Историческяй наукань докторсь, Россиянь Писателень союзонь членць, профессорсь Н.Ф.Мокшин:

—Николай Фёдорович, кода минь содасаськ, тон улеть делегатокс мокшэрзянь народонь тяда ингольдень сембе съезттнень эса. И ламотне синь решенияснон эзда тяфта жа етасть тонь кядялгат. Сяс азонтк: сембе ли ня решениятнень эзда тя пингс етафтовсть эряфс стане, кода эряволь? И мезе тон, кода мокшэрзянь содаф учёнай и общественнай деятель, учсят Мокшэрзянь народонь Всероссийскяй VI-це съездть эзда?
—Ся пингста, мзярда ётафтовсь Мокшэрзянь народонь Всероссийскяй I-це съездсь, етась ни 20-да лама киза. Тя пингста пяк полафтсь странась, коса минь эрятама. Тяфта жа ашесть аще фкя вастса процессне, конат мольсть странань этноснень еткса. И синь ульсть аф фкя лацоннет.
Мярьктяма, Советскяй Союзть срадомда-каладомда меле аф сембе ванцть тя процессть лангс фкя лаца. Финцне тя пингс лувсазь тя историческяй процессть трагедиякс. Омбонцнень мяльснон коряс, Советскяй Союзть срадоманц-каладоманц мархта етафтовсь эряфс В.И.Ленинонь национальнай политикац. Кле, ульсь фкя страна, а арась 15 государства. И сембе синь эряйхть тя пингс.
Сяс Мокшэрзянь народонь тяда ингольдень съезттнень решенияснон пяшкодемаснон колга корхтамстовок можна азомс и кулемс лама аф фкя лацонь мяльда. Монь койсон, катк, пади, аф сембе съездонь решениятне педа-пес етафтовсть эряфс, но синь эсь позитивнай путксснон вельде виияфтозь минь народоньконь национальнай культуранц, кялензон и национальнай самосознаниянц. Тяда башка, съездонь решениятне, конат етафтовсть эряфс, няевиста кемокстазь ялгаксшинь соткснень нароттнень еткса кода Мордовияса, стане и Россиянь лия регионца, коса компактнайста эряйхть мокшэрзят.
Сяс мон надиян: Мокшэрзянь народонь Всероссийскяй VI-це съездсовок примавихть стама решеният, конат пяшкодемдост меле кандыхть лама цебярьда и мокшэрзянь, и Россиянь лия нароттненди!
—Всероссийскяй VI-це съездса тяддень 23-24 октябрьста делегаттне кармайхть корхтама минь народоньконь национальнай культуранц, самосознаниянц, кялензон… касфтомаснон и виияфтомаснон колга.
А мезень квалма кармат корхтама тон?
—Кда съездонь делегаттне максыхть тейне вал, мон карман корхтама мокшэрзянь фкя народонь колга. Тяфтама народ ули. И сонь колганза сермадсть нинге античнай историкне. Сяс ули кода азомс: мокшэрзянь народсь сувси Россиянь инь кунардонь пингонь этноснень лувксс!
Мокшэрзянь фкя народонь колга съездса мон карман корхтама нинге сяс, мес миньцонк, Мордовияса, кой-кит корхтайхть и сермадыхть: кле, кодамовок мокшэрзянь народ аш. А улихть, кле, мокшень и эрзянь наротт.
Но тя ефси аф тяфта. И съездса эсь мялезень мокшэрзянь фкя народть колга мон кемокстаса научнай аргументса и историческяй фактса.
—Николай Фёдорович, кодамкс тон няйсайть мокшэрзянь народть тячиень и сай пингонзон?
—Ефси аф кунара минь етафтоськ мокшэрзянь народть 1000 кизонь иланц. Тя концепциясь монь, хуш лангсонза покодсть лия ученайхтьке и мянь целай институтт.  И минь сонь вельденза марстонь вийса няфтеськ мокшэрзянь народть оцюдонга оцю путксонц Российскяй государствать тиеманцты, касфтоманцты и вииялгофтоманцты. Сяс тячи тейнек ули кода азомс: мокшэрзянь народсь—тя государствообразующай народ. И тя концепциясь, монь койсон, сувай тя пингонь Россиянь историянь сембе учебникненди!
Сяс, монь койсон, мокшэрзянь народсь сай пингстовок сувафтсы эсь няевикс путксонц Российскяй государствать историяс.
—Мекольце кизефкссь. Съездса кодама мяль сембода пяк ералеть кулемс лия делегаттнень ширде?
—Сембе вийса ванфтомс мокшэрзянь фкя народть. И кеподемс од серьс сонь национальнай самосознаниянц, кялензон и культуранц. Сяс мес инксонк тянь кивок аф тисы!
—Спасиба, Николай Фёдорович.

В.НЕСТЕРОВ.