Поиск по сайту: 
 
Наши мокшанские сыновья и дочери
Свежий номер
Тема дня
Национальная тематика
Культура
Обратная связь (Газета - Читатель)
В Госсобрании РМ
В Правительстве РМ
События
Демография
Здоровье
Мокшане о мокшанах
Как жили и живут мокшане
Ветеранам о ветеранах
Молодежный клуб
Наша усадьба
Наука и жизнь
Спорт
Национальный проект
Образование
Доступное жилье
Благотворительность
Поговорим о создании единого литературного мордовского языка

Архив
 сентябрь 
 2010 
пн вт ср чт пт сб вс
  12345
6789101112
13141516171819
20212223242526
27282930   

 
 

 
Ветеранам о ветеранах

«Кельгома Руссь и Мордвась» конкурссь

ВИДЕШИТЬ АЗОНДОЗЬ СЁРМАТНЕ
 
ТОСТ 
…9-це майста Сашатнень пяли састь инжихть. Сашанди курок топоди 6 кизот. Эряй тядянц, алянц, емла сазорнянц и сире бабанц мархта.
Тядяц аноклась шра. Акша скатертть лангса латцефт тарелкат, пиндолды бокалхт.
Мекпяли учевсть инжихневок.
Церанясь ерась ердамс пря каршезост, но лядсь мялезонза, што 6 кизонза ни курок, и прясь эряви вятемс алякс. Катк инжихне васенда шумбракстыхть оцюфнень мархта, етайхть комнатав.
Мзярда сембе озсесть шрать перьф, Ваня оцясь кизефтезе:
—Содасак кодама праздник тячи?
—Вейхксоце майсь!—отвечась Саша.
Шра ваксстотне пеедезевсть.
—Тясть визделгофне церазень,—арась ширезонза тядяц,—семботь содасы и шарьхкодьсы. Сяськомань шить инкса!
Конешна, тядянц видецоль. Мзяра кинода Саша няйсь фашисттнень колга! Конашкава афолезень няе ня нильготькс, прянь няи, клянцень сельме, рузкс корхтама аф машты фашисттнень! И конашкава кельгозе тя сетьме и торжественнай праздникть! Теенза-арам, марнек перьфпяльсь тячи тяфтамоль: ульцясь, инжихне, шра лангсь, телевизорста шаржу генералсь, кона корхтась советскяй славнай артиллеристтнень, летчикнень и танкисттнень колга…
—Тядяй, можна азан тост?
—То-о-ст?
—Мярьгода церати азомс тост, аля сон или аф!?—пшкядсь Ваня оцяц.
Саша арась стулти плманжа лангс, штоба сембонди няеволь, кеподезе лимонадта пяшксе бокалонц:
—Советскяй летчиконьконь и танкистоньконь инкса, конат сяськозь фашисттнень! Ура!
—Ура!—фатязь инжихне.
—Молодец!—шназе Петя оцяц.
Эста Саша тага пешкодсь:
—Шумбрат улест боецоньке, конат… конат… конат…
—Ура!—лездсть теенза инжихне.
Тя еткть телевизорста эряфкшу генералть полафтозе военнопленнайхнень колга передачась, седиень сязьфти документальнай кадратне няфнезь концлагерьхнень эса эряфть.
Саша элякотфоль, сяшкава тусь мялезонза тостонь азондомась.
—Шумбрат улест советскяй военнопленнайхне, конатнень шавондозь фашисттне. Ура!—и симозе лимонадонц.
Инжихнень эзда кивок ашезь пееде-раха, сембе нолданьбрят сюволясть цянгоняса тарелкасост, а сире бабанц сельмонза пяшкодсть сельмоведьта и тусть шудема щекаванза.
Аляц фатязе церанц кавлалда, кандозе комнатазонза, путозе кияксти, лисемста аф кайгиста, но кяжиста пшкядсь:
—Арьсек, мезе мярьготь,—кенкшсь селговсь.
Мольсь пингсь. 9-це майста пуромкшнесть тяка инжихне. Саша ашезь тяряфне тостонь азондомс. «Военнопленнай» валть лятфтаманцка пельсь.
Аньцек кемонь кизода меле шарьхкодсь, мес тостоц тяшкава таяскофтозень сире бабанц и инжихнень.
19.08.2010 №32

 

60 КИЗОНЬ КУВАЛМОСА ПАВАЗ

Краснослободскяй райононь Куляз велеть и сонь эряензон колга «Мокшень правда» газетаса тяшневсь аф весть ни. Велень корреспондентоньке П.С.Феоктистов газетать лувиензонды азонкшнесь «Ёндол» колхозонь труженикнень тевснон-сатфкс­снон колга. Аф весть лятфнезе тевонь кельги ломанть Степан Степанович Федоровонь лемонц. Кодама аньцек тефт ашезь пяшкотькшне мокшалясь: покодсь кузенцяса, ульсь бригадиркс, заведующайкс, азорондась общественнай фермаса. Общественнай производстваса ламос работась пенсияс тумдонза мелевок.
Аф кунара Степан Степановичень семьяса ульсь оцю ила, кона лемтьфоль рьванц, Раиса Ивановнань мархта марстонь эряфснонды 60 кизонь топодемати. Пуромкшнесть идьсна, уноксна, радня ломаньцна.
Мезьста сембось ушеткшнесь? Павазу эряфонь киснон колга азондсть синць юбилярхне.
12.08.2010 №31

 

МОКШЭРЗЯНЬ МАСТОРТЬ ЛЯМБОЦ

Великай Отечественнай войнать ушедоманц мархта странаньконь западнай областьса обстановкась пяк стакалгодсь. И ломаттне тоста ушедсть тушендома странать тылс. Сяс СССР-нь  Народнай Комиссаронь Советсь 1941 кизонь июльста нолдась «О порядке эвакуации населения в военное время» лем ала Постановления.
Постановленияса азфоль, што сембе эвакуированнайхненди эряви максомс эряма васта ошса, рабочай поселкаса и велеса, Горьковскяй, Пензенскяй, Куйбышевскяй, Саратовскяй областьса. А тяфта жа Чувашскяй, Удмуртскяй, Татарскяй и Мордовскяй Республикатнень эса.
Постановленияса тяфта жа мярьгондевсь республикань Совнаркопнень председательснонды сембе эвакуированнайхненди максомс эряма и покодема вастт колхозса, совхозса и заводса. И макссемс, мзярда эрявксты, медицинскяй лезкс.
Мордовияса Народнай  Комиссаронь Советть Председателенц В.В.Верендякинонь руководстванц ала ульсь пуроптф специальнай комиссия. Сон работась эвакуированнай ломаттнень мархта. Республикаса ульсть тифт эвакопунктт. Синь работасть Рузаевкаса, Саранскяйса, Ковылкинаса и лия оцю станцияса, ошса и поселкаса. Республикав эвакуированнай ломаттнень мархта васенце эшелоттне ушедсть сашендома 1941 кизонь июнь ковть песта. И 11 июльть самс Мордовияса эрясь ни 25 тежянь эвакуированнай ломань. Синь састь Ленинградста, Минскяйста, Витебскяйста, а тяфта жа—Могилевскяй и Гомельскяй областьста.
Архивнай документтнень коряс, ширде саф ломаттне кучсевсть покодема Мордовиянь Ардатовскяй, Атяшевскяй, Ромодановскяй, Ичалковскяй, Ковылкинскяй, Торбеевскяй району. Тоса теест макссевсь сембе ширдень лезкс: ярхцамбяльса, щамбяльса, эряма вастса и ярмакса. Саранскяйса теест макссевсть фуфайкат, сапонь и лия товархт. Столовайса эрь шиня обедафневсь 800 ломань.
Эвакуированнайхнень еткса ульсь лама цебярь специалист: учительхть, зоотехникт, врачт, инженерхт. Тяфтама специальность мархта ломаньда Мордовияса эста ульсь аф лама. Сяс, эряви азомс, эвакуированнайхне республикань специалисттненди макссесть оцюдонга оцю лезкс.
Войнань кизотнень Мордовиясь примась 80 тежянь ломань. Республикань эряйхне сявсть эсь семьязост 1300 уроз шаба. И республикаса тяфта жа панчфоль 26 идень интернат. Лиякс мярьгомс, Мордовиясь войнань кизотнень тиезе семботь, штоба эвакуированнай                хне марялезь пряснон кода кудса.
Войнада меле ламотне эздост мрдасть куду. А кой-кит эздост ушедсть эряма од эряфса мокшэрзянь масторса. 
Е.ЛОШКАРЕВА,
Мордовиянь
Центральнай
государственнай
архивонь сотрудник.
05.08.2010 №30

 

Ученайть, педагогть В.С.Тягушевонь 75 кизонь топодеманцты

МЯЛЯМОЗОНК ЛЯДСЬ ПАРА ВАЙМЕ ЛОМАНЬКС, ВИИ УЧЕНАЙКС
 
Мордовиянь историкнень еткста цебярьста содаф историкть, педагогть В.С.Тягушевонь лемоц.
Шачсь сон 1935 кизонь 14 августста Мордовскяй АССР-нь Ичалковскяй райононь Кендя велеса крестьянонь семьяса. Аляц, Степан Григорьевич, шавовсь Великай Отечественнай войнаса. Тядяц, Прасковья Васильевна, II группань инвалидоль, эрясь Кендя велеса.
Василиень идькс пингоц аф теждяль. Савсь кярьмодемс кудонь тефненди, лезнемс сяряди тядянцты. Церанясь якась кудонь жувататнень мельге, аноклакшнесь тише, кормат, пенгат.
 
Василий Степановичень кармань содамонза 1963 кизоста сявомок. Эста марса тонафнеме МАССР-нь Министронь Советть видеса кялень, литературань, историянь и экономикань Мордовскяй научно-исследовательскяй институтса. Лама морафнесь, кельгозе трудендаманц, содазе тевонц. 
1943 кизоня Вася Тягушев ушедсь тонафнема Кенден­скяй школаса. 7 класста меле поступась Ичалковскяй педагогическяй училищав, конань 1954 кизоня шумордазе отличия мархта дипломса. Сяльде поладозе тонафнеманц А.И.Полежаевонь лемса Мордовскяй государственнай педагогическяй институтть историческяй факультетсонза. Эста тяфта лемневсь тяниень университетсь. Тягушевонь квалма корхтасть кода цебярь, еню, шарьхкоди студентонь колга. 1959 кизоня Василий шумордазе университетть отличия мархта дипломса.
22.07.2010 №28

 

АЛЯЗЕНЬ КЕЛЬГОМА ТЕВОЦ

Азкс М.Н.Бычковонь квалма, кона 70 киза служай журналистикати
Алязе азонкшнесь, што мзярда нинге мольфтсь ОРС-са проверка, тостонь служайхне аф кайгиста кичкордсть:
—«Мокшень правда»! А минь мокшекс аф шарьхкоттяма!
Ковшкада меле М.Бычков тага варжакстсь ся организацияв, лия кизефксонь коряс. Но тяни «мокшекс аф шарьхкодихне» салава кжнасть:
—Опять «Мокшень правда» пришла!
Весть ошень хлебокомбинатть директороц И.Я.Шарипов эняльгодсь алязти:
—Ошень вятихне сюцесамазь, мес комбинатоньке аф пяшкотькшнесы кшинь панемань планть. А минь кшиньке узгоряви магазинга и кушнеси. И тя ся пингоня, мзярда кой-кона велень ломаттне, мярьгомс Перхляеннетне, тушендыхть кшинь-мезень рамама Лямбирскяй району. Пара ули, кда тон, Михаил Николаевич, няфтьсак газетаса тя безобразиять...
08.07.2010 №26

 

ЛЯТФНЕЗЬ РОДИНАТЬ ИНКСА ШАВФНЕНЬ

22 июньцта Саранскяйса Великай Отечественнай войнаса Родинать аралаензонды Мемориальнай комплексть ваксса етафтфоль траурнай митинг, кона лемтьфоль Лятфнемань и ризнамань шити—воиттненди, кит 1941-1945 кизотнень максозь эряфснон Родинать инкса.
Пуромкшнесь лама ломань. Ульсть делегацият организациятнень и властень структуратнень эзда.
Отечествать араламста шавфненди памятникть ваксс панчфт путсть Мордовия Республикань Оцюнясь Н.И.Меркушкин и Приволжскяй федеральнай округса Россиянь Президентть Полномочнай представителенц заместителец В.Н.Шнякин.
24.06.2010 №24

