Поиск по сайту: 
 
Наши мокшанские сыновья и дочери
Свежий номер
Тема дня
Национальная тематика
Культура
Обратная связь (Газета - Читатель)
В Госсобрании РМ
В Правительстве РМ
События
Демография
Здоровье
Мокшане о мокшанах
Как жили и живут мокшане
Ветеранам о ветеранах
Молодежный клуб
Наша усадьба
Наука и жизнь
Спорт
Национальный проект
Образование
Доступное жилье
Благотворительность
Поговорим о создании единого литературного мордовского языка

Архив
 сентябрь 
 2010 
пн вт ср чт пт сб вс
  12345
6789101112
13141516171819
20212223242526
27282930   

 
 

 
Наша усадьба

АВГУСТСЬ—УРОЖАЕНЬ УРЯДАМА ПИНГЕ

Августста кенери томатонь, перецонь и баклажанонь урожайсь. Штоба сон улель сяда козя, ковть ушетксста ня касыксне можнат «аннемс» органикаса или минеральнай удобренияса.
Кизонь мекольце ковть аф мярьгондеви тиклатненди тиендемс подкормка, а панчф и панчф поколь мархта кодоркснень песна керсемат. Тяфта тиклась касы сяда оцюста.
Августста сиденяста ляпопнема модась перецнень и баклажаттнень перьфке. Лацкас валондомат. Урожайсь кочксема 3-5 шинь етазь. А куярхненди валондомада башка нинге тиендема подкормка. Тя лезды сяда ламос ярхцсемс свежай куярда, конат августста сязендемат 2-3 шинь етазь.
Шурьхкятне тюжалгодомада и велямда меле тарксемат, а меле косьфтамат панде лангса (пизему пингста тя тиема вельхкс ала).
Августста прят ашкоды поздняй капстась. Ковти весть тиендема подкормка органикань или минеральнай удобрениянь растворса. Тя пингть капстатнень, а стане жа тялонь ряпсть «мушендсы» рапсовай пилильщиксь. Унжать машфтоманкса касыксне валондомат Регентонь растворса (10 литрат ведти—фкя грамма тяфтама препарат). Сяда лафча касыксненди етафнема аф корневой подкормка минеральнай удобрениянь растворса: 2,5 граммат калийнай сал, 200 грамма суперфосфат и 25 грамма молибдат аммоний—10 литрат ведти.
 Модамарьть таргамда 15 шида инголе нетьксне лядемат. Тяфта модамарьсь ули сяда кенерьф. Август ковть ушетксста можна видемс капер, петрушка, умбрав, редис, шпинат, штоба получамс омбоце урожайть. Сяда пара видемс синь ся участкатненди, коса кассь фасоль, кукуруза, шурьхкя и чеснок.
 
А.ПОРТНОВ.
19.08.2010 №32

 

ПЯТНАТ ШУКШТОРУКСТЬ ЛАНГСА

Шукшторуксонь лопатнень лангса эвондасть равжаза пятнат. Тя касыксть лангс «врьгятсь» антракнозсь—грибной урмась. Урмать срхкафтыец етафнесы тялоть пяярьф лопатнень лангса. Антракнозсь сяда вииякшни летьке, пизему пингста.
Штоба сяськомс тя урмать, сексенда и рана тунда кусторксть алда модась шувондома. Тяфта сяда кирьфтави инфекциянь запассь. Панжемда инголе и меле, а стане жа имошнень кочкамда меле валондома касыкссь «Азофосса», «Топсимса», 1 процентонь бордосскяй жидкостьса. Кизонда, мзярда эвондайхть антракнозонь васенце признакне, кусторкснень валомат кальцинированнай содаса (50 грамма сода и хозяйственнай сапонь 10 литрат ведти). Тяфта тиемс кафксть-колмоксть. Можна нолдамс тевс коровяконь настойть (фкя пяльксть колма пялькст ведти, кадомс колма шис, меле колмоксть шовордамс ведьса, педямс).
12.08.2010 №31

 

