Тейнек пачфнихть

Надежда Михайловна Морозкина—Инсарскяй аграрнай техникумонь производствань тонафнемать коряс мастер:
«КЕЛЬГСА ЛУВОНДОМС ЭСЬ КЯЛЬСА ЛИСЕНДИ ГАЗЕТАНЬКОНЬ»
Мон шачень Инсарскяй райононь Мокшень Паёвка велеса стака пинкнень. Аф пелемок сталмода, тядязень мархта алязе шачфтсть сисем итть: ниле стирнят, колма церанят. Синь тиендезь семботь, штоба касфтомс минь шумбраста-тазаста, лездсть тонафнефтемс. Синць лама покодсть совхозсонк: тядязе—дояркакс, алязе—шоферкс. Сяс тядязти, Евдокия Ильиничнанди, и алязти, Михаил Федоровиченди, тянкса азонттама оцю спасиба.
Сидеста марс аф пуромкшнетяма тядяньконь шири (алязе ни аш шиса). Но, мзярда кочксефтяма эсь шачема-касома кудсонк, эста сембе седиень лямбоньконь, пара валоньконь мархта кеняртьфнесаськ кельгома тядяньконь. А сон мяль вельде кенордай минь каванямс эсь пидефонц-паньфонц мархта. Тя пингть пяк лама лятфнетяма етаф эряфть колга, азонкшнетяма, кода молихть тячиень тевоньке. Уленди, морсетяма мокшень моротка. Тянь мархта касфнесаськ аф аньцек тядяньконь мяленц, но и минценьге.
Мокшень кяль… Сон тейне пяк кельгови, инь мала, атянь-бабань, тядянь-алянь юромстонк. Пефтома кельговихть и минь мокшень лама вайгяльса морави мороньке. Мокшень кяльса нолневи фкя и сяка мокшень газетаньке, конань мон лувондса педа-пес. «Мокшень правдать» страницанзон эзда мушендан лама лезкс кудъетконь тевонь тиемаса. Васенце страницасонза азондови кодама илат-месть етафневихть, мезе тиендеви минь Правительствасонк. Аф юксневихть и велеряйхне, синь эряфсна, тевсна. Журналисттне аф кржа серматкшнихть минь Инсарскяй райононьконь колга. А кодама мазыхть минь мокшень стиреньке и аваньке, синь щамсна! Аграрнай техникумсонк васенда етафнень урокт «История культуры мордовского края». Иттне пяк мяль вельде сотцезь, кодамоль мокшетнень культурасна кунардонь пинкнень, кода сон полафтсь, козякодсь тяни. Няфнине и минь, мокшаваньконь щамснон. А тяни мон работан производствань мастеркс. Минцень ули производствати тонафнема хозяйстваньке, коса кирдевихть жуватат, улихть минцень паксяньке, конатнень соксесазь-урятцесазь тяса тонафнихне. Вдь велеть вандыень шиц, эряфонц цебярьгофтыец—нят тячиень тонафниеньке.

 

Атюрьевскяй райононь Каргоньжяй велень средняй общеобразовательнай школаса тонафнихть итть Мокшень Козловка, Потма, Сире Кушка, Бораж и нльне Темниковскяй райононь Кушка велетнень эзда. Школаса маштозь ладяф мокшень кяльть и литературать вятемац. Тя тевть тиендьсазь педагогическяй трудонь ветеранць Е.Ф.Маланкина, од учительсь С.Г.Кимяева. Ширеснон кирдьсазь школань директорсь В.И.Гераськин, завучне Н.Н.Гераськина, Е.Ф.Мылкина. Школаса пяк лама «Мокшень правда» газетань серматфнида, морафнида.
—«Мокшень правда» серматфнян нильгемоньшка киза,—азозе Е.Ф.Маланкина.—Ушедонь морафнемонза студенткакс и тячить самс сон инь кельгома газетазе.
Аф стак аф кунара тя школаса етафтовсь оцю ила, коза инжикс терневсь «Мокшень правда» газетать эсь корреспондентоц И.П.Вешкин. Корхтамась мольсь газетати серматфтомать колга. Иттнень и учительхнень ламоль кизефкстост, конатнень лангс журналистсь отвечась пара мяльса. Лама корхтавсь и сянь квалма, кода тиендеви эсь кяльсонк газетась. Иттне лувсть газетаста стихт. Учительхне Е.Ф.Маланкина, Е.Ф.Мылкина, Н.Н.Гераськина, С.Г.Кимяева, Т.В.Пронина, Е.В.Пятина путозь И.Вешкинонь «Содай Марясь», «Весяла каникулат» пеетьксонзон коряс сценкатнень.
—Азса сембонь лемста, што газетась мялезонк. Серматфнеськ и серматфнесаськ пара мяльса,—мярьгсь завучсь Н.Н.Гераськина.