 

В.Т.Чукаровонь 95 кизонцты

ПОЭТ, ПЕРЕВОДЧИК И ЖУРНАЛИСТ
 
Василий Трофимович Чукаров—содаф мокшень поэт, переводчик и журналист. Шачсь 1925 кизонь 10 июньцта Рузаевскяй райононь Могилевка велеса. Од церакс етазень Великай Отечественнай войнань стакадонга-стака китнень-яттнень. Войнать аделазе Германияса. Стака рананзон мархта мрдась родной велезонза. Теенза эста ульсь аньцек 21 киза. Покодсь колхозса, сермадсь стихт. А пингонь етазь тердезь Саранскяи. Седикс-ваймокс покодсь «Мокшень правда» газетаса корреспондентокс, Мордкизса—редакторкс, «Советская Мордовия» газетаса и республиканскяй радиокомитетса—переводчикокс. 1949 кизоня Мордкизса лиссь «Од вайгяльхть» стихонь коллективнай сборникоц. Тя сборниксь панжевсь Василий Чукаровонь стихотворениянзон мархта. Ламоц стихне лемтьфтольхть войнань темати. 1951 кизоня лиссь «Заря валда» сонцень васенце сборникоц. Авторсь сермады войнать, Родинать аралаензон колга, морасыне войнаста саф солдаттнень мирнай трудснон, колхозникнень эряфснон.
1956 кизоня лувихне получазь Чукаровонь «Якстерь знамя» лем ала омбоце книганц, коза сувасть кафта поэманза.
В.Т.Чукаров лама работась кода переводчик. Сон мокшень кяльс етафтозень А.С.Пушкинонь, Н.В.Гоголень, Н.Г.Чернышевскяень, В.В.Маяковскяень, А.М.Горькаень, Леся Украинкать и лия писательхнень и поэттнень произведенияснон.
Василий Трофимович ульсь аф аньцек цебярь поэт и переводчик, но и цебярь прозаик. «Мокшень правда» газетаса и «Мокша» журналса печатлась лама рассказ и повесть. Сонь перанц алда лиссь аф кржа очерк, оржа фельетон, коса рахсезень нолатнень, эсь прянь няихнень, салайхнень-колайхнень.
В.Т.Чукаровонди ламос эрямс ашезь сав. Сон кулось 1980 кизонь 25 июньцта, мзярда теенза ульсь сембоц 55 киза.
10.06.2010 №22

 

ТЯСА ВАНФНЕВИ ИСТОРИЯСЬ

Войнань и трудовой подвигонь Мемориальнай музейсь панчфоль 15 кизода тяда инголе. Сон ушедсь работама 1995 кизонь 9-це майста. Музейть строямс средстват макссесть предприятиятне, частникне. Музейть васенце директороц ульсь А.М.Мамаев. Войнань ветеранць лама тись экспозициянь, фондонь материалонь, финансовай средствань кочкамста, музейть строяфтоманкса. Куломдонза меле тя постти путфоль сонь церац А.М.Мамаев. А 2008 кизоста сявомок музейти директоркс путф «Поиск» республиканскяй патриотическяй объединениять вятиец Н.А.Кручинкин.
Коллективса трудендайхть тевонь кельги ломатть, конат творческяй вешендемать пингста мушендыхть од фактт войнань пингонь событиятнень колга, сотцевихть од геройхнень лемсна. Тяфта, научнай сотрудниксь И.С.Бурнайкин исследовательскяй работанц вельде содась летчикть гастеловецть, Советскяй Союзонь Геройть И.С.Кудашкинонь подвигонц колга. Лама киза работась музеень сотрудницась Л.С.Сандина сянкса, штоба сембе содалезь Российскяй Федерациянь Геройть С.И.Вандышевонь лемонц. Лама одня Геройхнень колга, конат шачсть-кассть  Мордовияса, мусь исследовательскяй работань вятемста пропагандань отделонь заведующайсь Т.П.Футанова.
27.05.2010 №20

 

