Поиск по сайту: 
 

Архив
 март 
 2020 
пн вт ср чт пт сб вс
      1
2345678
9101112131415
16171819202122
23242526272829
3031     
Благотворительность

СОДАФТ ПАРА ТЕВСНОН МАРХТА

Красный Крест Международнай движениясь—тя масторлангса инь содаф общественнай организациясь.     170-да лама национальнай обществань сотрудникне и волонтерхне работайхть инь стака вастса снярда, мзярда государственнай структуратненди аф сатнихть вийхне и ресурсне, штоба решандамс прябалать: стихийнай бедствиять, урмань эпидемиять, вачашить, гражданскяй конфликтть и стак тов. Красный Крест движениять доброволецонза кепотьф мяльса макссихть лезкс.  1990 кизотнень кучкаста Российскяй Красный Крестть видеса панчф од ломанень движения. Странасонк од  ломаттне ушедсть пуромкшнема группава местнай областной или республиканскяй Российскяй Красный Крестть видеса. 
1998 кизонь апрель ковста сявомок тяфтама группа появась Саранск ошса. Группась тиф Н.П.Огаревонь лемса Мордовскяй государственнай университетонь историко-социологическяй институтть видеса. Тя институтть профильнай отрядоц, а тяфта жа     Российскяй Красный Крестть Мордовскяй республиканскяй отделениять структурнай подразделенияц. Группась максси лезкс ошень од ломаттненди и иттненди. Вдь аньцек от-тнень прябаласнон сяда лац  шарьхкодьсазь оттне. Разнай пингоня группаса волонтеркс ульсть школьникт и университетонь лия факультетонь студентт. Но оцюшкась Красный Крест молодежнай группаса—тя историко-социологическяй факультетонь тонафнихне: сай пингонь социальнай работникне, регионоветтне, психолокне, политолокне и стак тов. Красный Крест молодежнай группать тяфтамот работань направлениянза. Подросткатнень и од ломаттнень еткса туберкулезть, наркоманиять, СПИД-ть инголдамац,  тя тевонди ярмаконь кочкамась. Ряцок лия тефнень мархта,  Красный Крест движениять задачац—содафнемс ломаттнень и серьгятькшнемс от-тнень группав. Тяконь лувксса од ломаттнень еткса донорствась, кона няевикс васта занци Красный Крест од ломанень группать работаса. Доброволецне етафнихть од ломаттнень еткса агитационнай работа. Тяда башка, етафнихть профилактическяй семинархт васенце курсонь студенттнень и школьникнень еткса, лама тиендихть наркоманиять инголдаманкса. Од ломаттне работайхть аф аньцек университетса, но и ошень образовательнай лия учреждениятнень эса: колледжса, техникумса и стак тов.
Группась етафни аф фкя лацонь акцият. Кода азозе Красный Крест од ломанень группать председателец Александр Семенюк, 28 ноябрьста  Н.П. Огаревонь лемса Мордовскяй госуниверситетса етафтовсь «Прикоснись к сердцу ребенка» благотворительнай акция. Ширде ваныкс ашесть ляда и экономическяй, историко-социологическяй, архитектурно-строительнай, географическяй, медицинскяй, юридическяй, филологическяй и лия факультетонь студент-тне. Акцияса сембоц примасть участия университетонь кемонь факультетт. Кочкаф 54 тежянь цалковай. Ня ярмакне туйхть  1№ идень республиканскяй больницянь шабатненди-отказникненди.
Эрь кизоня етафневи «Белая ромашка» акция. Акша ромашкась—тя туберкулезть каршес тюремань символсь. Кочкаф ярмакне тусть Республиканскяй противотуберкулезнай диспансеру.
Тяда башка, сидеста етафневихть аф фкя лацонь акцият, конат лемтьфт СПИД-ть каршес тюремань Всемирнай шити. Волонтерхне явондыхть студенттненди информационнай буклетт, листовкат, ленточкат и стак тов. Тиендеви сембось, штоба од ломаттне содальхть тя урмать колга.
Кода пачфтсь Александр Семенюк, Красный Крест од ломанень группать сай пингть мялец макссемс васенце медицинскяй лезкс аварияс повф ломаттненди. Но тя аньцек мяльсост, кода лиси эряфса, нинге аф содаф.
Тяни историко-социологическяй институтонь Красный Крест од ломанень группаса 28 волонтер, конат виень и пингонь аф ужяльдезь макссихть лезкс од ломаттненди, иттненди и сембе обществати. Арьсетяма, штоба сай пингть синь лувкссна нинге сяда касоль.
 
Л.РЕЗОВА.

13.12.2012 №49

Новости

ПЕРЯМС КИТЬ КОРОНАВИРУСНАЙ ИНФЕКЦИЯТИ

11 мартста Саранскяйса Мордовия Республикань Пресс-центраса ётась Мордовия Республикаса эпидемиологическяй обстановкати лемтьф пресс-конференция.            Журналисттнень мархта васедемаса примасть участия Мордовия Республикань здравоохранениянь министрсь О.В.Маркин, Мордовия Республикать эзга  потребительхнень праваснон и ломаттнень благополучияснон араламаснон сфераса надзорть коряс федеральнай службань Управлениять эпидемиологическяй надзоронь отделонц начальникоц Ю.В.Матвеева.

 

Кода азозе Мордовия Республикань здравоохранениянь министрсь О.В.Маркин, тячиень шити Мордовияса Республиканскяй инфекционнай больницяв госпитализировандафт 8 ломатть, конатнень улихть и ОРВИ-нь,  и коронавируснай инфекция лангс шарфты признаксна. Кафттне эздост састь Италияста, кототне—контактнайхть.
 

20.03.2020   №
МОРДОВИЯНЬ ГОССОБРАНИЯНЬ ДЕПУТАТТНЕ ШНАЗЬ РФ-нь КОНСТИТУЦИЯТИ ПЕТЬКСНЕНЬ

12 мартста Саранскяйса ётась Мордовия Республикань Государственнай Собраниять 44-це сессияц.  Сонь шинь повесткасонза фкя инь важнай кизефксокс ульсь РФ-нь Конституцияти петькснень колга законть ванондомац. Законти основакс арасть тезисне, конат азфтольхть РФ-нь Президентть Владимир Путинонь мархта Федеральнай Собранияти эсь Посланиясонза. Президентскяй ушетксне сяда тов ульсть келептьфт предложениятнень мяльс сявозь, конат састь рабочай группати, кона пуроптф государстваньконь вятиенц мархта.
 

 

Кода азозе шинь повесткати лихтьф тя кизефксть коряс дискуссиять ушедомстонза МР-нь Госсобраниять Председателец, «Единая Россия» партиянь политсоветть Секретарец Владимир Чибиркин, РФ-нь Конституцияти полафтксне водендафт странаньконь суверенитетонц обеспечендаманцты, граждаттнень социальнай гарантияснон кемокстамаснонды, политическяй системать виияфтоманцты, вешфкснень  касфтомаснонды ломаттненди, конат занцихть государственнай пяк эрявикс должностть.

 

20.03.2020   №
МОРДОВИЯСА 7750 СЕМЬЯТИ МАКСФ РЕСПУБЛИКАНСКЯЙ ТЯДЯНЬ КАПИТАЛСЬ

Тяниень пингть, кода марнек странаса, стане и минь республикасонк оржаста ащихть демографиянь кизефксне. Мордовиянь Оцюнясь В.Д.Волков Государственнай Собранияти Посланиянц эса азозе: «Маластонь кота кизотнень тейнек эряви пяшкодемс афкукс историческяй задача—касфтомс республикань населениять одс шачфнень лувксснон касфтоманц вельде, мезсь  апак сатнеколь комсь ветие кизода ламос». Эряви азомс, мекольдень пингть Мордовияса аф кржа тиендеви од, лама идень семьятнень ширеснон кирдеманкса. Эряфс ётафневи программатне, примсеви мератне каннихть результатт. Тяфта, вете кизоста лама идень семьятнень лувкссна Мордовияса кассь 1,5 тёжяньда. Тяниень пингть республикаса эряй 6685 семья, коса касфтовихть колма и сяда лама шаба. Оцю лезксокс ащи семьятненди тядянь капиталсь, кона тя кизоста сявомок Россиянь Президентть В.В.Путинонь мярьгоманц коряс, кармай      макссевома васенце идень шачфтыхнендивок. Минь республикасонк 2012 кизоста сявомок тевс сувафтф республиканскяй тядянь капиталсь. Кинди сон максови, кодама лувксоц и мезень лангс ули кода карьхцямс сонь? Тянь колга корреспондентоньконь мархта корхнемста азондсь Мордовия Республикань социальнай защитань, трудть и населениять занятостенц коряс министрть заместителец С.И.Шувалова.
 

19.03.2020   № 10
Н.А.КРУЧИНКИН: «ТЕЙНЕК МЯЛЯФТОМА ЭРЬ ЛЕМСЬ…»

2020 кизось странаньконди эсь лацонне. Тядде топоди 75 киза, кода сяськоме Великай Отечественнай войнаса. Россиянь эрь эряйти Победань шись, улема, инь питнись. Сон лятфни тейнек атяньконь-бабаньконь немецко-фашистскяй захватчикнень каршес тюремаса оцюдонга оцю подвигснон колга, и сянь, кодама питне максфоль воляшиньконь инкса.

 

Россиянь Президентть В.В.Путинонь Указонц коряс, 2020 кизось азф Мялямонь и славань кизокс, илати лемтьф мероприятият ётафтовихть марнек странать  келес, тяконь лувксса и минь республикасонк.

 

Ня шитнень корреспондентоньке васетькшнесь 1941-1945 кизонь военнай и трудовой подвигонь Мемориальнай музейть директоронц, «Поиск» Мордовскяй республиканскяй патриотическяй объединениять вятиенц Н.А.Кручинкинонь мархта. Сон азондсь Великай Победать юбилеенцты анокламать колга, а стане жа отвечась лия кизефкснень лангс.

30.01.2020   № 3
 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин