«РостАГРО» ООО-сь ТЕВТЬ ЛАТЦЕСЫ САЙ ПИНГТЬ КОЛГА АРЬСЕЗЬ

«РостАгро» ООО-сь тиевсь-пуроптовсь ефси аф кунара—2014 кизоть песта. Но, аф ваномок «одксшинц» лангс, сон сатсь ни аф кальдяв результатт. Вятикс тя хозяйствати кемокстаф Наталья Андреевна Куликова. Сон, нинге ефси од руководительсь, сафнесы сембоса.
Поздравляндамок фкя-фкянь етай сембе праздникнень мархта, Наталья Андреевна отвечась кизефксоньконь лангс.
—Тусь историяв нинге фкя киза—2015-цесь. Наталья Андреевна, азк, пожалуйста, кодамоль сон тинь хозяйствантенди—«Ростагро» ограниченнай ответственностень обществати?
—«РостАгро» ООО-сь пуроптфоль-тифоль 2014 кизонь декабрь ковста Ковылкинскяй муниципальнай районца. Кодама тевса заняф «РостАГРО» ограниченнай ответственностень обществась?—кизефтьсамасть. Кирдевихть миньцонк жуватат, касфневи сера, тиендевихть транспортнай услугат населенияти и организациятненди-кинди. Аф юксневихть велень поселениятне. Пяшкотькшнесась аф аньцек синь вешфксснон, но и лезнетяма.
—Мезьса и кода?
—Тяни, няйсаськ, ульцяса тяла, сяка-тев вельхневихть китне ловса. А минь молочнай комплексоньке Ковылкинскяй райононь Рыбкина велеса. Шарьхкотьф, даволда, вишке ловда меле, кда аф урядавихть-аруяфтовихть китне, тоза аф пачкодят. Вов и сашендовихть урядамс синь. И аф аньцек молочнай комплексу вятихне, но и Рыбкинав. Штоба иттненди теждя улель школав, идень садику етамась. Да и магазину, пчкафтомань учрежденияв эрявксни молемс и оттненди, и эряфкшуфненди.
Аф-аф, да кизефтьсамазь, кодама наследства сатсь тейне, тяниень хозяйствань вятити. Тяса наследствань колга корхтамска аф сашендови. Минь хозяйстваньке—одс пуроптф предприятия. И, кода ни азыне, заняфтама животноводствань, растениеводствань тевса и пяшкотькшнетяма транспортнай услугат аф аньцек населенияти, но и муниципальнай образованияти.
—Хозяйствасонт мзяра сембоц жуватада?
—КРС-та—вете сядода лама пря. Синь кой-конашкасна сявфт арендас Ковылкинскяй муниципальнай районцта, а лядыксне—комплекснай управляющайхнень кядьста. Тиф мархтост договор молочнай комплексть, жувататнень, техникать арендас сявоманц коряс.
—Наталья Андреевна, кода сотцеви, нинге  ефси аф кунара ламоц хозяйстватне рамсесть жуватат омба масторста. Мезе азат тянь колга?
—Мон тяфтама аськолксть ширенц аф кирдьса. И тя сяс, мес миньцонк, Россияса, аф кржа племенной центрада, коста можна добувамс цебярь породань жуватат. Мезе арьсетяда, омба масторста сяда цебярьхть пачфневихть? Минь эрятама Россияса, минь россияттама и тевс ноляма сембось ся, мезсь аноклакшневи, касфневи тязк. Миньге арьсекшнетяма тядде ламолгофтомс жувататнень лувксснон эсь странасонк касфтф ведрашнень вельде. Тяни работатама тянь лангса, но сембе секреттнень мзярс аш мялезе панчсемс.
—Коллективонте кеме, работама машты, содасы, кода касфтомс жувататнень продуктивностьснон. А кда  тяфта, улема, результаттневок аф кальдяфт?
—Кда мяльса кирдемс лофцонь получамать, то 2015 кизоня сатфксне аф ламода, но кеподсть.
—И мезть вельде тя сатовсь?
—Аф стак мярьгондихть, што жуватать лофцоц кяльбрясонза. И нят аф шава валхт. Жуватаньке топодьстот. Макссевихть минеральнай добавкат, мезть сюнеда лофцсь мишендеви сатомшка жирностень. Тядде планцонк анокламс стама жа минеральнай удобреният, кодамот рамсетяма Саратовскяй областьста. Тяфта ламолгофтови и лофцонь получамась.
—Мзяра ломань заняф животноводстваса?
