ЭСТЕЕНЗА МУСЬ ТЯДЯ, А АЛЯНЦТЫ—ОД РЬВЯ

Комсь кафкса кизоса рьвяянь ефси од и мезеньге колга аф пичеди стирь лангс. Мес? Ну, вдь минь, алятне, тяфтаптама: корхтатама, што тейнек эрявихть вернайхть и заботлюфт, а минць кочксесаськ сятнень, кинь мазы шамац и ронгоц. Тяфта мон и рьвяянь стирь лангс, кона аф аноколь рьвакс лисемати и тядякс арамати.
Семьяньке срадсь-каладсь. Явомда меле лядонь ниле кизоса церазень мархта. Рьвязе лиссь рьвакс лиянди и тусь мархтонза Москуву. Кяжиелень сембе мирть-масторть лангс, сяс Антошканди мархтон ульсь аф весяла. Лезнесть тядяне-аляне, конат сидеста сявондезь унокть ширезост. А мон «ваянь» бизнесс…
Весть тядязе мярьгсь, што тяфта сяда тов аф эряви—аньцек работамс и работамс, и рамась тейнек Антошкань мархта путевкат крымскяй пансионату. Тя ульсь киза, конада меле Антошканди тума школав и, конешна, теенза эрявсь лацкас ваймамс.
Балкоттне пансионатса ульсть «кафта номеронди»—тяфтама кувака балкон, кона явондовсь алняння перяфксса. Тя ульсь пяк аф мялезон, сембода сяс, мес шабра номерса ульсть кафта мазы стирьхть. Рахсемасна кяжияфнесть эсон, и ульсь пяк досадна, лисемок балкону, марямок эсь лангсон сельмованфснон.
Весть кадыне Антошкань номеру, а монць тунь лавкав. Сашендан—шабась аш! Ашемань кулхцонда и тусь ульцяв.
Варжакстонь балконцта алу: шабатне налхксесть, но Антошка етксост ашель. Тунь вешендемонза, етайне сембе пирьфть и ризназь мрдань меки. А кда тусь моряв и мезе-мезе тоса лиссь?!
Лисень балкону, курендан и синнян пря, мезе тяни тиемс, коста мумс Антошкань. И тяса кульса вайгяленц. Семботь шарьхкодине. Сон етась балконть вельхкска и сувась инжикс шабранень шири.
Лисендян коридору, чакан теест. Шарьхкотьф, што Антошканди повсь. Да и стирти—номерса ськамонзоль—тиень разнос. Кода можна улемс тяфтама лафча енькс—и аф арьсемс сянь колга, што церать аляц кармай вешендемонза и лисендема еньцтонза пичефксть эзда. Лиякс мярьгомс, сялондоме. И тяса сон тейне корхтай:
—Содасак, тяни аф дивандан, мес кадонзе рьвянце. Монга тулень тяфтамть эзда!
Мезевок ашень аза каршезонза, тунь... Малаткшнесь весь, а мон нинге ашень сашенда эсь эзон. Тунь ваннаи, варжакстонь лангозон ваномава и арьсень: «А вдь видец. Мон афкукс кяжиян. Кодамовок ава аф кармай кельгомонза тяфтамть... Шобдава васьфтеме столовайса. И тяса сон маладсь тейне и виздезь анась прощения исяконнеть инкса! А сяльде и корхтай:
—Ули мяленте, арттама марса ошу? Мольхтяма карусельхненди и дельфинарияв. Антошканди кармай улема весяла: шабатне кельгсамазь, хуш и аф кулхцондсамазь.
И минь срхкаме. Меки мрдаме таксиса, шобдалготкшнесь. Лама апак учсекта мезе кармань содама Наташань колга. Што теенза ни колмогемонь, и сон ламось пчксесь аф шачфтомада и стаки ашезь пчкя, а мирдец афи тяряфтсь, штоба кочкамс ярмак ЭКО-нди.. Да и хуш мезендивок лиянди. И сон ульсь аф лафча ень, а серьезнай и еню, аньцек ашезе юмафта оптимизманц, аф ваномок сембе ризфнень-пичефкснень лангс.
Тяфта корхнеме недяляньберьф, мзярс ашезь са пинге тумс...
Тумда инголень веня, мзярда Антон ни удось, пяшкодень ризфта-пичефкста. Шарьхкодень, што кельгса Наташань. Виденц азомс, тянь шарьхкодине сяда инголи, аньцек старандань панцемс ня мяльхнень-арьсематнень. Да и мезенди? Минь кальдявста фкя-фкянь содатама и эрятама разнай ошева. Аш кодамовок надияма, што сотксоньке поладови. Наташа юкстасамань, кодак аньцек мрдай куду. Да и аф мон салайне мяленц, а Антошка—церась, кона кой-мзяра пингс арась теенза церакс.
И сембе сяка ашень кирде и кафта частста веть чакань шабраненди. Аф пара пингсь кельгомать колга виденцямаса, но и тумс апак виденцяк Наташанди кельгомаса ашель кода.
Дивандазевонь, мзярда кенкшсь панжевсь эстокиге.
—Ашень уда,—мярьгсь Наташа.—Арьсень, пади, сатада тумда инголе…
Мезе эста лиссь мархтон, валса аф азондови. Да тяфтама сценатне афи азондовихть. Аньцек пачфтьсан фкять: меколи Наташа варжакстсь лангозон пеедезь и мярьгсь, што аф сембось тяшкава кальдяв, кода мон арьсян:
—Аф юкстате, мзярда мрдан куду,—мярьгсь тейне.—Кда, конешна, тонць тянь аф тисак. Мон ашень аза тейть кой-мезе. Арьсень, азса, кда виденцят кельгомаса, а кда аф... то и шяйтанць мархтот, лисенди, аф судьба! Кашт ашезь моле и поладозе:
—Мон эрян сяка ошса, коса и тон Антошкань мархта. Сяс васьфтемасть вокзалса ниле шида меле!!!
Свадьбаньке ульсь кизода меле. Наташа ашезь эряскода. Пельсь, кда карматама эряма марса и аф эряфтама, Антононди тя ули психологическяй травмакс. Мяль салай ся, што Наташань пелеманза сотфтольхть мархтон, а Антононь мархта сотксть инкса ашезь пеле. Кодак мусть марстонь кяль пансионатса, сяльдевок тевсь лац тусь.
Кода-бди весть кармань сюцемонза Антононь. А сон тейне и корхтай:—И аф визькс тейть юватькшнемс лангозон стакащемда? Мон тейть рьвя мунь, а тон сюцят и сюцят эсон.
А вдь, виде, тя сон мусь тейне рьвя! Мзярдовок афолень малада Наташанди и афолень содафта мархтонза. Тя Антон мусь эстеенза тядя, а тейне—кельгома ава.