КАЗНЕ МАРХТА, АЛЕКСАНДР СТЕПАНОВИЧ!

 

 

Александр Степанович Лузгинонь лемоц лац содаф аф аньцек мокшэрзянь масторса, но и лия региоттнень эса. Шачсь сон Мордовскяй АССР-нь Торбеева поселкаса. 1972 кизоня шумордазе М.Е.Евсевьевонь лемса Мордовскяй государственнай педагогическяй институтть, 1978 кизоня—МНИИЯЛИЭ-нь аспирантурать, сяльде тя институтонь археологиянь и этнографиянь секторонь научнай сотрудниколь. 1986 кизоста сявомок—лектороль, межнациональнай соткснень коряс консультантоль  КПСС-нь ОК-са. 1992 кизоня путфоль Мордовскяй книжнай издательствань директоркс, 1998 кизоня—Мордовия Республикань печатень и информациянь министркс, 2003 кизоня—Мордовия Республикань Национальнай политикать коряс госкомитетти председателькс, кона сяльде тифоль республикань Национальнай политикать коряс министерствакс.
Александр Степанович—Мордовия Республикань Государственнай премиянь лауреат, казьф «За трудовую доблесть» и лия медальса, Мордовия Республикань Почетнай Грамотаса.
Республикань национальнай политикать коряс министркс улемстонза Александр Степанович Лузгин лама тись родной кяльхнень и национальнай койхнень-обуцятнень ванфтомаснон инкса, мезсь лездсь кемокстамс миньцонк эряй нароттнень еткса ялгаксшить. Ся кизотнень Мордовияса етафтфоль национальнайти лемтьф аф кржа пуромкс, ширезонк сашендсть инжихть лия региоттнень, странатнень эзда. Тяфта сембось ащи тянивок.
VI съездть пингста Александр Степанович кочкафоль Мордовскяй (мокшень и эрзянь) народть Межрегиональнай общественнай организациять исполкомонцты председателькс, мезсь нинге весть няфтезе, што лангозонза надияйхть марнек Россиянь мокшетне и эрзятне.
Ня шитнень мархтонза корхнесь корреспондентоньке, конань кизефксонзон лангс сон отвечась оцю мяльса.
—Александр Степанович, примайть седи ваксстонь поздравленияньконь оцю казнеть—Славань III степенень Орденть сатоманц мархта! Арьсетяма тейть од сатфкст и сембе цебярть.
—Спасиба!
—Тяфтама оцю казнесь няфнесы, што ломанць аф кржа тись, работась виень аф ужяльдезь. Тяда башка, мокшетнень и эрзятнень оцю пуромкссост кочкафолеть Мокшэрзянь народть Межрегиональнай общественнай организациянц исполкомонцты председателькс. Кодапт платтне сай пингонди?
—Васенцесь, мезть лангс шарфтома мяль—тя демографиясь. Башка вастса ащихть и кармайхть ащема родной кяльхнень мархта сотф кизефксне. Сяда лама работама республикань райоттнень эса. Марстонь вийса ванфтомат велетне, вдь тоса «эряйхть» юроньке, коеньке-обуцяньке. Аф юкснема ширдень мокшетнень и эрзятнень квалма, конатнень мархта мекольдень кизотнень ладяме кеме соткст. Синь ули кода тернемс инжикс Мордовияв аф аньцек съезттнень, лия оцю пуромкснень пингста, но и фалу. Содафнемат научнай, образовательнай, издательскяй ширеньконь, массовай информациянь средстваньконь мархта. Сяда сидеста етафнема экскурсият Саранскяйть эзга. Тяфта кармайхть маряма соткснень атянь-атяснон шачема масторснон мархта. Тевда инголе аф кржа, но марстонь вийса синь сяськовихть.
—Пяшкодевост мяльхне-арьсематне, Александр Степанович!

                                                                                                                                           Т.АЛЬШИНА.