Поиск по сайту: 
 

Архив
 май 
 2022 
пн вт ср чт пт сб вс
      1
2345678
9101112131415
16171819202122
23242526272829
3031     

 
 

 

Как жили и живут мокшане

КУНАРДОНЬ ПИНКНЕНДИ МРДАМОК

1869 кизоня лиссь российскяй педагогть, этнографть, статистикть Владимир Александрович Ауновскяень мордватнень-мокшетнень колга этнографическяй очеркоц. Эсонза авторсь келиста и мялень салайста пачфни Симбирскяй губернияса эряй мокшетнень и эрзятнень колга, но башка мяль шарфни мокшетненди. Этнографсь азонды атяньконь атяснон эряфснон-ащефснон квалма и тиендьсы тянь сяшкава лац, што оцю очеркть морафтсак фкя ваймоса. Газетаньконь тячиень номерсонза макссаськ эздонза сявф кой-кона пакшнень.

 

…Сяда козя ломаттне эрь шинь эряфсост-ащефсост мезьсовок аф явондыхть ашуфнень эзда, кда аньцек сянь мархта, што сяда лама ярхцамбяльдост и щамдост-карямдост. Кода модань соксихть, синь апак пеняцяк кирнесазь стакатнень-сталмотнень и температурать полафнеманзон шумбрашити кальдявонь апак тиентть. Алятне мезьсовок аф лият руснень эзда ронгс-пондс коре и эрьгавкс улемаснон мархта, а мордовкатне—ули кода смелста азомс—кафксть сяда виихть рузонь аватнень коряс. Урматнень ёткста инь сидеста васьфневись сельмонь золотухась, лисенди сянкса, мес мордвась кельгсыне медень пуреть и равчста ушневи куттнень.
 
 

17.03.2022 №10

 

АВАНЬ ГУЛЯНДАМАНЬ ШИ


 

ДАНЬШИНО ВЕЛЕСЬ—«РАЕНЬ УЖЕНЯ»

17-18 декабрьста Саранскяйса ётафтовсь «Российскяй Федерациянь Финно-угорскяй нароттнень Ассоциациясна» Общероссийскяй общественнай движениять VII съездоц, конань омбоце шистонза Мокшэрзянь национальнай драматическяй театраса работасть несколька темас панельнай дискуссият. Фкясь эздост каннесь «Этнотуризм, бизнес, проектная деятельность» лем. Пингстонза презентацият тисть Россиянь финно-угорскяй нароттнень съездозост саф делегаттне и участникне.

 

Ётксост ульсь Пензенскяй областень Белинскяй райононь Даньшино велеса шачф-касф мокшалясь Н.Н.Пиксин, кона оцю мяльса пачфтсь «раень поместьять», ёмла родинанц—Даньшино мокшень велеть колга. И тиезе тянь аф стане, кода тиендихть ламонцне эздонк: шачень тоса-тоса, пяк кельгса ёмла родиназень, танцти онцтонга аньцек сонь и няендьса и стак тов. Мокшалясь азондозе, мезе сон тись, штоба араламс юмамда-арамда Даньшинать, кодаптольхть тя тевса васенце аськолксонза и кода эряй-ащи «раень тя уженясь» тячи.

20.01.2022 №2

 

АТЯНЬКЕ И БАБАНЬКЕ МАШТСТЬ И РАБОТАМА, И ПРАЗДНИКОНЬ ЁТАФТОМА

Мокшэрзянь народть лувксс сувсихть кафта субэтност—эрзят и мокшет, мокшетнень ёткса нинге улихть каратайхть.

 

Явондыхть субэтносне и национальнай традиционнай щамть эсь лацонь ширензон мархта. Кода пачфневи nazaccent.ru сайтса, мокшаватне инголи каннесть кели понкст и каркс мархта панар. Синь кельгозь руцятнень или шальхнень, конат няемас коре черемисскяй чалма лацотольхть. Мекольдень кизотнень Мордовияса лама мезе тиендеви народнай щамть содафокс тиеманц инкса: национальнай щапт-каряпт щашендовихть оцю пуромксненди, конат ётафневихть республикать столицаса—Саранскяйса.

 

Мокшэрзятнень ламошкасна тяни православнайхть, шуроста васьфневихть молокатт или лютератт.

 

Кда корхтамс койхнень колга, то христианствать саманц мархта синь лядсть станяк весялакс, но примасть сяда целомудреннай шире. Калядань ши мокшэрзятне мярьгондельхть Роштувань сочельникти. Тя шись мокшетнень и эрзятнень эряфса лувондовсь шить (солнце) кувака тялода меле «шачеманц» мархта сотфокс и макссесь надияма цебярь кудазорхненди удалаф эряфонди. Калядань шить пингста иттне весяла мора мархта якасть велень эряйхнень кудснон ланга, а азорхне каванякшнезь синь эсь паньф ярхцамбяльса—пярякаса.

 

Сёксесь мокшетнень эряфса сотфоль паксятнень эса урожаень урядамань тефнень, перень сёротнень и злакнень кочкамаснон шумордамаснонды сотф койхнень мархта. Пяк и пяк кунара «зрнянь пингть» ушедомста ломаттне озонкшнесть плодородиянь шкайхненди, сюконякшнесть теест максф козя урожайть инкса.

 

Кда ваномс атяньконь и бабаньконь эряфснон, то содави, што синь маштсть аф аньцек варьхмодемста шоподемс виень аф ужяльдезь работама, но и праздниконь, ваймама шинь весяласта ётафтома. И тейнек кородозь ванфтомат и тевс нолямат эздост лятф койхнень, обуцятнень, аф юкснемат синь, вдь тя минь историяньке.

 

14.10.2021 №40

 

"ГОСТЕВАНИЕ" ПРОЕКТСЬ—МОКШЕНЬ ПИШЛЯСА


 

КРУЖЕВАКС АЩИ ШУВАНЯ ПАЧАНЬ РЕЦЕПТ РУЗАЕВСКЯЙ РАЙОНОНЬ ПЕРХЛЯЙ ВЕЛЕНЬ КЛУБТЬ ЭЗДА


 

Вирь кучканяса

Моратама кунардонь мора

 

Вирь кучканяса

Вирь кучканяса

 

Паргу келуня,

 

Прясонза морси

 

Цинняй нармоння,

 

Цинняй нармоння,

 

Рашку пулоня.

 

Вай, кува морай,

 

Сияк аварди:

 

«Чик-чирик-чирик»

 

Морай-кольгонди.

 

Вай, кда морай,

 

Лопась маземи,

 

Кда аварди,

 

Лопась пужеми.

 

—Тиелень пиза

 

Оцю вирети,

 

Вай, тоса пелян

 

Вирень ваныда.

 

Вирень керыда,

 

Кайги ружьяда,

 

Оржа узерьда.

 

Тиелень пиза

 

Пиже лугати,

 

Вай, тоса пелян

 

Тишень лядида,

 

Тишень лядида,

 

Тишень прдайда,

 

Пею грабляда.

 

Тиелень пиза

 

Сери межаняс,

 

Вай, тоса пелян

 

Нуйда, кочкида,

 

Нуйда, кочкида,

 

Благой шабада.

 

Благой шабада.

 

Оржа тарвазда.

 

Мес сон аварди,

 

Мес сон кольгонди?

 

Киге аш маряйняц,

 

Киге аш кулиняц.

 

Аньцек марязе

 

Беднай алянясь,

 

Беднай алянясь—

 

Вирень ванынясь.

 

Сон тя моронять

 

Фталу путозе,

 

Фталу путозе

 

Сединянц кучкас.

 

Мес сонценьге аш

 

Эрям-ащемац.

 

Эрям-ащемац,

 

Лямбе вастоняц.

 

Сонь аш поланяц,

 

Аш пестовайняц.

 

02.09.2021

 

КРУЖЕВАНЗОН ЭСА—ВАЙМОНЦ ЛЯМБОЦ


 

Лемоц лятфневи лямбе валса

Атерь велесь содаф трудонь кельги эсь ломанензон мархта. Тяфтамкс лувондови Великай Отечественнай войнань и трудонь ветеранць, мокшалясь Н.И.Сяткин. Кунара ни аш шиса, но цебярь славась, мялямсь колганза эряйхть. Пяле веле мокшалять радняц. Лядсь фкя брадоц, кафта стиренза. Улихть уноконза и уноконь иденза.
Тяддень 26 февральста Никифор Ильиченди топодель 95 киза.
Сонь родителенза, Илья Васильевич и Дарья Филипповна, одста работакшнесть козялятнень лангс. Революциять васьфтезь мяль вельде, но ульсь кодама-бди таколдома, аф верондама. Тоса ушедсь коллективизациясь, колхозонь пуроптомась. Илья Васильевич и Дарья Филипповна сувасть колхозу. Эряфсь петневсь, тёждялготкшнесь. Но аф куватьс ульсь тяфта. Ушедсь Великай Отечественнай войнась. Алянц, Илья Васильевичень, сявозь    фашисттнень каршес тюрема, странаньконь аралама. Эста Никифор Ильиченди ульсь аньцек кеветие киза. Тонафнесь школаса, оцюфнень мархта ряцок трудендась колхозса. А 1943 кизоня теензовок кандсть военкоматста повестка. Ульсь Дальняй Востокса, тюрсь Япониять каршес. Старшай сержантсь Сяткин служась Родинати сисем кизот. Войнада мелевок ульсь Дальняй Востокса, кеподсь странать эса. Куду мрдась аньцек 1950 кизоня.
Н.И.Сяткинонь войнада мельдень сембе эряфоц сотфоль Атюрьевскяй районть мархта. Войнада меле пуроптсь эстеенза семья. Рьвянди кочказе Атерень трудонь кельги стирть, тылонь труженицать Евдокия Даниловнать. Шачсть кафта стирьсна. Тяни кафцьке педагогическяй трудонь ветератт. А.Н.Фролова эряй Курташка велеса. 40 лама киза вятсь мокшень кялень и мокшэрзянь литературань урокт школаса. В.Н.Макарова работась Атерь велень 2№ средняй общеобразовательнай школаса рузонь кялень и литературань учителькс. Никифор Ильичень вете уноктонза, ветексне цёрат.
Лама вастса трудендакшнесь войнань и трудонь ветеранць Н.И.Сяткин.  Ушеткшнезе ДОСААФ-ста. Тоста ётафтозь инспекторкс Атерень сберкассав. Войнада меле мокшалять высшай образованияц ашель. Кучсезь киза тонафнема Куйбышевскяй плановай институту, усксь экономистонь диплом. Тяда меле ульсь райпланонь председателькс, райисполкомонь оцюнянь полафтыкс. Кучсезь Саранскяи тонафнема, коса ётась велень хозяйствань предприятиянь руководителень курст. Сяльде трудендась Атерень «Память Ильича» колхозса парторгокс, Перевесьянь Ждановонь лемса колхозса председателькс, райпланонь оцюнякс. Пингонь ётазь ётафтозь сберкассав заведующайкс. Тяста и тусь войнань ветеранць пенсияв.
—Тянемс алязе ащи сельминголен,—мярьгсь стирец В.Н.Макарова.—Сон тейнек сембоса ульсь примеркс, гордостекс и прянь шнафтома вастокс. Сон пяк трудонь кельгиель, вестевок ашезь пеняцякшне аф сизеф, аф заняфшинц лангс. А конашкава кельгозе  тядязень, эрявсь аньцек няемс.
Евдокия Даниловна кулось аф кунара. Уноконзонды, уноконь идензонды фалу азонкшнезе, кодама цебярь ломанькс ульсь щятясна, кода рьвяясть, эрясть войнада мельдень кизотнень, касфтозь-тонафнефтезь эсь кафта стирьснон.
Сяськомань шиста Н.И.Сяткинонь портретоц «Бессмертнай полкса». Колганза лятфнихть брадоц, стиренза, лия раднянза и мала ломаненза. А лятфтамс ули мезе. Никифор Ильич эрясь аф тёждя, но интереснай эряф. Лама боевой казнедонза. А мзяра оцю казнедонза лац покодеманкса. Коса ашезь трудендакшне, сембе вастса сафнезе.
И.ИВАНОВ.
Снимкаса: Н.И.Сяткин рьванц, Евдокия Даниловнань, стирензон, Аннать и Валентинать, мархта.
20.05.2021 №19