КДА КУДСОНТ УЛИ КАТА

Катонь азорхненди пара содамс ниле мадяса ялгаснон башка ширеснон и прянь вятемаснон.
Катотне пяк лац кулихть, но марясазь аньцек сянь, мезе теест эряви. Кепотьксонди, кода арды шеерсь, но ружьяста ляцемась мадяфнень афи сргозьфтьсыне.
Нинге катотне лац няихть шобдаса. Виде, тюснень аф шарьхкодьсазь, но предметтнень формаснон няйсазь лац.
Сельмопонасна, усасна и мадясна катотнень пяк маряйхть, сяс лездыхть понав ялгати перьфпяльть «няеманцты». Синь мархтост кудонь животнайсь шобдаста сияк содасы инголенза стяй перяфксть. Сяс эряви ваномс, штоба шабатне афолезь кера катоть емла «антеннанянзон».
 
 
 
КОДА ВАНФТОМАТ ПЕРЕНЬ СЁРОТНЕ
*Штоба свежай куярхне лядольхть станяк жа свежайста, нолдасть синь вяри пенят пяле видева кельме ведьс и полафнесть ведть эрь шиня.
*Куярхне можнат ванфтомс мянь тялоти, кда штамс синь лакафтф ведьса и лацкас нардамс. Меле вадендемс алакшеса. Сяда пара, кда куярса улихть пулонят, мезьда можнат повфнемс подвалу или бохаряму.
*Свежай пурьхкясь лац ванфтови подвалса рядонь-ряд марафста и крупнай песокса вельхтяфста.
*Пурьхкятне лац ванфтовихть и косьфтаф шурьхкя кедь еткса, кда ванфтомс марамдост инголе валомс синь шурьхкя кедень настойса.
*Шурьхкясь и чесноксь аф кальдявста ванфтовихть комнатнай температураса пулокс понафста или капроновай чулка потмоса.
05.08.2010 №30

 

МАШФТСАСЬК АЕРКСТЬ

Кизоньгучкать модамарьхненди оцю зиян каннихть колорадскяй унжатне. Ня вредительхнень машфтоманкса нолдасть тевс алува азф рецепттнень. Тя препараттнень мархта валондомат модамарень нетьксне.
 
*Килограмма древеснай кулуть лангс каямс 6-10 литрат лакай ведь. Кадомс суткас, меле педямс и каямс эзонза 40 грамма хозяйственнай сапонь.
*150-200 грамма мелкайста керсеф нярьхкамазть шовордамс стакан древеснай кулу мархта, каямс лангозост лакай ведь и кадомс 2-3 частс. Меле педямс.
*Нярьхкамазть кочкамс панжемстонза. Килограмма тяфтама касыксть мелкайста керсемс, кадомс суткас. Сяда меле лакафтомс 20-30 минута аф лама ведьса. Кельме отварть педямс и каямс лангозонза 10 литрат ведь.
*100 грамма сяпи перецть 2 частт пидемс 10 литрат ведьса, мезьда меле каямс отварти 40-60 грамма хозяйственнай сапонь.
*Кумбаравонь мелкайста керсеф лопатнень мархта пяшкодемс ведаркать колмоцекс пяльксонц. Кадомс суткас и педямс.
Ули модамарень сорт, конанди аф пелькс колорадскяй унжась. Тя «бататсь». Касфтомац сонь аф стака. Озафневи кода модамарьса, стане и кодорксса. 2-3 модамарьста тялоньберьф можна касфтомс рассада целай участканди. Сотка модати эрявксты 196 касыкс.
Кда мяленте озафтомс модамарьть нетьксса, эста сексенда «бататонь» кодоркссь лезвияса керома аф оцю нетькскянь стане, штоба эрь нетьксть эса улель колмонь почка. Кемонь шис ня нетьксне нолдамат ведьс. Мзярда нолдайхть ункст, озафтомс синь 10 сантиметрань крхкалмос модас. Апрель ковть песта или майста нетьксне озафтомат панденяс.
29.07.2010 №29

 

