«КЕЛУ» ОБЩИНАСЬ—ЯКУТИЯНЬ МОКШЕТНЕНЬ «ОМБОЦЕ КУДСНА»

Тостонь школать шумордамдонза меле поступась сон Мордовскяй республиканскяй культурань училищав «Культурно-просветительскяй работа» специальностьс коре. Училищать аделазе, но профессияс коре работа ашезь му, сяс ушедсь работама Мокшень Пишлянь школаса пионервожатайкс. Етай веконь 90-це кизотне стакатольхть марнек странати, ломаттне, повомок сокращенияс, лядондсть работафтома. Тя лиссь и Людмила Матвеевнань мархта. Ся пингть Якутияса эрясть ни Людмилань колма аканза-сазоронза. Синь и тердезь сонь эряма Севернай полушарияв. 1996 кизоста сявомок Людмила Матвеевна работай Мирнинскяй райононь Культурань управленияса. Тяни сон Методическяй работань и культурно-массовай проектонь отделонь руководитель, сяс башка васта тевсонза занцихть национальнай кизефксне. Работац мялезонзоль, но Людмила Матвеевна коль сяда сидеста арьсекшнесь пуроптомс марс Мирный ошса эряй мокшетнень и эрзятнень. И вов тя сатовсь. 2009 кизонь ноябрьста Мирнинскяй районца панчфоль «Келу» мокшэрзянь общинась. Тостонь мокшетне и эрзятне путсть инголест цель—ванфтомс мокшень кяльть, койхнень-обуцятнень, этническяй ширеть и няфтемс Севернай полушарияса эряйхненди, кит стапт мокшетне и эрзятне, пачфтемс седиезост и ваймозост мороньконь мазышиснон, содафтомс синь культураньконь мархта. Общинать видеса эвондась «Келу» ансамбль. Кой-кона щапнень участницатне стафтозь ательеса, а мокшавань кунардонь пингонь панархнень Л.М.Евланенкова ускфтозень шачема ширестонза—Мокшень Пишляста. «Лийфтезень», сяс мес пачфтьфтольхть панархне самолетса.
Кода азозе Людмила Матвеевна, аф кржа мокшэрзяда эряй Мирнинскяй райононь Айхал велеса. Ламотнень мархта удалась ладямс соткст.
Аф кунара Мирный ошса етафтовсь «Калейдоскоп культур-2014» од ломанень фестивальсь, конань эса примасть участия Саха Республикань (Якутиянь) Мирнинскяй райононь народонь Ассамблеять Мирнинскяй отделениянц национальнай общинанзон представительсна, од ломаттне—студенттне и волонтерхне.
Эрь командати эрявсь анокламс помещения и мазоптомс сонь национальнай койхнень-обуцятнень мяльса кирдезь, декоративно-прикладной творчествань выставка, кона сембе ширде няфтелезе тя или тона народть коензон-обуцянзон, культуранц, анокламс национальнай щамонь-карямонь презентация, пидемс-панемс национальнай ярхцамбяльхть, няфтемс творческяй номер и командать народностенц культуранц квалма информационнай презентация.
Сембоц фестивальса примась участия кефкие команда: якутонь, татаронь-башкиронь, бурятонь, киргизонь-казахонь, славянонь, мокшэрзянь, таджиконь и лиятне.
Мокшэрзянь командати кураторкс ульсь Людмила Матвеевна Евланенкова, кона, виень аф ужяльдезь, аноклась тя пялькстомати. Работась Мокшетнень и эрзятнень поделкань, сюреса сермадомань, кодамань выставкасна. Инжихне каваняфтольхть национальнай ярхцамбяльса. Командась азондсь Мордовиять колга, национальнай щамоньконь квалма. Меколи «Келу» общинась кеняртьфтезень сембонь мазы мороньконь мархта.
Мзярда аноклавсь тя материалсь, Людмила Матвеевна азозе, што синь аноклайхть «Ысыах» национальнай праздникти, кона ули июнть песта.
Л.М.Евланенковать валонзон коряс, «Келу» общинаса башка мяль занци историческяй ширесь, сяс мокшетне и эрзятне кирдихть кеме соткст шачема-касома ширеть мархта. Сидеста гайфнихть Мордовияса эряй ялгаснонды и радняснонды, конат фалу анокт лездомс и валса, и тевса. Кепотьксонди, весть эрявкстсть мокшень ефкст—«Келу» общинась сась мяльс няфтемс сценка. А коста сяват Мирный ошса тяфтама книгат? Людмила Матвеевна эстокиге интернетть вельде пачфтезе эняльдеманц Мордовияв ялганзонды. И синь ашесть атказа—омбоце шиня ефксне кучфтольхть электроннай почтазонза.
Васенцеда «Келуть» квалма «Мокшень правдаса» пачфнеме 2012 кизонь январьста. Несколька газета удалась кучемс Севернай полушарияв—Мирный ошу. Тостонь мокшетне пяк кенярдсть, няемок эсь кяльсонк лисенди изданиять. Афкуксонь праздникокс арась «Мокшень правдать» мархта васедемась! Мордовияса сашендови улендемс шуроста—несколька кизоти весть, сяс теест бта эсь ломаньцнон мархта удалась корхнемс.
Ужяль, кле, што кядезонк мокшень кяльса лисенди изданиятне пачкотькшнихть аф сидеста, но газетань или журналонь эрь номерсь арси питни казнекс.