 

МОКШЭРЗЯНЬ КЯЛЬХНЕНЬ ВСЕРОССИЙСКЯЙ ШИСНОНДЫ ЛЕМТЬФ ПРАЗДНИК—МОСКУСА


 

 
 
 

 
НОВОСТИ

Зубово-Полянскяй райононь оцюнясь В.А.Поршин:«Эрь тевсонк васенце вастса ащи ломанць!»

Зубова Полянась васенцеда лятфневи 1680 кизоста сявомок Керенскяй засечнай чертань служилай ломаттнень Зубофнень фамилияснон коряс, синь тя ширеса азорхтольхть. Лемть омбоце пяльксоц пачфни, што тяса кужель, вирьса шуфттнень эзда ароптф вастоль. Сире пинкнень тияк ётнесть Шацк-Спасск алашань кись, Зубова Полянань почтовай станциясь. Машина кить строямста посёлкась вишкста кассь. Тяниень пингть Зубово-Полянскяй районца улихть оцю предприятият, конат лезнихть виияфнемс марнек Мордовиять экономиканц. Кепотьксонди, «Плайтерра» фанерань нолдай компаниясь и Вышинскяй деревообрабатывающай комбинатсь. Лама киза Зубова Поляна посёлкаса ноляй электроннай оборудования «Радиодеталь» заводсь. Оцю тефт тиендихть наказамань ётамань учреждениятне. Пцтай эрть эса улихть стамань цехт, шуфтонь и металлонь обработкать коряс производства. Аф кржа рабочай васта максси «Талина» компаниясь, кона мольфти районца аграрнай бизнес. Инголи моли технология мархта ня предприятиятне сявондихть работама сембе ширде аноклаф, квалифицированнай ломатть, сянкса зарплатавок пандыхть цебярь.
 
 

Корреспондентоньке аф кунара васьфнесь Зубово-Полянскяй райононь оцюнять Владислав Алексеевич Поршинонь мархта и кизефнезе, кода Мордовиянь инь оцю районца ётафневихть эряфс национальнай проекттне.

12.05.2022  № 18
 
 
 
 

МОРДОВИЯНЬ ОЦЮНЯСЬ ПОЗДРАВЛЯНДАЗЕНЬ ВЕТЕРАТТНЕНЬ

Шуваланяста, 5 майста, Артём Здунов васетькшнесь Мордовиянь ветеранскяй активть мархта. Васедемаса примасть участия республикань райононь ветеранскяй организациянь председательхне и члеттне.

 

Тяддень мартста организацияти топодсь 35 киза. Мордовиянь Оцюнясь азозе, што Ветеранонь советть оцю значенияц регионца, сон путни сатомшка оцю путкс од поколениять воспитандаманцты. Корхтафоль памятниконь тиемать коряс Военно-историческяй обществать мархта марстонь работать и Сурскяй рубежень строяйхненди музеень панжемать колга.

 

«Кда аф тинь советонте, тейнек улель стака ламоц важнай задачатнень пяшкодемста. Башка мяль тячи, конешна, эряви шарфнемс од ломаттнень воспитандамаснонды, сянди, мезе тиендеви школатнень эса. Интернетса лама аф видексонь информацияда, конань вельде ули кода тиемс кальдяв од ломаттненди, сяс кадондомс мялень апак шарфтт тя категориять аш кода»,—мярьгсь Артём Здунов васедемать панжемста.
 

12.05.2022  № 18
 

СЕДИЕНЬ ТАКОЛДОМА И ОЦЮ КЕНЯРДЕМА КАННИ ТЕЙНЕК 9 МАЕНЬ ШИСЬ!

Победань шиня Саранскяйса и Мордовиянь райоттнень эса ётафтовсть мероприятият, конат лемтьфтольхть 1941-1945 кизотнень Великай Отечественнай войнаса Сяськомать 77 кизонь топодеманцты.

 

Саранскяйса Победань площадьса ётафтовсь торжественнай митинг. Ся кизонь пелькс событиянь участникненди и свидетельхненди сюконяма, сяськиень поколенияти спасибань азома, сембонь сятнень лятфтама, кит тяни ашет мархтонк, сашендсть ошеряйхне и Мордовиянь столицань инжихне.

 

Торжественнай митингть панжемста Мордовиянь Оцюнясь Артём Здунов поздравляндазень пуромфнень странаньконь историяса Великай шить мархта: 

 

«77 кизода тяда инголе Советскяй народсь аралазе родной Отечестваньконь,  нолдазе воляс фашизмать  эзда ламоц странатнень и нароттнень. Республикасонк шачф-касф ломаттне тиендсть героень тефт сембе фронттнень эса: Брестскяй крепостть араламста, Москуть, Ленинградть, Севастопольть инкса ащемста, Сталинградть ала и Курскяй дугать лангса тюремста, Украинань, Белоруссиянь союзнай республикатнень и сембе Европать воляс нолдамста. Тылонь труженикне, аф ваномок ашушить и вачашить лангс, сатнезь Победать станокнень ваксса, паксяса, Сурскяй рубежса и госпитальхнень эса. Марса аватнень и сире ломаттнень мархта тылса стакат-сталмот кирдсть шабатне. Вечнай толть ваксса минь сюконяфнесаськ пряньконь сембонь сятнень лятфтаманкса, кие ашезь мрда войнаста, кие эреклафнезе народнай хозяйствать войнада меле. Сембось тя тиф минь инксонк, шабаньконь, сяськиень сай пингонь поколениятнень инкса!»

 

 
12.05.2022  № 18
 

«Бессмертный полк России» ООД-ть Мордовия Республикань региональнай отделениянц штабонц руководителец Н.А.КРУЧИНКИН: «ТЯДДЕ "БЕССМЕРТНЫЙ ПОЛК" ШЕСТВИЯСЬ КАРМАЙ АСЬКОЛЯМА МАРНЕК СТРАНАТЬ ЭЗГА!»

05.05.2022  № 17
 
 

Касы коронавируснай инфекцияса сярядихнень лувкссна

29 апрельста ётафтовсь коронавируснай инфекциять инголдаманц и келемоманцты кить персеманц коряс региональнай оперативнай штабть  заседанияц. Сонь работасонза примась участия Мордовиянь Оцюнясь Артём Здунов.

 

«Коронавируснай инфекцияса урмаськодомать мархта тефне Мордовияса ашесть полафта—300-та лама пациент пчксихть ковиднай госпитальхнень эса. Ваномс, штоба Маень праздникнень пингста массовай пуромксне афольхть ара урмаса сярятькстыхнень лувксснон касомаснонды туфталкс»,—мярьгсь регионть руководителец.

 

МР-нь Правительствать Председателенц заместителец Галина Лотванова азондсь эпидемиологическяй  тяниень пингонь ситуациять и коронавируснай инфекциять эзда населениять вакцинациянц мольфтеманц колга.

 

Ётай недялять коряс 19 процентта кассь госпитализированнайхнень лувкссна, сяда лама арась стационарса пчкафневи идьта. Коллективнай иммунитетсь кирсь и тячиень шити сон арась 52,7 процент.

 

05.05.2022  № 17
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин