Ольга Данилова: «МОКШЭРЗЯННЕСЬ—ТЯ МОНЬ ЭРЯФОЗЕ!»

Ольга Данилова шачемас коре Инсарскяй райононь Кочетовка велень. Кассь стирнясь мокшень велеса, сяс теенза сембе минценнесь, национальнайсь пяк мала. Ольга серматкшни стихт, школаса тонафнемста морсесь «Ляйня» ансамбльса. Фалу примси участия од писателень семинарса. Родной кяльти кельгомась Ольгань эса, можна мярьгомс, шачсь мархтонза. Стихт мокшень кяльса ушедсь серматкшнема ветеце класса. Тянди лездсь и мокшень кялень и литературань олимпиадаса участвондамась. Кизоста кизос Ольгань виенза стихонь сермадомаса коль кемокснихть.
Тяни Ольга тонафни Н.П. Огаревонь лемса Мордовскяй государственнай университетса филологическяй факультетса. Кочказе «Журналистика» специальностть. Но тяда башка, работай «Вайгель» радиостанцияса. Кода стирсь кенерькшни сембе вастова, азондови алува.
—Ольга, кодама васта занци национальнайсь тонь эряфсот?
—Национальнайсь—тя монь эряфозе. Шачень мокшень велеса, тядяне-аляне, атяне-бабане, акане-сазорне сембе мокшет. Эсон шуди афкуксонь мокшень ломанень вер. Касонь сядонгольдень мокшетнень эряфснон колга кулендезь. Кельгса щавазень ширеса улендемазень. Сон азонкшни тейне одонь кизонзон квалма: кода эрясть ся пинкнень, мезе пицесть, кода етнесть шисна-весна и стак тов. А инь пяк сон кельгсы эстонь койхнень-обуцятнень колга азондоманц. Сяс идькс пингста сявомок мялямозон лядсть азксне нюрямонь мороста сявомок мокшень свадьбати молемс. Но азкссь тя азкс, а вов васенцеда эсь сельмосон семботь тянь няине «Мокшаваня» Коцятовонь хорть концертстонза. Эста содафтонь мокшень щапнень-каряпнень мархта, кулине кайги моротнень, сиде моронятнень, няине мялень салай мокшень кштиматнень. Содайне, кода атяньконь-атясна якасть рьвянянь ладяма. Эста и сань мяльс, што сяда тов карман ванфтома сянь, мезе тейнек кадсть атяньке-бабаньке. Койсон, васендакиге аф юмафтома-арафтома родной кяленьке. Нинге школаса тонафнемста ушедонь сермадома стихт мокшень кяльса. Печатлакшневсть синь и «Мокша» журналса, и «Мокшень правдаса».
—Мезе азат «Вайгель» радиостанцияса работацень колга?
—Кода ни азыне, путнесайне сембе вийнень, штоба аф юмафтомс-арафтомс национальнай культурать. Радиостанцияса работамась, тя нинге фкя аськолкс мокшэрзяннеть ванфтомати. Ламоц сюжетоне сотфт мокшетнень культураснон мархта. Работан тоса аф кунара, сяс сатома тейне лама. Тейне пяк лезни коллективсь. Практикаса тонафнесамазь радио-журналистонь тевти.
—Ольга, кодамот мяльхне-арьсематне сай пингонди?
—Васенда эряви шумордамс тонафнемазень. И сяда тов стихонь сермадомазень аф кадса.
—Лятфтак, инь кельговикс стихцень?
—Тя «Коса эряй павазсь?»
Коса эряй павазсь? Пади, панда пряса?
Эженди шить
каршеса, пефтома ризнай,
Сяс мес тялоть
песта шись аф эжди тяса,
Да и кивок инжикска
теенза аф сай.
Коса эряй павазсь?
Порать уженяса?
Куценди и шить-веть
келунятнень лангс.
Сембось тоса няеви
шуфтонятнень пряса,
Вов и фалу весяла
вирень павазсь сянкса.
Лямбе кизонь пиземса,
 аньцек пидеф кшиса,
Тядянь валда ванфса,
 седисонза сонь,
Кизонь, тялонь,
сексень, валда тундань шиса,
Эряй и аф пичеди
павазозе монь!
—Спасиба!