МАЦИХНЕНЬ КОЛГА

Вов ни аф васенце кизось пирьфсон кирдян мацихть и мельгаст якамать лувондса аф стака тевкс.
Авамацить озафнеса нарвайкс сяка васту, коса сон эряй фалу, сяс мес лияса ащеманц кудонь тя нармонць аф кельгсы—кармай комотнема сей-тов и кадсыне алонзон.
Маци лефкскятне касыхть курокста. Ковоньберьф сталмосна пачкотькшни кафта килограммати. Синь кирдемат арушиса, сяс сидеста урятцема вастсна. Мон етафнян дезинфекция—валондса масторть 2 процентонь каустическяй содаса и ацсеса коське тишеса-мезьса. Фалу ванан сянь мельге, штоба нармоттне афольхть начконда. Симомбяльснон путнеса кшнинь пачкалга лангс и вельхнеса шура сеткаса. Ведьснон полафнеса эрь шиня. Васенце шитнень мацихнень аннесайне 1,5-2 сантиметрань сереса лотокста. А сяда тов кормать кайсеса кувака очконяс, штоба фкя пингть ярхцальхть сембе.
Мацихне аф кельгсазь, кда вастсна пяк пси, или, меколанкт, пяк кельме. Кда синь лац ярхцайхть, отькорьста ласькондихть, ваймосихть аф оцю группань—колмонь-ветень пря, эста сембось лац. Ванома и сянь мельге, штоба толгафнень вастсна улель валда. Васень недялять—нльне веть.
Кда лефкскятне касыхть нарвайфтома, 5-7 шида меле нолнесайне ульцяв. Васенда 20-30 минутас, а сяльде—сяда ламос. Кафта недялянь топодемда меле мацине якайхть ульцява шиньберьф. Оцю мацихне ванцазь кудозень пине лаца. Эстедон башка киньге аф ноляйхть.
 
К.ТЕМНОВА.
22.07.2010 №28

 

АРАЛАСТЬ ПОМИДОРАТНЕНЬ ФИТОФТОРОЗДА

Помидорась нинге панжемстонза урмаськоткшни фитофторозса. Уле тюсоннекс арсихть башка лопанянза, а меле наксадома вастт эвондайхть оцю помидоратнень и аньцек эвондафкятнень эса.
Фитофторозть каршес тюрема ушедома кода можна сяда рана, мзярда нинге урмась сельмосовок аф приметневи. Сяс инголдасть сонь тяникиге.
Васенцесь: аммиачнай селитрать вастс тевс нолдасть комплекснай удобрениятнень. Лишнай азотсь эреклафтсы урмать.
08.07.2010 №26

 

Усадьба


 

КАСФТТАМА КУЯРХТ

Сянкса, штоба сявомс куяронь оцю урожай, эряви цебярьста ваномс рассадатнень мельге. Аф эрявихть валондомс пяк сидеста. Сяда пара тя тиендемс 2-3 ши етазь и аньцек шить ала эжтьф ведьса. Кемонь шити весть ведьса валондомась полафтома подкормкаса (10 литра ведти каямс фкя литра коровяк (траксонь свежай назем ведь) и 10 граммат мочевина).
Мзярда курок кенери сортонь куярть эвондайхть 4-6 лопанянза, а поздна кенерихнень—7-8, касыкснень эвондайхть кодоркссна. Курок кенери сортоннетнень кодоркссна аф кувакат (80 сантиметра), поздна кенери сортоннетнень кодоркссна пачкотькшнихть 150 сантиметрати. Васенда эвондакшнихть кяльгепанчфт, тяда меле—афкуксоннет. Штоба сявомс оцю урожай, панжемдост инголе модась эряви аф ламода косьфтамс (тя пингть куярхне аф валондомат). А подкормкась, меколанкт, прибавама. Коровяконь растворти (1 литрась шовордамс ведарка ведьс), каямс 10 граммат сернокислай калий или 20 грамма калимагнезия и 40 грамма суперфосфат. Юрти валомс фкя стакан раствор. «Аннемат» недяляти весть.
 
 
 
КОКЦИДИОЗСЬ—САРАЗОНЬ УРМА
Кда приметасть, што сараснень наземсна шонгара, акша тюсонь и вер мархта, содасть, синь урмаськодсть кокцидиоз урмаса. Нинге лемнесазь «Белый понос кур» урмакс. Сонь эвондафнесазь кокцидиятне, конат, повомок нармонть организмас, пяк курокста ламолготкшнихть. Сарасне тя пингть пяк прафтыхть ведти, аш аппетитсна, якайхть пялес удозь. Кда приметасть нармоттнень эса ня признакнень, эстокиге кярьмодеда пчкафтомань тевти. Тевс нолдамат Ампролиум, Байкокс препараттне. Профилактика етафтома Кокцидиовит, Ампролин препараттнень мархта. Штоба машфтомс паразиттнень, пси ведьса штамат саразонь кирдема васттне. 80 градусонь пси ведсь машфтсыне синь эстокиге. Саразонь карденятне валомат 5-10 процентонь карболово-керосиновай, салицилово-скипидарнай или карболово-скипидарнай эмульсияса.
17.06.2010 №23

 

«КАВАНЯМА»—капстань мелафненди


 

Перень тефт

ТОМАТТНЕ КЕЛЬГСАЗЬ ВАЛОНДОМАСНОН
Томаттне—летьконь кельги касыкст. Виде, теест  аф пелькс и пиземфтома кизось, но эста урожайсь ули аф кодама. Эрь квадратнай  метрати  эрявксты инь кржась 8-10 литра ведь.  Штоба тя ведсь  «симоволь», эряви валомс тя нормать кафксть валозь.
Сянкса сяда меле 1-1,5 недяля аф эрявихть валомс. А кда алост ацамс шужярь, то мянь коське  погодастовок валомат недяляти весть. Ведень аф  сатнемать сюнеда ушедыхть  пяярема аньцек  эвондаф помидоратне, а конат лядыхть, улихть емлат размерс  коре. Ведень аф сатнемста пяльневихть  лопатне, эвондай эсост урма. И нинге: кда лазовсь помидорась, содасть, што сон эряви пяконе валомс. Тяфта уленди ведень  аф сатнемста.
03.06.2010 №21

 
 

 
НОВОСТИ

МИНЬ ЗЕМЛЯКОНЬКЕ АЛЕКСЕЙ АЦАПКИН—ОЛИМПИЙСКЯЙ ЧЕМПИОН

17 августста кизонь I-це Юношескяй олимпийскяй налхкоматнень эса Сингапурса вольнай стильса ведьса уендихнень еткса 4х100 метрас эстафетаса сяськсь Россиянь командась: Андрей Ушаков, Илья Лемаев, Антон Лобанов и минь Мордовиянь спортсменоньке Алексей Ацапкин. Россияттне етазь китайскяй сборнайть 0,55 секундада. Уемаса пялькстыхне—австралиецне—лиссть нилеце вастти, пачфни олимпийскяй турниронь сайтсь.
19.08.2010  № 32
 

Мольфтеви «2010 кизонь урожайсь» оперативно-профилактическяй операциясь

МВД-нь СОТРУДНИКНЕ ВАНЫХТЬ СЁРОНЬ УРЯДАМАТЬ МЕЛЬГЕ
 
Мордовияса 270 предприятиясь заняф велень хозяйствань культурань касфнемаса. Марстонь площадсь 1659 тежянь гектар.
Сянкса, штоба ванфтомс тяддень и мелянь урожайть, 2010 кизонь 15 июльста сявомок республикасонк мольфтеви «Урожай-2010» оперативно-профилактическяй операциянь омбоце этапсь, мезть пингста республикань внутренняй тевонь органонь сотрудникнень мархта муфоль 41 административнай правонарушения, 483 преступления.
Мордовия Республикава Внутренняй тевонь министерствась оцю работа мольфти сянь коряс, штоба перямс кить велень хозяйствань продукциянь, жуватань-мезень саламати, ваныхть сянь мельге, штоба назначенияс коре нолявольхть засухать сюнеда эвондаф зияттнень машфтомс государствать мархта макссеви бюджетнай средстватне, мольфтихть контроль серонь, тишень, ГСМ-нь, удобрениянь, техникань-мезень ванфтома васттнень мельге.
Внутренняй тевонь органонь сотрудникненди лездомс ули кода кажнайти. Кда приметаф саламань-коламань случай, пачфтеда 47-70-60 номерс коре.
 
