«ЭСЬ АРЬСЕФОНЬКОНЬ ФАЛУ САТНЕСАСЬК!»,—мярьгсь корреспондентоньконь мархта корхнемста Ельниковскяй райононь «Нива» ООО-ть директороц Николай Лаврентьевич Четырев

—Николай Лаврентьевич, азк, пожалуйста, мезсь тячи инь пяк таколфтсы хозяйствань руководительть?
—Улема, велень хозяйствань тевса эрь заняфть, мяльса кирдьса руководствать, инь оцю пичефксоц—рабочай кяттнень аф сатнемасна. Ули вешфкс кода рабочайхненди, стане и специалисттненди. Аш кода етамс и финансовай ширде лафчашить вакска. Вов тя, койсон, инь главнайсь. Кда сяда кемоста решандакшневольхть ня кизефксне, ванат, ламось полафтоль хозяйстваса. Васендакиге мяльс сявондьса оборудованиять. А мзярс од технологиятнень тевс сувафтомаснон коряс пря пяк шнафтомс аш мезьса. Но сембе сяка, аф ваномок семботь тянь лангс, фкя вастса ащема аф уленди. Ингольцекс соксевихть-витцевихть паксяньке, животноводствась валом, но эреклай. Кда корхтамс урожайностть колга, то тяда ингольдень колма кизотне (2013 кизоти молемс), погоднай условиятнень мяльс сявозь, аф кодамотольхть. Пиземонь аф улемась кой-конашкада тиезе эсь тевонц. А меля сексенда прябалат савсть васьфтемс и озимоень видемать мархта. Ашезь тиев ся, мезе эряволь тиемс сексенда. А тя вятсь сянди, што тунда сяда лама площадь савсь занямс яровойса. Шарьхкотьф, сексень апак тиф тефне кадозь эсь «пильгокиснон» тунданди.
Кизонда пиземонь аф улемась и сексень сидестонь пизепне тиезь эсь тевснон. Сянкса урожайське средняй. Заботендамок тячить колга, важнай задачакс ульсь тейнек и видьмонь анокламась. Сатомшка катф фураженди и, конешна, пяшкодеськ населениять вешфксонц. Обеспечендафт зернаса работниконьке.
—А кода ащи тевсь тядде сексень работатнень мархта? Мяльса кирдьса озимоень видемать.
—Озимоенди катф паксятне видефт. Сембоц заняф колма сядода лама гектар. Тишеда жувататненди аноклаф тежяньда лама тонна, силость мархта работась нинге мольфтеви, шужярьге усксетяма. А сяда тов кярьмоттяма жомонь усксема. Тя Ромодановаста. Козякофтсаськ жувататнень рационцнон и тяфтама кормаса.
—Кукуруза витцеви аньцек силосонди или видьмондивок касфневи?
—Зерна аф  получсетяма. Нолясаськ сонь аньцек жувататненди андомс—силосонди. Но гербициттнень кальдявшиснон сюнеда кукурузада эрь гектарста получаф аф сняра, мзяра арьсекшневсь. Аф содаф, мес гербицидсь ашезень машфта сор тишетнень. Катк сон и добувафоль тоста, коста и нона кизотнень, но… И тянь ули кода азомс аньцек кукурузать колга, зерновойхнень коряс пеняцямат лангозост аш.
—Сталмот, Николай Лаврентьевич, кода шарьхкотькшнеса, сашендовихть васьфнемс, конатнень старандатада машфнемс марстонь вийса.
—Тя афкукс тяфта. А велень труженикнень тевдост фалу пефтома. Шумордавихть финцне, поладсазь синь лиятне. Эряви азомс, трудонь кельги ломатть  трудендайхть «Нива» ограниченнай ответственностень обществасонк. Сталмотнень старандатама сяськондемс марстонь вийса. Ведьгемонть малава ломань трудендай коллективсонк. Кизонь пингть эрси эздост сяда лама.
—Мярьготь, кадрань кизефкссь ащи оржаста. Коса лисема вастсь?
