Поиск по сайту: 
 
Наши мокшанские сыновья и дочери
Свежий номер
Тема дня
Национальная тематика
Культура
Обратная связь (Газета - Читатель)
В Госсобрании РМ
В Правительстве РМ
События
Демография
Здоровье
Мокшане о мокшанах
Как жили и живут мокшане
Ветеранам о ветеранах
Молодежный клуб
Наша усадьба
Наука и жизнь
Спорт
Национальный проект
Образование
Доступное жилье
Благотворительность
Поговорим о создании единого литературного мордовского языка

Архив
 сентябрь 
 2010 
пн вт ср чт пт сб вс
  12345
6789101112
13141516171819
20212223242526
27282930   

 
 

 
Как жили и живут мокшане

ЭРЬ ПУРОМКССА СОНЬ ПУТКСОЦ

Салазгорь велень средняй школась—фкясь инь цебярсь Торбеевскяй районца. Тянь нинге весть кемокстазе оцю илась, кона лемтьфоль мокшэрзянь литературать ушедыенцты З.Ф.Дорофеевонди.
Ламось школаса ащи аф класснай работать коряс завучть Л.В.Каргаевать эзда. Аф кржа пуромкс етафневи школаса. И пцтай сембонь аноклакшнесыне Людмила Викторовна. Инь стакакс и козякс ульсь тонафтыти тонафнемань тя кизось. Тядде топодсь 65 киза Победань шити. Мзяра мероприятия аноклаф и етафтф: мужествань урокт, викторинат, патриотическяй моронь конкурст, войнань ветераттнень мархта васедемат, содаф васттнень эзга экскурсият.
Ульсть школаса выпускникнень мархта васедемат. Кевейхксые киза синь ашесть етафнев. Аноклафоль цебярь концерт, оцю пуромкс. Меле ульсь З.Ф.Дорофеевонди лемтьф ила.
Людмила Викторовна шумордазе Салазгорень средняй школать, поступась Мордовскяй госуниверситетонь филологическяй факультету. Шумордамдонза меле меки сась Салазгори. Аф каендай. Тяса музе эсь вастонц и кельгома тевонц. Коллективса лац васьфтезь и примазь эсь ломанькс.
И.ПЕТРОВ.
 
Снимкаса:
Л.В.Каргаева.
19.08.2010 №32

 

ДИАСПОРАСТА—МОРДОВИЯВ ТОНАФНЕМА!

Мокшэрзянь народсь эряй сембе Россиява: ичкоздень региоттнень эса улихть велет и ошт, коса эряйхне корхтайхть эрзякс и мокшекс. Республиканьке кирди кеме соткст диаспораса эряй ломаненьконь мархта. Сидеста якатама фкя-фкянь шири инжикс, кемокснесаськ ялгаксшить, содафнетяма тостонь мокшэрзятнень культураснон, койснон-обуцяснон мархта. Пети мяль, што Мордовиять кочксесазь тонафнемань вастокс диаспорань аф кржа од ломань. Содамошинкса ширезонк сашендыхть од ломаттне ичкоздень Приморскяй крайста, Иркутскяй областьста, Сахаста, Москуста, Пензаста. Пцтай сембонь юрсна ушедыхть тяста, мокшэрзянь крайста.
Мезсь вятезень Мордовияв, азондыхть ширеста саф студенттне.
 
Александра Сальникова.
Оренбургскяй областень
Рыбкина велесь: 
—Рыбкина мокшень велезе эвондась 1803 кизоня. Васенце эряенза—Мордовиянь ломаттне, конат састь Мордовиянь Ковылкинскяй райононь Рыбкина велеста. Котошка кизода инголе тя кафта велетне ушедсть якама фкя-фкянь шири инжикс, арасть цебярь ялгакс. Монь, кода ламоц лия ялганень, кошардомазь школада меле самс тонафнема Мордовияв. Эстокиге согласиндань, сяс мес ульсь оцю мялезе сяда крхкаста содамс народозень культуранц, кяленц.
Вов ни нилеце кизось тонафнян Н.П.Огаревонь лемса МГУ-са филологиянь факультетса. Кочкайне эстейне финно-угорскяй кялень отделениять. Тонафнемась мялезон. Содафнесамазь ламоц кяльхнень мархта. Нят венгерскяйсь, финскяйсь. Но сембода оцю мяль шарфнян мокшеннети, сяс мес тя—родной кялезе. Ужяль, но школасонк сон ашезь тонафнев. Тяни мялезе содамс лацкас и меле мрдамс велезон, штоба максомс содамошинень школаса тонафнихненди.
12.08.2010 №31