19.08.2010 №32
19.08.2010  № 32
 

РОССИЯНЬ ПРЕЗИДЕНТСЬ Д.А.МЕДВЕДЕВ ПОЗДРАВЛЯНДАЗЕНЬ МИНЬ СПОРТСМЕНОНЬКОНЬ САТФКССНОН МАРХТА

Ётай недялять Россиянь Президентсь Д.А.Медведев васетькшнесь легкай атлетикаса Европань XX чемпионатонь чемпиоттнень и призерхнень мархта. Сон поздравляндазень легкоатлеттнень оцю сатфксснон мархта. Барселонаса  спортсметтне сатсть 24 медаль: кемонь золотань, кота сиянь и кафкса бронзовайхть. Казнетнень оцюшкаснон сатозь Мордовиянь спортсметтне.
 
Ольга Каниськинась сембе легкоатлеттнень лемста благодарностень валхт азсь Президентти ширень кирдеманкса.
Васедемста Каниськинась пачфтсь, што Мордовияса ушетф Олимпийскяй подготовкань центрать колмоце очереденц, 400 метранди вельхкс ала манежть, бассейнать строямасна.—Тя тейнек башка пяк эряви 2012 кизоня Лондонца Олимпиадада инголе,—мярьгсь спортсменкась.
Ольга Каниськина васедемань участникненди лятфтась и сянь колга, што 2012 кизоня Саранскяйса етафтови спортивнай якамаса Миронь кубкась. И нинге фкя пяк оцю мероприятия—мордовскяй народть Российскяй государствань нароттнень мархта ладязь эрямаснон 1000 кизонь топодемань праздновандамась. Тияк сон лямбе валхт азсь тренерхнень лемс.
Д.А.Медведев поладозе:
—Оля видеть азозе тренерхнень колга. Тя шарьхкотьф. Но аф фалу шарьхкотьф тянь коряс региононь руководительхнень позициясна. Мордовияса, мон лац содаса, кда кодама поручения максат республикань руководительти, сон фалу старандай тиемс лац-ряц, оцю качестваса.
И тянь эряви азомс аф аньцек спортть колга.
12.08.2010  № 31
 

УШЕДОВСЬ ТОЛТЬ ЭЗДА ЗИЯНЦ ПОВФНЕНДИ КУДОНЬ СТРОЯМАСЬ

Мордовияса вирень пожархнень сюнеда кудфтома лятфненди строяви 81 эряма васта. Лядыксне, а сембоц республикаса палсь 157 куд, азсть мяль сявомс ярмакса. Виде, педа-пес нинге лац-ряц аф содаф, мзяра куд сави строямс. Но, кода азозь МР-нь Строительствань и архитектурань министерстваса, строительхне тисазь сембе эрявиксть, штоба кенеремс строямс синь 1 ноябрти, тя пингть ладязь Россиянь Президентсь Д.Медведев и странань премьер-министрсь В.Путин.
 
Сянкса, штоба эреклафтомс строямань тевть, странань руководствась примась решения, што эряма васта зиянц повфненди кармай строяма единай поставщик. Тя корхтай сянь колга, што муниципальнай заказчикти ули кода тиемс подрядонь договорхт конкурсонь апак етафтт, кона таргави 45 шис.
Тяка пингть, пожархнень сюнеда зиянц кой-кона повфне азсть мяль строяфтомс од кутт аф сяка васттнень эса, а лия населеннай пунктова—Саранскяйса, Зубова Полянаса. Кепотьксонди, Свеженькая, Подлясова и Вад.Селищи велень кой-кона эряйхне пачфтезь, што мяльсноль етамс райцентрав—Зубово-Полянав. Строительхне арьсихть строямс теест од ульця. Ламотнень мяльсна лядомс сяка васттненди. Строяви куттне улихть ефси лият палфнень коряс. Эсост кармай улема сембось: свет, газ, лямбе и кельме ведь, канализация.
Мордовияса строямань тевсь кемокстаф 8 организация мельге. Ня компаниянь представительхне ульсть ни райоттнень эса, васетькшнесть велень Советонь оцюнятнень мархта. Тяни специалисттне анокласазь проектно-сметнай эрявикс документациять. 6 августста строительхне прважазь районга эрявикс техникать и решандазь кизефксть рабочайхненди работань пингонди эряма вастонь максомать коряс. Подлясоваса арьсекшневи панжемс палаточнай лагерь. Ваймама шитнень ускфт стройматериалхт, а 9 августста рабочайхне кярьмодсть од кудонь строяма.
 
