь секретарькс. Тяка пингть кармась заочнайста тонафнема вузса, шумордазе историческяй факультетть. Сяльде кармась работама «Мокшень правда» республиканскяй газетаса главнай редакторкс. Аф лама пингонь етазь Петр Васильевичень прважасазь КПСС-нь ЦК-ть видеса общественнай наукань Академияв тонафнема. Сон лац шумордазе, получась историческяй наукань кандидатонь степень.
А сямольде тага покодсь газетаса. Комсь кизода лама П.В.Шавензов ульсь «Советская Мордовия» газетаса главнай редакторкс. Тя ответственнай вастса эсь прянц няфтезе эсь тевонь кельгикс и тевонь лац содайкс. Фалу аноколь кажнайти лездомс, максомс пара совет, кеподемс мяленц. И сембонь мархта мушендоль корхтама и политикать, и экономикать, и журналистскяй тефнень, и историять, и литературать колга. Сонь сембоса крхкатольхть содамошинза, келихтольхть интересонза и эряфка фалу аськолясь пси седихть и лямбе пильгокинь кадондозь. Ломаттненди пси седихть улемать инкса П.В.Шавензовонь кельголезь сембе, кит содазь.
А сонь смелшинцты можналь аньцек сельме каямс. Любой обстановкаса аноколь азомс эсь мяленц и араламс сонь. Аф теждяль Петр Васильевиченди тяфтама принципиальнай, вешфксу характеронц мархта. Вдь аф секрет: аф сембонь мялезост видеста сельмос азомась, принципиальнайкс улемась. Но лиякс улемс тя ломанць ашезь машта. Сонь кемоль гражданскяй позицияц.
Хуш редакторонь тевдонза-заботадонза крга видеваль, Петр Васильевич мольфтсь общественнай оцю работа. Сон ульсь партиянь обкомонь членкс, Мордовиянь Верховнай Советонь депутатокс.
Родинать инголе оцю заслуганзон инкса П.В.Шавензов казьфоль Якстерь Знамянь и Якстерь Звездань, Трудовой Якстерь Знамянь, «Знак Почета» ордеттнень мархта и лама медальса.
17.06.2010 №23

 

Н.И.Учватовонь 75 кизонь топодеманцты

ЛЕВЖА ВЕЛЕСА СОНЬ МЯЛЯФТСАЗЬ
 
Аф кунара Рузаевскяй райононь Левжа мокшень велень средняй общеобразовательнай школаса етась мокшэрзянь содаф поэтть, прозаикть, СССР-нь Писателень и Журналистонь союзонь членть, «Мокшень правда» газетать ингольдень редакторонц Н.И.Учватовонь 75 кизонцты лемтьф творческяй ила.
 
Левжа мокшень велень содаф талантливай, эсь тевонь кельги, еню ломанензон мархта, конатнень еткса и Николай Иванович Учватов. Сон шачсь тя велеса 1935 кизонь 1 январьста железнодорожниконь семьяса. Шумордазе Рузаевскяй средняй школать, а 1957 кизоня—Мордовскяй государственнай педагогическяй институтть физико-математическяй факультетонц, 1963 кизоня—КПСС-нь ЦК-ть видеса высшай партийнай школать. Работцесь «Советская Мордовия», «Молодой ленинец» газетань редакциятнень эса. Аф кржа киза макссь и «Мокшень правда» родной изданияньконди, коса 1975 кизонь декабрьста сявомок 1986 кизонь августти редактороль. Васенце стихонза лиссть 1956 кизоня «Мокша» журналса, 1962 кизоня рузонь кяльса стихонза нолдафтольхть «Люблю жизнь» Мордовиянь од поэттнень марстонь сборниксост. 1960 кизотнень кучкаста Н.И. Учватов прафтсь прозати, сермадсь азкст, повестть, роматт.
Николай Иванович Учватов мокшэрзянь писательхнень эзда фкя инь васенцесь, кона кярьмодсь фантастикань жанрати. Тя няеви «Сюра мархта шяйтан», «Взорванный остров» произведениянзон эзда.
1990 кизоста сявомок сон—СССР-нь Писателень союзонь член. Казьф медальса, Мордовскяй АССР-нь Верховнай Советть Президиумонц Почетнай грамотаса.
15.04.2010 №14

 

