МАЗЫХТЬ МОКШЕНЬ СТИРЕНЬКЕ

Мазыхть, асуфт, ёнюфт, кодама тевс афольхть кярьмоде—сембоса сафтсазь! Кода шарьхкодесть, корхтамась моли мокшень стирьхнень колга, теест и лемтьф газетасонк пялькстомась. Лятфтасаськ: тянди эрявихть участницатнень мокшень щамса наряжафста снимкасна, азондома колгаст. Редакциянь адрессь, телефоттне максфт газетать мекольце лопанясонза. Сашендода, гайфнеда, тяшнеда тейнек!
Тя номерсонк содафттядязь Алёна Соломатовать мархта. Мокшень стирсь эряй Москуса, а шачемас коре Рузаевскяй райононь Красное Сельцо велеста. Лажаткшни тядянь-алянь уженяти, мокшэрзянь кельгома масторти. Аф ваномок вайгяльбетнень лангс, мзярда эвондакшни пингоц, эряскоды вели. Кепотьксонди, маень мекольце ваймамань шитнень сон ётафтозень Мордовияса.
Шнасаськ мокшень стирть морамань асушинц инкса. Нинге ёмласта салсезе мяленц ся, кода праздниконь шитнень мокшень, рузонь морот морсесть раднясна. Смекамок стирнять асувонц, тядянза-алянза максозь тонафнема Рузаевкань 1-це музыкальнай школав. Школаса тонафнемань кизотнень няфнезе прянц районнай, республиканскяй лама пялькстомаса. Школать аделамдонза меле эряфонь кись вятезе А.Соломатовать Москуву. Тонафнема вастонди сон кочказе Услугань сферань 10№ колледжть. Лац тонафнеманц, асушинц инкса стирть тернезь пуромксс и пялькстомас. Инь мяляфтовикс теенза студентонь кизотнень арась «Студент года СПО» пялькстомась, конань эса мокшень стирсь лиссь сяськикс «Инь творческяй студент» номинацияса. Мокшень мазы щамса-карямса лисендсь сценати и моразе «Акша лов» мороть. Тянь мархта Алёна аф ламода содафтозень ваныхнень мокшэрзянь культурать мархта, няфтезе инксонза гордостень маряманц. Варжафтозе эсь кядьса пидеф-паньф ярхцамбяленц.
Кода корхнихть, асу ломанць асу сембоса. Тяфта ули кода мярьгомс А.Соломатовать колга. Сон машты налхкома гитараса, домраса, музыкальнай лия инструментса. Мазопни точечнай тяштьксса кядьгот, тиенди магнитт-месть, налхконды театральнай постановкаса, аноклакшни шабат пуромксненди. Кельгома тевонзон ёткс канневи художественнай лувомась.
Тядде мокшень стирсь аделасы тонафнеманц колледжса, сермады дипломнай тев. Тяка пингть Алёна работай идень аниматоркс: ётафни налхксемань программат иттненди ёфксонь и мультипликационнай образса, «мыльнай» шоут.
Лажатфонц Мордовияти ётафнесы Москувонь мокшэрзянь землячестваса. Сувси тостонь «Тяштеня» ансамбльти. Творческяй коллективть мархта морси мокшень морот, путни сценкат тя или тона пуромксти. А.Соломатовать валонзон коряс, мокшэрзянь землячествать концертонзон пингста марясы прянц бта шачема-касома уженяса. Кенярди стирсь, мзярда эряфкшу ломаттнень ёткста няенди отт, конат лацонза лисендихть сценать лангс. Тя афкукс максы надияма национальнай культурать сай пингонь эрекшинцты.