Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

СЁКСЕСЬ АЗОР

Аф лажнай кизось, лац етась пингоц.
И сексесь азоркс ни тяза сась.
Сась ашезь кизефне ефси киньге
И зарянь паляса вирьхнень щась.
Но шуфттнень кеняртьфнесь сон аф ламос
Синь вармась эзост ни эзк кундась.
И эсост карянтьфнесь пяляз ваймось
И галош кадозень мянь тундас.
А тонат салава аньцек пичедсть
Вай, мезе аэрась эздост вешсь
И пара сянгяряль вакссост пичесь,
Ся, кона визьксснон аф ламда кяшсь.
Пряц пичеть тёганьца, сатсы менельть
Сонць тошкай келути сяконь фкакс
А пади тяни ни ефси тяни
Улят ни малацекс, молят рьвакс
Кунара ванондан аньцек мельгат
Мон ронгцень вармада идеса
А келусь тошкай: «Мон ушторть кельган
И прязень киндиге аф миса».
И тага равчкоды ефси менельсь.
Сон марнек кяши туцятнень еткс
И шиське тоста куватьс аф мяни
И пиземсь каяй ни вельф ся еткть.
А каркне, мацихне тусть кунара
Ни омба шири, ся эряфть шнайхть
А тоса ширезост аяш арай
И шачем крайнязост меки сайхть.
Шять кизось лямбоня нинге казель,
Но сексесь якай ни кепотьф прят.
Ужяль ни ськамонза тяни азор
Перьфпяле. Мезевок аф тият
                                 П.АЛЁШИНА.
 
АКША КУЯРХТ
Англияса лихтсть куяронь од гибрид. Лемдезь сонь Перец мархта салкс экзотическяй «шамаликонц» инкса. Афкукс, куярнятне няемас коре аф кодапт. Акша тюссна шарфты крупнай салонди, а сялгомаснон равжа точканясна—перецонди. Аф ваномок сянь лангс, што аф пяк цебярьхть няемас коре, куярхненди дегустацияда меле макссть цебярь оценка—10 баллхт. Тя инь ламось. Таньфснон колга мярьгсть, што синь ламбапт и туйхть мяльс.
Миньцонк английскяй деликатессь кармай мишендевома аф курок, да и мезенди сонь учсемс? Мишендеви ни Акша Ангел. Сон стане жа акша, таньфс коре аф сяда кальдяв англичанинть коряс. Тя гибридонь емла куярнятнень: кеднясна пяк ляпе, аш видьмосна, а потмосна аф ляпе и аф калгода.
Нинге мишендеви Китайскяй акша куяр. Но колганза корхтайхть, што сон, кода и китайскяй сембе куярхне, кувалмос касыхть пяле метрашкати. Вельф кенерьф плоттнень сяда сидеста кеворясазь почфса и пушнесазь пачкалгса. Лианатне кувалмос пачкотькшнихть 5 метрас, и садонь азорхне аф содасазь мезе тиемс. Но таньфсна, кда сяземс тяфтама куярхнень, мзярда синь кармайхть сосискань эчкса, пяк цебярь и видьмотне пей алу аф повихть.
 
КЯДЬГОТНЕ ОДКСТОМИХТЬ!
Тюжя роза мархта наборть нолясаськ тевс 15 киза, вишня мархтоть—10! Кастрюлятне пингонь етазь шобдалготкшнесть потмоста, и ваень путькт педендихть лангозост, но мон мунь тя прябаласта лисема васта.
1.Штоба кядьготне акшелгодольхть потмоста, кой-коста лакафнян эсост столовай нардаманят, каямок литра ведти столовай куцю 3 процентонь водородонь перекись  (мишендеви аптекаса). Нардаманятнень начфнесайне и шовияфнесайне хозяйственнай сапоньца. Лакафнесайне 15-20 минута. Сяльде лоткафнеса газть и кадондсайне кельмомозост. Сембе кядьгось потмоста арай кода аньцек рамаф лавкаста! И нардаманятне улихть аруфт!
2.Омбоце способсь сяда стака. Штоба кядьготне улельхть аруфт лангста, тонгондсайне оцю кядьгос (кепотьксонди, бакс), можна тонгомс веляфста, кода тялькфтави кядьгось, коса кармайхть лакафтовома, кайсян тоза курмозь муськома порошок, лангозонза пси ведь и кадондса 10-12 частс. Сяльде шташендсайне кядьготнень губкаса и кой-мзярксть оргалясайне ару ведьса. Лангста кядьготне кода отт, нльне потмаксста равчсь юмси.
Тяфтама баня тиендян теест кизоти весть, тя аф сяшкава стака, да и нардаматне эрявихть мезьса-бди лакафтомс. Корхтамась моли аньцек эмалированнай кядьготнень колга.
В.БАЛЫБЕРДИНА.
 
