ЭРЬ ТЕВСА САФТСЫ

Эряфонц оцюшканц Прасковья Павловна максозе Атерень кинь строяма участкати. А тя пцтай 40 киза. Кеветиеда лама киза покодсь пенсияда меле. Трудендаль тянемс, но кардазь иденза.
—Тонь кизосотне бабакс тиендихть, ваймосихть, унокт ваннекшнихть,—корхтасть синь.—А тон алянь тефт тиендят. От-тнень мархта ряцок шиньберьф ки лангсат, аш праздникце, аш ваймама шице.
И виде. Кизонек-тялонек П.П.Надинась тевфтома ашезь лядонда. Кизонда строясь од кит, петнесь-паннесь уликснень эса. А тялонда урядась китнень, сеттнень крайге лов. А мзяра лия тевда сашендовсь тиендемс мокшавати. Трудендась совестьс коре, виень аф ужяльдезь. Тяни тянь квалма азондыхть оцю казненза, конатнень мархта Прасковья Павловна казьф лац покодеманкса.
Аф ваномок аф теждя эряфонц лангс, П.П.Надинась шачфтсь и касфтсь кафкса итть. Сембе синь шнама ломатть велеса, музь эсь вастснон эряфса. Лама идень касфтоманкса Прасковья Павловна казьф «Материнская слава» орденца.
—Эста аф тянить лаца шачфнесть аватне, колмонь киза ваймамс ашесть макссе,—корхтай мокшавась.—Фкя шиня нинге сембонь мархта ряцок трудендат, омбоце шиня молят шачфтома. Шачфтомда меле аф ламняс ваймат. И тага тевс. Аф аньцек мон тяфта шачфнень, сембе велень аватне. Аф пеняцян, аф каендан. Сембе идне шумбрат-тазат. Кеняртьфнесамазь пара тевснон мархта.
Сонць Прасковья Павловна шачсь Сараефнень семьяса. Сон васенце идсь. Мельганза шачсь нинге кафкса. Пингсь эста стамоль. Мольсь Великай Отечественнай войнась. Аляц, Павел Иванович, сась фронтста 1943 кизоня ранендафста. Но ашезь када ранань, сярятьфонь пчкафнема. Эстокиге тердезь колхозу работама, коса пяк эрявсть алянь кяттне. 1944 кизонь октябрьста Павел Ивановиченди рьвац, Надежда Григорьевна, шачфтсь стирня. Сон ульсь сембоса седиень петьксокс, кенярдема вастокс, кудса лездыкс.
Пяк рана ушедсь трудонь биографияц Прасковья Сараевать. Кемнилие кизоса ни якась торфонь урядама  Ярославскяй области. Тоста добуваф ярмаконзон лангс усксесь куду котфт. Синь эздост стафнесть панархт. Аф лама пинге стирнясь трудендась Атерень колхозса дояркакс, строяма участкаса разнорабочайкс. А меле сась покодема кинь участкав и пцтай нильгемонь киза строясь районца, да и аф аньцек районца, цебярь кит. Пара мяльса лятфнесыне мархтонза покоди ялганзон И.Ф. Лемяскинать, З.П.Москвинать, М.Т.Равочкинать, А.Ф. Сяткинать, А.И.Чалдышкинать и ламотнень лиятнень, конатнень мархта, аф ваномок погодать лангс, трудендасть ки лангса.
П.П.Надинась аф аньцек кельгома тядя, но и павазу рьвяль. Мирденц Петр Петровичень мархта марса эрясть пцтай ведьгемонь киза. Эрясть ладязь, фкя-фкянь шарьхкодезь. Оцю кельгомась казсь теест кафкса итть. Тяни синь лама уноктост. Ужяль, но трудонь кельги мокшалясь, райононь содаф гармонистсь, аф кунара тусь эряфста.
П.П.Надина—мокшень коень-обуцянь кельги и ванфты ломань. Сон най якай мокшень щамса-карямса, пяк кельгсы пидеманц-панеманц. Аф уленди стама праздникоц, штоба сон ёталь позафтома, пачафтома. А каванямс ули кинь. Прасковья Павловнань мазы вайгялец. Эрь мокшень мороть петьсы. Лама пинге сон серматфнесы «Мокшень правда» газетать.
Юбилей мархта, Прасковья Павловна! Кеме шумбраши и теждя эряф тейть!
                                                                                                                                            И.ВЕШКИН.
                                                                                                                          Снимкаса: П.П.Надина.
                                                                                                                                      Фотось авторть.