12.08.2010 №31
12.08.2010  № 31
 

ПАЛЫХНЕНДИ МАКСФ ВАСЕНЦЕ ЛЕЗКССЬ—1,5 МИЛЛИОН ЦАЛКОВАЙСЬ

Нинге аф кунара ня васттне ульсть Мордовияса инь цебярьхне. Но стихиясь нардазь нардазе тя мазышить и кадсь мельганза седиень ацергофты картина. Сянгяря вирьхнень вастс лама километра кить кувалмова таргавсть равжа палф шуфтт, а велетнень вастс—кулуфт. Колма ломанень жертват, 150 палф куд—тяфтама тячиень пожаронь пелькс статистикась республикань Зубово-Полянскяй районца.
 
Мордовиянь Оцюнясь Н.И. Меркушкин и РФ-нь региональнай развитиянь министрть заместителец К.Ю.Королевский ваймама шитнень ульсть районца.
Тевсь тяса ащи пяк кальдявста. Ломаттне эвотьфт, но тяни валом валом сашендыхть эсезост. Н.И.Меркушкин азозе: ламось тяни ащи местнай властть эзда. Эряви куроконе анокламс сембе эрявикс документтнень. Августста палф куттнень вастс ушедома од стройка.
Районца тиф оперативнай штаб, конанди вятикс Государственнай Думань депутатсь В.Б.Кидяев. Эрь палф велеса работай комиссия: медикт, райсобессь, милициясь и районнай администрациянь представитель. Ломаттненди, кит юмафтозь сембе имуществаснон, пяк стака. Но лезкссь сай. Понедельникти палыхне получазь васенце 1,5 миллион цалковайть Мордовиянь Оцюнять резервнай фондстонза. Ломаттненди явондови пси ярхцамбяль и сухой паек.
Пуромомок Мордовиянь Оцюнять перьф, велеряйхне корхтайхть теенза: Мордовиясь колганк заботендай, пси ярхцамбяль анокласть, сухой паек усксихть. Синь валснон полаткшнесазь Вад. Селища велень эряйхне: Спасиба, што тейнек тняра техника панеде, спасиба што вертолеттне, самолеттне пожар матсть, сюкпря теенть. Меркушкин отвечась: Васендакиге спасиба странань руководствати.
Вад. Селищаса толонь даволсь етась ляйть туркс кожфка пяле километра вастс, кона явфнезе велеть вирть эзда и валгсь куттнень лангс. Тяфтама пелькс тяса ашесть няенде нльне кунардонь эряйхне. Но, кода фалу, трагедиять улихть аф аньцек жертванза, но и эсь героенза. Ся велеряйхне, конатнень кудсна ни палсть, эсь прянь аф ужяльдезь (тя видекс тяфта) матсть шабраснон кудснон эса. Толть мархта тюрсть нльне школьникне. Емлатне каннесть ведь мархта ведаркат, оцюфне—кие кода маштсь.
Н.И.Меркушкин люпштазе тястоконь школань выпускникть Сергей Левштановонь кяденц. Сон васенцекс няезе толть, кеподезе пильге лангс сембе велеть. Тядде Сергей поступай университетонь историческяй факультету.
Историясь аф юкстасы тя страшнай кизоть.
Тяни, 2 августста, аньцек Зубово-Полянскяй районца 8 оцю вирень пожар. Качамти ляпиякшнихть животнайхне, палы вирсь. И эрь тяфтама бедати ушетксокс арси—кинь-бди мархта ердаф папироса песь, крьвястьф сардонясь. Мезти нинге эряви лисемс, штоба кажнайсь эздонк, мекпяли, тянь шарьхкоделезе?
 
05.08.2010 №30
05.08.2010  № 30
 

МАРЯТАМА ИНКСОНТ ГОРДОСТЬ!

Испанияса ётафтови Европань чемпионатса Россиянь сборнайсь сатсь 5 медальхть и сембе синь—миннет.
Испаниянь Барселона ошса моли легкай атлетикать коряс Европань чемпионатсь. Васенце шиня пялькстсть 20 километрань дистанцияса ялга якамать коряс инь вии спортсметтне. Тя мезть синь етксост аньцек ашель тяниень миронь чемпионць Валерий Борчин, сяс мес сон получась травма. Но сембе мирти содаф тренероньке Виктор Чегин мусь теенза достойнай полафтыхть. Васендакиге надияматне ульсть сотфт од талантливай спортсменть Станислав Емельяновонь мархта. И тя аф стак.
 
29.07.2010 №29
29.07.2010  № 29
 

ГРАНТТ—ЕВРО- ПАРЛАМЕНТТЬ ЭЗДА

Мордовиянь Образованиянь министерствась получась Европарламентть эзда кафта грантт. Кажнайсь синь эздост тейнек максы фкя миллион 300 тежянь цалковаень. Министерствань сотрудникне анокласть кафта проектт, конат шнафтольхть.
Васенце проектсь—этнокультурнай направлениянь кизонь лагерсь, коса республикастонк и мокшэрзянь диаспораста шабатне кармайхть сяда крхкаста тонафнемост родной кяльть и сяда маласта знакомондайхть эсь народснон культуранц мархта. Лагерьса ваймамась питнефтома, родительхне пандсазь аньцек кить. Главнай условиясь—штоба шабась мяль вельде тонафнелезе эсь родной кяленц.
Омбоце проектсь—электроннай библиотекань тиемась, коза сувайхть учебникне и методическяй изданиятне мордовскяй (мокшень, эрзянь) кяльхнень тонафнемаснон коряс.
 
22.07.2010 №28
22.07.2010  № 28
 

ВАСЕНЦЕДА МОРДОВИЯСА!

12-15 июльста республикасонк етафтови легкай атлетикать коряс Россиянь чемпионатсь.
Минь тячи гордостень марязь азондсаськ, што Мордовияньке лемневи сембодонга спортивнай республикакс. И тя аф стак. Тянь можна кемокстамс лама примерса. Ваносте, мзяра мекольдень кизотнень Саранскяйса эвондась од спортивнай объектта! Сембе райоттнень эзгавок строяф (или строяви) физкультурно-оздоровительнай комплекст.
08.07.2010  № 26
 

ШИРЕЗОНК САЙ ТЁЖЯНЬ СПОРТСМЕН

Пресс-конференцияста

Понедельникста, 5 июльста, Саранскяйса Печатень кудса ульсь легкай атлетикать коряс Россиянь чемпионатти лемтьф пресс-конференция. Эсонза примасть участия Мордовия Республикань спортонь, физическяй культурань и туризмань министрсь В.Г.Киреев, сонь заместителец В.В.Цыбусова, Мордовия Республикань легкай атлетикань Федерациять президентоц, высшай спортивнай мастерствань республиканскяй  школать директороц М.Л.Храмов, тренерхт, спортсметт, официальнай лия ломатть.
08.07.2010  № 26
 

УДАЛАЗА КИНТЕ, МЕДАЛИСТТ!

Исяк, 23 июньцта, Саранскяйса Республикань кудса Мордовия Республикань Оцюнясь Н.И.Меркушкин васьфнесь республикань школань ся выпускникнень мархта, конат шумордазь тонафнемаснон золотань медальса.
Арась цебярь традициякс кизоста кизос получсемс тя казнеть республикань Оцюнять кядьста.
24.06.2010  № 24
 

 

 

Учредительхие:
Главнай редакторсь: И. С. Лушкин