 

КЕЛЬГОЗЬ ОТТНЕ СОТЦЕМАСНОН

Мзярда корхтазеват велень эряфкшу ломань мархта, афи лоткалеть сонь кулхцондомонза. Сяшкава мялень салай азкст тейть азондыхть. Да афи азкст, тя вдь синь эряфсноль. Арьсезеват: кодама весялаль-пароль оттненди тяда ингольдень пингть.
 
Семьяса инголи касфтовсь лама идь. И кажнайсь заняфоль эсь тевсонза. Сисем кизоса ни лисендсть пери, серонь озафтома, панденянь-мезень кочкома. Сяда эзрайхне возясть-работасть оцюфнень мархта ряцок паксяса, яксесть пенгянь аноклама, кярьмотькшнесть лия тефненди. Но одста вдь кода: шить сизят-пульзят, а илядсь сай—бта одукс шачат. Аньцек шоподи ульцясь и тяса кели ки макссевсь од ломаттненди. Полгонянь-полгонянь якасть од стирьхне-цератне. Мархтост фалу гармониясь ульсь. Тя инструментть мархта морама маштсь велень пцтай эрь церась. Тя промозфтома ся пингть ефси ашель кода. Синь маштозь гармошкань пунятнень люпшнесазь, а стирьхне мелодиять корява эзк мора таргайхть. Васенда морсихть велеть эзга яказь, сияк фкя-фкянь тернихть. Меле тя тевть велень клубса поладсазь. Аделасазь кувака моротнень, ушедыхть сиде моронят. Сияк кштийхть.
Кода азонкшнесы тядязе, Мария Васильевна, инголи мокшень ломаттне пяк кельгозь сотцемаснон. Да вдь кодама од стирень аш мялец инголенди содамс, кие ули мирдец-полац. Тянкса и шобда баняс якасть веньгучкать и карденяв саразонь кундама сувсесть. И вдь ашесть пеле! Молихть и баняв пелеветь, и тонгсазь кядьснон шобда баняти. Кда кундасыне синь понав кядь, сай пингонь мирдсь ули козя и, меколанкт.
А нинге од стирьхне Роштува мархта Кльхчяня еткть ерялезь пильгс щамаснон перяфксть вельф. Коза няфти пряц, ся ширде и учт кудат.
Ульсть сотцемат, конатнень пингста оттнень еткс шоворькшнесть эряфкшуфневок. Илять лисихть сембе пирьфи эшить малас, колмоксть шарыхть перьфканза, а меле комайхть и кулхцондыхть: кда пилезост прайхть весяла вайгяльхть, гармониянь морама, маластонь пингть велеса ули свадьба. Кда марявихть авардемат, эста учема зиян.
Ичкози лядсть ся пинкне. Полафтсь эряфсь, а мархтонза и од ломаттнень промозсна. Ужяль, мес юксневихть кунардонь пяк цебярь койхне-обуцятне...
 
О.КОЛЕДИНОВА.
05.08.2010 №30

 

«ПОВОЛЖСКАЯ ГЛУБИНКА» ФЕСТИВАЛЬСА МОКШЭРЗЯНЬ МОРОТНЕ ЭЖНЕСТЬ ВАЙМЕ, КЕНЯРТЬФНЕСТЬ СЕДИ

Ульяновскяй областень Павловскяй району XVI векста етасть эряма мокшэрзянь пляматне, мельгаст састь рузоннетне. Ся пингста сявомок тоса ладязь эряйхть русне, мокшэрзятне, татархне и чувашне. Нинге тоза састь украинецт, белоруст, этническяй немецт, етай векть ушетксста—армятт. Инголи Павловкась и перьф велетне содафтольхть кода Поволжьянь ярмарочнай оцю центра, мишендемань ряттнень кувалмосноль кафтонь вайгяльбе.
 
Кемголмува кизода инголе Павловскяй райононь культурань работниконь коллективсь азсь мяль етафтомс национальнай культурань областной фестиваль. Ся пингста сявомок фестивальть эвондасть лама ялгадонза Россиянь ошнень эса и «Поволжская глубинка» фестивальсь арась Межрегиональнайкс.
29.07.2010 №29

 

«Кельгома Руссь и Мордвась!» конкурссь

МОРДОВИЯСЬ—РОССИЯТЬ ЁМЛА УЖЕНЯЦ
 
Мокшень край! Сон аф пяк оцю, но конашкава мазы!
Мордовияса эряйхть руст, мокшет, эрзят, татархт и лия национальностень ломатть.
Мордовиять колга лятфневи кемонце векста. Мокшень ломаттнень ульсть койсна-обуцясна, религиясна, шкайсна: Ведява, Кудава, Нишкепаз, Вирява. Теест озондсть, ня шкайхнень мархта сотфт ульсть иласна.
Мордовскяй народть эряфоц стакаль. Работада аф пели мокшетне и эрзятне эрясть Мокша и Сура ляйхнень трвава. Синь керсезь и тарксезь вирьхнень, керф васттнень соксезь, витцезь сероса. Но аф фалу теест сашендовсь урядамс паксяста сероть. Врьгятькшнесть вракне, плхнезь паксяста серотнень, ломаттнень сявондезь пленц.
Мольсь пингсь. Мокшэрзянь ломаттне валом валом сувсесть Российскяй государствати.
Монголо-татархне врьгятькшнесть мокшэрзянь масторть лангс. Мокшетненди и эрзятненди лезксфтома ламос ашесть сяськов синь. Рузонь народсь сась лезксонц мархта мокшэрзянь народти, и тя лезкссь нинге сяда маласькофтозень рузонь народть мархта мокшэрзянь народть. И тя пингста сявомок мокшэрзянь народсь сувась Россияти.
22.07.2010 №28

 

УЛЬЯНОВСКЯЙ ОБЛАСТЕНЬ ТИМИРЯЗЕВСКЯЙ ПОСЕЛКАТЬ УЛЬСЬ 100 КИЗОНЬ ЮБИЛЕЕЦ


 

ПОБЕДАНЬ ПРАЗДНИКТЬ ВЕТЕРАТТНЕ ВАСЬФТЕЗЬ ВЕСЯЛАСТА

Майста странаньке, да и лия лама народносттне отмечазь Великай Отечественнай войнаса Победать 65 кизонь топодеманц.
Ниле кизот мольсь тя пяк стака войнась и шумордавсь Советскяй Союзть победанц мархта.
Победати оцю путксоц и минь республиканьконь—Мордовиять.
Мужестванкса, отваганкса, воинскяй доблестень няфтеманкса Мордовиянь 103 ломань арась Советскяй Союзонь Геройкс, 22 воин—III степенень Славань Орденонь кавалеркс, 100 тежяньда лама солдат и офицер казьфт Советскяй Союзонь орденца и медальса.
24.06.2010 №24

 

ФИННО-УГОРСКЯЙ НАРОДОНЬ ЛЯМБЕ ВАСЕДЕМАТ ЁТАФТОВСТЬ КАРЕЛИЯ РЕСПУБЛИКАСА

5 июньцта сявомок 8 июнти молемс Карелия Республикаса етась «Финляндско-Российский проект по обучению представителей финно-угорских организаций Российской Федерации» лем ала семинар. Пуроптыенза: Финляндиянь культурань фондсь, «Финляндия-Россия» обществась, Финно-угорскяй народонь Международнай консультативнай комитетсь, Финно-угорскяй народонь од ломанень Ассоциациясь (МАФУН), «Nuori KariJala» од ломанень республиканскяй общественнай организациясь и лиятне.
 
