Поиск по сайту: 
 

Архив
 февраль 
 2019 
пн вт ср чт пт сб вс
    123
45678910
11121314151617
18192021222324
25262728   

 
 

 

Религия

ДРАКИНАНЬ ПОКРОВСКЯЙ АЛЯНЬ МОНАСТЫРТЬ ПАРА ТЕВОНЗА

Мелянь 4 декабрьста Дракина велень алянь Покровскяй монастырсь отмечазе сяда кизонь юбилеенц. Архитектурань историческяй тя памятниксь ащи велеть кучкаса и эрь службати пуропни лама ломаньда. Шкайти озондыхне сашендыхть аф аньцек Дракинаста, но и марнек Торбеевскяй районцта, а стане жа Атюрьевскяй, Зубово-Полянскяй, Ковылкинскяй райоттнень, шабрань Пензенскяй и лия областтнень эзда.
Очижинь карша, Ару Шуваланяста, алянь Покровскяй монастырьса службаса ульсь корреспондентоньке И.П.Вешкин, кона корхнесь службань вятихнень, тястонь эряйхнень, Шкаенди озондыхнень мархта.
Алянь Покровскяй монастырьса васьфтень оцю делегация Зубово-Полянскяй райононь Потьма велеста.
—Синь сафт сяряди идень кудста-интернатста,—мярьгсь монастырть настоятелец игуменць Пахомий (Куцин).—Пцтай комсь киза кирттяма соткст тя интернатть мархта. Якатама иттнень мархта васьфтема, синцьке аф юкснесамазь. Вов и Ару Шуваланяста ширезонк сась пцтай марнек коллективсь. Тя минь пяк кеняртьфтемазь.
Интернатонь оцюнясь Д.А.Макаров шарфтсь мяль сянди, што монастырть мархта кеме сотксонь кирдемась канды цебярь и сяряди иттненди, и тоса работайхненди. Тя ялгаксшись ушедсь нинге эста, мзярда тя кудса азораваль Дмитрий Александровичень тядяц Раиса Алексеевна, кона кафта кизода инголе кулось. Ётай веконь вейхксогемонце кизотне стакатольхть. Монастырьса служайхне усксесть интернатонь эряйхненди ярхцамбяль, кочксесть ярмак. Лезнесть лия тевса. Тяни пингсь лия, но казнефтома вестевок аф якайхть. Воскреснай школав сашендыхне няфнихть концертт. Шумукс аф лядондыхть интернатса эряйхневок—синьге аноклакшнихть концертт, казнет. Игуменць Амфилохий (Куцын) няфтезе казнеть, конань казезе фкя стирнясь. Шабать сярядихть кяденза, аф кулихть пиленза, аф корхтай. Но мзяра эсонза верондамада, надиямада, кенярдемада. Тяфтама ломаттнень мархта васьфтемась фалу оцю праздник батюшкать эряфса.
Интернату якайхть Роштуваста, Покравста, Очижиста. Улендихть и лия праздникста. Потьмань интернатть видеса 2012 кизоня панчсть озондомань комната.
Рузонь православнай церькавонь Синодть решениянц коряс, 1997 кизоста сявомок Дракинань Покровскяй церькавонь приходсь тифоль монастырькс. Васенце настоятелькс ульсь игуменць Пахомий (Куцин). Сон тянивок вятьсыне монастырень тефнень.
—Ломаттнень ёткса ульсь аф шарьхкодема,—азозе игуменць Амфилохий.—Синь корхнесть, што сайхть монахт, а храмса службат аф кармайхть, лоткафтовихть венцямань, кстиндамань и лия тефне. Ульсть пеняцямат, аф верондама. Пингонь ётазь шарьхкодезь, што тя аф тяфта. Монастырсь кочкась вийхть. Сядовок одкстомсь, мазомсь. Ломаттне тянь няезь. И тя пяк кеняртьфти.
Амфилохиень валонзон коряс, ломаттне венемихть Шкайти, сашендыхть озондома. Но, кда кирдемс мяльса, што Дракинаса тяни эряй  1600-да лама ломань, а службав сашенды кодгемонць-кафксогемонць эздост, тя аф сяшкава и лама. Но монастырьса эряйхне семботь тиендьсазь сянкса, штоба кись храмти фалу улель такор.
Кемонь кизода ламос монастырть видеса работай воскреснай школа. Игуметтне Пахомий и Амфилохий пуроптсть перьфкаст Торбеевскяй райононь 700-да лама шаба. Якайхть школатнень эзга, работайхть иттнень, тонафтыхнень мархта. Кирдемок мяльса, што Дракинань школаса тонафни 105 идь, 72-сь эздост якайхть воскреснай школав. Занятиятне ётафневихть официальнай программать коряс. Сембе платтнень, разработкатнень ули экспертнай заключениясна. Занятиятне школаса улендихть Мордовия Республикань Образованиянь институтть программанзон мяльса кирдезь. Кода и сембе школатнень эса, улихть урокт, мольфтеви аф класснай работа. Урокнень эса корхтайхть Шкайти верондамать, праздникнень, святойхнень, святой васттнень, монастырьхнень и ламоть лиять колга. Ванондыхть фильмат, кулхцондыхть православнай музыка. Шабатнень улихть рабочай тетрадьсна, теест макссевихть заданият. А аф класснай работась—концертт, экскурсият, паломническяй якамат святой содаф васттнень эзга. И сембось тя тиендеви Покровскяй монастырть ярмаконзон лангс. Кепотькста можна лятфтамс пяк лама. Якасть Санаксарскяй, Дивеевскяй монастырьхненди, Ф.Ф.Ушаковонь музе-езонза, ульсть Муромса, Валаамса, лия вастса.
Воскреснай школаса эрь кизоня тиендевихть выпускной илат. Тядде нолдасазь кафксоце классть. Тя илась арьсекшневи етафтомс Дракинаса 21 майста. Классне аноклайхть поздравленият. Няфтихть концерт. Улихть поздравленият тядятнень-алятнень, учительхнень, священникнень эзда. Выпускникне нолдайхть менели гуленят.
Райононь школатнень эса мольфтевихть «Основы православной веры» урокт. Синь вятисна, а тя 100-да лама тонафты, етасть курст монастырть видеса. Монахне киндивок аф атказайхть лездомс, кенкшсна панжадот сембонди.
Игуменць Амфилохий вятнесамазь монастырть эзга. Кепси мяль спортивнай залсь, коса кемокснесазь шумбрашиснон иттне, велень од ломаттне. Ули хореографиянь класс. Стирнятне тонафнихть стама, кодама. Путнихть сценкат, снимандайхть эсь колгаст фильмат. Тяса семботь иттне тиендьсазь эсь кядьсост оцюфнень лезкс-снон вельде.
—Минь кафта кяденьконь кеподьсаськ воскреснай школать инкса,—мярьгсь Дракинань школать директороц Н.Д.Разгуляева.—Иттне фалу заняфт эрявикс, мялень салай тевса. Тя сяда кемокстасы дисциплинать, синь ефси лиякс ваныхть эряфть лангс, виияй фкя-фкянь еткса ялгаксшись.
Игуметтне Пахомий и Амфилохий тевфтома аф ащихть мзярдовок. Етафнихть Роштувань и Очижинь фестивальхть. Ветеце майста Торбеевань Культурань кудса ётась «Пасхальный благовест» идень творчествань фестиваль-пялькстома. Эсонза примасть участия синць и тонафнисна. А мзяра лия пара тевдост, конат эрявихть етафтомс эряфс.
 
