Поиск по сайту: 
 

Архив
 май 
 2022 
пн вт ср чт пт сб вс
      1
2345678
9101112131415
16171819202122
23242526272829
3031     

 
 

 

Письма из села

ЁЖКАТЬ УЛИ ВАНДЫЕЦ?


 

СОН АРЬСЕСЬ И САЙ ПИНГТЬ КОЛГА

Панжада седихть азса: монь, кода журналистонь, касфтомань «Мокшень правдась». Сон арась тейне родной тядякс. Теенза эряфстон казень 45 киза.

 

Мзярда арьсекшнян редакцияса ётаф кизотнень колга, фалу пара мяльса лятфнеса Василий Михайлович Сурковонь. И тя аф стак. Сон ульсь пяк цебярь журналист и пяк цебярь редактор, национальнай печатень афкуксонь патриот.

 

Эрь ломанть улихть тяштьксонза, конат тиендьсазь приметавикс лиятнень ёткса. Кда кизефтельхть, мезсь васендакиге шарфнесь мяль Василий Михайловичень эса, ламоц содафонза  азсазь: маштсь лаказь лакай тевонь срхкафтома, эсь мельганза ломанень вятема. Мзярдовок ашель оцюлгофнемац, аф прянь няйхнень эздоль. Сон лама вешсь эздонк и лама сонць макссь тейнек. Планёркатнень, редколлегиянь заседаниятнень эса Василий Михайлович фалу вешсь журналисттнень эзда  нолямс интереснай и содержанияс коре козя газета, штоба «Мокшень  правдать» улель сонцень шамаликоц, сонцень мазышиц. Сяс сон най башка мяль шарфнесь журналистскяй кадрань анокламати. Редакциясь пуропнезень эсь перьфканза мокша ломаттнень, конатнень ульсь асусна журналистикати, писателень тевти. Од журналисттне фалу кирдевсть главнай редакторть сельминголе. Синь кядьстост лама вешевсь и кизефневсь. А сят, кит вешендсть тёждя кит, редакцияса ламос ашесть кирнев. Сурковонь пингста, эряви азомс, пяк вииель «Мокшень правдась» творческяй работниконь ширде. Мзярдонга ашезь мадонда творческяй толняц журналистть Юрий Кузнецовонь. Сон фалу вешендсь и мушендсь од адрест, од темат. Пяк образнаель и козяль кялец.
 

 

 
25.11.2021 №46

 

Арась пара ялгакс

«Мокшень правдати» ёфси аф кунара, тяддень сентябрть песта, топодсь 100 киза! Тя векста сон аф весть полафнезе эсь «шамаликонц», вешендсь од темат, панчсесь од рубрикат, но эсонза аф полафтовикс ульсь фкясь—сон фалу ёрась тумс эсь лувиенц мяльс. Тяфта тевсь ащи тянивок. Минь, газетать смекаенза-арьсиенза, фалу ащетяма вешендемань киса, штоба эрь недяляня газетать од номероц суваль  морафтыть кудс учсеф инжикс, пара ялгакс.  Мялезонк арси лад, мзярда «Мокшень правдать» кельгиенза азондсазь эсь мяльснон мокшень кяльса лисенди фкя-тяка изданиять колга. Вов мезе кой-кит эздост пачфтсть аф кунара.
Рузаевскяй райононь Цифтамаз велеса шачфсь-касфсь, Моску ошень эряйсь Галина Петровна Лаушкина (Будко):
—Оцю мяльса азса, што «Мокшень правдать» мархта арань ялгакс ёфси шабакс. Тя ульсь Цифтамаз шачема-касома велеса. Конешна, тяни сон повонды сяда шуроста, сяс мес вов ни лама киза эрян ширеса Мордовиять эзда. Но газетань журналисттненди удалась  ладямс соткст мархтонк и минь оцю мяльса пачфнетяма теест сянь колга, кодама пуромкст, концертт, васедемат ётафнетяма Москуса и Московскяй областьса, ламотне эздост сотфт минценнеть—мокшеннеть мархта. Вдь мокшень аф кржа ломань тя или тона туфталонкса тусь эряма Мордовияста лия вастс, но тя аф корхтай сянь колга, што синь юкстазь мокшень родной кяльть, тядянь-алянь койхнень-обуцятнень. Сяс, мзярда кядезон повонды «Мокшень правдать» тя или тона номероц, тейне тя арси оцю кенярдемакс. Афолень мярьге, што мялезон вов  ня и ня тематне. Морафнеса газетаста семботь. И журналистонь кядьса тяштьф эрь материалсь тушенды мялезон. Пара улель, кда сяда сидеста лисендельхть национальнай мокшень ярхцамбялень рецептт, вдь эздост аф кржа и кой-конат тянемс нинге ванфтовихть бабаньконь-щаваньконь «арзяснон» эса, а сяда пара улель таргамс синь тоста и тиемс содафокс, нолямс тевс.
Зубово-Полянскяй райононь педагогическяй колледжень родной кялень и литературань учительсь, Мордовия Республикань Заслуженнай преподавательсь Нина Александровна Баранова:
—«Мокшень прадать» сёрматфнеса фалу. Аф мяляфтса мзярда, кодама кизоня васенцеда сявине кядезон. Ноляса тевс кода родной кялень учитель, а стане жа кода и газетань кельги ломань.
Оцю мяльса морафнесайне литературнай страницатнень, поэттненди и писательхненди, синь эряфснонды лемтьф материалхнень. Ламотнень эздост нолясайне тевс родной кялень урокненди анокламста.
Пара улель, кда кельгома газетасон сяда сидеста макссевольхть  материалхт тяниень пингонь мокшэрзянь писательхнень и поэттнень, тяконь лувксса и тевонь ушеды од «тяштенятнень» колга, лисендельхть мархтост интервьют, тяштьфсна.
Т.Альшина.
11.11.2021 №44