ШНУРОКНЕ АФ ЮКСОВИХТЬ
Лезды канифольсь, кона ноляви тевс паяндамста. Шнурокнень песна, конат кармайхть юкссевома, люпштамат канифоль пакшкас и несколькаксть ускомат ланганза. Эвондай акшаза серай порошок—сон и кирдьсыне шнурокнень юксовомада. Канифоль ули кода рамамс хозтоваронь лавкатнень эса, емла банканять питнец трешникт, или афкуксонь канифоль ули кузнять или пичеть ронгса. Тя стама жа вещества. Аньцек шуфтста сявондема кунардонь кристаллкс араф пялькскятнень, конат аф педихть. Свежайхне тя тевонди аф кондястихть.
С.КОРОЛЁВ.
 
СЕМБОСЬ КОДА ДОНОРТЬ
Фкя американскяй семьяса лиссь зиян. Алясь, кона павазуста эрясь рьванц мархта, туфталфтома ляцезе прянц. Врачне арьсихть, што тя лиссь фкя туфталонкса: теенза кой-мзяра пингта инголе путозь эсь прянь шавить седиенц, кона тусь эряфста тяфта жа. Ученайхне азондсазь: кда ронгсь ваймонь тялькфтай, эста органць, кона лия ломанень, макссыне тонанцты эсь азоронц характеронц эсь лацонь ширензон.
Салайсь пякстафоль кухняса
Дмитрий К. ульсь стаж мархта салайкс, но меколи тяфтама киц перявсь. А муворусь сембоса  пинесь, конань Дмитрий васьфтезе фкя квартираса. Сон шиньгучкать куцсь балкону и панжезе кенкшть квартирав. Етамок комнатать, варжакстсь кухняв, а тоса кинц перязе оцю ротвейлер. Дмитрий ерась етамс пинеть вакска, но тона рнась, няфнемок оцю пеензон. Тяфта салайсь пякстафоль кухняса, коса ульсь шиньберьф. Мзярда квартирань азорсь мрдась, сонь учезе сюрприз: пинесь кундазе ворть.

Новости

https://mokshapr.ru

10.06.2022   №
МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

2 июньцта коронавируснай инфекциять инголдаманц и келемоманцты кить персеманц коряс региональнай оперативнай штабть заседанияса примафоль решения—лоткафтомс Мордовияса маскань каннемань режимть. Кода азозе вице-премьерсь Галина Лотванова, республикаса эпидемиологическяй ситуациясь лувондови цебярькс и ащи контроль ала. Мекольдень шитнень коронавирусса урмаськодсь 19 ломань, стационархнень эса пчкси 160 пациент.
 

 
Тяконь мархта азфоль, што ковидсь ашезь пота, сяс хуш и валхтф маскань каннемань обязательнай режимсь, общественнай транспортса  и лама ломанень ёткса улемста мярьгондеви нолямс тевс араламань средстватнень. Общественнай питаниянь предприятиятненди мярьгондеви каннемс маскат сотрудникненди, конат работайхть оцю лувксса ломаттнень мархта.

 

09.06.2022   № 22
НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022   № 22
ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022   № 22
Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022   № 21
Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022   № 21
Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022   № 21
Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022   №