Поиск по сайту: 
 

Архив
 апрель 
 2019 
пн вт ср чт пт сб вс
1234567
891011121314
15161718192021
22232425262728
2930     

 
 

 

Наши мокшанские сыновья и дочери

МОКШЭРЗЯНЬ ПИСАТЕЛЬХНЕ, КОНАТ АШЕСТЬ МРДА ВОЙНАСТА

...Тя аф оцю сёрматфозень эса мялезе азондомс мокшэрзянь писательхнень-фронтовикнень колга, конат ашесть мрда войнаста. Но васенда нюрьхкяня лятфнема вал.
Ульсь недляши—мани и лямбе. Перьфпяльге сембось сянгяряль: паксятне, лугатне, вирьхне. Лотксесть ни панжемда саттне. Мольсь кизоть инь мазы пингоц—июнць.
Недляшиста—ваймама шиня—ломаттне ранакиге, кода фалу, анокласть кие вири, кие ляй лангс шинять каршеса ронгонь пицема, а кие молемс инжикс или инжиень васьфтема. Мон эсь ялганень мархта тунь Инсара ляи калонь кунцема (эста работань ни «Мокшень правда» газетаса). Эздонк кивок мезеньге зиян-осал изь учсе. Кальдяволь аньцек ся, калхне тейнек исть повонда. Аш и аш. И минь срхкаме меки куду. Шись менель тёгоннясоль ни.
Московскяй ульцяса, аф ичкозе эстонь типографиять эзда, васьфтеме аля. Аськолясь шуфтонь тротуарть ланга, пряц нолдаф мяштезонза, и сюцесь:
—Сволочь Гитлер...
Тя ульсь сяшкава апак учсек, што минь афи стряндаме лоткафтомс алять и варжакстомс шамазонза—пади, ирецта и шотнай месть аф эряви.
Но ся ульсь аф шотнама. Сяка Московскяй ульцяса фкя кудть келес панжада вальманц инголе ащесть ломатть и кулхцондсть. Нежедеме миньге. Вальмя лангса радиоприемник, нолдафоль пяк кайгиста.
—Мезе?
—Война... Молотов корхтай…
Бта седиезе марязе—эряви куроконе пачкодемс куду. Аньцек панжине калитка кенкшкять, квартира азорава бабанясь каршезон:
—Скорейне редакцияв мярьгсть! Сашендсь курьеронте...
Эстонь Печатень кудсь унась токаф нешкокс. Шить кемгафтува частта меле радио вельде (телетайпт ашельхть) примафтольхть Советскяй правительствать заявленияц и ТАСС-онь лия материалхт, конат мокшэрзянь газетатненди сияк зрявсть ётафтомс эсь кялезост. Редакциятне, сяка ёткса «Мокшень правданнеське», анокласть нолдамс экстреннай номерхт...
Сяка шиня Саранск ошень военкоматть инголе пяшксель народта: кадровай командирхт, красноармеецт, синь рьвасна, шабасна. Занязь аф аньцек военкоматть инголенц, но марнек ся ульцять пяленц да мянь Пушкинонь лемса паркть маластонь аллеянзон.
Тяфта сембе красноармеецне и командирхне, конатнень военнай билетсост сёрматфоль «явиться по первой тревоге», аноклавсть ильхтемс фронту—войнань васенце шинякиге.
Омбоце шиня—понедельникста—сань работама. Ванан: фкя шрать ваксса аш ломань, омбоцеть, колмоцеть...
—Войнав тусть...
Ацер-моли седиста ня валхненди ашень тонаткшне, мзярс эстейне исть канда повестка «иметь при себе ложку, кружку...» Тя ульсь 1941 кизонь    12-це августста.
«Мокшень правдав» аф сидеста, но и аф шуроста сувсекшнесь Григорий Ельмеев—Рузаевскяй райононь Сузгярьге велень учительсь. Мазы аля, валда шама, аф пяк корхтафкшу. Теенза ульсь 35 киза. Мзяра нинге сёрмадоль стихта, поэмада, ёфкста, да аш, изь лисе, войнань ушедома нилеце ковня—сентябрьста—шавовсь фронтса.
Писательхнень еткса пяк кельгома ломанькс ульсь Иван Чудайкин—«Комсомолонь вайгяль» газетать редактороц. Комсь кизоса нолдазе стихонь васенце книганянц—«Кастама». Войнада меле ни якась куля, мезсь маряви легенда лаца. Комиссарсь Иван Чудайкин ялганзон мархта лиссь фашисттнень окруженияста, токадсь партизанонь отряд лангс, шоворсь ся отрядти и тюрендсь тоса, мзярс изь пова пленц. Кода сонь изь муця гитлеровецне, изь аза фкявок вал аф партизаттнень, аф армияньконь колга. Эста сотнезь комиссарть шуфтс и алонза серептсть толмар... Поэтсь кулось, а стихонза—хоть и аф лама—эряйхть тячемс.
Сяка «Комсомолонь вайгяль» газетаса ответственнай секретарькс работась Андрей Чекашкин. Лувондовсь редакциянь авторитетокс. Сёрмадсь и стихт, и азкст. Кодама зиян мархтонза лиссь войнада инголе, ся тяштьф биографиясонза. Но вдь сонга юмась войнаса. И мезсь нинге пяк стака марямс ваймосот. Ковылкинскяй райононь Порапа велеса улендемстон кулендине эряфкшу ломаттнень кургста: «Минь шачендсть кафта писателеньке и кафцьке шавовсть войнаса».
Омбоцекссь—Федор Дурнов. Сонь колганза мялезе азомс васендакиге вов мезе: пяк пара ялгазель. А ладяма ушедоме, мзярда сон, кевейхксые кизоса поэтсь, путфоль литературнай редакторкс «Колхозонь эряф» (тяни—«Мокша») журналти. Ефси войнада ингольня Мордкизса лиссь стихонь «Нюди» сборникоц, конань казендезе мондиневок, и титульнай листонц лангс сёрмадсь: «Казьса Девин Ильянди, тяк няфне киндивок илянди, а Савватеевичень лятфнек...» И мон аф юкстаса Федянь куломозон.
Эсь лятфнеманзон эса Дурновонь од цёракс пингонь кельгома ялгац Василий Радин сёрмады: «Федор Дурнов—талантливай поэт, сонь творчествац лезды тейнек няемс мирть мазышинц, кельгомс шачема масторть и видешить, тюремс эряфса синь инксост стане жа виде ваймот, кода сонць поэтсь».
Ужяль, эрясь и тюрсь сон аньцек 23 киза, минь тя писателеньконьге нельгозе народоньконь кядьста войнась.
Степан Родькин—Ковылкинскяй райононь (тага Ковылкинскяй!) Рьба велеста од цёрась сась литературазонк колмогемонце кизотнень кучкаста—ёжу, пиленза, кода корхнихть, ащесть стяда, валонкса зепозонза изь эцекшне. Тяштсь прозаса. Одс ушеды сёрмадыхнень ёткста 1939 кизоня васенцекс нолдазе васенце книганц—«Велень расскаст». Войнав тусь кельгома велестонза, Мокшеть ваксста, конатнень сон ашезень кадонда, хоть и аф весть мярьгондсть теенза самс работама Саранскяи. Тусь и меки изь мрда.
Сембодонга няевикс и содафокс марявсь эста эрзянь поэтсь Алексей Рогожин—фалу щафоль уряднайста, прянц вятезе аф што «киян мон», но мезе-бди ульсь сянь эздовок. А конашкава сельмонь каяма вастокс ульсть поэттненди сонь кафта оцю произведениянза, конат сёрматфтольхть стихса,—«Гале» и «Литува»! Мондине-арам, М.Безбородовонь и A.Рогожинонь лангс ванозь, ся кизотнень ламоц поэттне тяряфнесть сёрмадомс «оцю произведеният». Тусь войнав, меки куду изь мрда.
Мзяра синь эздост тяфтамда—тусь войнав, меки изь мрда,—кафта кядень суроньке лувомост аф сатыхть. Петр Кономанин, кона сявсь да ётафтозе эрзякс (изь пеле сталмода!) М.Лермонтовонь «Песня про царя Ивана Васильевича, молодого опричника и удалого купца Калашникова» произведениянц; Александр Зиньков, Павел Батаев, Андрей Юргай (Сафронов), Василий Водясов, Степан Прохоров (Кумбря), Николай Филиппов—Писателень союзть правлениянц эстонь ответственнай секретарец. Сембоц 13 поэт и прозаик.
Монь аш кодамовок кагодозе, штоба корязонза азомс, мзяроль мокшэрзянь писательда Великай Отечественнай войнань крьвязема кизоня. Но эсь мялямсон кемоста кирдьсайне лемснон сятнень, кинди удалась мрдамс войнаста живста или ранендафста. Нят—К.Абрамов, С.Вечканов, П.Гайни, Н.Эркай, А.Карасев, П.Кириллов, В.Коломасов, А.Лукьянов, А.Моро, Я.Пинясов, Г.Пьянзин, Е.Пятаев, В.Радин (Аловский), А.Щеглов. Писательхнень-фронтовикнень пялесна лядсть фашисттнень каршес тюрема паксятнень лангс—кие эсь масторсонк, а кие, кода тяни корхнихть, маластонь или ичкоздень омба масторса.
Катк лядыхть синь мялямозонк и сай пингонь эряйхнень ёньц ся произведенияснон мархта, конатнень кенерсть сёрмадомс войнать сюнеда нюрьхкалготф эряфснон пингста.

 

03.07.2015 №
 
 
 

 
НОВОСТИ
 
 
 
 
 
 

МОРДОВСКЯЙ ГОСУНИВЕРСИТЕТСА ПАНЧФ УЧЕБНО-НАУЧНАЙ ЛАБОРАТОРИЯ

2 апрельста Мордовиянь Оцюнясь В.Д.Волков ульсь Н.П.Огаревонь лемса      МГУ-са, коса ванозе лекарственнай средствань технологиянь учебно-научнай лабораториять и корхнесь од ученайхнень и студенттнень мархта.
Лекарственнай средствань технологиянь учебно-научнай лабораториясь панчфоль Физикань и химиянь институтть видеса 2019 кизоня университетть и «Биохимик» АО-ть марстонь вийса. Тянкса нолдафоль пцтай 4 миллиотт цалковай (фкя миллион цалковайсь—предприятиять). Лабораториясь козякофтф тяниень пингонь оборудованияса, кона максси возможность етафнемс аф аньцек учебнай занятият, но и фармацевтическяй субстанциятнень и анок лекарственнай форматнень технологияснон анокламанц коряс научнай исследованият. Лабораторияса студенттненди ули кода пяшкодемс лекарственнай препараттнень производстваснон действующай веществать синтезонц эзда сявомок анок продукцияти молемс. Лиякс мярьгомс, тевса варчсесазь университетса получаф содамошитнень.
11.04.2019  № 14
 

1 апрельста ушедсь 2019 кизоть омбоце пяленцты газетас и журналс сёрматфтомась

11.04.2019  № 14
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин