Поиск по сайту:

Архив

Молодежный клуб

ЭРЯЙХТЬ ЛАДЯЗЬ И КЕЛЬГОЗЬ

Нина Андреевна и Александр Васильевич Ямщикофне шачфтсть-касфтсть вете итть. И сембе синь арасть цебярь ломанькс. Оцю церасна, Василий, эряй Саранскяйса, трудендай аф кальдяв вастса. Сергей и Саша—Москусот, синцень семьясна. Марина—учительница, эряй Ельникаса. А Геннадий лама пинге эрясь Курташкаса.

Тяфта ни лиссь эряфса, што Александр Васильевич пингта инголе кулось. Нина Андреевна лядсь ськамонза. Сонь лафча шумбрашиц, сяс лездыфтома теенза аш кода. Сембе кудъетконь тефнень Геннадий лаподезень эсь лафтувонзон лангс. Сон и пидесь-панць, муськсь-шовась, тиендезень перень тефнень.

—Монь вастозе аньцек указовамс,—корхтай Нина Андреевна.—А Геннадий ни семботь анок тиемс. Мархтонза пяк пароль.

Аф кунара Генань ульсь свадьбац. Рьвянди эстеенза кочказе Е.В.Беликовать. Елена эряй Московскяй областень Лыткарино ошса, трудендай инженеркс-конструкторкс. Сон цебярь ломань, аф кальдяв специалист. Стирнять юронза Темниковскяй райононь Пакся Ордаж веленнет. Курташкаса лама раднядонза. Тяса и васьфтезе сай пингонь мирденц. Крьвязсь етксост кельгомань цятконясь. Елена Владимировна, мзярда сашендсь ваймама Курташкав, пяк лезнесь и сяряди авозенцты.

Тяни мирттне-рьвятне строяйхть од куд. Геннадий етась эряма Лыткаринав, покоди теплосетьса. Оттне аф юкснесазь тядяснон, эрь шиня гайфнихть, сидеста сашендыхть варжамонза и лездома.

—Пара мялезон, мес Геннадий и Елена мусть фкя-фкянь, эряйхть ладязь и кельгозь,—корхтай Нина Андреевна.—Сяда оцю паваз тядяти аш. Моньге кельгсамазь и аф юкснесамазь.

А сонць Геннадий арьси тяфта: ломанти, коса сон тяза уле, шачема уженядонза питни мезевок аш.

—Мон пяк кельгса Курташкать,—корхтай Геннадий.—Но тяфта ни лиссь, што тунь лия вастс эряма. Эстейне, конешна, муволь покодема васта, а рьвязти работамс аш коса. Вов и савсь кадомс шачема вастть.

И.ВЕШКИН.

Снимкаса:

Геннадий и Елена

Ямщикофне.

19.08.2010 №32

Минь интервьюньке

Европань чемпионць Станислав Емельянов:

«ВЕРОНДАДА ЭСЬ ВИЕНТЕНДИ И СЕМБОСЬ УДАЛАЙ!»

Республикасонк лама спортсменда, конат эсь пара сатфксснон мархта вярьгак кандсазь Мордовиять лемонц. Кепотьксонди, Европань чемпионатса, кона етась июльста Барселона ошса, легкоатлетоньке сатсть мянь кота медальхть. Содаф спортсметтнень мархта ряцок чемпионатсь «крьвястсь» спортонь нинге фкя «тяштеня». Алятнень еткса 20 вайгяльбес ласькомаса золотань медальть сатозе Станислав Емельянов. Стасонь тя васенце оцю соревнованияц. Тяда инголе сон примсесь участия юниорхнень еткса пялькстомаса. И няфнесь аф кальдяв результатт. Кафксть лисендсь Россиянь чемпионкс, 2007 кизоня сявозе золотать миронь юношескяй чемпионатса, кизода меля—миронь юниоронь чемпионатса, 2008 кизоня арась чемпионкс юниорхнень коряс Европань чемпионатса...

Ня шитнень Стасонь мархта васьфнесь минь корреспондентоньке и макссь теенза кой-кодама кизефкст.

12.08.2010 №31

МЕС КУРЕНДАТАДА, СТИРНЯТ?