—Старандатама лия вастса эряйхненьге тердемс ширезонк. А кой-конат мртцихть Москуста-коста.
—А переселенецт Украинаста аш «Ниваса»?
—Сашендсть, ванондсть-тисть и тусть. То фкясь ашезь ту мялезост, то омбоцесь. Удобства мархта помещения макссеме эрямс, но теест, няйсасть, аф стама эряви. Вешихть профессияс коре работа. Мезенди тейнек, мярьктяма, парикмахерхне, монтажникне! А механизаторкс, кладовщицакс или фермаса-коса работамс аш мяльсна.
—Мзяра сембоц жуватадонт, Николай Лаврентьевич?
—Сисем сятт кодгемонь. Эздост кафта сядода ламось потяви тракст. Ванома вастоньке аф кальдяфт, тялонь помещениятнень лангска аф сашендови пяк пеняцямс. Но пичефкссь вов мезьса. Кепотьксонди, кядьстонк продукциять рамасазь пяк уцезста, а, ванат, магазинонь прилавкатнень лангса питнетне ефси лият. Лофцть рамасазь хозяйстваста кемзисемге цалковайда, а мисазь ни ведьгемоньшка цалковайда. Тяконь ули кода азомс сивольть колга. Мярьктяма, живой весть инкса пандыхть тейнек сизьгемонь-кафксогемонь цалковай, а рынкаса аф колма сядода уцез. И колбасать колгавок азома тякось. Аф шарьхкотьф. Пади, дотацият-месть эрявольхть. Оборудованиять одкстоптоманц тяса кирдьса мяльса. Штоба, мярьктяма, механизаторсь теждяста еталь фкя техникаста омбоцети, кона работафтоволь любой пингть. А сиретьфть мархта ичкози аф комотеват.
—Ламоц хозяйствань азорхне старандайхть пачфнемс жуватат ширде. Кода тон, Николай Лаврентьевич, ванат тя аськолксть лангс?
—Пади, кой-кинь мяльс тя тушенды. Но мон лоткалень вов мезть лангс. Лия вастста-коста ускф жуватати эряви аф кржа пинге, штоба тонадомс тястонь кирдемань условиятненди. Тя фкясь. Омбоцесь—андомань рационць. Катк, мярьктяма, тясовок аф кальдяв, но лия. Тянь коряска «инжити» эряви тонадомс. Ульсь пинге, мзярда миньге рамсеме Белгородскяй областьста 30 ведраж, но сафоль мяльс сяда кемоста нолямс тевс искусственнай осеменениять. И тянь цебярец няеви. Шарьхкотьф, аф юкснема и андомань рационть козякофнеманц колга.
—Николай Лаврентьевич, аф панда фтала тялось. Аноктада теенза?
—Стаки аноклатама. Кода ни азыне, стаки мольфтеви кукурузань урядамась. Силос, сенаж аноклаф. Арьсетяма, жуватаньке тялоть етафтсазь аф кальдявста.
—Оттне прафтыхть велень тефненди?
—Тянь азомс аш кода. Синь аф оцю мяльса сотнекшнесазь эряфснон велеть мархта.
—Койсот, Николай Лаврентьевич, мезе эряви тиемс властьса ащихненди, штоба велень хозяйствань производствась афоль кеворе алу, а касоль-эреклаль?
—Эряви сембе ширдень финансовай лезкс. Штоба ушедомс од тев, вярдень лезксфтома ефси аш кода. А лиякс стаки кармайхть шамондома веленьке, ашуякшнема ламоц хозяйстватне. Но ломанць мзярс эряй—надияй. Надиян монга, што тя ширети шарфтови башка оцю мяль.
—Аф лама пингта меле сембе аграрийхне праздновандасазь Велень хозяйствань и перерабатывающай промышленностень работниконь шить. Малаткшни праздникть мархта, Николай Лаврентьевич! Шумбраши, сатфкст и сембе цебярть тейть, семьяцти и сембе коллективцти!
—Спасиба.
                                                                                                                                     Н.КУБАНЦЕВА.