—Миньцонк ефси аш кядь вельдень труд. Сембось автоматизировандаф. Ялгатама сембе однять мархта, мезсь эрявксни животноводстваса. Кепотьксонди, миньцонк работафтови «Елочка» доильнай установкась. Мзярс соньге сявоськ арендас. Эряенди тянь коряска эвондайхть оцю полафткст. Кда корхтамс дояркатнень колга, то синь эздост кота ломатть. Улихть и телятницат, конат якайхть аньцек вазыяф вазнятнень мельге. Сембе синь тостоконь—Рыбкинань. Мезенди пачфнемс ломатть Ковылкинаста, кда мушендовихть тосток. Тя вдь стяшенды сяда уцезста. Работайхть синь виень аф ужяльдезь. Васендакиге лятфталине дояркатнень-сазорхнень Тарасоватнень. Ванат кода синь тиендьсазь тевснон, мяльце кеподи. Жуватаснон мархта корхнихть бта ломанень мархта. Синь пичедихть тевснон инкса.
Жуватань комплекссь ащи кода-бди кафта пяльксста. Фкаса кирдевихть жувататне, омбоцеса—потьневихть синь. И тяса, и тоса аруши. Штоба кирдема вастста етафтомс жувататнень доильнай помещенияв, ульцяв синь аф эрявкстыхть лихнемс—ули специальнай етама васта. Аш кодамовок стресс потямстост.
—Наталья Андреевна, анокламс продукция—тя фкя. Но сон эряви нинге реализовандамс. Кинь мархта работатада?
—Лофцть прважсесаськ Торбеевань «Молоко» ограниченнай ответственностень обществав. Работатама мархтост хозяйстваньконь панжема шистонза сявомок. Питнесь тушенды мялезонк, сафтсаськ фкя-фкянди.
—Населениять кядьста аф рамсетяда лофца?
—Виденц азомс, тяни траксонь кирдихтьке, можна мярьгомс, аш. Тянкса или лиянкса, но тяфтама работа аф мольфттяма. Минь минцень продукцияньке сатомшка.
—Катк тяни сембе вастова работась латцеви механизматнень вельде, тевс ноляви инновациясь, но сембе сяка, согласиндада мархтон, велень хозяйствань тевсь аф теждятнень эзда. А кодама заработнай платац велень труженикть?
—Тяни «РостАгро» ООО-са работайхне получайхть аф сяда кржа сянь коряс, мзяра получсесть «Рыбкина» агрофирмаса. Ломаттнень, а целайнек нят сят, кит работцесть агрофирмаса, мяльс тевсна тушенды. Да вдь кочкамска пяк аф сашендови. Работада велеса тинць содасасть мзяра. И месть, мярьгондихть синць, цебярть эзда вешендемс сяда цебярь. Зарплатась макссеви эсь пингстонза. И, велень меркатнень коряс, аф кальдяв. Сянкса и од ломаттневок оцю мяльса сашендыхть ширезонк. Виденц азомс, пелендень, што оттне аф кирдевихть велеса. Эльбядень кой-конашкада. Улест условият, пандовоза эсь пингстонза зарплата, кивок аф лийкстай тядянь лямбоса эжтьф уженястонза. И нинге. Кода содасаськ, республикась аф юксни велень хозяйствать колга. Кирдевихть ширесна ломаттнень, конат работайхть велеса, макссевихть субсидият велеса эряма вастонь строямс и лия тевонди.
—Инновациятне. Тя тяни инь васенцесь сембе тевса, тяконь лувксса и велень хозяйстваса. Мезе азат тянь коряс, Наталья Андреевна?
—Работатама «Развитие села» ГУП-ть мархта. Ширдест, эряви азомс, ули шарьхкодема. Сублизингс коре сявоме эрявикс техника. Тядде мяленьке добувамс комбайнат-месть эсь вийсонк.
—Наталья Андреевна, тяни эрь етатама растениеводствати. Азк, пожалуйста, мзяра гектар модадонт?
—Колма тежятть гектар. Тя аф кржа минь аф оцю хозяйстваньконди. Касфнетяма зерновой, зернобобовай культурат. Ули и озимой тозероньке. Надиятама получамс цебярь урожай. Тяда башка, витцеви ячмень, снав и пинем. Сатфксне цебярьхть. Ули и модамарень плантацияньке. Аф оцю—30 гектар занцеви, но тейнек тя мзярс сатомшка.
…Наталья Андреевна стаки азондсь хозяйстваса тевснон колга, а минь сатфксснонды аньцек дивандакшнеме и арьсеме сяда товолдонь пара тефт.