Минь поздравленияньке

ЮБИЛЕЙ МАРХТА, ПАВЕЛ НИКОЛАЕВИЧ!
20 февральста топоди 70 киза Павел Николаевич Петровонди-мокшаляти Московскяй областень "Трест" оцю строительнай фирмань генеральнай директорти.
Минь, "Мокшень правдань" журналисттне, эсь лемстонк и газетаньконь сембе лувиензон лемста седишкада поздравляндасаськ Павел Николаевичень тя валда юбилеенц мархта! Арьсетяма теенза кемодонга кеме шумбраши, паваз, од сатфкст работаса, мялензон и планонзон эряфс етафнемаса.
18.02.2010 №6

 

ПОЗДРАВЛЕНИЯТ МОРДОВИЯ рЕСПУБЛИКАНЬ ОЦЮНЯТИ Н.И.МЕРКУШКИНОНДИ ШАЧЕМА ШИНЦ МАРХТА

5 февральста Мордовиянь Оцюняти звонясь Российскяй Федерациянь Президентсь. Поздравляндамок Николай Ивановичень шачема шинц мархта, Д.А.Медведев макссь оцю оценка сонь работанцты Мордовияти Оцюнякс улемстонза, арьсесь Россиять и республикать виияфтомаса сяда товолдонь работасонза цебярь сатфкст.
Мордовиянь Оцюнять шачема шинц мархта поздравляндазе Россиянь Правительствать Председателец В.В.Путин. Владимир Владимирович лямбе валса лятфтазень мероприятиятнень, конатнень пингста сон ульсь мордовскяй модать лангса, арьсесь Н.И.Меркушкинонди шумбраши, сатфкст республикать виияфтомаса.
Седи ваксстонь валса поздравляндазе Николай Ивановичень сембе Русень и Московскяй патриархсь Кирилл.
11.02.2010 №5

 

ПОДВИГОЦ АФ ЮКСТАВИ МЗЯРДОНГА


 

МИТРОПОЛИТСЬ АНТОНИЙ—МОКШЭРЗЯНЬ НАРОДТЬ ЦЁРАЦ

2012 кизонь 4 ноябрьста топоди 100 киза ся шиста, мзярда кулось Санкт-Петербургскяй и Ладожскяй митрополитсь Антоний (Вадковский).
Россиянь тя пяк оцю религиознай деятельсь шачсь Мордовияса Зубово-Полянскяй райононь Ширингуши велеса священниконь семьяса. И лама кизода меле эстеенза фамилиякс сявозе Вад ляйть лемонц, конань ваксса сон шачсь.
Шабакс пингста сявомок, Антоний кемась Шкайти. Кемонь кизоса сон ушедсь тонафнема. Васенда—духовнай училищаса, а тяда меле—Тамбовскяй и Казанскяй духовнай академияса, конатнень  аделазень цебярь оценка мархта.
04.02.2010 №4

 

"МОКШЭРЗЯТНЕ—ГОСУДАРСТВАНЬ ТИИ-ПУРОПТЫ НАРОД!"

Финно-угорскяй народонь культурань Поволжскяй центрать директороц, профессорсь Ю.А.МИШАНИН:
"-Юрий Александрович, 2009 кизоня Мордовия Республиканьконь эряфса етась лама оцю события. Тонь койсот, конац эздост ульсь инь важнайкс, инь мяляфтовикс?
-Афкукс етай кизось событиянь ширде пяк козяль. Но васенце вастса, конешна, етксост ащи Россиянь Президентть Д.А.Медведевонь Указоц мокшэрзянь народть Россиянь лия нароттнень мархта 1000 киза ладязь эрямаснон праздновандаманц колга. Тя документть пяк оцю историческяй значенияц. Сяс мес эсонза видеста азф, што мокшэрзянь народсь нинге тежянь кизода инголе странаньконь лия народонзон мархта строясь Российскяй государствать эса.

28.01.2010 №3

 
 

 
НОВОСТИ

МИНЬ ЗЕМЛЯКОНЬКЕ АЛЕКСЕЙ АЦАПКИН—ОЛИМПИЙСКЯЙ ЧЕМПИОН

17 августста кизонь I-це Юношескяй олимпийскяй налхкоматнень эса Сингапурса вольнай стильса ведьса уендихнень еткса 4х100 метрас эстафетаса сяськсь Россиянь командась: Андрей Ушаков, Илья Лемаев, Антон Лобанов и минь Мордовиянь спортсменоньке Алексей Ацапкин. Россияттне етазь китайскяй сборнайть 0,55 секундада. Уемаса пялькстыхне—австралиецне—лиссть нилеце вастти, пачфни олимпийскяй турниронь сайтсь.
19.08.2010  № 32
 

