https://mokshapr.ru
10.06.2022
 |
Архив | |
| апрель | ||||||
|---|---|---|---|---|---|---|
| 2024 | ||||||
| пн | вт | ср | чт | пт | сб | вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | |||||
 |
|
ПИДЕСТЬ-ПАНЦТЬ ТАНЦТИ ЯРХЦАМБЯЛЬМокшэрзянь национальнай ярхцамбяльть колга корхтамста эстокиге лядихть мялезт суронь пачатне, шову позась, пуштф алхне, ямсь и стак тов.
Сембонь тянь кудазораватне пицезь-панцезь пянакудса. Тячи, кода няйсаськ, эрямань-ащемань обуцятне полафтсть. Шуроста велень эряйхнень кудса няят пянакуд, а кда ни ули, ушнесазь сонь аф сидеста. Аф ваномок тянь лангс, национальнай кухняти тячивок шарфневи башка мяль. Сидеста Мордовияв сашендыхть ломатть Россиянь лия региоттнень эзда, омба масторста. И ся, кинь ули мялец содафтомс народоньконь культуранц мархта, эрямань-ащемань коензон, ёрай варжамс мокшэрзянь ярхцамбяльть. Коса тя удалай тиемс? Саранскяйса улихть ресторатт, конатнень эса шарфтови башка мяль национальнай кухняти. Шарьхкотьф, што пидефсь-паньфсь тоса—аф пянакудста таргаф. Лия тевсь, кда ширде сафсь пови вели, коса ули этнографическяй музей. Кепотьксонди, Сире Теризморгав. Тоса ни афкукс ули кода варжамс мокшень суронь пачатнень, шову позать, пуштф алхнень, ямть и стак тов. Эряви азомс сявок, што мокшэрзянь ярхцамбялень аноклайхть улихть тячивок, кода сяда эряфкшуфнень, стане и сиретнень ёткса.
Кунаркиге мокшэрзятне пицесть-панцесть ся продуктатнень эзда, конат ульсть хозяйствасост. Тячивок велетнень эса мокшаватне панцихть копшат. Шапаксть аноклакшнесазь тяфта жа, кода и кшити тозеронь и розень почфста. Иланди аф шуроста пицихть суроста, тозеронь почфста пачат. Кой-конатнень тяниень пингтьке лисендихть эчконяста. А ярхцайхть пачада лофца мархта. Лофцть колга эряви азомс башка. Кинь ули траксоц, сявац, сянь шра лангса—лофца. А лофцть эзда ули кода тиемс сыр, вай, мичке и шапама лофца.
Кунардонь мокшэрзянь симомбялькс лувондови позась. Мялень салай ся, што мокшетне тунда ётафнельхть обряд, кона лемневсь авань поза. Мокшаватне кочксевольхть оцю кудс, каннельхть мархтост алхт, кши, пачат, почфт позань тиемс. Мзярда сон ульсь анок, симнелезь фкя-фкянь, и корхнесть цебярь урожайть шачеманц колга. Аделсевсь сембось тяфта: лихнелезь позань тиема кудста симомбяльда пяшкотьф кядьготь и каннелезь кудс, коса сай кизоть ули ётафтф тяка жа ритуалсь. Позать анокламац—тевсь стакатнень эзда. Тиенделезь сонь розень почфста, а сяльде якстеряпсста.
Сядонголе свадьбас, илас, а тячи стак шиня ярхцамс пицихть шяняпт, селянка. Селянкась пицеви эстокиге пурхцкять или букать печкомда меле. Парной сивольть сядонголе марселезь цюгунняс, пицезь, сяльде каяльхть модамарьхть и аф лама приправа.
Башка эряви азомс пуштф алхнень колгавок. Афкукс танцтиста лисендихть пянакудса пидефне!
Нолнелезь тевс жуватань сюлотнень. Кепотьксонди, пярякань пицемс. Чистендасазь сюлотнень, пидесазь, нолдасазь мясорубкань пачк. Пидихть модамарьхть, тапасазь. Сяльде шорясазь тянь семботь, каяйхть шурьхкат. Пицевихть пярякатне ведьса. Кеденди молель тозеронь шапакссь.
Сядонголе лама ярхцамбяль пицевсь калста. Васендакиге калонь шонгарям. Эсь лацоньшикс лувондовсь ся, што ведьса пицевсть эрь-кодама кундаф калхт.
 МОКШЭРЗЯТНЕНЬ КУНАРДОНЬ МОРАМАНЬ ИНСТРУМЕНТСНАСядонголе мокшетне да эрзятне морсесть волынкаса. Тя морамань инструментть ульсь эсь лацонь ритуалоц: лувондовсь, што морамась мархтонза ванфты сельмодемать и кяжи духнень эзда.
Мокшэрзянь волынкада кафтоль. Васенцесь тиендевсь вазнянь кедьста, кожфонь уфамс трубканяста и колма вайгялень трубканяста: фкясь бурдоннай, варяняфтома, тиендевсь сон пяшеста или келуста, и колма варяня мархта кафта нюдиень. Фкя налхкомань трубканясь мольсь мелодиянди, омбоцесь—бурдоннай вайгялень нолдамс. Кой-коста морамань трубканятне тиендевсть валхневикс, штоба морсемс мархтост башка. Мокшэрзянь омбоце видонь волынкась тиендевсь букань, траксонь или тувонь фамста. Мокшэрзянь велетнень эса ульсь обуця, ломаттненди эрявсь каннемс музыканттненди волынкань тиемс жуватань фапт. Фамти тонгондовольхть кафта нюдиень трубкат, кажнайсь эздост колма варяня мархта. Кожфонь уфамс трубка ашель, сяс музыкантсь уфсезе фамть, таргамок морамань трубкатнень, и морась, мзярс сатнесь кожфсь, сяльде тага уфсезе. Сидеста волынщикне морсесть кафонест: мзярс фкясь мораль, омбоцесь уфсезе волынкань резервуарть.
Волынкасна улихть и лия финно-угорскяй нароттнень, омба масторонь странатнень эса эряйхнень. И кажнайсь эздост морай эсь лацонза.
СЯДОНГОЛЕ ПЧКАФНЕЗЬ УРМАТНЕНЬ БАНЯСА И ПЯНАКУДСА
Кунаркиге мокшэрзятне лувондозь банять фкя инь цебярь урмань пчкафтома вастокс. Баняса пчкафнелезь пукшетнень, эзняста лисьф васттнень, радикулитть, дерматиттнень, касфнелезь сяряди иттнень вийснон-эрьгаснон и стак тов. Банясь тячемс лувондови цебярь пчкафтыкс козомста, а тяфта жа сузокстомань и кой-кона лия инфекционнай урматнень эзда. Ашезь мярьгондев сявондемс баняв оцю температура мархта сярядись. Шумбрашинь кемокстамс келувонь тяльмода башка путнесть компресст, нолязь тевс ваннатнень, ингаляциять, пчкафтомань тишень отвархнень. Козть, сузокстомать ётафтомс пянакуду кайсесть путлеконь (мята), пихтань, хвоянь, лия тишень настойхть и таркселезь ваймоснон парть вельхксса. Сибирскяй мокшэрзятне саттнень, пукшень сярятьфть пингста парьсесть пихтань тяльмоса, сяряди васттненди путнесть лакафтф ведьса киртьф акша лапаз пря панчфонь (тысячелистник), мокрицань, нупонень компресст. Козть, сузокстомать, а тяфта жа ревматизмать ётафтомс нолялезь тевс панжамонь и хвоянь пси ваннатнень.
Баняса пчкафтомась—тя эсь лацонь магическяй обряд. Вов кода сон ётафневоль иттнень пчкафтомста. Ведь каннельхть колма лихтибряста, тяльмоть аноклалезь колма келуста (стирняти), тумоста (цераняти), кевнят кочксельхть колма банятнень эзда. Пчкафтомда инголе знахаркась аноклаль ведь паронди. Тянкса ведень кядьготи кайсесть кантф кевнят, конатнень вельхксса ингольс лувондсть молитва и пяконе эжнелезь. Сяльде сон кепселезе идть полканя лангс и парьселезе, а тядяц кайсель пси. Тяльмонь полафнезь тяфта тиендельхть колмоксть. Обрядта меле банять пякснелезь, штоба урмась афоль мрда идти. Баняда башка мокшэрзятне урмань ётафтомс нолязь тевс пянакудть. Эсь лацоннекс осал, путькс аф моли иттнень (худосочияса сярядихнень, народ ёткса—«пинень сиреши») пчкафнелезь Самарскяй уездса. Тянкса идть озафнелезь шуфтонь каймоть лангс и тонгондолезь пянакуду, эстокиге пидеф кшить таргамда меле. Фкя авась ульцяста вальмава кизефнелезе сянь, кие кирдьсы каймоть: «Мезе пидят?»—«Пинень сирешить».—Пидек лацкас, штоба афоль уле!». Мярьгольхть тяфта колмоксть, и колмоксть озафнелезь шабать пянакуду. Кой-кона мокшэрзянь велетнень эса пчкафнелезь пянакудса оцюфненьге. Тянкса сонь цютькада ушнелезь шужярьса или щепкаса, таркселезь кулуфнень, потмозонза атцельхть шужярь и валондолезь стенатнень, штоба лисель пар. Сувальхть пянакудть потмос и озсельхть ацаф шужярть лангс. «Сузокстомста пянакудонь парда меле симат чайда инези или медь мархта, урмась кода и ашель»,—корхнесть народса.
Урмань ётафтыкс васендакиге лувондовсь псись. Касыксонь, жуватань средстватнень тевс нолямста, мяльса кирнелезь пчкафтомань свойстваснон. Ломаттне кемасть, што ливозть мархта тушендоль урмась. Пчкафтомась мольфневсть снярс, мзярс «кирдсь» седись. Конешна, кой-кона седиень и тевлавонь урмаса сярядемста тяфтама «пси пчкафтомась» ульсь пелькс. Псиса пчкафнесть кизонь кофнень, сяс мес ливоськотф и псилготф ломанць курокста кельмофтеви. Пчкафтомань процедурада меле мярьгондевсь кой-мзяра ши лацкас (лямбоняста) щамс. Народнай медицинаса нолнелезь тевс кой-кона лихтибрянь веттнень и шинь лямботь. Рахитса сяряди иттнень мярьгондельхть сиденяста лихнемс шить алу. Кизонь мани шитнень каннелезь ляй беряку и эжнелезь ляень шуварса. Пакарень шулкфтомста, радикулитть, шуроста дерматитть пингста тевс тяфта жа нолнелезь салть, пуворть.
Материалсь аноклаф
«Мордва» энциклопедиять коряс.
|
|
НОВОСТИ | |
