Тяниень пингть республикасонк пцтай 436 школа, коса тонафни 70091 стирня и цераня. Школатнень оцюшка пялькссна веленнет. Кизоста кизос тонафнихнень лувкссна эсост коль кири, школатне селгондовихть. Тянкса пяк пичедихть кода синць ученикне, стане и синь тядясна-алясна.

Школань пякстамати туфталда лама. Васенцесь—кржа тонафнида. Ламоц велень школань класснень эса лядондсь вете-кота шаба, а кой-конатнень эса—сядонга кржа. Тяфта жа аф сатнихть кой-кона предметтнень коряс учительхне. Сявомс хуш иностраннай кялень, географиянь учительхнень. Синь урокснон аф шуроста вятнесазь мокшень кялень, лия предметонь тонафтыхне. Кой-коса школатне пяк таштомсть, эсост аф ванфневихть санитарно-эпидемиологическяй норматне, лия вешфксне. Велетне юмама-арама лангсот, школатне селгондовихть или  полафнесазь статусснон. Средняй школать вастс, мярьктяма, эвондай основной или начальнай.

Ламотнень, конешна, тя пичефтьсыне, а кой-кит арьсихть, што малокомплектнай школатнень селгомасна аф стама ни оцю зиян, нльне меколанкт. Лияста велень шабатнень содамошисна сяда лафчт ошеннетнень коряс, сяс мес велень школаса тонафнемс аш стама условият, конат улихть базовайса и ошеннеса. Тяса таштомсь материально-техническяй базась, од учительхнень аш мяльсна самс работама вели. А сяс родительхневок сидеста аф ащихть каршек школать пякстаманцты. Кажнайть мялец, штоба идец 11 классть шумордамда меле получаль цебярь содамошит и поступаль тонафнема вузу. Тянкса базовай школатнень эса ули сембе эрявикссь: тонафтомась мольфтеви тяниень вешфкснень коряс, улихть лабораторият, Интернет мархта компьютернай класст и стак тов. Тя сембось аш малокомплектнай школаса. Ученикненди аш кинь эзда сявомс пример, а кда класса лама тонафнида, етксост мольфтеви эсь лацонь пялькстома, кажнайсь старандай улемс сяда цебярькс. Оцю класса пингське етни сяда интереснайста. Кода, мярьктяма, весяласта, мялень салазь етафтомс мероприятиять, кда школаса сембоц комсь ученик?

Краснослободскяй районца тяниень пингть 16 школа. Кода пачфтсть тейнек райононь образованиянь Управленияста, мекольдень вете кизотнень синь лувкссна ламода кирсь. Селговсть Старорябкинскяй, Новозубаревскяй, Зайцевскяй, Дубровскяй и лия школатне. Шабатне пачфневихть тонафнема шабрань вели. Тянкса районца работайхть автобусонь кемонь маршрутт, конат усксихть 169 тонафни. Кепотьксонди, Старорябкинскяй и Новозубаревскяй школань ученикне тяни касфнесазь содамошиснон Преображенскяй поселкаса, кона ащи пцтай 12 вайгяльбе вастса. Дубровскяй школать пякстамда меле тостонь шабатне етасть Гуменскяй школав. Тяддень тонафнема кизотьке ученикненди аф панчсазь кенкшснон Старогоряшинскяй и Русско-Маскинскяй школатне. Васенцесь таштомсь, мольфтемс эсонза тонафнемать сяда тов аш кода. А вов омбоцесь нинге од, но тонафнида эсонза лядсь пяк кржа, сяс сафоль мяльс усксемс синь шабрань вели. Виде, ся случайста, мзярда мокшень школаста ит­тне етафневихть тонафнема рузоннес, родной кялень урокне теест сякокс кармайхть вятевома.

Школать селгоманц колга кизефксть коряс самс фкя мяльс пяк стака. Ламотне лувондсазь тянь оцюдонга оцю зиянкс, вдь, кда аф ули школа, пингонь етазь юмай велеське. Тяста туйхть и аф кармайхть мртцема од ломаттне... Улихть и лия мяльхть-арьсемат. Шабатненди, кле, сяда пара тонафнемс оцю, цебярь школаса, коса сембе учебнай процессь мольфтеви тяниень пингонь вешфкснень коряс. Синь вдь аф муворуфт велеса школатнень селгондомаса.

Меля Атерь велень средняй школань 1959 кизонь выпускникне отмечазь школать шумордамда меле 50 кизонь топодемать.

—Тя ульсь мокшень васенце классь Атюрьевскяй районца,—мярьгсь трудонь ветеранць П.И.Сяткин.—Тяса тонафнесть войнань пингонь шабат. Пцтай сембонь алясна фронтсотольхть. И пяк ламотне куду ашесть мрда. Касфтозь синь тядясна.

Сонцень Петр Ильичень аляц, Илья Васильевич, ульсь кафта войнаса. Великай Отечественнайста сась афкуксонь геройкс. Казьфоль лама орденца и медальса. А вов мархтонза фкя класса тонафни цераня и стирня ялганзон алясна ашесть са. Шавовсть бойса и юмасть куляфтома.

Мокшень васенце класса начальнай классонь учительницакс ульсь В.А.Рябинина. Ломанць цебярель, кельгозень и ужялязень иттнень, макссь крхка содамошит. Аф стак тянемс учениконза лятфнесазь Варвара  Алексеевнань аньцек лямбе валса.

Мокшень васенце классть тонафнезь тяфтама содаф учительхть, кода А.А.Тюгаев, М.П.Кшнякин, П.А.Чикина, А.И.Тюгаева. Класснай руководителькс сисемце класста сявомок ульсь В.П.Малахова.

—Тонафтыеньконь еткса ашельхть кальдяв ломатть,—сяда тов азондсь Петр Ильич.—Ламотне сафтольхть фронтста. Аф стак пяк ламотне мокшень классоньконь эзда арасть учителькс.

Сембе эряфонц школати максозе А.С.Чудаева. Мокшавась ульсь начальнай классонь учительницакс нильгемоньда лама киза. Тонафтсь мокшень семьяста иднятнень эса морафтома, сермадома, цебярь койхнень-обуцятнень ванфтома. Васенце учениконзон синцень ни уноксна, но кельгома учительницаснон аф юкснесазь. Кода можна юкстамс мазы вайгяль мокшень моронь морсить Анна Степановнань! А мзяра етафтсь мокшень кяльса пуромкс. Сембе афи лувовихть.

Тя оцю мокшень класса тонафнесть М.В.Полькина, Е.Н. Пугайкина, П.И.Царева, ламотне лиятне.

—Пяк ламоль эздонк,—азозе Н.П.Ямщикова.—Етась ведьгемонь фкя киза, кода аделаськ школаньконь. А фкя-фкянь ашеме юкста. Шачема шистонк фкя-фкянди гайфнетяма, пара иластонк якатама инжикс. Аф юкснетяма фкя-фкянь и эста, мзярда сувай кудозонк зиян.

Васенце мокшень классь нолдафоль 1959 кизоня. Ламотне эряйхть районца, улихть и шири туфт. Кивок эздост ашезе юкста мокшень кяльть. Сембе аватне якайхть мокшень щамса. Ламотне пяк кельгсазь мокшекс морамаснон.

—Тянемс шнафттама пря сянь мархта, што тонафнеме васенце мокшень класса,—азозе П.И.Сяткин.—И гордостень марязь азса: выпускниконьке занясть пяк цебярь васта аф аньцек школать, но и районть историяса.