МОКШЭРЗЯНЬ СПЕКТАКЛЬСЬ НЯФТЬФОЛЬ ПОВОЛЖЬЯНЬ ТЕАТРАНЬ ВАСЕНЦЕ ФЕСТИВАЛЬСА

Ня шитнень Национальнай театрась моли Атюрьевскяй, Старошайговскяй и Ичалковскяй райоттненди. Васенце кафта аймакнень эса арьсеви няфтемс мокшень кяльса Валентина Мишанинать «Толмар» пьесанц коряс путф спектакльсь.
Но тяддень фкя инь мяляфтови и оцю пуромксокс актерхненди арась Поволжьянь театрань Васенце фестивальсь, кона етафтовсь 10-16 июньцта Оренбург ошса. Театральнай искусствань илась пуроптозень Саранскяень, Ульяновскяень, Самарань, Саратовонь, Оренбургонь, Нижняй Новгородонь, Ульяновскяень, Чебоксаронь, Пензань, Уфань, Казанень, Йошкар-Олань, Кудымкаронь инь цебярь коллектифнень. Фестивалень ошть колма театрань сцена лангстонза няфтевсть спектакльхть национальнай кота кяльса—эрзянь, чувашень, коми-пермяконь, татаронь, маринь и башкиронь.
Фестивальть панжезе «ET CETERA» московскяй театрась Уильям Шекспиронь «Буря» пьесанц коряс путф спектакльса. Столицань инжихне ся шитнень вчек етафтсть эряфс «Оцю гастрольхть. 2014—театральнай кизось» од федеральнай проектть эса.
13 июньцта М.Файзинь лемса Оренбургскяй татарскяй драматическяй театрать сценас лисендсть Мордовиянь актерхне. Ксения Петровать «Ташта койса» пьесанц коряс путф спектакльть ванома кочкавсь пяшксе зал.  Кой-кит сашендсть национальнай щамса-карямса. Омбоце шиня спектакльсь няфтьфоль Севернай районца.
«Сюконямань валхт эряви азомс «Мокшэрзянь культурнай центра» Оренбургскяй общественнай организациять вятиенцты Михаил Дмитриевич Кузьминонди,—мярьгсь Национальнай театрань директорть тевонзон тиендисна С.И.Дорогайкина.—Сонь вельденза театрав пуромсь лама мокша да эрзя. Кеняртьфтсь ся, што ломаттне шарьхкодезь семботь кяльста кяльс етафтомань наушникфтома».
Питне мокшэрзянь постановкати макссть тяфтама содаф ломаттне, кода Россиянь искусствань Заслуженнай деятельсь, философскяй наукань кандидатсь, Кинематографистонь Союзть Конфедерациянц председателенц полафтыец К.А.Щербаков, Россиянь культурань Заслуженнай работниксь, филологическяй наукань докторсь, Ярославскяй государственнай театральнай институтонь профессорсь М.Г.Ваняшова, Казахстан Республикань Заслуженнай деятельсь, Искусствань Казахскяй национальнай университетонь профессорсь А.Т.Сыгай и СТД-нь драматическяй и национальнай театрань кабинетонь заведующайсь, Россиянь театральнай режиссёронь Гильдиять ответственнай секретарец М.М.Корчак.
Целайнек спектакльть колга азфтольхть аньцек цебярь валхт. Мялезост тусь ся, што эсонза лац няфтевсть народоньконь кунардонь пингонь коенза-обуцянза, эрямань-ащемань эсь лацонь ширец, козя культураньке, сельмос пови мазы костюпне, мокшэрзянь лама вайгяльса морамась. Актерхнень эзда сембода пяк шнафоль Дмитрий Мишечкин, кона налхкозе атявозть Карпань роленц.
Фкя пингть Национальнай театрать мархта, аньцек лия сценическяй вастса—М.Горькаень лемса Оренбургскяй драматическяй театраса  налхксть Пензань актерхне. М.М.Корчак, кода критик, питнень максома повсь тоза. Аньцек сонцень пяк мялецоль ваномс мокшэрзянь спектакльть, сяс, шарьхкодемок пензенскяй постановкать смузенц, срхкась миннетнень ванома. Кельговсь Мокшэрзянь национальнай театрась теенза нинге 2011 кизоня, мзярда Саранскяйса етафтовсь «Штатол» национальнай театрань Всероссийскяй фестивальсь. Пялькстомань программати эста сувась эрзянь кяльса «Власть тьмы» Лев Толстоень повестенц коряс Тамара Весеньевать постановкац. Но, тяда башка, артисттне няфтсть  «Эряфонь парь» мокшэрзянь фольклорть коряс музыкально-театрализованнай представления, конань эса—мокшэрзянь народть национальнай эсь лацонь ширец. Мекольцесь аф азовомшка салазе критикть мяленц. И Поволжьянь Васенце фестивальса, валонзон коряс, сон нинге весть сась сянди, кодама вии мокшэрзянь театрась.
Мордовиянь актерхненди удалась улемс Оренбургскяй областень Национальнай велеса, ваномс тостонь Мокшэрзянь подворьять, содафтомс лия коренной эряйхнень культураснон мархта.
Фестивалень участникненди мастер-класст етафтсть Россиянь Заслуженнай деятельсь, искусствоведениянь кандидатсь, профессорсь, театральнай искусствань Российскяй академиянь сценическяй корхтамань кафедрань заведующайсь (ГИТИС) Ирина Промптовась и AKT-ZENT Театрань Международнай институтонь научно-исследовательскяй центрань/ЮНЕСКО художественнай руководительсь, профессорсь Юрий Альшиц.
Фестивальса ашезь путов задача кочкамс сяськихть. Пуромкссь шарфтф сянди, штоба кемокстамс ломаттнень еткса соткснень, ваномс, кода ащи тевсь лия региоттнень эса, явомс мархтост маштомошиса, кулхцондомс профессиональнай критикнень мяльснон-арьсемаснон.
Надиятама, што тя пара ушеткссь поладови сяда тов. И сай кизотнень тяфтама фестивальхне кармайхть етафневома Поволжьянь лия ошнень эса, кирдемок мяльса Саранскяйтьке.