Молень кода-бди ня шитнень ошень ульцява. Ломаньда ламоль, сембе ков-бди эряскодсть. Малазон нажядсь стирьшаба и мярьгсь:

—Макст курендамс.

—Аф курендакшнян,—машнезь отвечань мон.

—Вов тя да, мзярдовок ашень арьсе, што эряфкшу ломаттне аф курендакшнихть,—дивандазь мярьгсь стирьшабась.

Варжакстонь мельганза и няине: киоскста рамась сигарета пачка и ушедсь таргама. А мон арьсезевонь. Мезенкса стирьхне, аватне ушедсть курендама? Мезенкса синь маряйхть гордость и шнафнихть пря сянкса, мес пухиихть. Финцне, кле, тяфта ерайхть осалгодомс, омбонцне—нерваснон сетьмофнихть. А колмонцне корхтайхть, минь, кле, аф курендатама, аньцек коленттяма.

Тянь квалма кода-бди корхтазевонь содафозень, од стирть мархта. Сигаретать мархта стирьшабась ялга кунара ни. Сон азондсь: «Вов вдь мезе лисенди. Знакомондань аф кунара од цера мархта. Цебярь сембе пяльде, аньцек фкя афсатыксоц: аф курендай».

Мезе тиендеви стирьхнень, аватнень мархта? Да, тяфтамть маласка аф сай нажядемаце. Мархтост калякондамста сигаретань качамть пачк шамасновок аф няеви. Тякоть мархта сувафт ронгсна, кедьсна, шяярьсна.

Кодавок аф шарьхкотькшнесайне 13-15 кизоса стирнятнень тядяснон-аляснон. Пади, синь афи содасазь, што идьсна прафтсть курендамати. А деряй можна тя аф няемс?

—А кда тядяце содасы, што тон курендат?—кизефтине содафозень, кона тонафни 10 класса.

—Вай, улема, сон кулы тяда меле,—отвечась сон.

—А тейне тянь ширде ризносемс аш месть,—мярьгсь стирнять ялгац.—Алязе сонць курендай. Сигаретань шинеть монь ширден сон афи марясы. Тядязевок кунара ни тонатф курендамань качамти.

Вов тяфта ваныхть оттне кальдяв промозть лангс. Одукс и одукс макссян кизефкс: «Мес курендатада, од стирьхть?» А кда тинцень иденте кармайхть курендама? Тинць, штоли, сигаретат теест рамсетяда? Арьсян, кодамовок тядя аф арьси иденцты кальдяв. А курендамась—инь кальдяфнень эзда фкясь.

В.СОКОЛОВ.

29.07.2010 №29

МОН ВДЬ АВАН!

Атявозезе—алясь бта аф кальдяв. Но, вов кодак сай инжикс, эзк ушеды: «Кедьстост лисендихть тяниень тядятне! И памперссна улихть, и муськома машинкасна, и анок пидеф ярхцамбяльсна, и кудса ащемс можна мянь колма кизот. И нинге коль мезе-бди вешихть. А сядонголе аватне шачфнесть паксяса и шачфтомда меле эстокиге кярьмотькшнесть работати и ашесть пеняцякшне». Сонь валонзон коряс, шабада эряви водендамс аф ниледа кржа. Мон корхнян теенза, кле, зарплатаньке фкя идть трямс аф саты. А атявозезе каршезон: «Тон мезе, омба масторонь фруктада штоли ярхцсемс ерат? Тядяцевок тейть лезды—мес ина омбоце иднять аш мяльце шачфтомс?»

Авозезе фалу кирдьсы мирденц ширенц. Мон, кле, пекистовок модамарьхть таргань. Аф кунара якаме дачав, коса авозезе лездсь атявозезти каннемс кирпицьт, хуш теенза сталмот кепсемс аф мярьгондеви—кирдсь онкологическяй операция. Сюцемс атявозть аф смендан, но и кулхцондомс виезе ни аф сатни. Мон вдь аван, а аф «ломовой» алашан!

НАТАЛЬЯ.

22.07.2010 №28

КУЛЕНДЕСТЬ?

*Июнь-июль ковста шачф шабатнень сяда сидеста эвондакшни близорукостьсна декабрьста-январьста шачфнень коряс. Тянди туфталкс ащихть идть лангс прашенды шинь сюролдатне. Но исследованиятнень пингста содавсь, што близорукай ломаттнень интеллектсна сяда оцю сятнень коряс, кит няихть цебярьста.

*Мяштьса андомась араласы пиже шабать астмать эзда. Тяфтама мяльс састь канадскяй ученайхне. Синь етафтсть эксперимент, конань эса примасть участия 300000-да лама шаба. Содавсь, што астмаса сембода сидеста сярятькшнихть иттне, конатнень тядясна лоткасть мяштьса аннемдост 9 ковонь топодемстост.

22.07.2010 №28

КЕЛЬГОМС ЭРЯВИ ФАЛУ

Кельгомать колга кизефкснень лангс отвечай психотерапевтсь и сексопатологсь Александр Бобылев.

Етни кельгомась—тя ломанть состоянияц, кона, ужяленди, аф сембе пингонне.
—А кельгомась?
—Кельгомась—тя лама пингонь соткст. И ладявихть синь ся ломанть мархта, кона похожай тейть. Сон арьси стане жа, кода и тон. Мархтонза фкат характеронте, мяленте-арьсеманте, эряфонь питнишинте. Кда семботи тянди поладыхть уважениясь и фкя-фкянди венемомась—тя арай кельгомати ушетксокс. И тя кельгомати ули кода арамс сембе пингоннекс. Аньцек эряви сонь араламс и ванфтомс. Кда ломанць аф пели азондомс мирденцты или рьванцты планонзон, таколдоманзон-ризнаманзон колга, и омбоце пялькскац сонь шарьхкодьсы, эвондай фкя-фкянди маласькодома. Можна-аф кельгомс эста, кда тяфтама аш? Мирттне-рьвятне марса эряйхть, меле касфтыхть итть, сяда тов якайхть эряфкшу тядяснон-аляснон мельге. Теест улема марса.

08.07.2010 №26

ПОДОЛЬСКАЯСЬ И ПРЕСНЯКОВ РЬВЯЯСТЬ

Певецсь и композиторсь Владимир Пресняков-емлась официальнайста рьвяясь эсь кельгоманц Наталья Подольскаять лангс. Тя мероприятияти серьгятьфтольхть аньцек рьвяяйхнень раднясна—Володянь родителенза, Наташань сазороц Юлясь и тядяц.

Володясь и Наташась знакомондасть ветешка кизода инголе Францияса «Большие гонки» васенце каналть проектонц снимандамста. Тя ульсь васенце кельгомакс. Кафта кизода меле Подольскаясь и Пресняков сувасть од квартирас, конанди синь ремонт тисть марса. 2007 кизонь кизонда салава тиендсть свадьба Лас-Вегасса Америкать эзга путешествиять пингста. Но Россияса тя рьвяямась законнайкс аф лувондови.

Официальнайсь «Наташа, мон тонь келькте, листь тейне рьвакс» кайгозевсь меля кизонда Юрмаласа «Новая волна» музыкальнай фестивальста мрдамда меле ресторанца ужнамста. Подольскаясь, конешна, примазе тя предложениять. Эста женихсь невестать мархта азозь, што свадьбать тисазь кизошкада меле. Тяфта и лиссь.

«Фабриканткать» Наташа Подольскаять тя васенце рьвакс лисемац. Ся пингть, кода Владимир Пресняков, фалу пелендезь малаткшнесь рьвяямати, ульсь ни официальнайста рьвяяф. Фкя сяка законнай рьвяямац ульсь дизайнерть Лена Ленскаять мархта—аделавсь явомаса.

17.06.2010 №23

ЦЕБЯРЬ МОРОСЬ СЕДИ ЭЖДИ

«Девчата» вокальнай ансамбльсь, кона пуроптфоль 1997 кизоня Мордовскяй государственнай филармониять видеса, содаф аф аньцек республикасонк и Россияса, но и омба масторсовок. Сонь репертуарсонза рузонь, мокшэрзянь, казачай морот и стак тов. Народнай творчествать ванфтоманкса и виияфтоманкса «Девчата» ансамбльть лама казнедонза. Сон МР-нь Государственнай премиянь лауреат, «Красота спасет мир» V-це международнай вокальнай конкурсонь лауреат... Тяниень пингть «Девчата» коллективса морсихть ниле ломатть. Ня шитнень корреспондентоньконди удалась корхнемс ансамблень солисткать Марина Чебаковать мархта, кона оцю мяльса отвечась сонь кизефксонзон лангс.