 Семинарс пуромкшнесть финно-угорскяй разнай национальностень ломатть: мокшэрзят, удмуртт, мариецт, пермякт, ижорхт, карелхт, конат састь Мордовия, Удмуртия, Марий Эл, Коми республикаста, Коми-Пермяцкяй, Ханты-Мансийскяй автономнай округста, Тверской, Ленинградскяй областьста, Москуста и лия вастста.
Карелия Республикань Петрозаводск ошса Мордовиянь и лия региононь делегациятне лямбоста васьфтьфтольхть семинаронь пуроптыхнень мархта. Тяда меле инжихнень учсезь Карелиянь Пряжинскяй райононь Чална поселкаса, коса ащи «Урозеро» Международнай образовательнай центрась. Тоса и етафтфоль семинарсь.
17.06.2010 №23

 

ТАТАРСТАНЦА СОН ТОНАФТЫ МОКШЭРЗЯНЬ КЯЛЬТЬ КЕЛЬГОМА

Тяниень пингть ламотне лувондсазь учителень профессиять аф престижнайкс. Улема, сяс оттневок аф пяк сидеста кярьмотькшнихть учителень тевти. Аф стамотнень еткста мокшень стирсь Олеся Корнеева. Тонафтыень профессияти Олеся шарфнесь мяль нинге идькс пингста, а сяс школать шумордамда меле ламос ашезь арьсекшне, коса сяда тов касфнемс содамошинзон. Кочказе М.Е.Евсевьевонь лемса Мордовскяй государственнай пединститутть. Мелянь сентябрь ковста сявомок Олеся работай Татарстан Республикань Тетюшскяй райононь Киртели велень школаса мокшень кялень и литературань учителькс. Аф кунара сон ульсь Саранскяйса, коса мархтонза васьфнесь минь корреспондентоньке и эняльдсь отвечамс кизефксонзон лангс.
10.06.2010 №22

 

Кода эрят, диаспора?

ДАЛЬНЯЙ ВОСТОКОНЬ МОКШЭРЗЯТНЕНЬ ШИРЕСА
«Мордва Дальнего Востока» книга нолдась Мордовия Республикать видеса гуманитарнай наукань научно-исследовательскяй институтсь. Авторхне Л.И.Никонова, Л.Н.Щанкина, Н.Н.Авдошкина, В.П.Савко. Тя книгаса азондови сянь квалма, кода ульсть етафтфт этнографическяй исследованиятне Дальняй Востокса эряй мокшэрзянь диаспорать еткса. Азфт географическяй положениясь, природнай условиятне, максф социально-демографическяй характеристика тоса эряй мокшэрзятнень историяснонды, материальнай культураснонды, семейнай и общественнай эряфснонды. Экскурсиятнень пингста ульсть кочкафт архивнай материалхт, тифт аудиозаписть и фотографият. Мекольце тяфтама экспедициясь етафтфоль 2009 кизонь августста. Магаданскяй, Амурскяй, Саха Республикав якасть историческяй наукань докторсь, профессорсь  и историческяй наукань кандидатсь Л.Н.Щанкина. А тяда инголе улендсть Сахалинца, Камчаткаса, Хабаровскяй крайса.
Вов мезе азондсь корреспондентоньконь мархта васедемста историческяй наукань докторсь, профессорсь Людмила Ивановна  Никонова.
03.06.2010 №21

 
 

 
НОВОСТИ

МИНЬ ЗЕМЛЯКОНЬКЕ АЛЕКСЕЙ АЦАПКИН—ОЛИМПИЙСКЯЙ ЧЕМПИОН

17 августста кизонь I-це Юношескяй олимпийскяй налхкоматнень эса Сингапурса вольнай стильса ведьса уендихнень еткса 4х100 метрас эстафетаса сяськсь Россиянь командась: Андрей Ушаков, Илья Лемаев, Антон Лобанов и минь Мордовиянь спортсменоньке Алексей Ацапкин. Россияттне етазь китайскяй сборнайть 0,55 секундада. Уемаса пялькстыхне—австралиецне—лиссть нилеце вастти, пачфни олимпийскяй турниронь сайтсь.
19.08.2010  № 32
 

