Мордовиянь писательхнень 100 книгасна» акциясь

Кадошкинскяй районць
Кадошкинаса пуромкссь етась районнай Культурань кудса, коса Саранскяйста саф инжихне васьфтьфтольхть кшиса-салса, мороса. А.С.Пушкинонь лемса Национальнай библиотекась и республикань лия библиотекатне усксть мархтост козя выставкат, конатнень вельде ульсь кода содафтомс миньцонк ноляви книгатнень мархта. Кепотьксонди, А.С. Пушкинонь лемса Национальнай библиотекань сотрудникне аноклазь книгань экспозицияснон стане, штоба няфтемс Мордовиянь писательхнень и поэттнень книгаснон, а стане жа авторхнень изданияснон, конат шачсть ся районца, коса тячи етай акциясь.
Васенда Кадошкинань Центральнай библиотекаса работась «круглай шра», коза пуромкшнесть райононь библиотекарьхне. Мархтост васьфнесть Мордовия Республикань культурань и туризмань министрть заместителец Н.Л.Храмов, А.С. Пушкинонь лемса Национальнай библиотекать директороц А.И.Степанов, Мордовия Республикань Народнай писательсь В.И.Мишанина, Россиянь Писателень союзонь членць В.М.Лобанов. Центральнай библиотекать заведующаец Л.А.Григорьева пачфтезе, мзяра Кадошкинскяй районца библиотекада, мзяра ломань работай эсост, конашка тячиень шити книгань фондсь, козякофневи-аф сон и стак тов. Ванфтольхть таколфты кизефксне. Кепотьксонди, велень библиотекатнень эса тянемс аш компьютерхт, интернет, сяс тянь мархта сотф тефнень библиотекарьхне тиендьсазь кудса. Ужяль, но тя прябалась васьфневи велень пцтай сембе библиотекатнень эса.
«Круглай шра» ваксса васедемада меле акциясь поладозе работанц районнай Культурань кудть актовай залсонза. Мордовия Республикань культурань и туризмань министрть заместителец Н.Л.Храмов пачфтсь Кадошкинань эряйхненди «Мордовиянь писательхнень 100 книгасна» акциять квалма, а стане жа тердезень синь максомс вайгяльснон мялезост туф книгать инкса.
Тя шиня лама пара вал азфоль содаф кафта писательхнень—В.И.Мишанинать и В.М.Лобановонь лемс. Валентина Ивановна шачсь Инсарскяй райононь Адаж велеса (тяни сон канневи Кадошкинскяй районти), а Виктор Михайлович—Кадошкинскяй райононь Паева велеса. И синь самасна арасть тястонь ломаттненди афкуксонь казнекс, а сценаста корхтамасна салазень сембонь мяльснон, сяс мес синь мусть киня ломаттнень ваймос идень пингснон, шачема ширеснонды кельгомать колга корхтамстост. Пуромфне ламос цяпазь кядьснон.
Газетать фкя лопаняц аф саты, штоба пачфтемс Кадошкинань эряйхнень В.И.Мишанинать и В.М.Лобановонь мархта васедемаснон квалма. Надиятама, тянь тисаськ «Мокшень правдать» маластонь номеронзон эса.
Аф кржа пара вал азфоль тя шиня Мордовия Республикань Народнай писательть А.П.Тяпаевонь, поэтть И.В.Носиковонь колга.
Мокшень морот казсть Адаж велень мокшаватне, стихт морафтсть школаса тонафнихне. Сяльде Саранскяйста саф делегациясь тусь Инсарскяй району.

Инсарскяй районць
Мокшень шову позаса, суронь пачаса, мороса-кштимаса васьфтезь инжихнень Инсаронь районнай Культурань кудть инголе Мордовская Паевка велень «Поюня» фольклорнай коллективонь мокшаватне.
Культурань кудса работасть мялень салай выставкат. Мокшень щапне-каряпне, кудъетконь кядьготне, валенцятне, библиотекатнень тячиень шиснон квалма пачфни стенттне ашезь када озадонь седихть ащема киньге. Кулевсть мокшень морот, сиде моронят, гармониять вайгялец.
Мордовия Республикань печатень и информациянь министрсь В.В.Маресьев, Мордовия Республикань культурань и туризмань министрть заместителец Н.Л.Храмов ванозь сембе выставкатнень, макссесть лама кизефкс пуроптыснонды.
Тя шиня етась эсь лацонь васедема велень и республиканскяй библиотекатнень еткса. Кафцьке ширетне няфтезь книгаснон, пачфтсть «эряфснон» квалма.
Торжественнай пяльксть панжема сценати тертьфоль Мордовия Республикань печатень и информациянь министрсь В.В.Маресьев.
Валерий Валерьевич корхтась книгань морафнемать эрявиксшинц квалма. Тячиень шиня, кле, тя тевсь полафневи сянь мархта, што лувомс материалхт сявондевихть лия источникнень эзда.
Мордовия Республикань Культурань и туризмань, Мордовия Республикань Национальнай политикать коряс, Мордовия Республикань Печатень и информациянь министерстватне састь мяльс етафтомс Мордовиянь писательхнень книгаснонды лемтьф акция. Инсару састь республикань содаф писательхне В.И.Мишанина и В.М.Лобанов, мархтост васедемась нинге весть няфнесы тя акциять эрявиксшинц.
Сяда тов тифоль В.И.Мишанинать эряфонцты и творчестванцты лемтьф презентация.
Мзярда сценати лиссь Валентина Ивановна, сон мярьгсь, што тячи кафта райоттнень эса квалманза азозь семботь, но идькс пингонц колга лятфнематне салазь ломаттнень мяльснон. Тяфта ульсь и В.М.Лобановонь мархта. Кафта писательхне мяль шарфтсть шачема ширеснонды, коль лятфнесть идькс пингснон колга, а тяфтама лятфнематне занцихть башка васта ломаттнень ваймоса.
Виктор Михайлович Лобанов токазе и седиень ацергофты ширеть: Украинать. Валонзон коряс, тостонь Горловкав тушендсь эряма аф фкя семья и сонь велестонза. Алятне и цератне кярьмотькшнесть шахтеронь тевти, лядондсть тоза эряма. Кирдемок мяльса мекольдень пингонь событиятнень, кой-кона раднятнень мархта соткс аш тянемс.
Тя шиня тифоль презентация писательть М.Т.Петровонь эряфонь и творческяй кинц колга.
Кадошкинскяй и Инсарскяй райононь эряйхне азсть мяль етафнемс тяфтама васедемат сяда сидеста. И аф аньцек акциятнень пингста, а фалу. Тяда башка, пара улель ускомс району В.И. Мишанинать «Сенем толмар» пьесанц коряс путф спектакльть, мезсь араль цебярь казнекс ломаттненди и, штоба синь содалезь Валентина Ивановнань кода драматургонь.
Мордовиянь писательхнень книгаснон инкса вайгяльть ули кода максомс www.e-mordovia.ru сайтса «О Мордовии» разделса.
                                                                                                                                           Т.АЛЬШИНА.