 

Мария Павловна Потапова эряй Торбеевскяй райононь Дракина велеса. Теенза 82 киза. Озай эряфкшусь кудонц инголе скомнянять лангс и ванонды, кода налхксихть ульцяса шабатне, лятфнесы эсь идькс пингонц. Аф сембе тястонь эряйхне содасазь, што М.П.Потапова—Великай Отечественнай войнань кизотнень тылонь тружениколь, казьф медальса. Васенда трактористкаль. Мирдец фронтса связистоль.
Иван Потапов шумордазе школать, а сяльде ялганзон мархта ушедсь тонафнема трактористокс. Армияв сявозь 1941 кизоня. Казаньца етась связистонь курст. Сяльде кучезь Смоленскяй 88 стрелковай дивизияв. Примась участия ламоц тюрематнень эса, панезе врагть ошнень и велетнень эзда.
Связисттне суткань дежурясть телефонть ваксса, менельста лангозост фашистскяй самолеттне ерясть бомбат. Зенитчикне синь васьфнезь толса. Связистсь Иван Потапов кочксесь сведеният немецонь толонь точкатнень колга. Тя тевса ламоц ялганза шавовсть. Орловско-Курскяй дугаса фкя велеса мольсь тюрема. Связсь сязевсь. Николай Годунов и Иван Потапов тусть петемонза. Н.Годуновсь повсь минать лангс, кона сязевсь. И.Потапов музе проводть и проволкаса и аф саты васт-тнень эса автоматть кшнинц мархта пейса «сускозе» сонь. Связсь ушедсь работама. Тя подвигть инкса казьфоль Славань III степенень орденца. Хуш войнась шумордавсь 1945-це кизоня, И.Потапов мрдась велезонза аньцек 1947-це кизоня. Комсь кизода ламос работась механизаторкс колхозса. Рьванц, Мария Павловнань мархта, касфтсть вете итть, конатнень тяни синцень семьясна.

 

Вов ни комозьда лама киза аш велеряйхнень еткса Советскяй Союзонь Геройсь Михаил Тихонович Антясов. Михаил Тихонович шачсь и кассь Кадошкинскяй райононь Алякс велеса, коса етасть сонь идькс пингонь кизонза. А мзярда кассь, тусь работама Моску ошу. Тоса и сатозе войнась. Пцтай вете кизот ульсь фронтса. Лама фронтовой ялга юмафтсь тя пингста.
1945 кизоня омбоце Белорусскяй фронтсь пачкодсь Одер ляйть малас. Седсь срафтфоль-калафтфоль. Солдаттне кармасть етнема понтон лангса. Ляйсь лаказь лакась, сяка-тев сязендевсть снаряттне. Но, аф ваномок тянь лангс, Михаил Тихонович ялганзон мархта етафнезь солдаттнень тона бяряку. Шавфтольхть сембе ялганза. Тя пингть лиссь стройста фкя понтонць. Антясов комотсь кельме ведти, уйсь понтонть малас и петезе сонь. Солдаттне етасть ляйть туркс и тусть атакас немецнень каршес.
Мокшень алясь ульсь смелай солдатокс, мужественнайкс. Тя подвигть инкса максфоль теенза Советскяй Союзонь Герой лем. Казнеть алу путозе кяденц омбоце Белорусскяй фронтонь командующайсь К.К.Рокоссовский.
И вов сась Сяськомань шись. 1945-це кизоня Михаил Тихонович мрдась эсь шачема велезонза и кода сембе велеряйхне ушедсь работама колхозса. Лама киза трудендась МТФ-са плотникокс.
Етай веконь 1960-це кизоня Антясовонь мархта лиссь зиян. Тялонда палсь кудоц. Алясь мольсь колхознай баярхненди лезксонкса. Но баярхне шарфтсть теенза копорь пяльде. Тя пингть сась вели инжикс ичкоздень раднясна, кона эрясь Моску ошса. Тердезе Михаил Тихоновичень ширезонза. Нюрьхкяня пингта меле вярдень оцюнятнень лезксснон вельде Антясовонь кизефксоц решандафоль.
Сась тундась. Колхозсь ушедсь строяма кирпичнай од куд. Тя кудса сон касфтсь кота шабат. Пенсияс тумдонза меле калмазе рьванц. Алясь лядсь шава куду ськамонза. Стирец, кона эрясь Ковылкинскяй райононь Мокшень Коламаз велеса, сявозе алянц эсь ширезонза. Тоса сон эрязень лядыкс кизонзон.
Но велеса сонь ашезь юкста. Предпринимательсь Григорий Григорьевич Палаев и велень учительсь Семен Михайлович Кулясов (кона тяни аш шиса ни) кармасть заботендама, штоба полафтолезь ульцять лемонц. Тяни ся ульцясь, коса шачсь Михаил Тихонович Антясов, лемтьф сонь лемсонза. Велеряенза маряйхть гордость землякснон инкса. И ули мезенкса.