Мольфтеви «2010 кизонь урожайсь» оперативно-профилактическяй операциясь

МВД-нь СОТРУДНИКНЕ ВАНЫХТЬ СЁРОНЬ УРЯДАМАТЬ МЕЛЬГЕ
 
Мордовияса 270 предприятиясь заняф велень хозяйствань культурань касфнемаса. Марстонь площадсь 1659 тежянь гектар.
Сянкса, штоба ванфтомс тяддень и мелянь урожайть, 2010 кизонь 15 июльста сявомок республикасонк мольфтеви «Урожай-2010» оперативно-профилактическяй операциянь омбоце этапсь, мезть пингста республикань внутренняй тевонь органонь сотрудникнень мархта муфоль 41 административнай правонарушения, 483 преступления.
Мордовия Республикава Внутренняй тевонь министерствась оцю работа мольфти сянь коряс, штоба перямс кить велень хозяйствань продукциянь, жуватань-мезень саламати, ваныхть сянь мельге, штоба назначенияс коре нолявольхть засухать сюнеда эвондаф зияттнень машфтомс государствать мархта макссеви бюджетнай средстватне, мольфтихть контроль серонь, тишень, ГСМ-нь, удобрениянь, техникань-мезень ванфтома васттнень мельге.
Внутренняй тевонь органонь сотрудникненди лездомс ули кода кажнайти. Кда приметаф саламань-коламань случай, пачфтеда 47-70-60 номерс коре.
 
19.08.2010 №32
19.08.2010  № 32
 

РОССИЯНЬ ПРЕЗИДЕНТСЬ Д.А.МЕДВЕДЕВ ПОЗДРАВЛЯНДАЗЕНЬ МИНЬ СПОРТСМЕНОНЬКОНЬ САТФКССНОН МАРХТА

Ётай недялять Россиянь Президентсь Д.А.Медведев васетькшнесь легкай атлетикаса Европань XX чемпионатонь чемпиоттнень и призерхнень мархта. Сон поздравляндазень легкоатлеттнень оцю сатфксснон мархта. Барселонаса  спортсметтне сатсть 24 медаль: кемонь золотань, кота сиянь и кафкса бронзовайхть. Казнетнень оцюшкаснон сатозь Мордовиянь спортсметтне.
 
Ольга Каниськинась сембе легкоатлеттнень лемста благодарностень валхт азсь Президентти ширень кирдеманкса.
Васедемста Каниськинась пачфтсь, што Мордовияса ушетф Олимпийскяй подготовкань центрать колмоце очереденц, 400 метранди вельхкс ала манежть, бассейнать строямасна.—Тя тейнек башка пяк эряви 2012 кизоня Лондонца Олимпиадада инголе,—мярьгсь спортсменкась.
Ольга Каниськина васедемань участникненди лятфтась и сянь колга, што 2012 кизоня Саранскяйса етафтови спортивнай якамаса Миронь кубкась. И нинге фкя пяк оцю мероприятия—мордовскяй народть Российскяй государствань нароттнень мархта ладязь эрямаснон 1000 кизонь топодемань праздновандамась. Тияк сон лямбе валхт азсь тренерхнень лемс.
Д.А.Медведев поладозе:
—Оля видеть азозе тренерхнень колга. Тя шарьхкотьф. Но аф фалу шарьхкотьф тянь коряс региононь руководительхнень позициясна. Мордовияса, мон лац содаса, кда кодама поручения максат республикань руководительти, сон фалу старандай тиемс лац-ряц, оцю качестваса.
И тянь эряви азомс аф аньцек спортть колга.
12.08.2010  № 31
 

УШЕДОВСЬ ТОЛТЬ ЭЗДА ЗИЯНЦ ПОВФНЕНДИ КУДОНЬ СТРОЯМАСЬ

Мордовияса вирень пожархнень сюнеда кудфтома лятфненди строяви 81 эряма васта. Лядыксне, а сембоц республикаса палсь 157 куд, азсть мяль сявомс ярмакса. Виде, педа-пес нинге лац-ряц аф содаф, мзяра куд сави строямс. Но, кода азозь МР-нь Строительствань и архитектурань министерстваса, строительхне тисазь сембе эрявиксть, штоба кенеремс строямс синь 1 ноябрти, тя пингть ладязь Россиянь Президентсь Д.Медведев и странань премьер-министрсь В.Путин.
 