УСКСЕЗЕ МАРШАЛТЬ В.И.ЧУЙКОВОНЬ

—Тя ломанць легендарнай,—мярьгсь Судебнай департаментонь управлениять пресс-секретарец Е.Саблина.—Войнань кизотнень сон ульсь водителькс, пачкодсь Берлину, усксезе автомобильса маршалть В.И.Чуйковонь.
Лангс ванозь Иван Ивановиченди тняра киза кивок аф максы. Эрьгав, корхтафкшу.
—Шоферкс тонафнень Сабур-Мачкасскяй автошколаса,—азондсь ветеранць.—Эста тейне ульсь 15 киза.
А мзярда сась пингсь тумс Родинать аралама, ульсь ни водителень удостоверенияц. Сонь ашезь прважа фронту, а кадозь учебнай автомобильнай полку. Иван Квасков парста аделазень курснень и арась водителькс-инструкторкс. Фронтти эрявсть тежятть водитель. Тяка пингть эрявсь тонафнемс и немецкяй, английскяй, американскяй техникась. Тонафневсть «Виллис», «Студебеккер», «Форд» автомобильхне. Мордовияста тертьф воинонь фкя взводсь, конанди командиркс ульсь Козлов, техникать тонадозе сембонь коряс сяда лац. Эрь курсантти тянкса казсть равжа од шинель, а инструкторти И.Квасковонди макссть «Отличный шофер» знак.
20.05.2010 №19

 

ПОЭТ, ФРОНТОВИК

П.К.Любаевонь мархта васенцеда васедеме етай веконь кодгемонце кизотнень. Ся кунардонь пингста сон работась милициянь оргаттнень эса. Ламоксть няендине Саранск ошень ульцяста. Лангсонза каннель китель, лафтувонзон лангса пиндолдсть милициянь подполковниконь погононза. Серес аф оцю, военнай формась пяк ладясь теенза. Ежу сельмованфоц, ялгакс маштозь корхнемац фалу кепсезе корхни ялганц мяленц. Сидеста ляденди мялезон ся шись, кода весть васьфтемань  ошень ульцяса. Сон лоткась ваксозон, кундазе кядезень, пеедезевсь.
—Вага мезе тячи азан тейть, ялгай,—ушедозе сон  корхтаманц.—Сувак ширезон Внутренняй тевонь министерствав, сяфтядязь работама милицияв участковайкс. Юристонь тевтьке сяда лац кармат содамонза.
Ся кизотнень эзда сявомок, минь ашеме явонда фкя-фкянь эзда. Сон лезнесь тейне Казанскяй университетса тонафнемстон.
Ня шитнень улень ширесонза.
13.05.2010 №18

 
 

 
НОВОСТИ

МИНЬ ЗЕМЛЯКОНЬКЕ АЛЕКСЕЙ АЦАПКИН—ОЛИМПИЙСКЯЙ ЧЕМПИОН

17 августста кизонь I-це Юношескяй олимпийскяй налхкоматнень эса Сингапурса вольнай стильса ведьса уендихнень еткса 4х100 метрас эстафетаса сяськсь Россиянь командась: Андрей Ушаков, Илья Лемаев, Антон Лобанов и минь Мордовиянь спортсменоньке Алексей Ацапкин. Россияттне етазь китайскяй сборнайть 0,55 секундада. Уемаса пялькстыхне—австралиецне—лиссть нилеце вастти, пачфни олимпийскяй турниронь сайтсь.
19.08.2010  № 32
 

Мольфтеви «2010 кизонь урожайсь» оперативно-профилактическяй операциясь

МВД-нь СОТРУДНИКНЕ ВАНЫХТЬ СЁРОНЬ УРЯДАМАТЬ МЕЛЬГЕ
 
Мордовияса 270 предприятиясь заняф велень хозяйствань культурань касфнемаса. Марстонь площадсь 1659 тежянь гектар.
Сянкса, штоба ванфтомс тяддень и мелянь урожайть, 2010 кизонь 15 июльста сявомок республикасонк мольфтеви «Урожай-2010» оперативно-профилактическяй операциянь омбоце этапсь, мезть пингста республикань внутренняй тевонь органонь сотрудникнень мархта муфоль 41 административнай правонарушения, 483 преступления.
Мордовия Республикава Внутренняй тевонь министерствась оцю работа мольфти сянь коряс, штоба перямс кить велень хозяйствань продукциянь, жуватань-мезень саламати, ваныхть сянь мельге, штоба назначенияс коре нолявольхть засухать сюнеда эвондаф зияттнень машфтомс государствать мархта макссеви бюджетнай средстватне, мольфтихть контроль серонь, тишень, ГСМ-нь, удобрениянь, техникань-мезень ванфтома васттнень мельге.
Внутренняй тевонь органонь сотрудникненди лездомс ули кода кажнайти. Кда приметаф саламань-коламань случай, пачфтеда 47-70-60 номерс коре.
 