Мольфтеви «2010 кизонь урожайсь» оперативно-профилактическяй операциясь

МВД-нь СОТРУДНИКНЕ ВАНЫХТЬ СЁРОНЬ УРЯДАМАТЬ МЕЛЬГЕ
 
Мордовияса 270 предприятиясь заняф велень хозяйствань культурань касфнемаса. Марстонь площадсь 1659 тежянь гектар.
Сянкса, штоба ванфтомс тяддень и мелянь урожайть, 2010 кизонь 15 июльста сявомок республикасонк мольфтеви «Урожай-2010» оперативно-профилактическяй операциянь омбоце этапсь, мезть пингста республикань внутренняй тевонь органонь сотрудникнень мархта муфоль 41 административнай правонарушения, 483 преступления.
Мордовия Республикава Внутренняй тевонь министерствась оцю работа мольфти сянь коряс, штоба перямс кить велень хозяйствань продукциянь, жуватань-мезень саламати, ваныхть сянь мельге, штоба назначенияс коре нолявольхть засухать сюнеда эвондаф зияттнень машфтомс государствать мархта макссеви бюджетнай средстватне, мольфтихть контроль серонь, тишень, ГСМ-нь, удобрениянь, техникань-мезень ванфтома васттнень мельге.
Внутренняй тевонь органонь сотрудникненди лездомс ули кода кажнайти. Кда приметаф саламань-коламань случай, пачфтеда 47-70-60 номерс коре.
 
19.08.2010 №32
19.08.2010  № 32
 

РОССИЯНЬ ПРЕЗИДЕНТСЬ Д.А.МЕДВЕДЕВ ПОЗДРАВЛЯНДАЗЕНЬ МИНЬ СПОРТСМЕНОНЬКОНЬ САТФКССНОН МАРХТА

Ётай недялять Россиянь Президентсь Д.А.Медведев васетькшнесь легкай атлетикаса Европань XX чемпионатонь чемпиоттнень и призерхнень мархта. Сон поздравляндазень легкоатлеттнень оцю сатфксснон мархта. Барселонаса  спортсметтне сатсть 24 медаль: кемонь золотань, кота сиянь и кафкса бронзовайхть. Казнетнень оцюшкаснон сатозь Мордовиянь спортсметтне.
 
Ольга Каниськинась сембе легкоатлеттнень лемста благодарностень валхт азсь Президентти ширень кирдеманкса.
Васедемста Каниськинась пачфтсь, што Мордовияса ушетф Олимпийскяй подготовкань центрать колмоце очереденц, 400 метранди вельхкс ала манежть, бассейнать строямасна.—Тя тейнек башка пяк эряви 2012 кизоня Лондонца Олимпиадада инголе,—мярьгсь спортсменкась.
Ольга Каниськина васедемань участникненди лятфтась и сянь колга, што 2012 кизоня Саранскяйса етафтови спортивнай якамаса Миронь кубкась. И нинге фкя пяк оцю мероприятия—мордовскяй народть Российскяй государствань нароттнень мархта ладязь эрямаснон 1000 кизонь топодемань праздновандамась. Тияк сон лямбе валхт азсь тренерхнень лемс.
Д.А.Медведев поладозе:
—Оля видеть азозе тренерхнень колга. Тя шарьхкотьф. Но аф фалу шарьхкотьф тянь коряс региононь руководительхнень позициясна. Мордовияса, мон лац содаса, кда кодама поручения максат республикань руководительти, сон фалу старандай тиемс лац-ряц, оцю качестваса.
И тянь эряви азомс аф аньцек спортть колга.
12.08.2010  № 31
 

УШЕДОВСЬ ТОЛТЬ ЭЗДА ЗИЯНЦ ПОВФНЕНДИ КУДОНЬ СТРОЯМАСЬ

Мордовияса вирень пожархнень сюнеда кудфтома лятфненди строяви 81 эряма васта. Лядыксне, а сембоц республикаса палсь 157 куд, азсть мяль сявомс ярмакса. Виде, педа-пес нинге лац-ряц аф содаф, мзяра куд сави строямс. Но, кода азозь МР-нь Строительствань и архитектурань министерстваса, строительхне тисазь сембе эрявиксть, штоба кенеремс строямс синь 1 ноябрти, тя пингть ладязь Россиянь Президентсь Д.Медведев и странань премьер-министрсь В.Путин.
 
Сянкса, штоба эреклафтомс строямань тевть, странань руководствась примась решения, што эряма васта зиянц повфненди кармай строяма единай поставщик. Тя корхтай сянь колга, што муниципальнай заказчикти ули кода тиемс подрядонь договорхт конкурсонь апак етафтт, кона таргави 45 шис.
Тяка пингть, пожархнень сюнеда зиянц кой-кона повфне азсть мяль строяфтомс од кутт аф сяка васттнень эса, а лия населеннай пунктова—Саранскяйса, Зубова Полянаса. Кепотьксонди, Свеженькая, Подлясова и Вад.Селищи велень кой-кона эряйхне пачфтезь, што мяльсноль етамс райцентрав—Зубово-Полянав. Строительхне арьсихть строямс теест од ульця. Ламотнень мяльсна лядомс сяка васттненди. Строяви куттне улихть ефси лият палфнень коряс. Эсост кармай улема сембось: свет, газ, лямбе и кельме ведь, канализация.
Мордовияса строямань тевсь кемокстаф 8 организация мельге. Ня компаниянь представительхне ульсть ни райоттнень эса, васетькшнесть велень Советонь оцюнятнень мархта. Тяни специалисттне анокласазь проектно-сметнай эрявикс документациять. 6 августста строительхне прважазь районга эрявикс техникать и решандазь кизефксть рабочайхненди работань пингонди эряма вастонь максомать коряс. Подлясоваса арьсекшневи панжемс палаточнай лагерь. Ваймама шитнень ускфт стройматериалхт, а 9 августста рабочайхне кярьмодсть од кудонь строяма.
 
12.08.2010 №31
12.08.2010  № 31
 

ПАЛЫХНЕНДИ МАКСФ ВАСЕНЦЕ ЛЕЗКССЬ—1,5 МИЛЛИОН ЦАЛКОВАЙСЬ

Нинге аф кунара ня васттне ульсть Мордовияса инь цебярьхне. Но стихиясь нардазь нардазе тя мазышить и кадсь мельганза седиень ацергофты картина. Сянгяря вирьхнень вастс лама километра кить кувалмова таргавсть равжа палф шуфтт, а велетнень вастс—кулуфт. Колма ломанень жертват, 150 палф куд—тяфтама тячиень пожаронь пелькс статистикась республикань Зубово-Полянскяй районца.
 
Мордовиянь Оцюнясь Н.И. Меркушкин и РФ-нь региональнай развитиянь министрть заместителец К.Ю.Королевский ваймама шитнень ульсть районца.
Тевсь тяса ащи пяк кальдявста. Ломаттне эвотьфт, но тяни валом валом сашендыхть эсезост. Н.И.Меркушкин азозе: ламось тяни ащи местнай властть эзда. Эряви куроконе анокламс сембе эрявикс документтнень. Августста палф куттнень вастс ушедома од стройка.
Районца тиф оперативнай штаб, конанди вятикс Государственнай Думань депутатсь В.Б.Кидяев. Эрь палф велеса работай комиссия: медикт, райсобессь, милициясь и районнай администрациянь представитель. Ломаттненди, кит юмафтозь сембе имуществаснон, пяк стака. Но лезкссь сай. Понедельникти палыхне получазь васенце 1,5 миллион цалковайть Мордовиянь Оцюнять резервнай фондстонза. Ломаттненди явондови пси ярхцамбяль и сухой паек.
Пуромомок Мордовиянь Оцюнять перьф, велеряйхне корхтайхть теенза: Мордовиясь колганк заботендай, пси ярхцамбяль анокласть, сухой паек усксихть. Синь валснон полаткшнесазь Вад. Селища велень эряйхне: Спасиба, што тейнек тняра техника панеде, спасиба што вертолеттне, самолеттне пожар матсть, сюкпря теенть. Меркушкин отвечась: Васендакиге спасиба странань руководствати.
Вад. Селищаса толонь даволсь етась ляйть туркс кожфка пяле километра вастс, кона явфнезе велеть вирть эзда и валгсь куттнень лангс. Тяфтама пелькс тяса ашесть няенде нльне кунардонь эряйхне. Но, кода фалу, трагедиять улихть аф аньцек жертванза, но и эсь героенза. Ся велеряйхне, конатнень кудсна ни палсть, эсь прянь аф ужяльдезь (тя видекс тяфта) матсть шабраснон кудснон эса. Толть мархта тюрсть нльне школьникне. Емлатне каннесть ведь мархта ведаркат, оцюфне—кие кода маштсь.
Н.И.Меркушкин люпштазе тястоконь школань выпускникть Сергей Левштановонь кяденц. Сон васенцекс няезе толть, кеподезе пильге лангс сембе велеть. Тядде Сергей поступай университетонь историческяй факультету.
Историясь аф юкстасы тя страшнай кизоть.
Тяни, 2 августста, аньцек Зубово-Полянскяй районца 8 оцю вирень пожар. Качамти ляпиякшнихть животнайхне, палы вирсь. И эрь тяфтама бедати ушетксокс арси—кинь-бди мархта ердаф папироса песь, крьвястьф сардонясь. Мезти нинге эряви лисемс, штоба кажнайсь эздонк, мекпяли, тянь шарьхкоделезе?
 