ЭРЯМОК ШИРЕСА, АФ ЮКСНЕСАЗЬ ЮРСНОН
Пара, што улихть мокшень ломатть, конат эрямок ичкозе родной уженяснон эзда, старандайхть ванфтомс и эреклафтомс национальнай культурать. Светлана Никушина кассь тяфтама семьяса, коса мокшэрзянь койхне-обуцятне васенце вастсот. Шачемас коре Света Татарстанонь Киртели мокшень велень. Вете кизода инголе поступась тонафнема Саранск ошу. Кочказе Н.П.Огаревонь лемса Мордовскяй государственнай университетонь филологическяй факультетть. Стирсь лац содасы мокшень кяльть.
—Шачень-касонь Татарстан Республикаса, Тетюшскяй райононь Киртели велеса,—мярьгсь Никушинась.—Тядязе вов ни колмогемонь киза работай дояркакс, а алязе—тракторист. Школаса васенда тонафнине татаронь кяльть, сяс мес сон обязательнай национальнай кяль. Но мон содайне, што роднойсь тейне мокшеннесь и оцю мялезель тонафнемс мокшень кяльть и литературать. Кенярдемазти ашель пе, мзярда школань директорть О.Д.Никушинать лезксонц вельде тонафнемань программати сувафтфтольхть мокшень кялень и литературань урокт. Синь етафневсть мялень салайста, старандань аф нолдамс фкявок занятия. Тонафнихне аноклакшнесть панжада урокт, мероприятият мокшень кяльса, арьсекшневсть налхксемат мокшэрзянь сире койхнень-обуцятнень мяльса кирдезь.
Тяда башка, школаньконь видеса пуроптф «Пайгоня» кштимань ансамбль, коса участвондань монга. Тяни лятфнян ся пингть колга, мзярда няфнеськ маштомошиньконь районца. «Лаймоня» ансамблень участникне морсихть морот мокшень кяльса. Школаса тонафнемстон ня коллектифне содафтомазь мокшэрзянь культурать мархта.
—Мес тонафнема вастонди кочкайть Н.П.Огаревонь лемса Мордовскяй госуниверситетть?
—Идькс пингстокиге башка мяль шарфнян кялень тонафнемати, кельгса книгань морафтомазень. Старандан ванфтомс и эреклафтомс эсь родной кялезень, национальнай культурать. Содайне, што сяда крхкаста тонафнемс мокшень кяльть ули кода аньцек Мордовияса. Ламос ашень арьсекшне профессиязень кочкамстовок. Мялезе аф аньцек ванфтомс мокшэрзянь культурать, но и тонафтомс иттнень шачема-касома уженять, тядянь-алянь родной кяльть кельгома. Сяс поступань Н.П.Огаревонь лемса Мордовскяй государственнай университетонь филологическяй факультету, кочкайне национальнай отделениять. Тяни ветеце курсонь студентан. Аф каендан, мес сань тяза содамошинь касфнема. Рузонь и мокшень кяльда башка тонафнеса финскяй кяльть. Пяк цебярьхть преподавательхне. Синь вете кизот лезнесть тейнек арамс оцю квалификациянь мокшень кялень и литературань учителькс.
—Света, эрямок ширеса, ванфневихть семьяса мокшэрзянь койхне-обуцятне?
—Эрямок ичкозе Мордовиять эзда, сире койхнень-обуцятнень аф юкснесаськ. Васендакиге старандатама ванфтомс мокшень кяльть. Семьяса фкя-фкянь мархта корхнетяма родной кяльса. Спасиба тядязти и алязти, што тонафтомазь минценнеть кельгома.
—Университетть шумордамда меле ули-аш мяльце сяда тов сотомс эряфцень мокшэрзянь крайть мархта?
—Тянь квалма кунара арьсян и сань мяльс, што Саранскяйсь вете кизоста арась тейне родной ошекс. Лама ялгадон, конат лезнихть аф теждя пингоня. Няеви, што Мордовияса диаспорати шарфневи башка мяль. Надиян, што Саранскяйса муян работа специальностьс коре. А кода лиси—эряфсь няфтьсы.
—Спасиба!