 

Редакциять эзда

Ламонцненди «Мокшень правда» газетась арась мялень пети, ваймонь эжди ялгакс. Тя кеняртьфти. Минь кеняртькшнетяма и мзярда тейнек тяштихть синць лувихне. Синь сёрмасна пяк питнихть, эрявихть. Лезксфтомост журналисттненди нолямс интереснай и содержанияс коре козя газета стака. «Мокшень правдать» фкявок номероц аф лисенди лувихнень сёрмафтома. Лиякс мярьгомс, лувихне ульсть и ляткшнихть мокшень газетаньконь главнай корреспондентонза. Синь вельдест сашендыхть ошнень и велетнень эзда редакцияв од кулят, пачфневихть од адрест, свежай фактт. Да и кржа ли темада, конатнень лихнесыне эряфсь и конатнень колга эряви корхтамс и корхтамс вярьгак вайгяльхть.
Вов и тячи марнек страницась кочкаф лувиеньконь сёрмаснон эзда. Синь эздост можна лама содамс мокшэрзянь крайть эряфста. Редакциясь сяда товга кармай печатлакшнема тяфтама страницат. Эняльттяма теенть азондомс эсь работантень, ялгантень, мялентень-арьсемантень колга, мезьса сяда лац содаф, мезсь сембодонга таколфты эсонт. Минь учтама сёрмантень эса.
Ваность М.П.Девятаевонь колга фильмать
 
