Тейнек азондсть

-—Геннадий Сергеевич, васенце кизефксозе тяфтама: кода эряфонь кись вятензе тяшкава ичкоздень аймаку—Сургуту?
—Тоса ВЛКСМ горкомонь омбоце секретарькс работась дуганозе. Якшама вастса служань армияса. Васенда 1991 кизоня сань Тюмени, а сяльде, 2000 кизоня, ётань эряма Сургуту. Шачема-касома аймаксон улемста содафтонь рьвязень мархта. Мордовияв сашендсь раднянзонды, а эрясь сонць Сургутса.
—Кода и мезьста ушедсь нефтяной ошса мокшэрзятнень пуроптомасна?
—Коза и мзярда афолень ту шачема-касома вастозень эзда, нльне армияса служамста, старандань кирдемс коль сяда кеме соткст земляконень мархта. Повомок Сургуту, молень национальнай фестивалень ванома. Пуромксса ульсть лама нациянь ломатть. Нльне обжавонь, мес ётксост ашельхть мокшет и эрзят. Тя арась эсь лацонь кошардомань туфталкс сянди, штоба вешемс и пуроптомс марс эсь народоньконь. Муйне фкять, сяльде омбоцеть и стак тов, марса ни поладоськ тя тевть. Мокшэрзянь  обществать пуроптоманц колга мяльсь 2008-це кизоня пачфтьфоль Саранскяйса улемстонк Мордовиянь национальнай политикать коряс эстонь министрти А.С.Лузгинонди. Сон кирдезе пара тевти кярьмодеманьконь и надияфтсь тейнек лездомс. Корхтань тянь колга Сургут ошень администрацияса, штоба миньге, мокшэрзятнень сувафтолемазь национальнай пуромкснень ёткс.
Тянемс работатама республикань Правительствать, Саранск ошень мэрть П.Н.Тултаевонь мархта. Тернемазь Мокшэрзянь народть V съездозонза, улеме Мордовияса Мокшэрзянь народть Россиянь лия нароттнень мархта 1000 киза ладязь эрямаснонды лемтьф иласа. Cёксенда сатама VI cъездти. Ширесонк ульсть «Келу» фольклорнай ансамбльса морси Мордовия Республикань Заслуженнай артисткатне Галина Макшевась и Анна Атласовась.
Тялонда арьсетяма ётафтомс оцю пуромкс, тердемс тоза ансамбльхть, лия инжихть Мордовияста. Арьсекшневи анокламс этническяй выставка, няфтемс мокшэрзянь морамать. Ванцаськ, кода лиси.
—Мзяра мокшэрзяда тостонь ширеса?
—Тяниень пингть Сургутса эряй 2 тёжятть мокшэрзя, а сембоц Ханты-Мансийскяй автономнай округса—5 тёжянть малава. «Масторавать» пуроптомста нльне сашендовсь яксемс ломаттнень пяльге, азондомс мяленьконь-арьсеманьконь колга. Ламотнень вешеськ массовай информациянь средстватнень вельде.
—Кодама пуромксса примсетяда участия, пачфнемок лия нациянь ломаттненди мокшэрзятнень эсь лацонь ширеснон?
—Аф ляткшнетяма ошса, марнек округса ламоц ётафневи культурнай пуромкснень эзда. Кирттяма кеме соткст лия обществатнень мархта. Кепотьксонди, «Спасение Югры» общественнай организациять, мариецнень мархта ётафнетяма концертт, лисенттяма марстонь субботникс. Минцень морамань коллективоньке аш.  А вов Тюменскяй областень Сорокинскяй районца ули Калиновка веле, коса эряйхть мокшет, конат корхтайхть тяфта лемневи «ару атянь-бабань кяльса», кородозь ванфтсазь морамань искусствать и целайнек народоньконь культуранц. Синьге тернесаськ етафневи илазонк.
Сургутсь—лама национальностень ош. Ули аф кальдяв, кда иттневок кармайхть содама мокшэрзятнень культураснон колга. Сай самстонк ёратама озафтомс иттнень мархта Социальнай лезксонь центрать видеса шуфтонят. «Масторавась» кирди кеме соткст идень куттнень мархта. Тяддень кизоть Сургутса васенцеда ётафтови межнациональнай спартакиада, коса примайхть участия Мордовияста тоза эряма саф ломатть. Пуромкссь ётафтови спортонь эрь кодама виттнень коряс. Спортонь тяфтама пялькстоматне аф аньцек кемокстасазь финно-угорскяй нароттнень шумбрашиснон, но и ви-ияфтсазь сотксть фкя-фкянь еткса. Сай кизотнень арьсеви келептемс тя ушеткссь, тердемс ломатть марнек округть эзда.