19.08.2010 №32
19.08.2010  № 32
 

РОССИЯНЬ ПРЕЗИДЕНТСЬ Д.А.МЕДВЕДЕВ ПОЗДРАВЛЯНДАЗЕНЬ МИНЬ СПОРТСМЕНОНЬКОНЬ САТФКССНОН МАРХТА

Ётай недялять Россиянь Президентсь Д.А.Медведев васетькшнесь легкай атлетикаса Европань XX чемпионатонь чемпиоттнень и призерхнень мархта. Сон поздравляндазень легкоатлеттнень оцю сатфксснон мархта. Барселонаса  спортсметтне сатсть 24 медаль: кемонь золотань, кота сиянь и кафкса бронзовайхть. Казнетнень оцюшкаснон сатозь Мордовиянь спортсметтне.
 
Ольга Каниськинась сембе легкоатлеттнень лемста благодарностень валхт азсь Президентти ширень кирдеманкса.
Васедемста Каниськинась пачфтсь, што Мордовияса ушетф Олимпийскяй подготовкань центрать колмоце очереденц, 400 метранди вельхкс ала манежть, бассейнать строямасна.—Тя тейнек башка пяк эряви 2012 кизоня Лондонца Олимпиадада инголе,—мярьгсь спортсменкась.
Ольга Каниськина васедемань участникненди лятфтась и сянь колга, што 2012 кизоня Саранскяйса етафтови спортивнай якамаса Миронь кубкась. И нинге фкя пяк оцю мероприятия—мордовскяй народть Российскяй государствань нароттнень мархта ладязь эрямаснон 1000 кизонь топодемань праздновандамась. Тияк сон лямбе валхт азсь тренерхнень лемс.
Д.А.Медведев поладозе:
—Оля видеть азозе тренерхнень колга. Тя шарьхкотьф. Но аф фалу шарьхкотьф тянь коряс региононь руководительхнень позициясна. Мордовияса, мон лац содаса, кда кодама поручения максат республикань руководительти, сон фалу старандай тиемс лац-ряц, оцю качестваса.
И тянь эряви азомс аф аньцек спортть колга.
12.08.2010  № 31
 

УШЕДОВСЬ ТОЛТЬ ЭЗДА ЗИЯНЦ ПОВФНЕНДИ КУДОНЬ СТРОЯМАСЬ

Мордовияса вирень пожархнень сюнеда кудфтома лятфненди строяви 81 эряма васта. Лядыксне, а сембоц республикаса палсь 157 куд, азсть мяль сявомс ярмакса. Виде, педа-пес нинге лац-ряц аф содаф, мзяра куд сави строямс. Но, кода азозь МР-нь Строительствань и архитектурань министерстваса, строительхне тисазь сембе эрявиксть, штоба кенеремс строямс синь 1 ноябрти, тя пингть ладязь Россиянь Президентсь Д.Медведев и странань премьер-министрсь В.Путин.
 
