16 августста Мордовиянь Оцюнясь Н.И.Меркушкин ульсь республикань важнай объектонь стройкатнень эса.

Перинатальнай центрать пяк оцю значенияц Мордовияса здравоохранениять виияфтомаса. Вейхкса этажса комплекссь кармай оборудовандаф тяниень пингонь од техникаса. Тяза сувайхть од кондиционированиянь система, башка дизель-генераторнай станция, кислородонь пачфтема система, вертолетнай площадка. Ладяви, тяфта лемневи, немецкяй од технологиянь коряс, ару комнатань система. Перинатальнай центрать питнец—1,5 миллиардта лама цалковай. Ня средстватнень пялесна—Мордовиянь республиканскяй бюджетть ярмаконза. Перинатальнай центраса кармайхть пчксема пациентт аф аньцек минь республикастонк, но и шабрань региоттнень эзда эряйхть.

Объектть Мордовиянь Оцюнясь кирдьсы башка контроль ала. Сон азозень афсатыкснень помещениятнень шумонь изоляцияснон, киякснень и поталакнень покрытияснон качестваснон коряс. Н.И.Меркушкин критиковандазень строительхнень савор отделочнай работатнень мольфтеманкса. Сон нинге весть азозе, што объектсь эряви анокламс тя кизоть пенцты. Николай Иванович стане жа ванозе, кода строяви крытай футбольно-легкоатлетическяй манежсь. Республикаса тя инь оцю спортивнай объектсь. Планц коре эксплуатацияс максомасонза пингсь—сай кизоть пец. Ульсть азфт замечаният манежть территориянц маласа коммуникациятнень коряс.

Республикань Оцюнясь ванозе и Олимпийскяй подготовкань Центрать колмоце очереденц строяманц алу территориять. ЦОП-ть территорияса сон васетькшнесь центрань спортсметтнень и тренерхнень мархта. Ольга Каниськина и Виктор Чёгин азсть спасиба Мордовиянь Оцюняти Н.И. Меркушкинонди ширеснон кирдеманкса и азсть предложеният центрать материально-техническяй базанц цебярьгофтоманц коряс.

 

6 агустста Мордовиянь Оцюнясь Н.И.Меркушкин примась участия засухать эзда зиянц повф велень хозяйствань производительхнень ширеснон кирдемаса рабочай группать заседанияса. Видеоконференциянь лаца заседаниять етафтозе Россиянь Правительствать Председателенц васенце заместителец В.А.Зубков.

Странань Правительствась примась решения кафта этапова прважамс зиянц повф региоттненди 30 миллиард цалковай бюджетнай кредит и 10 миллиартт цалковай дотация.

Мордовиянь Оцюнясь Н.И.Меркушкин совещанияса корхтамста азозе, што юмафксне инголи азфть коряс сяда оцюфт. Средняйста сявф коэффициентса ашет сельхозпроизводительть, кона тевс нолясыне хозяйствать мольфтемаса интенсивнай метоттнень, афкуксонь карьхценза. Мордовиясь мекольдень кизотнень кафта пяле мархтонь-крда сяда лама удобрения сувафни модати. И земледелецненди тянь мархта савсь сяда лама карьхцямс. Лама ярмак республикань аграрийхне карьхцясть велень хозяйствань тяниень пингонь питни техникань рамамс. Кда средняйста странава техникать амортизацияц 70 процентть малава, то Мордовияса—сембоц 28.

Тяка пингть финансовай лезксонди республикать заявкац кирьфтафоль Москуса тянь мяльс апак сяфть.

Россиянь Правительствать Председателенц васенце заместителец кирдезе Мордовиянь Оцюнять ширенц. В.А.Зубков азозе, што мяльс эряви сявомс эрь регионть спецификанц. Сон мярьгсь РФ-нь Велень хозяйствань министерствати одукс ваномс тиф зиянть содаманц коряс уликс схемать.

Н.И.Меркушкин стане жа нинге весть лятфтась велень хозяйствань предприятиятненди аграрнай кредитонь получамс федеральнай гарантийнай фондонь тиемаса эрявиксшить колга.

Мордовиянь Оцюнясь пачфтсь В.А.Зубковонди сянь колга, кода ащи тевсь миньцонк пожархнень мархта. Республикань кота райоттнень эса палы тяни вирсь. Толть матомаса заняф 5 тежяньда лама ломань, специальнай и лия техника. Зиянонь лисема вастса ломаттне работайхть шить и веть. 

 

Аф кунара Россиянь Правительстваса ванфоль кизефкссь федеральнай бюджетста Российскяй Федерациянь субъекттненди субсидиянь максомать квалма, конат нолдавихть важнай спортивнай сооружениянь строямсь. Тя спискати повсь Саранскяйса Олимпийскяй анокламань центрась. Сонь колмоце очередень строяманцты федеральнай центрась нолдай 100 миллион цалковай.

 

30 июльста Мордовиянь Оцюнясь Н.И. Меркушкин примась участия рабочай группать заседанияса, кона пуроптф странань правительствать мархта велень хозяйствань производительть засухать эзда юмафксонзон мрдафтоманкса. Россиянь региоттнень мархта видеоконференция вельде заседаниять етафтозе РФ-нь Правительствать Председателенц васенце заместителец В.А.Зубков.

