Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      
Благотворительность

«КРУГЛАЙ ШРАСЬ» ЛЕМТЬФОЛЬ ДОБРОВОЛЕЦОНЬ МЕЖДУНАРОДНАЙ ШИТИ

5 декабрьста Саранскяйса «Мордовия Республикань бизнес-инкубатор» ГКУ-са етась «Мордовия Республикаса добровольческяй движениять пуроптомац и виияфтомасонза перспективатне» темас коре «круглай шра».
Мордовия Республикань Государственнай Собраниять видеса Од ломанень общественнай палатать и Мордовия Республикань Од ломаттнень тевснон коряс Государственнай комитетть инициативаснон коряс Доброволецонь международнай шиня етафтовсь од ломаттнень еткса добровольчествать содафокс тиеманцты лемтьф несколька пуромкс.
Мекольдень кизотнень миньцонк кочкси вийхть добровольческяй движениясь. Республикань муниципальнай райоттнень, вуснень и школатнень эса пуропневихть волонтеронь анокламать коряс центрат. Волонтерхне макссихть лезкс ветераттненди, эряфкшу ломаттненди, эряфонь стака ситуацияс повф иттненди. Синь вятихть вешендемань и гражданско-патриотическяй оцю тев. Работайхть территориятнень благоустройстваснон коряс. Етафневихть социальнай оцю акцият. Тежяньда лама волонтер примась участия 1000 кизонь юбилейть праздновандамаса. Тяни мольфтеви волонтеронь анокламась 2013 кизоня Казаньца етафтови Универсиадати, 2014 кизонь Олимпийскяй и Паралимпийскяй налхкоматненди, 2018 кизонь футболть коряс Миронь чемпионатти.
ООН-ть Генеральнай Ассамблеянц решениянц коряс, эрь кизоня 5 декабрьста отмечсеви Доброволецонь международнай шись. Теенза лемтьфоль и вяре азф «круглай шрась». Работасонза примасть участия высшай учебнай заведениянь, общественнай организациянь представительхне, миньцонк тонафни омба масторонь студенттне.
Пуромксть шумордамста казьфтольхть «1000 пара тев 1000 кизоти» од ломанень республиканскяй добровольческяй акцияса сяськихне. Тифтольхть итокт добровольческяй социальнай проекттненди.
Вятезе «круглай шрать» Мордовия Республикань Государственнай Собраниять видеса Од ломанень общественнай палатать председателец Е.А.Еракина.
Т.ТАТЬЯНИНА.

13.12.2012 №49

Новости

Синь арьсесть народоньконь сай пингонц колга

Тяддень 10 январьста топодсь 90 киза ся шиста, мзярда пуроптфоль Мордовскяй автономнай областсь. 1934 кизоня сон лемтьфоль автономнай республикакс.
Пингсь няфтезе: тя историческяй событиятне лездсть мокшэрзянь народти тиемс оцю аськолкст инголи культурань, социально-экономическяй кизефкснень решандамста.
Эряви азомс: эстонь пинкне тяниеннетнень коряс ёфси лиятольхть. Кржаль мокшэрзятнень ёткса грамотнай ломаньда, ашельхть национальнай школатка. И вов сят, кит кода-бди сатсть содамошит, шарьхкодезь революциять целензон, ушедсть кепсемонза мордовскяй автономиять колга кизефксть.
Сяс, штоба шарьхкодемс ся эпохать, минь аф штатнай корреспондентоньке Фёдор Гаврилов васетькшнесь историческяй наукань кандидатть Иван Андреевич Юринонь мархта, конань  тя темать коряс крхкат содамошинза.
13.08.2020   № 31
«Сурский рубеж» фестивалень конкурсс максф 250-да лама заявка

Шумордавсь «Сурский рубеж» патриотическяй моронь фестивалень конкурсс заявкатнень примамасна. Мордовиянь сембе райоттнень эзда и Чувашия Республикаста максф 250-да  лама заявка. Кеняртьфти ся, што конкурсанттнень ёткса улихть и вете кизоса шабат, и 80 кизода сире ветератт. Сембе моротнень эса, конатнень синь морасазь, шарьхкотькшневи странаньконь, сяськоманьконь инкса гордостень марямасна!
«Сурский рубеж» проектсь—гражданскяй обществать виияфнеманкса водендаф Президентскяй грантонь фондть 2020 кизонь васенце этапонц панжада конкурсонь сяськись. Тя военно-патриотическяй моронь фестиваль, кона ётафтови 1941-1945 кизотнень Великай Отечественнай войнаса советскяй народть Сяськоманц 75 кизонь топодеманц и 1939-1945 кизотнень омбоце мировой войнать шумордаманц праздновандамаснон мяльса кирдезь. Водендаф фестивальсь Мордовиянь ломаттнень оцю подвигснон колга историческяй мялямть ванфтоманкса.
13.08.2020   № 31
Е.С.Кирдяпина:«Мзярс ванфтови кяленьке, снярс кармай эряма нацияньке»

Ивановка велеса героиняньке шумордазе начальнай школать, а меле содамошит пуропнесь Морд-Полянаса. Школаса Ленась тонафнесь  лац. Пяк кельгозень мокшень кялень и литературань урокнень. «Литературань учителеньке най путнелезе Ленать тейнек примеркс,—лятфнесы Кирдяпинать фкя класса тонафни ялгац Е.И.Чекмарёва.—Урокнень пингста минь сембе старандаме лац-ряц азомс лувфть, максомс характеристика геройхненди, и сембоса кати-мезе ашезь сатне. Тяса терневсь доскати Ленась. Азы фкя вал, и марнек шарьхкотьф, сембось кода эряви. И эзк Нина Павловнаньке юватькшнель: «Молодецат, Лена!».
Нинге шабакс Е.С.Кирдяпинать салселезе мяленц учителень тевсь. Сяс школать шумордамда меле мялецоль тонафнемс тя профессияти. Но вов коса прябалась: сянкса, штоба тумс тонафнема Саранскяи, эрявсть ярмакт, а коста синь сявомс? Эста од стирсь, аньцек получазе аттестатть, лиссь работама. Киза покодсь Зубуса ламповай заводса, кочкась ярмаконя и сембе сяка пяшкодезе мяленц—поступась тонафнема Н.П.Огарёвонь лемса МГУ-нь филологическяй факультету.
13.08.2020   № 31
Аш стама тев, кона улель теенза аф вийс коре

Мзярда сань мяльс тяштемс Рузаевскяй райононь Мокшень Пишля велень эряйть, зрнянь кядь алять Фёдор Иванович Юдинонь колга, абондонь, сяс мес ашине сода мезьста ушедомс. Фёдор Иванович канневи стама ломаттненди, конат маштсазь семботь. Аш стама тев, кона улель теенза аф вийс коре. Нят аф шава валхт, а афкукс тяфта. И эрь тевсь, конанди  Мастерсь кярьмоди, кода корхнихть мокшень тя велеса, налхкозь налхки кядьсонза.
Аф кунара Мокшень Пишля велень клубть видеса панжевсь «Мастера и рукодельницы» творческяй мастерскойсь. Ламотнень эвондась мяльсна варжамс вийснон кядьтефнень, тяконь лувксса и кодамать (ткачествать) эса. Но тя ремеслась, аф ваномок рамаф од и кунардонь уликс кодамань статтнень лангс, аф эстокиге макссь пря, сяс мес пцтай юкстафоль и аф курокста мувсь ломань, кона шарьхкодель тя тевса.
Фкя шиня Фёдор Иванович Юдин сувась велень клубу, ванозе тостонь музейста кодамань кунардонь  станть, кона кунара ни ащесь пяльксонь пялькс. Тевонь содай мастерсь эстокиге азозе, кодама пялькст аф сатнихть, а кодама уликсне полафтомат ни, сяс мес таштомсть пингть сюнеда. И аф аньцек азозе, кодама пялькст аф сатнихть, а тиезень синь, кандозень клубу и кочказе станть! Тяфта и арась содафокс, што Фёдор Иванович машты кодамань станца работама. Коса и мзярда тонадсь тянди? Валонзон коряс, тя ремеслась ётась теенза бабанц Устиния Павловнань эзда.  А алянц, Иван Афанасьевичень, мархта лама кизода инголе сон кочксесь кодамань стан.
13.08.2020   № 31
АНОКЛАВИ памятник Михаил Девятаевонди

Торбеево посёлкать паркса путови бронзаста монумент легендарнай лётчикти, Советскяй Союзонь Геройти Михаил Петрович Девятаевонди.
Михаил Девятаевонди скульптурнай композициянь тиемать коряс 2019 кизонь мартста Мордовиянь Оцюнясь Владимир Волков пшкядсь Российскяй военно-историческяй обществати, кона, кода азондови РВИО-ть официальнай сайтсонза, кирдезе тя мяльть ширенц.
«Культура» национальнай проектть рамкаса РВИО-сь февральста макссь старт Советскяй Союзонь Геройти М.П.Девятаевонди памятниконь инь цебярь проектонь  арьсемать коряс международнай конкурсти. Коронавирусонь пандемиясь сувафтсь кой-кодама полафткст конкурсти итогонь тиемань пингти. Но аф кунара эксперт-тне ванозь максф творческяй заявкатнень и инь цебярькс лувфоль скульпторть Андрей Коробцовонь и архитекторть Константин Фоминонь проектсна.
13.08.2020   № 31
Торжественнай собраниясЬ лемтьфоль Строителень шити

Пяденцяста, 7 августста, Мордовия Республикань Оцюнясь Владимир Волков онлайн режимса примась участия торжественнай собранияса, кона лемтьфоль Строителень шити и, кона ётафтовсь Республикань Кудса. Региононь руководительсь пшкядсь традицияс коре ётафневи мероприятиянь участникненди поздравлениянь и благодарностень вал мархта.
«Тейне тя праздниксь эсь лацонне. Ваймоса мон улень и лядондан строителькс. Кизонь кофнень стройкатнень эса мон ётафнян сяда лама пингта рабочай кабинетть коряс. Самай стройкаса маряви созиданиянь афкуксонь вийсь, пяшкотькшневи задачатнень афкуксонь масштабсна, няеви эсь работацень конкретнай результатоц. Сяс седи ваксста поздравляндатядязь тинь и тинь коллегантень минь марстонь праздниконьконь—Строителень шить мархта!»
13.08.2020   № 31
Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020   № 29
МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020   № 29
 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин