Госсобранияса

Сессияса республикань прокурорсь В.М.Мачинский пачфтсь Мордовияса законностть состояниянц лангс. Сон азозе, што сяда тов тянь ширде работать мольфтемста васень мяльсь шарфтови ульцяса преступностть, коррупциять, экономическяй нарушениятнень каршес тюремати, бюджетнай средстватнень карьхцямаснон мельге контрольти.
Тя кизефксть коряс корхтамста Мордовия Республикань Оцюнясь В.Д.Волков шарфтсь мяль преступлениянь статистикать лангс. Мордовияса преступлениянь лувкссь общероссийскяй показательхнень коряс сяда емла 30 процентта, а ПФО-ть коряс—25 процентта. Граждаттне кармасть сяда надияма, сяда оцю доверия макссема правоохранительнай оргаттненди. Тянь колга корхтайхть и регистрировандаф пшкядематне.
—Преступлениянь тиеманкса наказамась,—мярьгсь В.Д.Волков,—должен арамс нормакс, аньцек эста правоохранительнай, лия государственнай оргаттне могут обеспечендамс нормальнай, сетьме эряф республикаса сембе эряйхненди, конатнень аш конфликтсна законть мархта.
Кода содаф, мекольдень пингть республиказонк сашенды лама финансовай средства. И синь должетт молемс и пачкотькшнемс ся проекттнень эряфс етафтомаснонды, конат арьсефт,—азфоль сессияса. Эряви тиемс семботь сянкса, штоба бюджетнай фкявок цалковай афоль тушенда шири. Тя тевса оцю рольсна правоохранительнай оргаттнень. Но тя задачась и государственнай, и муниципальнай оргаттнень, Финансонь министерствать, сембе депутатнень.
Бюджетнай средстватнень целевойста тевс нолямаснонды шарфтсь мяль сессияса республикань Правительствать Председателенц заместителец—финансонь министрсь А.Ю.Симонов. Сон азсь кой-кодама полафткст «2014 кизонди и плановай 2015-2016 кизотненди Мордовия Республикань бюджетть колга» МР-нь Законти. Министрсь пара мяльса лятфтазе, што финансовай од кизось ушедсь удалафста. Тяфта, январьста республикать бюджетс поступась 1,6 миллиард цалковай налоговай и аф налоговай доход, мезсь 29 процентта сяда лама 2013 кизонь январть коряс. Февральста эсь доходоньке ламолгодсь мелянь тяка пингть коряс 13 процентта. Тяда башка, 924 миллион цалковайда касфтф РФ-нь Правительствать решениянц коряс Мордовиять бюджетонц федеральнай пяльксоц.
Депутаттне сессияса примасть обращения Россиянь Государственнай Думати, коса мяльсь шарфневи уроз иттнень эряма вастса обеспечендамаснон коряс федеральнай программань анокламати и примамати.

 

МУШЕНДОМС МАРСТОНЬ КЯЛЬ
4 мартста Саранскяйса Мордовия Республикань Государственнай Собраниять Председателец В.В.Чибиркин васетькшнесь МР-нь региональнай отделениянь политическяй партиянь представительхнень мархта. Пуромксса примасть участия МР-ть эзга РФ-нь Юстициянь министерствань управлениять начальникоц Ф.П.Девятаев, МР-нь Центральнай избирательнай комиссиять председателенц заместителец А.С.Калинин, МР-нь Общественнай палатань представительхть, республиканскяй партиянь лидерхт.
Мордовия Республикаса регистрировандаф 37 политическяй партия. Кафттне сувсихть МР-нь Государственнай Собраниять составс. Нят «Единая Россия» и «Коммунистическая партия РФ» партиятне. 20-ти сувси эрь партияса лувондови аф кемоньда лама ломань. Сяс теест сави тиемс оцю работа.
В.В.Чибиркин башка мяль шарфтсь сянди, штоба Мордовияса политическяй процессонь сембе участникне мушендольхть марстонь кяль.
—Политическяй сембе партиятнень аф фкя лацоннет мяльсна-арьсемасна сянь коряс, кода ладяма государствась, кодама властень система тиема. Но Мордовиянь политическяй сембе партиятнень фкя и сяка марстонь цельсна: тиемс странаньконь, республиканьконь и граждаттнень эряфснон сяда цебярькс,—мярьгсь МР-нь Государственнай Собраниять Председателец.
МР-ть эзга РФ-нь Юстициянь министерствань управлениять начальникоц Ф.П.Девятаев пачфтсь пуромфненди нормативнай базать колга, конань коряс латцеви партиятнень работасна. Тяда башка, корхтафоль ся стакатнень-сталмотнень колга, конат васьфневихть партиянь регистрировандамста.

Л.РЕЗОВА.

 

Правительстваса
АФ ЛЯТКШНЕМС ЛАДЯФ ГРАФИКТЬ ЭЗДА
Мордовия Республикань Правительствать очередной заседанияса, кона етась 3-це мартста, ванондовсть республикать эряфонц и социально-экономическяй ширде вииякшнеманц мархта сотф кизефксне. Заседаниять вятезе Правительствать Председателец В.Ф.Сушков.
Оцю корхтама пуромксса мольфтевсь эряма вастонь строямать колга. Башка мяль шарфтфоль ташта и аварийнай эряма вастста граждаттнень етафтомаснонды. МР-нь Правительствать Председателец В.Ф.Сушков азозе, што аварийнай эряма вастста ётайхненди кудонь строямась мольфтеви аф кода, фталу ляткшневи ладяф графикть эзда. Тядде эряви аф аньцек шумордамс 2013 кизонь программать, но и строямс нинге 41 куд. Ужяленди, тячити 41 стройплощадкатнень эзда работась мольфтеви аньцек 25-са.
Сяда эреклафтомат тефне уроз иттненди эряма вастонь анокламать коряс, азфоль заседанияса. В.Ф.Сушков мярьгсь эрь районца тиемс-анокламс бюджетнай заказ лама квартирань кудонь строямс, коса квартират получайхть сембе категориянь граждаттне. Тянкса инголькиге содама, кинди сембодонга эряви эряма вастсь, аноклама проектно-сметнай документация.
Заседанияса стане жа ванфтольхть и лия эрявикс кизефкст.