Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

Мордовиянь культурань и туризмань министрть заместителец Н.Л.Храмов:

«СОН КАНДСЬ КУЛЬТУРАТИ ЛАМА ЦЕБЯРЬДА!»
—Николай Леонидович, тяддень кизось пяк козя культурань аф фкя лацонь мероприятияса. Сяс лувити пара ули содамс, конат эздост тейть арасть инь мяляфтовикс?
—Тейне, конешна, питнихть сембе мероприятиятне, конатнень минь ётафтоськ Мордовияса и Россиянь лия регионца тячиень шить самс. Сяс мес синь анокламстост и етафтомстост вийда карьхцяф аф кржа.
Но инь мяляфтовикс тейне, конешна, арасть ся мероприятиятне, конат ётафтовсть тя кизоня Россиянь Президентть В.В.Путинонь Указонц вешфксонзон коряс, конаса 2015 кизось лемтьф-азф Литературань кизокс. Мярьктяма, лама цебярьда национальнай письменнай культурати кандсь «Мокшэрзянь писателень инь цебярь 100 книга» проектсь, кона тя кизоть ушетксста вятеви республикаса. Минь ведомствадонк башка, тя проектть анокламанцты оцю путкс тяфта жа путсть Мордовиянь Национальнай политикать коряс и печатень и информациянь министерстватне. И монь койсон, тейне тячи ули кода азомс: тя проектсь ашезь ёта лувихнень ванфснон вакска. Сяс мес интернетть вельде лама ломань ни максозе эсь вайгяленц мокшэрзянь тя или тона писательть книганц инкса. Итокнень азсыне профессиональнай жюрись декабрь ковста. Надиян: лувихне кочкасазь инь цебярь книгатнень, конат сувайхть «Мокшэрзянь писателень инь цебярь 100 книга» лувксти.
Эсь потенциалснон коряс тя проектти тяфта жа малат «Шумбрат, Мордовия!» фестивальсь, «Волга—река мира» Международнай этнокультурнай фестивальсь и Россиянь великай поэтть С.А.Есенинонь 120 кизонь юбилеенцты лемтьф мероприятиятне.
—А кодама соткст республикань Культурань и туризмань министерствась кирди мокшэрзятнень мархта, конат эряйхть Россиянь лия регионца?
—«Национально-культурнай автономиятнень колга» республикань законть вешфксонзон коряс, кона миньцонк примаф нинге 2004 кизоня, минь Россиянь лия регионца компактнайста эряй мокшэрзятнень шири сидеста кучсетяма национальнай ансамбльхть, панчсетяма картинань, национальнай ремеслань, снимкань и книгань выставкат. Сидеста тоса ётафнетяма марстонь вийса тостонь мокшэрзятнень мархта лама лия мероприятия. Синь эсь духовнай вийснон вельде аф аньцек виияфтсазь диаспораса мокшень и эрзянь кяльхнень, национальнай культурать и койхнень-обуцятнень, но и няевиста кемокстасазь российскяй нациянь нароттнень ёткса ялгаксшинь и ладямань соткснень.
Мордовиянь Национальнай политикать коряс министерствать лезксонц вельде минь тяфта жа кучсетяма диаспорань школатненди учебникт, конат сёрматфт мокшень и эрзянь кяльса. А тостонь творческяй коллектифненди—национальнай костюпт и музыкальнай инструментт.
Сяс, монь койсон, тейне тячи ули кода азомс: Россиянь лия регионца эряй мокшэрзятнень мархта минь сотксоньке кизоста кизос аньцек кемокснихть!
—Тонь койсот, Николай Леонидович, Мордовияда башка, Россиянь кодама лия регионца инь цебярьста мольфтевихть мокшэрзянь тефне?
—Мон мярьголень, тяни мокшэрзянь тефне инь цебярьста мольфтевихть Самарскяй и Ульяновскяй областьса. Тостонь школаса тонафневихть мокшень, эрзянь кяльхне и литературась, сидеста ётафневихть национальнай аф фкя лацонь мероприятият.
Мярьктяма, аф кунара улень Самараса, коса ётафтовсь ярмарка. И, мярьгат, повонь Мордовияв. Сембе ширде кулевсть корхтамат мокшень и эрзянь кяльса, кайгсть мокшэрзянь морот.
Ня кафта региоттненди мокшэрзянь тефнень мольфтемаснон коряс тяфта жа малат Пензенскяй, Саратовскяй, Оренбургскяй и Нижегородскяй областтне.
—Тя кизонь культурань проекттнень ёткса улихть стапт, конат кармайхть мольфтевома сай кизонявок?
—Минь аф кунара Мордовияса ётафтоськ эряфс «Велень мазы ки» выставочнай проектть. Эсонза республикань велеса эряйхненди мокшэрзянь художникнень картинаснон вельде няфневихть Мордовия Республикать сембе ширдень мазышинза. Картинань выставкась ульсь ни кота районца. И эрь мезне сонь ваномонза сашендсь тёжятть ломань. Сяс саме тяфтама мяльс: Мордовия Республикаса няфтемдонза меле «Велень мазы ки» проектть тяфта жа эряви няфтемс и Россиянь лия регионца, коса компактнайста эряйхть мокшэрзят.
Тоса жа арьсеви ётафтомс мокшэрзянь художникнень персональнай выставкаса. Тостонь мокшэрзятнень мархта тянь коряс минь ни саме фкя мяльс. Сяс аф лама пингта меле минь тага кеняртьфтьсаськ диаспорань мокшэрзятнень и российскяй нациянь лия народонь зрительхнень.
—Сюкпря, Николай Леонидович. Надиятама, што сай кизоське Мордовия Республикань культурати канды лама цебярьда.
—Катк тяфта и ули.
В.НЕСТЕРОВ.

 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022