«ЭТНОШКОЛА» ПРОЕКТСЬ—ПЕНЗЕНСКЯЙ ОБЛАСТЕНЬ КИЖЕВАТОВО МОКШЕНЬ ВЕЛЕСА

29 апрельста «Этношкола» проектсь ульсь Пензенскяй областень Бессоновскяй райононь Кижеватово мокшень велеса. Инголи сон каннесь Селикса, сяльде—Рождественское лем, 1963 кизоня арась Кижеватовакс. Тифоль тя Советскяй Союзонь Геройть, 9-це пограничнай заставать начальниконц, Великай Отечественнай войнань васенце недялятнень Брестскяй крепостть оборонанц героенц, мордвинть Андрей Митрофанович Кижеватовонь колга мялямть ванфтоманкса. Советскяй Союзонь Геройсь А.М.Кижеватов шачсь 1907 кизоня тя велеса, а шавовсь Брестскяй крепость араламста 1941 кизоня. Кижеватоваса ладяф бюстоц, школаса лемозонза панчф музей.
Тяни Кижеватовскяй средняй общеобразовательнай школаса тонафни пцтай 200 идь, аньцек ветесь эздост сашендыхть Чемодановка шабрань велеста. Стирнятне и цёранятне маряйхть гордость землякснон, мордвинть А.М. Кижеватовонь инкса. Кирдихть кеме соткст Белоруссиянь Брест ошть мархта, коса сязевсь Андрей Митрофановичень эряфоц, коса немецне ляцезь марнек семьянц: тядянц, рьванц и идензон—15 кизоса Нюрать, 11 кизоса Ванять и кафта кизоса Галять. Школать директороц В.В.Крюков азондсь Мордовияста сайхненди школать, музейть историяснон квалма, а стане жа содафтозень синь тонафнемань заведениять тячиень шинц мархта.
Финно-угорскяй народонь культурань Поволжскяй центрать директоронц Р.И.Акашкинать лемста Благодарностть максфтольхть В.В.Крюковонди, велень поселениянь оцюняти И.М.Кондрашкинонди, мокшень кялень учительти М.С.Сарайкинати, а школати казьфтольхть книгат: Мордовиять квалма, национальнай литература и стак тов.
Поволжскяй центрать координаторонза И.Н.Астайкина и В.В.Кирдяев пачфтсть «Этно-школа» проектть эряфс ётафтоманц колга. М.Е.Евсевьевонь лемса Мордовскяй государственнай педагогическяй институтонь филологическяй факультетонь родной кялень и родной литературань кафедрань доцентсь, филологическяй наукань кандидатсь С.И. Маскаева азондсь мокшэрзянь масторть, тястонь вуснень квалма. Эсь лацонь казне тись Н.П.Огарёвонь лемса Мордовскяй государственнай университетонь творческяй группась—няфтсь концерт, конань пингста Кижеватово велень школаса тонафнихне содафтсть мокшэрзянь фольклорть, кштиматнень, щапнень-каряпнень мархта.
Сембонь мяльс тусть мастер-классне. Ветеце класса тонафнихненди мокшень кялень урок ётафтсь учительсь М.Н.Миронова, котоцеса—хореографиять коряс занятия няфтсь Н.П.Огарёвонь лемса Мордовскяй госуниверситетонь Национальнай культурань институтста искусствоведениянь кандидатсь М.А.Костерина, вейхксоцеса—декоративно-прикладной творчествань мастер-класс Е.В.Щербинкина.
Кижеватовась—мокшень оцю веле, сяс тяса ломаттне ёрайхть ванфтомс национальнай культурать. Пара, што хуш факультатив лаца школаса тонафневи мокшень кяльсь, иттне содафневихть коеньконь-обуцяньконь мархта.
Нинге весть мялезе мрдамс Советскяй Союзонь Геройти А.М.Кижеватовонди, конань колга тя велеса мяляфтыхть сембе. Бюстоц, кона ащи школать каршеса, лемозонза панчф музейсь тянь нинге и нинге весть няфнесазь. 2010 кизоня снимандафоль «Брестская крепость» художественнай фильма, коса лейтенантть, мокшень велеса шачф алять роленц налхкозе содаф актёрсь Андрей Мерзликин. Школань музейса ванфтови автографонц мархта фотографиясь, кона тиф вяре азф фильмать лангса работамста. «Геройхнень тяса аф юкснесазь!»—тянь ули кода азомс Пензенскяй областень Бессоновскяй райононь Кижеватово мокшень велеть колга.