 
И.ВЕШКИН,
«Мокшень правдать» эсь корреспондентоц.
Снимкатнень эса:
1.Дракина велень алянь Покровскяй монастырсь.
2.Игуменць Амфилохий  (озада васенце рядса види ширде васенцесь) Потьмань сяряди идень кудонь-интернатонь коллективть мархта Ару Шуваланянь службада меле.
Фототне авторть.
 

12.05.2016 №17
 
 
 

 
НОВОСТИ
 
 

ВАЛЕНТИН ВАСИЛЬЕВИЧ КОНАКОВ

2019 кизонь 27 январьста 80 кизонц лангса стакаста сярядемда меле тусь эряфста Валентин Васильевич Конаков—содаф государственнай и общественнай деятельсь, образованиянь и наукань пуроптысь, ученайсь.
Валентин Васильевич Конаков шачсь 1939 кизонь      9 июньцта Мордовскяй АССР-нь Атяшевскяй райононь Кулясово велеса крестьянонь семьяса.
Армияса служамда меле 1961 кизоня В.В.Конаков работась автомеханикокс Атяшевскяй «Сельхозтехникаса», а сяльде поступась Мордовскяй государственнай университету. Аделамок 1966 кизоня тонафнеманц, Валентин Васильевич кармась покодема образованиянь сфераса, 1966 кизоста сявомок 1979 кизоти молемс работась Мордовскяй государственнай университетса ассистентокс, старшай преподавателькс, металлонь технологиянь и машинань петемань кафедрань доцентокс, велень хозяйствань механизациянь факультетонь деканонь заместителькс. 1978 кизоня В.В.Конаков аделазе Московскяй лесотехническяй институтонь аспирантурать, теенза максфоль техническяй наукань кандидатонь лем.

31.01.2019  № 4
 

ДИПЛОПТ И ПРЕМИЯТ—АСУ ЛОМАТТНЕНДИ

Ётай недялять, 25 январьста, Российскяй студенчествань шиня Мокшэрзянь государственнай национальнай драматическяй театраса етась торжественнай пуромкс, конань пингста МР-нь Оцюнясь В.Д.Волков макссь казнет асу од ломаттненди. Мероприятияс пуромкшнесть аф фкя лацонь конкурсонь и олимпиадань сяськихне и призерхне, а стане жа  синь тонафтысна и тядясна-алясна.
Республикань Оцюнясь азозе, што асу од ломаттнень ширеснон кирдеманкса меля примафоль решения ладямс од премият школьниконь международнай и всероссийскяй олимпиадань сяськихненди и призерхненди.
«Международнай уровеньца сатфксонь сатоманкса премиять лувксоц 100 тежянь цалковайста сявомок 300 тежянь цалковайти молемс. Всероссийскяй олимпиадань мекольце этапонь сяськихне и призерхне получайхть 60 и 30 тежянень цалковай,—азозе Мордовиянь Оцюнясь.—Тядде лауреатокс арасть 43 школьниконьке. Тяда башка, казнет получайхть нинге 40 стирсь и церась, конат лац няфтезь пряснон  исследовательскяй тевса, социальнай и общественнай работаса, научно-техническяй творчествань и  профессиональнай мастерствань конкурснень эса».
31.01.2019  № 4
 

МОРДОВИЯНЬ ОЦЮНЯСЬ ВАНОНДОЗЕНЬ САРАНСКЯЙСА ОПТОВОЛОКОННАЙ ПРОИЗВОДСТВАТЬ ВИИЯФТОМАНЦ КОРЯС КИЗЕФКСНЕНЬ

Мордовиянь Оцюнясь Владимир Волков 22 январьста ётафтсь рабочай васедема «Оптиковолоконные системы» АО-ть генеральнай директоронц Андрей Николаевонь мархта. Ванондовсть предприятиять 2018 кизонь работань итогонза, а стане жа 2019 кизонди платтне. Ня кизефкснень ваномаса примась участия Правительствать Председателенц заместителец—промышленностень, наукань и од технологиянь министрсь Александр Седов.
Лятфтасаськ, оптическяй волокнань Саранскяй заводсь—фкясь и сякось странаса. Сон нолдафоль колма кизода инголе. Тя эсь лацонь производствать виияфтомань сембе этапонза етасть Россиянь промышленностень и торговлянь министрть  участиянц мархта. Владимир Волков аф весть васетькшнесь Денис Мантуровонь мархта, получсемок тя проектть, конанди вийс коре ладямс оптическяй волокнань производствать замкнутай цикланц марнек странать вешфксонзон мяльс сявозь, эряфс етафтоманц коряс республикать инициативанзонды ширень кирдема.
31.01.2019  № 4
 

МОКШЭРЗЯНЬ МАСТОРСЬ ТАГА ПУРОПТСЫНЕ ЭСЬ СТИРЕНЗОН И ЦЁРАНЗОН

Мордовскяй (мокшень и эрзянь) народть vii съездоц ётай тяддень
23-25 октябрьста республиканьконь столицаса
Мордовиянь Оцюнясь Владимир Волков 22 январьста Саранскяйса етафтсь мордовскяй (мокшень и эрзянь) народть VII съездонц, кона кармай тядде 23-25 октябрьста, етафтоманцты анокламать коряс совещания.
Совещанияса примасть участия Россиянь финно-угорскяй народонь Ассоциациять председателец Петр Тултаев, а тяфта жа мордовскяй народонь общественнай организациять Межрегиональнай представителенза, тяконь лувксса РФ-нь лия     субъекттнень эзда.
Владимир Волков мярьгсь, што мордовскяй народть съездоц работать важнай пяльксоц, кона мольфтеви властень оргаттнень и общественнай институттнень мархта традициятнень и межэтническяй ладямать ванфтоманц и ламолгофтоманц коряс—тя задачать путнесы странань Президентсь. Сай пингонь съездть инь главнай темац—«Мордовскяй (мокшень и эрзянь) народсь лама нациянь Россиять единай культурнай кодса».
31.01.2019  № 4
 
 

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

17.01.2019  № 2
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин