Н.П.ОГАРЁВОНЬ ЛЕМСА МГУ-ть И САНКТ-ПЕТЕРБУРГСКЯЙ КУЛЬТУРАНЬ И ИСКУССТВАНЬ ГОСУНИВЕРСИТЕТТЬ ЁТКСА СОТКСНЕ КЕМОКСНИХТЬ

Н.П.Огаревонь лемса Мордовскяй государственнай университетть тевонзон еткс сувси аф аньцек тячиень шить вешфксонзонды отвечай специалисттнень анокламасна, но и лия вуснень мархта уликс опытса полафнемась. Национальнай культурань институтсь фалу тянь кирдьсы мяльса и лама тиенди тя пара койть ванфтоманц инкса.
Аф кунара, 30 майста-2 июньцта, ИНК-нь преподавательхне и студенттне ульсть Санкт-Петербургса—сотцесть Культурань и искусствань Санкт-Петербургскяй государственнай университетть работанц мархта.
Кеветие ломаньцта ащи делегацияти сувсесть Н.П.Огаревонь лемса Мордовскяй государственнай университетонь Национальнай культурань институтть директороц Т.Н.Сидоркина, внеучебнай работать коряс сонь заместителец А.А.Казанцева, вокальнай искусствань курсть заведующаец С.В.Колесникова, «Сюлгамо» народнай моронь коллективсь, ИНК-нь модань театрась.
Инжихне оцю мяль шарфтсть Культурань и искусствань Санкт-Петербургскяй государственнай университетса образовательнай тевти. Тя ошу якамань васенце целькс А.А.Казанцева лемдезе опытса полафтомать. Валонзон коряс, Культурань и искусствань университетсь—радня вуз Н.П.Огаревонь лемса госуниверситетонь Национальнай культурань институтти. Вдь эсонза, кода и ИНК-са, тонафнемань предметокс арсихть культурась и искусствась. Тифтольхть сяда товолдонь сотксонь кирдемать и марстонь тевонь вятемать коряс договорхт. Кепотьксонди, синьге ули рузонь народнай моронь искусствань кафедрасна, конань заведующаец В.М.Сивова няфтсь мастер-класс Мордовияста сафненди. Тя мастер-классть эсь лацонь ширенза нолдавихть тевс Н.П.Огаревонь лемса Мордовскяй государственнай университетонь Национальнай культурань институтть тонафнемань тевсонза.
Культурань и искусствань Санкт-Петербургскяй государственнай университетонь рузонь народнай моронь искусствань кафедрань студенттне аф кунара макссть выпускной экзаметт, конатнень пингста няфтьфтольхть Россиянь сембе национальносттнень искусствасна. Фкя блоксь лемтьфоль мокшэрзянь культурати.
Мордовияста инжихне ванозь театрализованнай представлениянь и праздниконь режиссурань кафедрать, содафтсть, кодама оборудования ули студиятнень эса, коса етафневихть студенттнень мархта занятиятне и стак тов. Сембонь мяльс тусь библиотечно-информационнай факультетсь. Культурань и искусствань Санкт-Петербургскяй государственнай университетка делегацияньконди экскурсиять етафтозе вузть ректороц, земляконьке, кона шачемас коре Ковылкинаста, А.С. Тургаев. Алла Александровна Казанцева мярьгсь, што сон—еню, интеллигентнай ломанць. Тяда башка, лац содасы мокшэрзянь культурать и искусствать.
Вузса лама направлениява тонафни 12 тежянь студент. Ладяф музыкально-инструментальнай искусствась, вокальнай искусствась, дирижированиясь, культурологиясь и стак тов. Культурань и искусствань Санкт-Петербургскяй государственнай университетса кафкса факультетт, лингвистическяй образовательнай центра и дополнительнай образованиянь центра.
Н.П.Огаревонь лемса     МГУ-нь преподавательхне и студенттне аф аньцек тонафнесть Санкт-Петербургскяй тя вузть работанц эзда, но и синцьке няфтезь маштомошиснон. Кепотьксонди, С.В.Колесниковать «Сюлгамо» народнай моронь коллективоц содафтозень сембонь моронь искусстваньконь мархта, а модань театрась няфтезень эсь кядьса аноклаф моделензон.
Санкт-Петербургу тя якамась аф васенцесь, коса примасть участия ИНК-нь сотрудникне и студенттне. Синь кирдихть кеме соткст Финно-угорскяй народонь культурань Поволжскяй центрать мархта, няфнесазь маштомошиснон странаньконь ламоц региононзон эса. Маластонь пингть арьсихть молемс Францияв, а сяльде, хуш тя нинге ащи оцю кизефкс ала,—Германияв.