05.08.2010 №30
05.08.2010  № 30
 

МАРЯТАМА ИНКСОНТ ГОРДОСТЬ!

Испанияса ётафтови Европань чемпионатса Россиянь сборнайсь сатсь 5 медальхть и сембе синь—миннет.
Испаниянь Барселона ошса моли легкай атлетикать коряс Европань чемпионатсь. Васенце шиня пялькстсть 20 километрань дистанцияса ялга якамать коряс инь вии спортсметтне. Тя мезть синь етксост аньцек ашель тяниень миронь чемпионць Валерий Борчин, сяс мес сон получась травма. Но сембе мирти содаф тренероньке Виктор Чегин мусь теенза достойнай полафтыхть. Васендакиге надияматне ульсть сотфт од талантливай спортсменть Станислав Емельяновонь мархта. И тя аф стак.
 
29.07.2010 №29
29.07.2010  № 29
 

ГРАНТТ—ЕВРО- ПАРЛАМЕНТТЬ ЭЗДА

Мордовиянь Образованиянь министерствась получась Европарламентть эзда кафта грантт. Кажнайсь синь эздост тейнек максы фкя миллион 300 тежянь цалковаень. Министерствань сотрудникне анокласть кафта проектт, конат шнафтольхть.
Васенце проектсь—этнокультурнай направлениянь кизонь лагерсь, коса республикастонк и мокшэрзянь диаспораста шабатне кармайхть сяда крхкаста тонафнемост родной кяльть и сяда маласта знакомондайхть эсь народснон культуранц мархта. Лагерьса ваймамась питнефтома, родительхне пандсазь аньцек кить. Главнай условиясь—штоба шабась мяль вельде тонафнелезе эсь родной кяленц.
Омбоце проектсь—электроннай библиотекань тиемась, коза сувайхть учебникне и методическяй изданиятне мордовскяй (мокшень, эрзянь) кяльхнень тонафнемаснон коряс.
 
22.07.2010 №28
22.07.2010  № 28
 

ВАСЕНЦЕДА МОРДОВИЯСА!

12-15 июльста республикасонк етафтови легкай атлетикать коряс Россиянь чемпионатсь.
Минь тячи гордостень марязь азондсаськ, што Мордовияньке лемневи сембодонга спортивнай республикакс. И тя аф стак. Тянь можна кемокстамс лама примерса. Ваносте, мзяра мекольдень кизотнень Саранскяйса эвондась од спортивнай объектта! Сембе райоттнень эзгавок строяф (или строяви) физкультурно-оздоровительнай комплекст.
08.07.2010  № 26
 

ШИРЕЗОНК САЙ ТЁЖЯНЬ СПОРТСМЕН

Пресс-конференцияста

Понедельникста, 5 июльста, Саранскяйса Печатень кудса ульсь легкай атлетикать коряс Россиянь чемпионатти лемтьф пресс-конференция. Эсонза примасть участия Мордовия Республикань спортонь, физическяй культурань и туризмань министрсь В.Г.Киреев, сонь заместителец В.В.Цыбусова, Мордовия Республикань легкай атлетикань Федерациять президентоц, высшай спортивнай мастерствань республиканскяй  школать директороц М.Л.Храмов, тренерхт, спортсметт, официальнай лия ломатть.
08.07.2010  № 26
 

УДАЛАЗА КИНТЕ, МЕДАЛИСТТ!

Исяк, 23 июньцта, Саранскяйса Республикань кудса Мордовия Республикань Оцюнясь Н.И.Меркушкин васьфнесь республикань школань ся выпускникнень мархта, конат шумордазь тонафнемаснон золотань медальса.
Арась цебярь традициякс кизоста кизос получсемс тя казнеть республикань Оцюнять кядьста.
24.06.2010  № 24
 

 

 

Учредительхие:
Главнай редакторсь: И. С. Лушкин