Сянкса, штоба эреклафтомс строямань тевть, странань руководствась примась решения, што эряма васта зиянц повфненди кармай строяма единай поставщик. Тя корхтай сянь колга, што муниципальнай заказчикти ули кода тиемс подрядонь договорхт конкурсонь апак етафтт, кона таргави 45 шис.
Тяка пингть, пожархнень сюнеда зиянц кой-кона повфне азсть мяль строяфтомс од кутт аф сяка васттнень эса, а лия населеннай пунктова—Саранскяйса, Зубова Полянаса. Кепотьксонди, Свеженькая, Подлясова и Вад.Селищи велень кой-кона эряйхне пачфтезь, што мяльсноль етамс райцентрав—Зубово-Полянав. Строительхне арьсихть строямс теест од ульця. Ламотнень мяльсна лядомс сяка васттненди. Строяви куттне улихть ефси лият палфнень коряс. Эсост кармай улема сембось: свет, газ, лямбе и кельме ведь, канализация.
Мордовияса строямань тевсь кемокстаф 8 организация мельге. Ня компаниянь представительхне ульсть ни райоттнень эса, васетькшнесть велень Советонь оцюнятнень мархта. Тяни специалисттне анокласазь проектно-сметнай эрявикс документациять. 6 августста строительхне прважазь районга эрявикс техникать и решандазь кизефксть рабочайхненди работань пингонди эряма вастонь максомать коряс. Подлясоваса арьсекшневи панжемс палаточнай лагерь. Ваймама шитнень ускфт стройматериалхт, а 9 августста рабочайхне кярьмодсть од кудонь строяма.
 
12.08.2010 №31
12.08.2010  № 31
 

ПАЛЫХНЕНДИ МАКСФ ВАСЕНЦЕ ЛЕЗКССЬ—1,5 МИЛЛИОН ЦАЛКОВАЙСЬ

Нинге аф кунара ня васттне ульсть Мордовияса инь цебярьхне. Но стихиясь нардазь нардазе тя мазышить и кадсь мельганза седиень ацергофты картина. Сянгяря вирьхнень вастс лама километра кить кувалмова таргавсть равжа палф шуфтт, а велетнень вастс—кулуфт. Колма ломанень жертват, 150 палф куд—тяфтама тячиень пожаронь пелькс статистикась республикань Зубово-Полянскяй районца.
 
Мордовиянь Оцюнясь Н.И. Меркушкин и РФ-нь региональнай развитиянь министрть заместителец К.Ю.Королевский ваймама шитнень ульсть районца.
Тевсь тяса ащи пяк кальдявста. Ломаттне эвотьфт, но тяни валом валом сашендыхть эсезост. Н.И.Меркушкин азозе: ламось тяни ащи местнай властть эзда. Эряви куроконе анокламс сембе эрявикс документтнень. Августста палф куттнень вастс ушедома од стройка.
Районца тиф оперативнай штаб, конанди вятикс Государственнай Думань депутатсь В.Б.Кидяев. Эрь палф велеса работай комиссия: медикт, райсобессь, милициясь и районнай администрациянь представитель. Ломаттненди, кит юмафтозь сембе имуществаснон, пяк стака. Но лезкссь сай. Понедельникти палыхне получазь васенце 1,5 миллион цалковайть Мордовиянь Оцюнять резервнай фондстонза. Ломаттненди явондови пси ярхцамбяль и сухой паек.
Пуромомок Мордовиянь Оцюнять перьф, велеряйхне корхтайхть теенза: Мордовиясь колганк заботендай, пси ярхцамбяль анокласть, сухой паек усксихть. Синь валснон полаткшнесазь Вад. Селища велень эряйхне: Спасиба, што тейнек тняра техника панеде, спасиба што вертолеттне, самолеттне пожар матсть, сюкпря теенть. Меркушкин отвечась: Васендакиге спасиба странань руководствати.
Вад. Селищаса толонь даволсь етась ляйть туркс кожфка пяле километра вастс, кона явфнезе велеть вирть эзда и валгсь куттнень лангс. Тяфтама пелькс тяса ашесть няенде нльне кунардонь эряйхне. Но, кода фалу, трагедиять улихть аф аньцек жертванза, но и эсь героенза. Ся велеряйхне, конатнень кудсна ни палсть, эсь прянь аф ужяльдезь (тя видекс тяфта) матсть шабраснон кудснон эса. Толть мархта тюрсть нльне школьникне. Емлатне каннесть ведь мархта ведаркат, оцюфне—кие кода маштсь.
Н.И.Меркушкин люпштазе тястоконь школань выпускникть Сергей Левштановонь кяденц. Сон васенцекс няезе толть, кеподезе пильге лангс сембе велеть. Тядде Сергей поступай университетонь историческяй факультету.
Историясь аф юкстасы тя страшнай кизоть.
Тяни, 2 августста, аньцек Зубово-Полянскяй районца 8 оцю вирень пожар. Качамти ляпиякшнихть животнайхне, палы вирсь. И эрь тяфтама бедати ушетксокс арси—кинь-бди мархта ердаф папироса песь, крьвястьф сардонясь. Мезти нинге эряви лисемс, штоба кажнайсь эздонк, мекпяли, тянь шарьхкоделезе?
 
