Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

Мокшэрзянь народонь Межрегиональнай общественнай движениянь Советть председателец, филологическяй наукань докторсь, профессорсь М.В.Мосин:«ВАСЕНДА МИНЬ—РОССИЯТТАМА! СЯЛЬДЕ—МОКШЕТАМА, ЭРЗЯТАМА, РУСТАМА, ТАТАРХТАМА…»

—Михаил Васильевич, тон ащеть мокшэрзянь национальнай общественнай движениять ушетксса, азк эсь мяльцень лувиеньконди сонь васенце и сяда товолдонь аськолксонзон колга. Лиякс мярьгомс, кода сон арась Мокшэрзянь народонь Межрегиональнай общественнай движениякс?
—Мокшэрзянь народонь национальнай общественнай движениясь васенце аськолксонзон ушедсь тиендемост нинге етай веконь 80-це кизотнень песта. Эста и пуроптовсть «Масторава» и «Вайгель» национальнай обществатне. И синь мяльснон-мярьгомаснон коряс 1992 кизонь 14-15 мартста Саранск ошса етафтовсь Мокшэрзянь народонь 1-це Всероссийскяй съездсь. Советскяй Союзонь ингольдень республикатнень эзда Мордовияв сась 628 делегат. Инжихнень и наблюдательхнень мархта Профсоюзонь Дворецу пуромкшнесь эста 1200 ломань. И, эряви азомс, тя Всероссийскяй форумсь эста эсь тевонц тиезе цебярьста: сон ашезь ту национализмань киге!
Тяса, монь койсон, эряви лятфтамс мокшэрзянь национальнай движенияти профессорть Д.Т.Надькинонь, доцентть И.А.Ефимовонь, писательхнень К.Г.Абрамовонь, Г.И.Пинясовонь и лама лия мокшэрзянь народонь содаф деятельхнень оцю путксснон, кит арьсесть и тиендсть эсь народснонды аньцек пара тефт!
Тя формась, кодамкс минь тячи содасаськ Мокшэрзянь народонь Межрегиональнай общественнай движениять, теенза максфоль 1999 кизоня Мокшэрзянь народонь III-це съездса, кона етафтовсь Саранск ошса 7-10 октябрьста. Вов самай эста минь народоньконь национальнай движенияц кайгиста и  шарьхкодевиста азозень и пачфтезень минь и Россиянь лия нароттненди эсь основной задачанзон. Нят—сембе вийса кемокстамс Российскяй Федерацияса нароттнень еткса ялгаксшить и сембе ширдень ладямать; ванфтомс и виияфтомс мокшэрзянь народонь генофондть; ванфтомс и кеподемс-касфтомс мокшэрзянь народонь духовнай козяшитнень; максомс сембе ширдень лезкс национальнай историять касоманцты и виияманцты; лездомс сембе вийса Россиянь лия регионца эряй мокшэрзятненди ванфтомс и касфтомс национальнай культураснон и мокшень и эрзянь кяльхнень; ладямс кеме соткст Россиянь и омба масторонь финно-угорскяй народонь лия общественнай организациятнень мархта.
И тячи, VI-це съезтта инголе, тейне ули кода азомс: Мокшэрзянь народонь Межрегиональнай движениясь тевонзон тиендьсыне сатфксонь сатнезь и эсь пингстонза. Сидеста етафневихть Межрегиональнай совещаният мокшэрзянь кяльхнень и культурать сяда товолдонь виияфтомаснон коряс. Оцю лезкс минь национальнай движенияньконди макссесь и максси Ульяновскяй областень национально-культурнай автономиясь. Сонь руководителец Михаил Иванович Крынкин, кона арьсезе-аноклазе тя структурать, тись оцюдонга оцю тев эсь народонцты. И сонь эздонза сявсть пример Россиянь лия региононь мокшэрзянь народонь национальнай движениянь лидерхне. И тячи национально-культурнай автономиянь или центрань формаса-структураса Мокшэрзянь народонь Межрегиональнай общественнай движениясь мольфтьсыне тевонзон пцтай эрь регионца, коса компактнайста эряйхть мокшэрзятне!
—Съездсь—Мокшэрзянь национальнай движениять тёкшец. И сонь девизоц—«Мордовский народ в формировании общероссийской гражданской идентичности»—сонць корхтай эсь инксонза. Лиякс мярьгомс, VI-це съездса корхтамась кармай мольфтевома мокшэрзянь народть путксонц колга Российскяй государствать кемокстамаса?
—Афкукс тяфта! Минь сембе вийса карматама кемокстамонза Россиянь гражданскяй обществать. Да, минь кемокстатама и тяфта жа виияфттама эсь мокшень и эрзянь кяленьконь, национальнай культураньконь, коеньконь-обуцяньконь эса. Но тиендеськ тянь и карматама сяда товга тиендема эсь цебярь тевоньконь Россиянь Конституциять вешфксонзон коряс. И ладязь Россиянь сембе лия нароттнень мархта, кит сувсихть Российскяй нацияти!
Тяда башка, мокшэрзянь народсь эсь съездсонза Россиянь сембе лия нароттненди ерай эсь решениянзон вельде азомс: «Ялгат! Минь сембе васендакиге—Россияттама. И аньцек тяда меле—мокшетама, эрзятама, рустама, татархтама, чеченецтама…» И тянь минь азсаськ кода государствообразующай народ, кона рузонь и лия нароттнень мархта нинге 1000 кизода инголе ушедсь строяма Российскяй государствать эса. И ня процессне, кода мон арьсян, молихть тя пингс!
—Михаил Васильевич, тонць мезень колга кармат корхтама Мокшэрзянь народть VI-це съездсонза?
—Мон карман корхтама сянь колга, кодама эряфса тячи эряй Мокшэрзянь народонь Межрегиональнай общественнай движениясь. Тяфта жа пачфтьса съездонь делегаттненди, кода тя пингс работасть мокшэрзянь народонь национально-культурнай автономиятне и центратне кода Мордовияса, стане и Россиянь лия регионца. И мезе нинге эряви тиемс, штоба сядонга эреклафтомс синь работаснон съездта меле.
Нинге мон еран азомс эсь мялезень мокшень и эрзянь кяльхнень тя пингонь эряфснон колга. Да, мокшэрзянь национальнай культурась мекольдень пингть няевиста кассь. Етафневихть национальнай моронь фестивальхть кода Мордовияса, стане и Россиянь лия регионца, коса компактнайста эряй минь народоньке. И тя пяк кеняртьфтьсамань, и арьсян, национальнай движениянь и культурань лия деятельхненьге.
Но мокшень и эрзянь кяльхнень тевс нолямань сферать келептеманц лангса тейнек сембонди эряви нинге ламос работамс и работамс! Работамс кода Мордовияса, стане и Россиянь лия региоттнень эса.
—Мекольце кизефкссь, Михаил Васильевич. Межрегиональнай движениясь и сонь вярдень структуранза VI-це съездта инголе етафтсть и Мордовияса, и Россиянь лия регионца мокшэрзянь народть еткса оцюдонга оцю работа. Кодама решеният тя работада меле тинь учсетяда VI-це съездонь делегаттнень эзда?
—Мон надиян, што Мокшэрзянь народонь VI-це съездонь делегаттне фкя мяльса примайхть стама решеният, конат кемокстасазь ялгаксшинь соткснень Россиянь сембе нароттнень еткса! И нинге стапт, конат сувафтсазь-кеподьсазь няевикс вастс минь народоньконь, мокшетнень и эрзятнень, национальнай культураснон, койснон-обуцяснон и кяльснон.
                                                                                                                                         В.НЕСТЕРОВ.

 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022