03.06.2010 №21

Кизефкс-ответ

УЛЕНЬ ИВАНОВАКС И ЛЯДАН ИВАНОВАКС?

—Мирденди лисемда или явомда меле полафтомс-аф фамилиять?

И.Лапатина.

Вов мезе тянь коряс арьси психологсь:

Ингольдень пинкнень, лисемок мирденди, рьвянясь арсесь авозти рабынякс. Сянкса, етамок мирдень шири, фамилияське эрявсь сявомс синнесь.

Тяни фамилиянь полафтомась тиендеви авать мяленц коряс. Тейне, кода психологонди, и кода проста ломаненди, фамилиязе—тя алязень родонц кувалгофтомац. И кода афолине кельге мирдезень, алязти вернайкс улемась ляды главнайкс.

М.Баркова.

27.05.2010 №20

«КЕЛЬКТЕ! МРДАК…»

«Вов вдь сон кодама кельгомась,—арьсесь Марина.—Эряфоньберьф улень Олегонь видеса, а учендонь седиень таколфты васедема ефси лия ломанень мархта. Ашине шарьхкоде, што сай пингонь поланязе аськолясь ни мархтон фкя киге. Мес эльбятьксоньконь шарьхкотькшнесаськ тиемдост меле?»
Марина аф мяляфтсы, мзярда Олег сувась эряфозонза. Теенза-арам, церась фалу маласонзоль. Нинге школаса, мзярда емла классонь тонафнихнень линейкаса путнезь кафтонь-кафтонь: стирня—цераня, Олежкась сявондезе Маринкать кяднянц эсь кядезонза. Тяфта и мольсть школьнай эряфова, мзярс ашезень явфта кефкиеце класса мекольце пайгонясь.
Стирсь талакоткшнесь, што тя аф пяк сери, менелень тюсса сельме церась кельгсы сонь. Аньцек каршеконь кельгома Маринкать ваймоса ашель.

20.05.2010 №19

НОВОСТИ

МИНЬ ЗЕМЛЯКОНЬКЕ АЛЕКСЕЙ АЦАПКИН—ОЛИМПИЙСКЯЙ ЧЕМПИОН

17 августста кизонь I-це Юношескяй олимпийскяй налхкоматнень эса Сингапурса вольнай стильса ведьса уендихнень еткса 4х100 метрас эстафетаса сяськсь Россиянь командась: Андрей Ушаков, Илья Лемаев, Антон Лобанов и минь Мордовиянь спортсменоньке Алексей Ацапкин. Россияттне етазь китайскяй сборнайть 0,55 секундада. Уемаса пялькстыхне—австралиецне—лиссть нилеце вастти, пачфни олимпийскяй турниронь сайтсь.

19.08.2010 № 32

Мольфтеви «2010 кизонь урожайсь» оперативно-профилактическяй операциясь

МВД-нь СОТРУДНИКНЕ ВАНЫХТЬ СЁРОНЬ УРЯДАМАТЬ МЕЛЬГЕ

Мордовияса 270 предприятиясь заняф велень хозяйствань культурань касфнемаса. Марстонь площадсь 1659 тежянь гектар.

Сянкса, штоба ванфтомс тяддень и мелянь урожайть, 2010 кизонь 15 июльста сявомок республикасонк мольфтеви «Урожай-2010» оперативно-профилактическяй операциянь омбоце этапсь, мезть пингста республикань внутренняй тевонь органонь сотрудникнень мархта муфоль 41 административнай правонарушения, 483 преступления.

Мордовия Республикава Внутренняй тевонь министерствась оцю работа мольфти сянь коряс, штоба перямс кить велень хозяйствань продукциянь, жуватань-мезень саламати, ваныхть сянь мельге, штоба назначенияс коре нолявольхть засухать сюнеда эвондаф зияттнень машфтомс государствать мархта макссеви бюджетнай средстватне, мольфтихть контроль серонь, тишень, ГСМ-нь, удобрениянь, техникань-мезень ванфтома васттнень мельге.

Внутренняй тевонь органонь сотрудникненди лездомс ули кода кажнайти. Кда приметаф саламань-коламань случай, пачфтеда 47-70-60 номерс коре.

19.08.2010 №32

19.08.2010 № 32

РОССИЯНЬ ПРЕЗИДЕНТСЬ Д.А.МЕДВЕДЕВ ПОЗДРАВЛЯНДАЗЕНЬ МИНЬ СПОРТСМЕНОНЬКОНЬ САТФКССНОН МАРХТА

Ётай недялять Россиянь Президентсь Д.А.Медведев васетькшнесь легкай атлетикаса Европань XX чемпионатонь чемпиоттнень и призерхнень мархта. Сон поздравляндазень легкоатлеттнень оцю сатфксснон мархта. Барселонаса спортсметтне сатсть 24 медаль: кемонь золотань, кота сиянь и кафкса бронзовайхть. Казнетнень оцюшкаснон сатозь Мордовиянь спортсметтне.

Ольга Каниськинась сембе легкоатлеттнень лемста благодарностень валхт азсь Президентти ширень кирдеманкса.

Васедемста Каниськинась пачфтсь, што Мордовияса ушетф Олимпийскяй подготовкань центрать колмоце очереденц, 400 метранди вельхкс ала манежть, бассейнать строямасна.—Тя тейнек башка пяк эряви 2012 кизоня Лондонца Олимпиадада инголе,—мярьгсь спортсменкась.

Ольга Каниськина васедемань участникненди лятфтась и сянь колга, што 2012 кизоня Саранскяйса етафтови спортивнай якамаса Миронь кубкась. И нинге фкя пяк оцю мероприятия—мордовскяй народть Российскяй государствань нароттнень мархта ладязь эрямаснон 1000 кизонь топодемань праздновандамась. Тияк сон лямбе валхт азсь тренерхнень лемс.

Д.А.Медведев поладозе:

—Оля видеть азозе тренерхнень колга. Тя шарьхкотьф. Но аф фалу шарьхкотьф тянь коряс региононь руководительхнень позициясна. Мордовияса, мон лац содаса, кда кодама поручения максат республикань руководительти, сон фалу старандай тиемс лац-ряц, оцю качестваса.

И тянь эряви азомс аф аньцек спортть колга.

12.08.2010 № 31

УШЕДОВСЬ ТОЛТЬ ЭЗДА ЗИЯНЦ ПОВФНЕНДИ КУДОНЬ СТРОЯМАСЬ

Мордовияса вирень пожархнень сюнеда кудфтома лятфненди строяви 81 эряма васта. Лядыксне, а сембоц республикаса палсь 157 куд, азсть мяль сявомс ярмакса. Виде, педа-пес нинге лац-ряц аф содаф, мзяра куд сави строямс. Но, кода азозь МР-нь Строительствань и архитектурань министерстваса, строительхне тисазь сембе эрявиксть, штоба кенеремс строямс синь 1 ноябрти, тя пингть ладязь Россиянь Президентсь Д.Медведев и странань премьер-министрсь В.Путин.

Сянкса, штоба эреклафтомс строямань тевть, странань руководствась примась решения, што эряма васта зиянц повфненди кармай строяма единай поставщик. Тя корхтай сянь колга, што муниципальнай заказчикти ули кода тиемс подрядонь договорхт конкурсонь апак етафтт, кона таргави 45 шис.

Тяка пингть, пожархнень сюнеда зиянц кой-кона повфне азсть мяль строяфтомс од кутт аф сяка васттнень эса, а лия населеннай пунктова—Саранскяйса, Зубова Полянаса. Кепотьксонди, Свеженькая, Подлясова и Вад.Селищи велень кой-кона эряйхне пачфтезь, што мяльсноль етамс райцентрав—Зубово-Полянав. Строительхне арьсихть строямс теест од ульця. Ламотнень мяльсна лядомс сяка васттненди. Строяви куттне улихть ефси лият палфнень коряс. Эсост кармай улема сембось: свет, газ, лямбе и кельме ведь, канализация.

