Кштийхть и морайхть велень артисттне

Фестивальть панжемста Мордовия Республикань культурань и туризмань министрсь В.И.Шарапов мярьгсь:
«Шумбрат, Мордовия!» фестивальсь—тя народть ваймоц. Сон пуропнесамазь марс, тиендьсы сяда кемокс и виикс российскяй марнек народть. Праздник мархта!»
Васенцекс творческяй маштомошиснон республиканскяй сценать лангса няфтезь Чамзинскяй районцта саф самодеятельнай артисттне. Чамзинкась етай кизоть сатозе тя пуромксса васенце вастть, а тядде панжезе сонь.
Фкя ваймоса ванфоль-кулхцонтфоль концертсь. Мокшэрзянь, рузонь народнай моротнень мархта программаса маштозь ладяфтольхть кштиматне и авторскяй моротне. Иттнень мархта ряцок сценати лисендсть эряфкшуфне. Кядень цяпамась, улема, инь кайгиста кулевсь пенсионеркать Валентина Фирстовать «Деревенщина» стихотворениять лувомда и 5-це классонь тонафнить Виктория Котинать морамда меле.
Сяльде част пяле мархта пингс сценаса ульсть Ковылкинскяй райононь артисттне.  Концертонь программать вятезь А.С.Пушкинонь образса Илья Гаршин, Мордовия Республикань культурань Заслуженнай работниксь Любовь Канайкина и рузонь классикть «Руслан и Людмила» поэмастонза Катоть образса Сергей Борцов.
Аф васенце кизось фестивальса морсихть Порапань «Мокшава» (руководителец Ирина Кудашкина) и Курнино велень «Лаймоня» (руководителец Анна Бутылкина) фольклорнай ансамбльхне. Мокшень моросна, национальнай мазы щамсна салазь ваныхнень мяльснон.
Концертта башка, Дворецу сайхненди ся пингть ульсь кода ваномс «Мокшэрзянь масторть мастерствац» декоративно-прикладной творчествань выставкась. Сельмованф салась машты кядьса сембе тифсь.
***
25 октябрьста «Шумбрат, Мордовия!» народнай творчествань республиканскяй фестивальть поладозь Краснослободскяй и Рузаевскяй муниципальнай райоттне. Синь усксть декоративно-прикладной творчествань выставкат, конатнень сайхне ванозь оцю мяльса.   Концерттне лемтьфтольхть Литературань кизоти.
Васенцекс сценати лисендсь Краснослободскяй муниципальнай районць. Отчетнай концертоц ащесь комозьда лама номерста. Панжезь сонь «Родничок» народнай вокальнай ансамбльсь и «Гармония», «Калейдоскоп» кштимань коллектифне «Краснослободские» мороса. Сяльде ульсть кштимат, морот… Башка азома Мордовия Республикань культурань Заслуженнай работникть А.П.Рябовать колга, кона сонць тяшни морот—валхт и музыка. «Морак, сединязе монь» мороть Анастасия Павловна сонць арьсезе, сонць и моразе. Котоце номеркс мольсь «Мокшень баяраваня» мороц, конань моразе «Мокшаваня» народнай фольклорнай ансамбльсь, руководителец—А.П.Рябова.
Концертть эзда ширеса ашезь ляда оцю поколениясь—«Ветеран» хорсь, пенсионерсь А.Малозёмов, лиятне.
Сяльде меле сценасоль Рузаевскяй муниципальнай районць, кона Саранскяи ускозень художественнай самодеятельностень инь валдста палы «тяштензон».
Васенда пуромфненди седиста моли лямбе валхт азсь Рузаевскяй муниципальнай райононь администрациянь оцюнясь Н.В.Иняткина.
Тядде пяк ламоль авторскяй выступленияда: «У слова вечность впереди» стихсь (поэтсь О.Жуковская), Литературань кизоти лемтьф «Сон» прологсь (авторсь О.Жуковская), конань няфтезь «Дебют» народнай театрась и ламотне лиятне.
Аф кржаль премьерада: «Голос ребёнка» морось (морайсь Ксения Антонова), «Сегодня дождь» («Надежда» вокальнай ансамбльсь) и стак тов.
Мокшень Пишляста «Лихтибряня» фольклорнай коллективсь моразе «Вастома» ансамбльть репертуарста «Айда, ялгат» мороть, тердемок пуромфнень Сёмань ширес бозада и эсь паньфкянь симома. Левжаста «Ару лихтибря» народнай фольклорнай ансамбльсь, «Пайгонят» идень фольклорнай ансамбльсь и лия левжаряйхне ашезь када озадонь седихть ащема киньге.
«Шумбрат, Мордовия!» фестивальсь моли сяда тов.