СОН ПАЧКОДСЬ МЯНЬ БЕРЛИНУ

Советскяй народть мялензон-арьсеманзон од эряфонь строямаса колазь фашистскяй Германияь войскатне, конат 1941 кизонь 22 июньцта апак учсек врьгятсть минь мастороньконь лангс. Эста Саша кафксоце классть аделамдонза меле  лезнесь колхозонь работаса и кудъетконь тевонь тиемаса. Но вов синьге велезост кармасть сашендома седиень-ваймонь сязи кулят фронтса шавфнень колга.
—Шавозь. Андыеньконь шавозь!.. Авардезь-ольксезь синь кудозост сувась шабрань авась, тядянц Гуля ялгац. Мзярдонга Саша тяфтамкс ашезе няенде  шабраваснон, кона тяда инголе ульсь весяла, эряфонь кельги ломанькс. Эста сонь тядяц  авардить ктмордазе, озафтозе скомня лангс. Саша эрязста, цють аф авардезь лиссь кудста. Мольсь войнань васенце кизось. Татаронь церась  ялганзон мархта сидеста арьсекшнесь сянь колга, кода туйхть фронту фашисттнень каршес тюрема, сяськсазь аерксть и мрдайхть меки геройкс. Но нят ульсть мяльхть-арьсемат. А велезост стаки сашендсть «похоронкат». Мртцесть войнаста пилькфтомотне-кядьфтомотне, стакаста контужендафне, кит ашесть кондясте ни фронтса. Ломаттне пелезь васьфнезь почтальоттнень, фалу варжакснесть, кона курняв-куду синь шаркснихть. Ваномок оцюфнень ризфснон-пичефксснон лангс, сетьмосесть и церокшневок.
Но эряфсь мольсь. 1942 кизонь кизонда Духонькиттнень кудс кандсть повестка. Сашанди эста ульсь 17 киза. Лия тяфтама жа кизоса ялганзон мархта ускозь Пензенскяй областень Городища ошу. Кота кофт тоса синь тонафнезь военнай тевти. Саша, содамок, кода стака ули фронтса, тонафнесь сембе виень путозь, мяляфтомок сянь, мезе няфнесть и азондсть тонафтыенза. Синь ротнайсна—оцю опыт мархта ломанць аф весть мярьгондсь: «Стака ули тонафнемаса, сяда теждя кармай фронтса».
Пяле кизось етась курокста. Эрь шинь тефне-месне серматфтольхть минутаньбес. Тяда меле ульсь тонафнема Маршанск ошень стрелково-минометнай училищаса, конань аделазе 1944 кизоня и лейтенантокс кучфоль 1-це Белорусскяй фронту. Путфоль стрелковай взводонь командиркс.
Александр Харисович пичедезь-ризназь лятфнесь фронтса улемань васенце шитнень колга, мзярда од солдаттнень мархта, конатнень нинге ашель опытсна тюремаса, потафтсть фашисттнень эса. Эста юмафтфоль лама солдат.
Васенце пяк стака бойса сонь взводоц тюрсь Варшавать маласа, Висла ляйть лангса. Тоса немецнень ламоль вийсна и пяк лац ладяфтольхть войскасна, сембе вийса ерасть кирдемс эсь позицияснон, лоткафтозь советскяй войскатнень наступленияснон. Мольсь 1945 январь ковсь. Вислать вельхксса артиллериянь снаряттнень эзда кожфське вяшксь-циннясь и увнась. Кафта шит мольфтевсть артиллериянь ляцендематне. И аньцек 16 январьста сась приказ етамс Висла ляйге.
…Дотста и дзотста «сельгондсть» свинецса немецнень пулеметсна, пинекс увасть автоматонь ляцендематне, вяшкозь вяшксть, сязендевсть минатне, прашендсть снаряттне, конат сязевомда меле перьфпяли кепотькшнесть куломань канды пакшт-пялькст. Тянь сембонь пачк од командирсь сембе вийса кепотькшнезень солдаттнень атакас:
—Родинать инкса! Инголи! Атакас! Ура-а-а!
И кепсесть сонь мельганза атакас сембе солдат ялганза, ляйть лангса шуваня эйть лама вастса почкафтозь снаряттне, сяс сяда стакаль етамс ланганза. Сон синневсь-тапсевсь и солдаттне эй ведьса уендсть, оцю виень путозь кирдсть, штоба сталмоть эзда аф тумс ведть алу, но кой-конат эздост сембе сяка вайсесть. Но кивок ашезь шаркста меки.
«Аньцек пачкодемс берякть види ширезонза»,—арьсесь од командирсь. И кда васенда теенза ульсь пелькс, то тяни, ваномок, кода автоматста-мезьста ляцендезь ляйть ланга етасть лия советскяй солдаттне, сон стане жа мольсь инголи. И вов ни пачкодсть омба беряку, панезь фашисттнень дотста и дзотста, конат пильгонь синнезь ласькозь потасть.
Инголе няевсь машина кинь станциясь, кона тяфта жа  фашисттнень кядьсоль. Миннетне ушедсть вокзалста фашистонь вешендема. Александр Харисович связноенц мархта сувасть калафтф, синнеф-тапаф вокзалу.
—Лейтенант ялгась,—тошкась тейнза связноец,—тоса кие-бди ули.
Кафцьке ушедсть кулхцондома. И виде, коста-бди марявсь немецонь корхтама. Шарьхкодсть, корхтамась—подвалста. Ёрдальхть граната—и пецка тозк! Но Духонькин тись лиякс: сон немецненди мярьгсь кепотьф кядьса лисемс. Сятненди ашель мезе тиемс, лиссть, кода мярькфоль. Ёрязь оружияснон.
Фкя пленнайсь ульсь власовец. Сон прась плманжа лангс  и сельмоведеньбачк, авардезь пешкоткшнесь: «Тямасть шава! Тямасть шава!..» Вдь пяк лац содазе сянь, кода советскяй солдаттне ваныхть Родинать миензон лангс, а сон ерась эрямс, маряк, ужяльдесть. Тянь колга Отчизнань аралайсь Духонькин лятфнесь нильгодезь.
А сяльде  миннетне панезь немецнень кафта суткат Польшать моданц ланга. И аньцек 50 вайгяльбень ётамда меле синь полксна ульсь лоткафтф ваймама, штоба кемокстамс воинонь од вийса и техникаса. Вдь аньцек Александр Харисовичень взводстонза 32 солдаттнень эзда лядсть пялесна. И авардсь эста од командирсь, валонь апак аст, шарфнемок шири ялганзон эзда, конатнень тяфта жа  ашесть кирнев сельмоведьсна. Аф верондай Духонькин сятненди, кие корхни, што войнаса видексонь алятне аф аварькшнихть. Авардихть. Аньцек алякс… Ня бойхнень инкса минь земляконьке ульсь казьф Краснай Звездань орденца.
Тяда меле ульсь нинге аф фкя бой фашисттнень пизозост панемаса. Ламоксть А.Х.Духонькин няендезе, кода шавондовсть ялганза, конат эсь эряфснон максозь Родинать, лия нароттнень фашизмать эзда араламанкса. Но сят, кит лядсть шиса, стаки мольсть инголи, тапамок аеркс фашисттнень, сяськомок синь.
Одерть ала минь войсканьконь васьфтезе немецонь сопротивлениясь. Эрявсь етамс ляйть. Фашисттне лац кирдсть ляйть тона ширеса. Лиссь тяфта, што Духонькинонь взводоц васенцекс етазе ляйть. Но немецне кармасть потафтомост ня отважнай советскяй солдаттнень. Тя пингть ляйть берякс пачкодсть минь войсканьке. Тяни земляконьконди и сонь ялганзонды ульсь сяда теждя. Но апак учсек коса-бди аф ичкозе сязевсь немецонь мина. Духонькин марязе, кода мезе-бди пяцькафтозе пильгс и пряс. «Тейневок повсь»,—арьсесь взводонь командирсь. А пярьфпяле мольфтевсь бой, конань инкса сяда меле взводонь командирсь казьфоль омбоце Краснай Звездань орденца.
Госпитальса пчксемда меле Духонькин сатозе эсь частенц. Сяда тов немецнень панезь пяк вишкста, обосне лядсть ичкози фталу. Солдатоньке сувсесть фашисттнень мархта катф велетненди, поселкатненди...
Победань салютть Александр Харисович  васьфтезе Берлинть ала. 8 майста ульсь сетьме. Омбоце шиня рана шобдава тага ушедсть оружияста ляцендемат. Сембе арасть эсь позициязост, анокласть кальдявти. Но тя ульсь минь солдатоньконь сяськомань салютсна. А взводонь командирть мяштьса курок кармась пиндолдома Красная Знамя орденць.
…Аньцек Александр Харисович аф эстокиге мрдась меки куду. Васенда синь частьсна катфоль Варшава—Берлин кить ванфтома, а тяда меле  прважазь Берлину. Потсдамскяй конференцияда инголе тя ошть кирдезь советскяй войскатне, сяльде тяза сувасть союзниконьконь войсканза…
Мекольдень валсь. 1946 кизоня частьть, коса служась А.Х.Духонькин, мрдафтозь эсь Родиназонк, Рязани, Селищенскяй лагери. Тоса васьфтезе Людмила Андреевнань, конань мархта сотозе эряфонц, седикс-ваймокс эрясть мянь кодгемонь киза. Войнань и МВД-нь ветеранць сембоц казьфоль 4 орденца и комозьшка медальса. Александр Харисович Мордовияса пяк лама тись преступностть овстамаса. Сон МВД-нь отличниколь. Отставкаса милициянь полковниксь кулось 2006 кизонь 5 январьста.
                                                                                                                                            А. Пужайкин.