—Кода корхнихть, кяльсь—народть ваймоц. Эряй кяльсь—эряйхть культурась, койхне-обуцятне и стак тов. Кода ащи тевсь кяльть ванфтоманц мархта тоса?
—Аф кржа стамда, кит, каннемок пряснон мокшэрзятненди, аф содасазь кяльть. Ламоцне эздост аф  Мордовияста, а Самарскяй, Оренбургскяй, Омскяй, Пензенскяй областьста, Башкирияста, Алтайста. Аф содасазь кяльть от-тне, конат шачсть Сургутса или округонь лия ошса. Кой-конат ёфси аф кунара мусть мокшэрзянь юрхт родснон-плямаснон эзда.
Мекольдень пингть старандатама сяда оцю мяль эсь тевсонк шарфнемс од ломаттненди. Ётафневихть Студенческяй фестивальхть, конатнень вельде оттне содафтыхть вакссост эряй нароттнень культураснон мархта. Ётксост и мокшэрзянь моротне, кштиматне. Ламотне вдь нльне аф содайхть Мордовиять колга. Кармат теест колганза азондома, салайть мяльснон содаф ломаненьконь мархта, ушедыхть макссема кизефкст. Целайнек кизоста кизос касы республикать престижец. Тостонь эряйхнень эзда ламотненди мярьголень ба самс тяза отпусконь ётафтома, васттне цебярьхть, лямбе…
Мрдамок кялень кизефксти, ёран азомс, што маластонь пингть ули мяленьке панжемс воскреснай школа, коса тонафневольхть народоньконь кялец, эрямань-ащемань коенза, культурац, фольклорсь. Содасаськ, кда панжеви тяфтама уженя, тоза кармайхть якама аф най мокшет или эрзят, но и лия национальностень ломатть. Мзярс прябалась сотф тонафтыень вешемать мархта.
—Геннадий Сергеевич, пачфневи-аф ширезонт мокшэрзянь литература, кодамовок периодическяй изданият Мордовияста?
—Мзярда сашенттама Мордовияв, тейнек макссихть книгат, валкст. Нилешка киза Финно-угорскяй народонь культурань Поволжскяй центрась кучсесь тоза  «Финно-угорскяй газета», конань явонкшнине кода эсь ёткованк, стане и лия радня нароттненди. Кизошка получсеме и «Мокшень правда», «Эрзянь правда». Пароль ба поладомс тя тевсь. Фалу мяль салай ся, мезе тиендеви шачема-касома масторса, а родной кяльса-валса сёрматфсь бта маласькофттанза сембонди тянди.
—Геннадий Сергеевич, валхнень коряс, срхксетяда Мокшэрзянь народть VI cъездонцты. Мезе учсетяда тяфтама пуромкснень эзда?
—Учтама аньцек цебярь шири молема, сяда товолдонь касома-виияма мокшетненди и эрзятненди. V съездса, кона ётафтовсь 2009 кизоня, мзярда «Масторавась» аньцек стясь пильге лангс, няфтеськ пряньконь, што ичкоздень якшама ширеса улихть мокшэрзят, конат вятихть работа кяльть, культурать ванфтомаса. Содафтоме, корхнеме фкя-фкянь мархта, кулхцондоськ, кода мольфтевихть тефне лия региоттнень эса, мезе тиендеви тоса и кой-мезе сявоме эстеенк.
Мезе учтама маластонь съездть эзда? Васендакиге, кирдьса мяльть шачема-касома кяленьконь тонафнеманцты сяда оцю мялень шарфтомать коряс. Тя пяк эряви. Тяни нльне Мордовияса, монцень родной велесон емла шабатне корхтайхть рузкс. Кяльсь тонафнема аф аньцек школаса. Эряви, штоба идсь кудса кулелезе тядянь-алянь шачема кяльть, перьфканза ломаттнень ширде.
—Корхтаманьке тага прась кялень кизефксти. Кода сидеста кайги мокшень, эрзянь валсь тостонь аймакса, эсь семьясонт?
—Рьвязе рузава. Церанень мархта мзярс корхтатама рузкс. Школав нинге аф якайхть, ёмлат, сяс, штоба аф эльбафтомс кяльхнень, васендакиге, тонафтсаськ фкяти. Сяда тов кизонь кофнень пингс ёран ускомс вели, штоба кулелезь ару мокшень кяльть, шарьхкоделезь и тонадольхть корхтама. Ся пингти панчсаськ воскреснай школаньконь, коза кармайхть якама синьге.
Азса, што сонь кенкшенза улихть панчфт аф аньцек иттненди, но и оцюфненди, кинь мялец тонадомс кяльть, содафтомс мокшэрзятнень эсь лацонь ширеснон мархта. 
—Спасиба, Геннадий Сергеевич. Надиятама, што пара ушетксонте поладовихть и сембе мяленте-арьсеманте ётафтовихть эряфс.
А.ВОЛГАПОВА.