Совещанияса выступлениянц пингста Мордовиянь Оцюнясь азозе: республикаса тефне пяк стакат. Засухась машфтозень видефнень оцю пяльксснон. Мордовиясь кочкасы мелянь урожайть аньцек нилецекс пяльксонц. Тяконь мархта, миньцонк лама пуроптф жуватада велень хозяйствань угодиятнень лангса—инь ламось странаса. Шарьхкотьф, што региоттнень эса кормань анокламс условиятне, коса фкя траксти сашендови, условнайста азомс, 10 гектархт мода или 1,5 гектар, пяк аф фкя лацоннет.

Мекольдень вете кизотнень Мордовиясь строясь 100 оцю животноводческяй комплекс и тячи аграрнай секторть мархта сембе ноляви продукциять 60 процентонц мишендьсаськ республикать эзда ширьге. Мордовскяй велень хозяйствань продукциять объемонза сяда оцюфт ся региоттнень коряс кода Самарась или Саратовсь, а тяконь мархта региональнай бюджетсь 5-ксть сяда емла. А тяста лисенди, сяда емла возможностсь лездомс эсь аграрниконьконди.

Н.И.Меркушкин пшкядсь В.А.Зубковонди эняльдема мархта—региоттненди федеральнай субсидиянь нолдамста сявомс мяльс тя серьезнай положениять. Республикань Оцюнясь стане жа путсь кизефкс велень хозяйствань предприятиятненди федеральнай аграрнай гарантийнай фондста кредитонь получамать колга.

Н.И.Меркушкин В.А.Зубковонди пачфнесь жувататненди тялонди кормань анокламать—корматнень 75 процентснон республикась анокласыне эсь территориясонза, лядыкснень—странань региоттнень эзга, коса аш тяфтама засуха. Пожархнень мархта тяфта жа стака положениясь. Палыхть вирьхне, куттне. Тяни республикати эрявксты 400 миллион цалковай, штоба строямс ломаттненди эряма вастт.

 

 

Фкя суткаста вазнятне сталготкшнихть 621 граммада. Мелять васенце пялестонза ульсь 587 грамма. Пяле кизоста хозяйстваса вазыяф 177 вазня, 202 пряда сяда лама 2009 кизонь тяка пингть коряс. Кода няеви, животноводствань показательхне аф кальдяфт. Тянкса васендакиге шнама хозяйствань руководительсь Д.Н. Алыков и сонь тевонь содай коллективоц.

Рузонь Баймак велень фермаса главнай бригадирть сатомс ашезь удала. Сонь тевонзон пяшкотькшнезень В.Андреев. Тяда башка, сон нинге тиендьсыне ветврачень и осеменаторонь тефнень. Валериень рабочай шиц ушеткшни сембонь коряс сяда инголи и шумордакшневи кемонь частста илять. Мзярда сань фермав, В.Андреев заботендась емла вазнятнень перьфкя. Дояркатне заняфтольхть шобдавань потямать мархта. Тяниень пингонь доильнай залсь ламода теждялгофтозе синь тевснон. Дояркатне аньцек шташендсазь одарть, эцекшнесазь потятнень «молочнай стакаттненди», а сяда тов ваныхть, кода работай потямань аппаратсь. Сембе оборудованиясь штави сонць, а лофцсь специальнай каналхнень эзга шуди кельмофти аппаратти.

Рузонь Баймак велень фермаса кирдеви 628 крупнай сюру жувата. Етксост 406 потяви тракс, 142 вазня, 20 ведраж, 60 тракс. Совестьс коре трудендайхть скотникне и постуфне В.Данилов, В.Калантаев, А.Ейкин, В.Тишкин. «Хозяин» кормораздатчикть мархта, кона повфтаф «Беларусь» тракторти, маштозь явонды корма С.Шинкин. Жувататнень вастснон урятцемац—эрь шинь тевоц механизаторть А.Жадеевонь. Кода азозе В.Андреев, сембе вийснон эсь тевснонды макссесазь вазня мельге якайхне Л.Романова, В.Шитова. Синь группасост вазнятне суткати сталготкшнихть 700-800 граммада. Тя показательсь пяк цебярь!

Тяка шиня улень Кельме Порань животноводческяй комплексса. Ужяль, цифрат тейне тяса ашесть аза, но содавсь, што тефне тя хозяйстваса аф мялень кеподихть. Улема, няфтезе эсь прянц засухась.

Кизефксозень лангс, райононь кона комплекссь производствас коре моли инголе, «ВКМ-Агро» ЗАО-нь главнай экономистсь азозе, што инь цебярьхть сатфксне Рузонь Баймак велень фермаса. Суткати фкя траксть эзда тяса потьнихть 16,5 килограмма лофца. «Мезьса секретсь?»—кизефтине Д.Н.Алыковонь. «Кодамовок секрет тяса аш,—отвечась сон.—Кда ни водендать жувата, сон эряви лац-ряц андомс. Кормада миньцонк сатомшка. Тяда башка, жувататне кирдевихть пяк цебярь условияса, вятеви племенной работа. Кда тя сембось кирдеви мяльса, то оцю сатфксонь сатомась, арьсян, аф стака».

Кода содаф, тяниень пингть сельхозпредприятиятнень пичефтьсыне коське, пиземфтома пингсь. Но «ВКМ-Агро» ЗАО-ти, койсон, удалай сяськомс тя прябалать. Хозяйствать оцюфт мелянь тишень запасонза, аф кржа аноклаф ни сенажда, серода. Мольфтеви лия кормань анокламась.