Сянкса, штоба эреклафтомс строямань тевть, странань руководствась примась решения, што эряма васта зиянц повфненди кармай строяма единай поставщик. Тя корхтай сянь колга, што муниципальнай заказчикти ули кода тиемс подрядонь договорхт конкурсонь апак етафтт, кона таргави 45 шис.
Тяка пингть, пожархнень сюнеда зиянц кой-кона повфне азсть мяль строяфтомс од кутт аф сяка васттнень эса, а лия населеннай пунктова—Саранскяйса, Зубова Полянаса. Кепотьксонди, Свеженькая, Подлясова и Вад.Селищи велень кой-кона эряйхне пачфтезь, што мяльсноль етамс райцентрав—Зубово-Полянав. Строительхне арьсихть строямс теест од ульця. Ламотнень мяльсна лядомс сяка васттненди. Строяви куттне улихть ефси лият палфнень коряс. Эсост кармай улема сембось: свет, газ, лямбе и кельме ведь, канализация.
Мордовияса строямань тевсь кемокстаф 8 организация мельге. Ня компаниянь представительхне ульсть ни райоттнень эса, васетькшнесть велень Советонь оцюнятнень мархта. Тяни специалисттне анокласазь проектно-сметнай эрявикс документациять. 6 августста строительхне прважазь районга эрявикс техникать и решандазь кизефксть рабочайхненди работань пингонди эряма вастонь максомать коряс. Подлясоваса арьсекшневи панжемс палаточнай лагерь. Ваймама шитнень ускфт стройматериалхт, а 9 августста рабочайхне кярьмодсть од кудонь строяма.
 
12.08.2010 №31
12.08.2010  № 31
 

ПАЛЫХНЕНДИ МАКСФ ВАСЕНЦЕ ЛЕЗКССЬ—1,5 МИЛЛИОН ЦАЛКОВАЙСЬ

Нинге аф кунара ня васттне ульсть Мордовияса инь цебярьхне. Но стихиясь нардазь нардазе тя мазышить и кадсь мельганза седиень ацергофты картина. Сянгяря вирьхнень вастс лама километра кить кувалмова таргавсть равжа палф шуфтт, а велетнень вастс—кулуфт. Колма ломанень жертват, 150 палф куд—тяфтама тячиень пожаронь пелькс статистикась республикань Зубово-Полянскяй районца.
 
Мордовиянь Оцюнясь Н.И. Меркушкин и РФ-нь региональнай развитиянь министрть заместителец К.Ю.Королевский ваймама шитнень ульсть районца.
Тевсь тяса ащи пяк кальдявста. Ломаттне эвотьфт, но тяни валом валом сашендыхть эсезост. Н.И.Меркушкин азозе: ламось тяни ащи местнай властть эзда. Эряви куроконе анокламс сембе эрявикс документтнень. Августста палф куттнень вастс ушедома од стройка.
Районца тиф оперативнай штаб, конанди вятикс Государственнай Думань депутатсь В.Б.Кидяев. Эрь палф велеса работай комиссия: медикт, райсобессь, милициясь и районнай администрациянь представитель. Ломаттненди, кит юмафтозь сембе имуществаснон, пяк стака. Но лезкссь сай. Понедельникти палыхне получазь васенце 1,5 миллион цалковайть Мордовиянь Оцюнять резервнай фондстонза. Ломаттненди явондови пси ярхцамбяль и сухой паек.
Пуромомок Мордовиянь Оцюнять перьф, велеряйхне корхтайхть теенза: Мордовиясь колганк заботендай, пси ярхцамбяль анокласть, сухой паек усксихть. Синь валснон полаткшнесазь Вад. Селища велень эряйхне: Спасиба, што тейнек тняра техника панеде, спасиба што вертолеттне, самолеттне пожар матсть, сюкпря теенть. Меркушкин отвечась: Васендакиге спасиба странань руководствати.
Вад. Селищаса толонь даволсь етась ляйть туркс кожфка пяле километра вастс, кона явфнезе велеть вирть эзда и валгсь куттнень лангс. Тяфтама пелькс тяса ашесть няенде нльне кунардонь эряйхне. Но, кода фалу, трагедиять улихть аф аньцек жертванза, но и эсь героенза. Ся велеряйхне, конатнень кудсна ни палсть, эсь прянь аф ужяльдезь (тя видекс тяфта) матсть шабраснон кудснон эса. Толть мархта тюрсть нльне школьникне. Емлатне каннесть ведь мархта ведаркат, оцюфне—кие кода маштсь.
Н.И.Меркушкин люпштазе тястоконь школань выпускникть Сергей Левштановонь кяденц. Сон васенцекс няезе толть, кеподезе пильге лангс сембе велеть. Тядде Сергей поступай университетонь историческяй факультету.
Историясь аф юкстасы тя страшнай кизоть.
Тяни, 2 августста, аньцек Зубово-Полянскяй районца 8 оцю вирень пожар. Качамти ляпиякшнихть животнайхне, палы вирсь. И эрь тяфтама бедати ушетксокс арси—кинь-бди мархта ердаф папироса песь, крьвястьф сардонясь. Мезти нинге эряви лисемс, штоба кажнайсь эздонк, мекпяли, тянь шарьхкоделезе?
 
