Поиск по сайту: 
 

Архив
 декабрь 
 2019 
пн вт ср чт пт сб вс
      1
2345678
9101112131415
16171819202122
23242526272829
3031     
Наука и жизнь

М.Е.ЕВСЕВЬЕВОНЬ ЛЕМСА МГПИ-сь КЕМОКСТАСЫНЕ СОТКСНЕНЬ РЕСПУБЛИКАНЬ ШКОЛАТНЕНЬ МАРХТА

7 ноябрьста М.Е.Евсевьевонь лемса Мордовскяй государственнай педагогическяй институтть главнай корпусонц киноконцертнай залсонза етафтовсь «Образованияса од законодательствать вешфксонзон эшксса тонафнихнень проектнай и исследовательскяй тевонь организациянь технологиятне» лем ала семинар-совещания.
Пуромксса примасть участия пединститутть ректороц В.В.Кадакин, Мордовия Республикань образованиянь министрсь Н.В.Бычков, «НТ-МДТ» ЗАО-ть Наноэдюкатор образовательнай проектть руководителец А.А.Тихомиров, образованиять коряс муниципальнай органонь руководительхть, преподавательхть, студентт.
Мекольдень кизотнень Мордовскяй государственнай пединститутса цебярь шири полафтсь тонафнемань материально-техническяй базась. Ули тяниень пингонь эрявикс лабораторнай, программнай, мультимедийнай оборудования. Ня полафткснень вельде вузсь ерай кемокстамс соткснень школатнень мархта, штоба тевс нолдамс сай пингонь учителень анокламань од методология.
А.А.Тихомиров содафтозень пуромфнень «Тонафнихнень междисциплинарнай проектнай и исследовательскяй тевсост НАНОЭДЮКАТОР II учебно-научнай комплекс» Всероссийскяй образовательнай проектть мархта. Васенда пачфтсь нанотехнологиятнень колга, конатнень ули кода нолдамс тевс естественно-научнай содамошинь максомста. Учебно-научнай комплексти ули вешфкс школатнень эса. Тонафнихнень мархта работайхть вузонь преподавательхть, видесост иттне аноклакшнихть исследовательскяй проектт. Учительхненди етафневихть квалификациянь касфтомань курст, аноклакшневихть методологическяй од материалхт.
Москувонь, Санкт-Петербургонь вуснень эса улендихть проектонь анокламань конкурст, олимпиадат. Азф сайтс иттне кучсесазь исследованияснон. Сяськихненди ули кода касфтомс содамошиснон тя направлениять коряс Россиянь инь содаф вуснень эса. «НТ-МДТ» ЗАО-ть мархта кеме соткст кирдихть аф аньцек Россиянь, но и омба масторонь кой-кона странань образовательнай учреждениятне. Эряви азомс, М.Е.Евсевьевонь лемса МГПИ-сь рамась тяфтама комплекс и работай сяда тов эряфс етафтоманц лангса. «Универсал» инновационнай емла предприятиясь вяти марстонь работа МГПИ-ть мархта «7-9 классонь физикать коряс виртуальнай лабораторнай тефне» проектть лангса, конань мархта пуромфнень содафтозе аноклаец—В.Д.Чегерев.
МГПИ-ть видеса Академиянь емла школать колга азондсь од руководителец М.В.Лапшина.
Научнай работать коряс проректорсь Т.И.Шукшина казезень Благодарностьса ся районнай образованиянь управлениянь руководительхнень, конат кирдихть кеме соткст пединститутть мархта.
А.ВОЛГАПОВА.

14.11.2013 №45

Новости

ЭСОНЗА АФ МАДОНДЫ ТОЛКС ЮРНАЙ МИНЦЕННЕТИ КЕЛЬГОМАСЬ

 
Родной кялень кельги, национальнай коень-обуцянь ванфты, афкуксонь патриот. Тянь ули кода азомс Мордовиянь Инсарскяй райононь Пою велеса шачф-касф мокшавать Анастасия Афанасьевна Шумкинать (Акшаевать) колга. Аф ваномок сянь лангс, што сон лама киза ни аф эряй мокшэрзянь масторса, эсонза аф мадонды толкс юрнай семботи минценнети кельгомась. Мзярда корхнень Анастасия Афанасьевнань мархта, тя шарьхкодевсь эстокиге. А ушедозе азондомать аф эсь колганза, а ёмла родинанц эзда.

 

Уликс легендать мяльс сявозь, атянзон атясна эрясть оцю губор лангса, конань лемоцоль Ош панда ляй, кона кафта ширде шарфоль вирьхнень мархта, а нинге кафта ширде ульсть сери крутоярхт, конатнень ала шудесь Исса ляйсь. Пингонь ётазь карафне ушедсть пяярема и ляйсь полафтозе ведень шудема вастонц, вов эста родонь плямась сась мяльс ётамс эряма такор вастти, коса ульсь кода касфнемс козя урожай, а Иссать трвава кассь поювонь оцю и туста вирь. Вельденза алятне шапондсть од кутт семьяснонды. Тяфта и эвондась велеть лемоц—Пою.

 

Школаса тонафнемстонза Анастасия сидеста ванондсь раскопкатнень мельге, конатнень Ош панда ляйса ётафнезь Мордовскяй госуниверситетонь студенттне и преподавательхне. Синь мушендсть сёвонень кядьгонь пакшт, трудонь кевонь орудият, налонь пет, авань мазоптомат, монетат и лама мезе лия. Кунардонь эряма вастста ламоц муфкснень ули кода няемс Саранск ошса Краеведческяй музейса, улихть синь и велень школань музейса.

 

24.10.2019   № 42
 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин