Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

КУЖА ВЕЛЕСА КОЛМОЦЕДА ЁТАСТЬ ПИНЯСОВСКЯЙ ЛУВОМАТНЕ

Пинясовскяй литературнай лувоматнень панжезень Зубово-Полянскяй райононь ветераттнень организацияснон оцюнясна Г.Ф.Кулагин. Сон азсь лямбе валхт райононь администрациянь оцюнять С.С.Сурдинонь лемста.
Кужа велень «Мокшаваня» фольклорнай ансамбльсь илань участникнень инголе морась мокшень морот, а велень поселениянь оцюнясь В.Д.Пинясова азондсь содаф землякснон колга, сянь квалма, кода Григорий Ильич сашендсь шачема-касома уженязонза, васьфнесь ломаттнень мархта, конашкава кельгозе тястонь мазышить, перьфпяльть. Ламоц велеряензон колга сермадсь эсь произведениянзон эса. Тяфта жа Валентина Дмитриевна пачфтезе, што илада инголе теенза гайфнесь Италияста писательть сазороц Татьяна Ильинична, кона азсь седиень токай лама вал сятнень лемс, кит кельгсазь альняканц творчестванц, етафнихть лемозонза илат.
Г.И.Пинясовонди цебярь ялгакс ульсь велень хозяйствань производствань ветеранць Б.А.Голенков. Лац содазень Борис Афанасьевич писательть тядянзон-алянзон Илья Максимовичень и Дарья Николаевнань. Ульсь ширесостка. Сувсесь Григорий Ильичень варжама Саранскяйса. Эряфкшу ломанть мялямозонза лядсь Григорий Ильич панжада седи, сталмода аф пели ломанькс.
Аноклафоль «Мордовиять содаф цёрац» лем ала аф оцю выставка. Сонь колганза азондсь Кужа велень поселениянь библиотекарсь Т.А. Елисеева.
Тяда меле вал анась Кужа велень средняй общеобразовательнай школань директорсь М.С.Поршунова. Корхтась сянь квалма, кода кельгсазь и тонафнесазь школаса Г.И.Пинясовонь творчестванц. Аф юкснесазь и лия содаф писательснон, школань выпускникснон Я.М.Пинясовонь, Н.Б.Голенковонь.
Мария Серафимовнань корхтаманц поладозе школань мокшень кялень и мокшэрзянь литературань учительсь Л.М.Моисеева. Сонь учениконза Дмитрий Леонтьев, Александр Елисеев, Олег Родин, Татьяна Акшаева, лиятне лувсть стихт, путсть сценкат, кштисть-морасть.
Сембонь токазень седиснон Кужа велень инь сире эряйть Т.В.Кудашовать Пинясофнень семьяснон квалма лятфнеманза. Сон мяляфтсыне писательть атянц, оцянзон. Лац содазе алянц, сонцень Григорий Ильичень. Мархтонза васьфтемась Тамара Владимировнань эряфса фалу ульсь оцю праздникокс.
Зубово-Полянаса эряй писательсь Г.Н.Петелин кирди кеме соткст Г.И.Пинясовонь раднянзон, семьянц мархта. Гайфнихть теенза сазороц Татьяна Ильинична, лиятне. Сонць Геннадий Николаевич ульсь цебярь ялгакс писательти, васьфнесь мархтонза и Саранскяйса, и Зубуса.
Лямбе валхт Пинясовонь колга азсь Трудонь ветеранць В.Д.Тимошенков. Сон сермадсь лятфнемань стих рузонь кяльса.
Эсь васьфнеманзон Г.И. Пинясовонь мархта лятфнезень Зубово-Полянскяй муниципальнай райононь администрациянь социальнай работать коряс управлениянь оцюнясь И.А.Стёпушкин. Григорий Ильич теенза сидеста гайфнесь, сашендсь Иван Александровичень шири. Эняльдсь лездомс васенда «Мокша» журналти, а тоса «Якстерь тяштеняти» подписной кампаниять пингста. Сашендсь району илас. Лядсь Стёпушкинонь мялямс простой, аф прянь няи ломанькс.
Кужа велесь шачфтсь-касфтсь колма оцю писательхть. Мокшэрзянь литератураса, Григорий Ильичта башка, лац содафт Я.М.Пинясовонь, Н.Б.Голенковонь лемсна. Школать каршеса ащи Я.М.Пинясовонь бюстоц. Школань библиотекаса улихть книганза. Кочкаф колганза мялень салай лама материал.
Н.Б.Голенков Мордовия Республикань писателень Союзть председателенц заместителец, Мордовия Республикань Заслуженнай писатель. Кирди кеме соткст шачема веленц, райононц мархта. Етафни творческяй илат, лувихнень мархта васедемат. Пинясовскяй лувоматневок етнихть сонь эняльдеманц, лезксонц вельде. Николай Борисовичень земляконза васьфтезь пяк лямбоста. Сон ускозень кафта томса Г.И.Пинясовонь кочкаф произведениянзон, конат лиссть аф кунара Мордовскяй книжнай издательстваса.
Пинясовскяй колмоце лувоматне етасть фкя ваймоса, лямбоста. Синь эсост примасть участия аф аньцек Кужа велень эряйхне, школань коллективсь, но и райононь мокшень кялень и мокшэрзянь литературань учительхне, велень библиотекарьхне, педагогическяй трудонь ветераттне. Кепотьксонди, М.К.Вишнякова эряфонц максозе Зубово-Полянань педагогическяй училищати. Тянивок аф лядонды шири районть, училищать общественнай эряфснон эзда.
—Пинясовскяй колмоце лувоматненди сань пара мяльса,—азозе Мария Константиновна.—Григорий Ильичень содалине пяк лац. Сон педагогическяй училищань выпускниконьке. Кирдсь кеме соткст тонафнема вастонц мархта. Мзярда сашендсь шачема уженязонза, вакска ашезь етне. Седикс-ваймокс корхнесь тонафнихнень, преподавательхнень мархта. Ужяль, мес пяк рана кулось. Теенза нинге эрямаль да эрямаль, сермадомаль, нолдамаль од книгат.
Тяка мяльть поладозь и лия учительхне.
Пуромксть етафтоманкса шнама валхт ломаттне азсть Зубово-Полянскяй райононь администрациянь социальнай работать коряс управлениянь оцюняти И.А.Стёпушкинонди, Мордовия Республикань Писателень союзть председателенц заместителенцты Н.Б.Голенковонди, школань директорти М.С.Поршуновати. Синь семботь тиезь сянкса, штоба Пинясовскяй лувоматне етнельхть Кужа велеса эрь кизоня.
                                                                                                                                           И.ВЕШКИН.
                                                     Снимкаса: Питни казне Писателень союзть эзда получась Зубово-                                                  Полянскяй райононь администрациянь социальнай работать коряс    управлениянь  оцюнясь  И.А.Стёпушкин.
Фотось авторть.

 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022