Тяштьфтемок прянц переписьса, ломанць максси содамс эсь колганза, или, лиякс азомс, примси участия перспективнай социальнай стама программань анокламаса, коса мяльса кирдевихть ся группань ломаттне, коза сон сувафнесы эсь прянц. Кепотьксонди, анкетать кизефксонзон лангс работафтома лятфть ответонзон эзда можна содамс, коса эрявихть панжемс рабочай вастт. А вов школьнай кизонь иттнень лувксснон коряс даннайхнень вельде можна анокламс платт сянь коряс, мзяра эрявксты строямс од школада. И тяфта эряфонь сембе сфераса. Сяс мярьголень ломаненьконди, штоба активнай участия примальхть тя пяк эрявикс мероприятияса. И нинге. Аф эряви кяшендемс национальностсь. Мон монць мокшалян. И тянь мзярдовок и косовок ашине кяшенде, ашине сепонда. Меколанкт, маряса прязень азоркс масторса, кона каннесы «Мордовия» лемть. А месть сепондомс?! Вдь тяфтаковок лувксоньке коль кири. И тя аф мяштень шавома, а пичефкс. Етнеме эряма ошу, рузыяме минць, аф содасазь тядянь-алянь кяльснон иденьке. Коза тя кондясти! Сяс «Национальностсь» графать алу эряви тейнек, кинь верзанганза шуди мокшень ломанень вер, сермадомс: «Мон—мордвинан».

Саранск ошсь.

 

Коса ломанць афоль шача—емла веленяса или оцю ошса—эряфоц аф няевикс сюлмоса сотф ся аймакть мархта, коза, кода корхнихть, боконвядьмоц праф.

Мзярда получаме задания сермадомс сочинения «Любимая Русь и мордва» темать коряс, арьсезевонь, мезень квалма карман тяштема. Сась прязон мяль сермадомс эсь колган.

Тядязе рузава, а алязе казах.

Шачень Казахстанца Кокчетау ошса. Идькс пингозе етась тоса, якань идень саду, тоза лядсть ялгане и содафоне. Тя ошсь ульсь тейне пяк малакс, содайне сембе мазы вастонзон, культуранц, коензон-обуцянзон.

Мархтонк эрясь щавазе. Азондоманц эзда содайне, што сон шачсь-кассь аф Казахастанца, а Мордовияса, но лама киза ни эряй ичкозе мокшэрзянь масторть эзда. Пяк лажаткшнесь шачема уженянцты, а сядонга пяк—родной валса-кяльса корхтамати. Сон пяк лама лятфнесь шачема-касома вастонц колга. Азондсь, што тоса лама раднядонза, конатнень мархта ашеме кирде соткст. Сидеста азонкшнезе, кода ашуста и стакаста эрясть Од Пичингушень велеса мокшень ломаттне.

 

«Эх, мордовочка» фольклорнай ансамбльсь пуроптфоль пцтай 10 кизода инголе и ся пингста сявомок няфнезе прянц Москуса, примсесь участия народнай ламоц праздникнень и фестивальхнень эса, конат етнесть республикасонк. Коллективть улихть грамотанза и дипломонза. Участникне—Ковылкинскяй райононь Рыбкина велень ниле сазорхне Капаеватне. Кда азомс сяда видеста, синь—Старые Барки шабрань веленяста. Нинге одста етасть эряма Москуву, но аф юкснесазь юрснон и мокшэрзянь народть коензон-обуцянзон. Сембонь идьсна стане жа морайхть и примсихть участия концерттнень эса.

Ансамблень руководительсь Наталья Кувезенкова и сазоронза Татьяна Чумбаева, Анна Ткачева и Елена Чинилина сувсихть Москуса «Масторава» культурно-просветительскяй обществав. Этнокультурнай эряфса сатфкснень инкса казьфт Грамотаса.

—Емла родиназе—Зубово-Полянскяй райононь Пичпанда велесь, кона тячемс лядсь тейне инь питни, седиень эжди уженякс. Касонь крестьянонь оцю семьяса. Мондедон башка тядяне-аляне касфтсть нинге вете итть. Сембе, кода маштоме, лезнеме родителеньконди. Кажнайть эздонк ульсть сонцень обязанностенза. Шачема велесон аделайне 8 классонь школать, меле тонафнень шабрань Ачадова велеса, мезьда меле максонь экзаметт и поступань Н.П.Огаревонь лемса Мордовскяй государственнай университетонь медицинскяй факультету. Эста, 1967 кизоня, факультетсь аньцек панжезень кенкшензон. Тяда инголе врачт семьясонк ашельхть. Монга емласта арьсекшнень сотомс эряфозень техническяй наукатнень мархта, а касомок, мес-бди сяда оцю мяль кармань шарфнема врачень профессияти. Киган туф Вадим церазе. Сон ни лама пинге работай Подмосковьянь фкя клиникаса хирургокс. Медицинати «чепафтсь» сазорозевок, кафта племянниконе. Мон етксост, кода корхнихть, кинь кялись.

—Пара, што тячи Кяшалса етафтовихть Малькинскяй лувомат,—мярьгсь Николай Борисович.—Поэтть тевоц апак юкстак. Шачема велезонза састь аф аньцек творчестванц кельгиенза, но и стихонь, рассказонь сермадыхть, моронь латцихть.

Землякснон колга лятфнесть педагогическяй трудонь ветеранць П.Т.Суйкова, Торбеевань 3№ профессиональнай лицеень мастерсь, стихонь сермадысь М.П.Надин.

 

—Мокшэрзяда Люберецкяй районца аф кржа. Синь тяса эрясть фалу. Комозце векть ушетксста мольфтевсь фкя сооружениянь строямась Москуста Некрасовкав. Эрявсь шувомс пяк оцю канал. Тя тевса заняфоль пяк лама ломань, конатнень эзда ламотне састь Мордовия Республикаста. Кой-кит лядсть тязк эряма, водендасть семьят, шачфтсть-касфтсть итть. Населениянь Всероссийскяй мекольдень переписть даннаезон коряс, целайнек Люберецкяй районца эряй 1000 лама мокшэрзя, а афкукс эздост сядонга лама. Путоме задача—пуроптомс синь марс. Кизода инголе миньцонк ушедсь работама мокшэрзянь автономия.