05.08.2010 №30
05.08.2010  № 30
 

МАРЯТАМА ИНКСОНТ ГОРДОСТЬ!

Испанияса ётафтови Европань чемпионатса Россиянь сборнайсь сатсь 5 медальхть и сембе синь—миннет.
Испаниянь Барселона ошса моли легкай атлетикать коряс Европань чемпионатсь. Васенце шиня пялькстсть 20 километрань дистанцияса ялга якамать коряс инь вии спортсметтне. Тя мезть синь етксост аньцек ашель тяниень миронь чемпионць Валерий Борчин, сяс мес сон получась травма. Но сембе мирти содаф тренероньке Виктор Чегин мусь теенза достойнай полафтыхть. Васендакиге надияматне ульсть сотфт од талантливай спортсменть Станислав Емельяновонь мархта. И тя аф стак.
 
29.07.2010 №29
29.07.2010  № 29
 

ГРАНТТ—ЕВРО- ПАРЛАМЕНТТЬ ЭЗДА

Мордовиянь Образованиянь министерствась получась Европарламентть эзда кафта грантт. Кажнайсь синь эздост тейнек максы фкя миллион 300 тежянь цалковаень. Министерствань сотрудникне анокласть кафта проектт, конат шнафтольхть.
Васенце проектсь—этнокультурнай направлениянь кизонь лагерсь, коса республикастонк и мокшэрзянь диаспораста шабатне кармайхть сяда крхкаста тонафнемост родной кяльть и сяда маласта знакомондайхть эсь народснон культуранц мархта. Лагерьса ваймамась питнефтома, родительхне пандсазь аньцек кить. Главнай условиясь—штоба шабась мяль вельде тонафнелезе эсь родной кяленц.
Омбоце проектсь—электроннай библиотекань тиемась, коза сувайхть учебникне и методическяй изданиятне мордовскяй (мокшень, эрзянь) кяльхнень тонафнемаснон коряс.
 
22.07.2010 №28
22.07.2010  № 28
 

ВАСЕНЦЕДА МОРДОВИЯСА!

12-15 июльста республикасонк етафтови легкай атлетикать коряс Россиянь чемпионатсь.
Минь тячи гордостень марязь азондсаськ, што Мордовияньке лемневи сембодонга спортивнай республикакс. И тя аф стак. Тянь можна кемокстамс лама примерса. Ваносте, мзяра мекольдень кизотнень Саранскяйса эвондась од спортивнай объектта! Сембе райоттнень эзгавок строяф (или строяви) физкультурно-оздоровительнай комплекст.
08.07.2010  № 26
 

ШИРЕЗОНК САЙ ТЁЖЯНЬ СПОРТСМЕН

Пресс-конференцияста

Понедельникста, 5 июльста, Саранскяйса Печатень кудса ульсь легкай атлетикать коряс Россиянь чемпионатти лемтьф пресс-конференция. Эсонза примасть участия Мордовия Республикань спортонь, физическяй культурань и туризмань министрсь В.Г.Киреев, сонь заместителец В.В.Цыбусова, Мордовия Республикань легкай атлетикань Федерациять президентоц, высшай спортивнай мастерствань республиканскяй  школать директороц М.Л.Храмов, тренерхт, спортсметт, официальнай лия ломатть.
08.07.2010  № 26
 

УДАЛАЗА КИНТЕ, МЕДАЛИСТТ!

Исяк, 23 июньцта, Саранскяйса Республикань кудса Мордовия Республикань Оцюнясь Н.И.Меркушкин васьфнесь республикань школань ся выпускникнень мархта, конат шумордазь тонафнемаснон золотань медальса.
Арась цебярь традициякс кизоста кизос получсемс тя казнеть республикань Оцюнять кядьста.
24.06.2010  № 24
 

 

 

Учредительхие:
Главнай редакторсь: И. С. Лушкин