05.08.2010 №30
05.08.2010  № 30
 

МАРЯТАМА ИНКСОНТ ГОРДОСТЬ!

Испанияса ётафтови Европань чемпионатса Россиянь сборнайсь сатсь 5 медальхть и сембе синь—миннет.
Испаниянь Барселона ошса моли легкай атлетикать коряс Европань чемпионатсь. Васенце шиня пялькстсть 20 километрань дистанцияса ялга якамать коряс инь вии спортсметтне. Тя мезть синь етксост аньцек ашель тяниень миронь чемпионць Валерий Борчин, сяс мес сон получась травма. Но сембе мирти содаф тренероньке Виктор Чегин мусь теенза достойнай полафтыхть. Васендакиге надияматне ульсть сотфт од талантливай спортсменть Станислав Емельяновонь мархта. И тя аф стак.
 
29.07.2010 №29
29.07.2010  № 29
 

ГРАНТТ—ЕВРО- ПАРЛАМЕНТТЬ ЭЗДА

Мордовиянь Образованиянь министерствась получась Европарламентть эзда кафта грантт. Кажнайсь синь эздост тейнек максы фкя миллион 300 тежянь цалковаень. Министерствань сотрудникне анокласть кафта проектт, конат шнафтольхть.
Васенце проектсь—этнокультурнай направлениянь кизонь лагерсь, коса республикастонк и мокшэрзянь диаспораста шабатне кармайхть сяда крхкаста тонафнемост родной кяльть и сяда маласта знакомондайхть эсь народснон культуранц мархта. Лагерьса ваймамась питнефтома, родительхне пандсазь аньцек кить. Главнай условиясь—штоба шабась мяль вельде тонафнелезе эсь родной кяленц.
Омбоце проектсь—электроннай библиотекань тиемась, коза сувайхть учебникне и методическяй изданиятне мордовскяй (мокшень, эрзянь) кяльхнень тонафнемаснон коряс.
 
22.07.2010 №28
22.07.2010  № 28
 

ВАСЕНЦЕДА МОРДОВИЯСА!

12-15 июльста республикасонк етафтови легкай атлетикать коряс Россиянь чемпионатсь.
Минь тячи гордостень марязь азондсаськ, што Мордовияньке лемневи сембодонга спортивнай республикакс. И тя аф стак. Тянь можна кемокстамс лама примерса. Ваносте, мзяра мекольдень кизотнень Саранскяйса эвондась од спортивнай объектта! Сембе райоттнень эзгавок строяф (или строяви) физкультурно-оздоровительнай комплекст.
08.07.2010  № 26
 

ШИРЕЗОНК САЙ ТЁЖЯНЬ СПОРТСМЕН

Пресс-конференцияста

Понедельникста, 5 июльста, Саранскяйса Печатень кудса ульсь легкай атлетикать коряс Россиянь чемпионатти лемтьф пресс-конференция. Эсонза примасть участия Мордовия Республикань спортонь, физическяй культурань и туризмань министрсь В.Г.Киреев, сонь заместителец В.В.Цыбусова, Мордовия Республикань легкай атлетикань Федерациять президентоц, высшай спортивнай мастерствань республиканскяй  школать директороц М.Л.Храмов, тренерхт, спортсметт, официальнай лия ломатть.
08.07.2010  № 26
 

УДАЛАЗА КИНТЕ, МЕДАЛИСТТ!

Исяк, 23 июньцта, Саранскяйса Республикань кудса Мордовия Республикань Оцюнясь Н.И.Меркушкин васьфнесь республикань школань ся выпускникнень мархта, конат шумордазь тонафнемаснон золотань медальса.
Арась цебярь традициякс кизоста кизос получсемс тя казнеть республикань Оцюнять кядьста.
24.06.2010  № 24
 

 

 

Учредительхие:
Главнай редакторсь: И. С. Лушкин