Мордовияса строямань тевсь кемокстаф 8 организация мельге. Ня компаниянь представительхне ульсть ни райоттнень эса, васетькшнесть велень Советонь оцюнятнень мархта. Тяни специалисттне анокласазь проектно-сметнай эрявикс документациять. 6 августста строительхне прважазь районга эрявикс техникать и решандазь кизефксть рабочайхненди работань пингонди эряма вастонь максомать коряс. Подлясоваса арьсекшневи панжемс палаточнай лагерь. Ваймама шитнень ускфт стройматериалхт, а 9 августста рабочайхне кярьмодсть од кудонь строяма.

12.08.2010 №31

12.08.2010 № 31

ПАЛЫХНЕНДИ МАКСФ ВАСЕНЦЕ ЛЕЗКССЬ—1,5 МИЛЛИОН ЦАЛКОВАЙСЬ

Нинге аф кунара ня васттне ульсть Мордовияса инь цебярьхне. Но стихиясь нардазь нардазе тя мазышить и кадсь мельганза седиень ацергофты картина. Сянгяря вирьхнень вастс лама километра кить кувалмова таргавсть равжа палф шуфтт, а велетнень вастс—кулуфт. Колма ломанень жертват, 150 палф куд—тяфтама тячиень пожаронь пелькс статистикась республикань Зубово-Полянскяй районца.

Мордовиянь Оцюнясь Н.И. Меркушкин и РФ-нь региональнай развитиянь министрть заместителец К.Ю.Королевский ваймама шитнень ульсть районца.

Тевсь тяса ащи пяк кальдявста. Ломаттне эвотьфт, но тяни валом валом сашендыхть эсезост. Н.И.Меркушкин азозе: ламось тяни ащи местнай властть эзда. Эряви куроконе анокламс сембе эрявикс документтнень. Августста палф куттнень вастс ушедома од стройка.

Районца тиф оперативнай штаб, конанди вятикс Государственнай Думань депутатсь В.Б.Кидяев. Эрь палф велеса работай комиссия: медикт, райсобессь, милициясь и районнай администрациянь представитель. Ломаттненди, кит юмафтозь сембе имуществаснон, пяк стака. Но лезкссь сай. Понедельникти палыхне получазь васенце 1,5 миллион цалковайть Мордовиянь Оцюнять резервнай фондстонза. Ломаттненди явондови пси ярхцамбяль и сухой паек.

Пуромомок Мордовиянь Оцюнять перьф, велеряйхне корхтайхть теенза: Мордовиясь колганк заботендай, пси ярхцамбяль анокласть, сухой паек усксихть. Синь валснон полаткшнесазь Вад. Селища велень эряйхне: Спасиба, што тейнек тняра техника панеде, спасиба што вертолеттне, самолеттне пожар матсть, сюкпря теенть. Меркушкин отвечась: Васендакиге спасиба странань руководствати.

Вад. Селищаса толонь даволсь етась ляйть туркс кожфка пяле километра вастс, кона явфнезе велеть вирть эзда и валгсь куттнень лангс. Тяфтама пелькс тяса ашесть няенде нльне кунардонь эряйхне. Но, кода фалу, трагедиять улихть аф аньцек жертванза, но и эсь героенза. Ся велеряйхне, конатнень кудсна ни палсть, эсь прянь аф ужяльдезь (тя видекс тяфта) матсть шабраснон кудснон эса. Толть мархта тюрсть нльне школьникне. Емлатне каннесть ведь мархта ведаркат, оцюфне—кие кода маштсь.

Н.И.Меркушкин люпштазе тястоконь школань выпускникть Сергей Левштановонь кяденц. Сон васенцекс няезе толть, кеподезе пильге лангс сембе велеть. Тядде Сергей поступай университетонь историческяй факультету.

Историясь аф юкстасы тя страшнай кизоть.

Тяни, 2 августста, аньцек Зубово-Полянскяй районца 8 оцю вирень пожар. Качамти ляпиякшнихть животнайхне, палы вирсь. И эрь тяфтама бедати ушетксокс арси—кинь-бди мархта ердаф папироса песь, крьвястьф сардонясь. Мезти нинге эряви лисемс, штоба кажнайсь эздонк, мекпяли, тянь шарьхкоделезе?

05.08.2010 №30

05.08.2010 № 30

МАРЯТАМА ИНКСОНТ ГОРДОСТЬ!

Испанияса ётафтови Европань чемпионатса Россиянь сборнайсь сатсь 5 медальхть и сембе синь—миннет.

Испаниянь Барселона ошса моли легкай атлетикать коряс Европань чемпионатсь. Васенце шиня пялькстсть 20 километрань дистанцияса ялга якамать коряс инь вии спортсметтне. Тя мезть синь етксост аньцек ашель тяниень миронь чемпионць Валерий Борчин, сяс мес сон получась травма. Но сембе мирти содаф тренероньке Виктор Чегин мусь теенза достойнай полафтыхть. Васендакиге надияматне ульсть сотфт од талантливай спортсменть Станислав Емельяновонь мархта. И тя аф стак.

29.07.2010 №29

29.07.2010 № 29

ГРАНТТ—ЕВРО- ПАРЛАМЕНТТЬ ЭЗДА

Мордовиянь Образованиянь министерствась получась Европарламентть эзда кафта грантт. Кажнайсь синь эздост тейнек максы фкя миллион 300 тежянь цалковаень. Министерствань сотрудникне анокласть кафта проектт, конат шнафтольхть.

Васенце проектсь—этнокультурнай направлениянь кизонь лагерсь, коса республикастонк и мокшэрзянь диаспораста шабатне кармайхть сяда крхкаста тонафнемост родной кяльть и сяда маласта знакомондайхть эсь народснон культуранц мархта. Лагерьса ваймамась питнефтома, родительхне пандсазь аньцек кить. Главнай условиясь—штоба шабась мяль вельде тонафнелезе эсь родной кяленц.

Омбоце проектсь—электроннай библиотекань тиемась, коза сувайхть учебникне и методическяй изданиятне мордовскяй (мокшень, эрзянь) кяльхнень тонафнемаснон коряс.

22.07.2010 №28

22.07.2010 № 28

ВАСЕНЦЕДА МОРДОВИЯСА!

12-15 июльста республикасонк етафтови легкай атлетикать коряс Россиянь чемпионатсь.
Минь тячи гордостень марязь азондсаськ, што Мордовияньке лемневи сембодонга спортивнай республикакс. И тя аф стак. Тянь можна кемокстамс лама примерса. Ваносте, мзяра мекольдень кизотнень Саранскяйса эвондась од спортивнай объектта! Сембе райоттнень эзгавок строяф (или строяви) физкультурно-оздоровительнай комплекст.

08.07.2010 № 26

ШИРЕЗОНК САЙ ТЁЖЯНЬ СПОРТСМЕН

Пресс-конференцияста

Понедельникста, 5 июльста, Саранскяйса Печатень кудса ульсь легкай атлетикать коряс Россиянь чемпионатти лемтьф пресс-конференция. Эсонза примасть участия Мордовия Республикань спортонь, физическяй культурань и туризмань министрсь В.Г.Киреев, сонь заместителец В.В.Цыбусова, Мордовия Республикань легкай атлетикань Федерациять президентоц, высшай спортивнай мастерствань республиканскяй школать директороц М.Л.Храмов, тренерхт, спортсметт, официальнай лия ломатть.

08.07.2010 № 26

УДАЛАЗА КИНТЕ, МЕДАЛИСТТ!

Исяк, 23 июньцта, Саранскяйса Республикань кудса Мордовия Республикань Оцюнясь Н.И.Меркушкин васьфнесь республикань школань ся выпускникнень мархта, конат шумордазь тонафнемаснон золотань медальса.
Арась цебярь традициякс кизоста кизос получсемс тя казнеть республикань Оцюнять кядьста.

24.06.2010 № 24

Учредительхие:

Мордовия Республикань Государственнай Собраниясь и Правительствась;

Главнай редакторсь: И. С. Лушкин

Сайт разработан в студии web-дизайна
Филиал в Республике Мордовия ОАО "ВолгаТелеком".