Мон аф кунара пара мяльса, оцю гордостень марязь ваныне «Девятаев» фильмать, конань аноклазь Тимур Бекмамбетов и Сергей Трофимов. Фильмаса сявфт мяльс афкуксонь событиятне и пачфневи советскяй легендарнай лётчикть, мокшалять Михаил Петрович Девятаевонь подвигонц колга.
Девятаев пяк кельгозе авиациять, лац содазе эсь тевонц. Великай Отечественнай войнать пингста, повомок пленц, сон ашезе юмафне Отечествати верондаманц, няфнемок афкуксонь смелши и героизма, сатозе эсь целенц—ворьгодсь ялганзон мархта пленцта немецкяй самолетса.
Войнань кизотнень Михаил Петрович крьвястсь вражескяй аф кржа самолет, кожфу кепсесь 180-ксть. Сонь пленцта ворьгодемац—мужествань, мастерствань и Родинати кельгомань оцю подвиг. Тяда башка, отважнай лётчиксь пачфтезень советскяй военнайхненди немецкяй ракетань базать координатонзон.
М.П.Девятаевонь подвигоц—пяк цебярь пример од ломаттненди, тяниень пингонь поколенияти.
Картинась афкукс салай мяль, таколфты. Монь койсон, актёрсь Павел Прилучный лац, маштозь, верондафтыста налхкозе Михаил Девятаевонь роленц. Оцю спасиба теенза тянкса.
И.СИДОРИН.
ЭРЬКА, пшкядян…
Сидеста сашендови кулендемс: «А мезенди тейнек мокшень кяльсь? Кали сон кондясни эряфса, тяни вдь сембе вастова корхтави рузкс и коль сяда келиста тевс сувафневихть омба масторонь кяльхне». Вов и ня шитненьге ошень маршруткаса ардомста кулине тянь колга кафта тядятнень корхнемаснон. Фкясь пеняцясь омбоцети, кодама, кле, стака тяни школаса тонафнемась, предметта пяк лама, вешфксне оцюфт, да нинге мокшень, эрзянь кяльхнень мархта шабатнень пряснон шаракофнесазь. Мезенди, кле, сувафтозь программати, шабатненди синь ёфси аф эрявихть, аньцек сталмоть лангозост касфнесазь. Корхтай ялгацка кирдезе ширенц, сяда пара, кле, улель, кда ня часттне максовольхть омба масторонь кяльхнень тонафнеманкса, синь афкукс эрявкснихть эряфса.
Кулхцондонь корхтамаснон эса и седиезе люпштавсь. А вдь кафцьке аватне мокшет. Лисенди, синць мокшетне ёрайхть атказамс эсь кяльдонк. Маршруткать эзда лисень колаф мяльхть. Кода стане атказамс сянь эзда, мезсь максовсь тейнек тядянь лофцть мархта?! Мзярс прясон шарондсть пичефти мяльхне-арьсематне, каршезон токась кунардонь содафозе, ошеряйсь О.О.Кулаева. Ольга Осиповна лама киза ни эряй Саранскяйса, а шачемас-касомас коре сон Ельниковскяй райононь Молчаново веленне. Корхтазевоме мархтонза. Эрька, арьсян, кизефнеса, мезе сон арьси национальнайть ванфнеманц колга.
—Мон пяк кельгса родной кяленьконь,—азозе мокшавась.—Да и кода аф кельгомс? Мокшень кяленьке мазы, лац кайги, сон максф тейнек Шкабавазть мархта. Мокшекс азфт васенце валхне, мокшекс мархтонк корхнесть инь мала ломаненьке—тядяньке-аляньке. Мзяра киза ни эрян ошса, руз ёткса, а эсь родной кялезень ашине юксне фкя шиска. Онненьге няендьсайне мокшекс. Сянкса пяк колсеви мялезе, мзярда приметнеса, што кой-кона мокшетне виздьсазь эсь пряснон, сёпондсазь национальностьснон. Сайхть ошу и эстокиге рузыякшнихть. Да и велесовок тячи аф шуроста уленди стане, што тядятне-алятне эсь шабаснон васендакиге тонафнесазь рузонь кяльти. А кда семьяса аф кайги родной валсь, кали сяда тов сон кельгови од ломанти. Аф кельгови, сяс мес сембось моли семьяста.
Ёран нинге шарфтомс мяль мокшэрзянь культураньконди. Ваносте, кодама мазыхть щамоньке! Кодамовок лия народонь аш тяфтама нарядоц. Аф стак нинге лама кизода тяда инголе Францияса ётафтф конкурсса мокшень щамсь азфоль масторлангса фкя инь мазыкс. А мороньке? Кие мокшэрзяда башка машты лама вайгяльса морама? Мон тяфтамот аф содан. Эрь кизоня пара мяльса улендян «Шумбрат, Мордовия!» Народнай творчествань республиканскяй фестивальса, коза пуромкшнихть самодеятельнай артисттне сембе райоттнень эзда. И най дивандакшнян, мзяра ётксонк асу ломаньда. Кие кштий, кие морай, кие эрь кодама кядьтевса сафтсы. Кали тя аф максси тейнек туфталхт марямс гордость эсь народоньконь инкса?!
Эрьда арьсезефтяма, мезьс токатама, кда карматама сёпондомонза национальностеньконь, юкстасаськ кяленьконь? Эста юмай-арай масторлангста мокшэрзянь народсь. А тя афкукс пичефти, тянь нолдамс тейнек аш кода.
О.ВАСИЛЬЕВА.
«Родной кялезе—монь кенярдемазе»
Ковшкада инголе Саранскяйста васьфтине эсь землякозень, кона кунара ни эряй Нижняй Новгородса. Ломанць сон аф од ни, но нинге эрьгав. Ламось лятфтафоль мархтонза, а мзярда корхтамась тусь национальнай кизефксть колга, сон мярьгсь:
—Ламонцне эсь пингстонза кадоськ эсь веленьконь, а вдь тячи кизефтьк эздонк кажнайть, мезть сембодонга  сидеста няендьсак онцтот, кульсак: покой аф максси шачема-касома вастсь. Лажаткшнян теенза, тостонь эряйхненди, калякондамс ба мархтост седикс-ваймокс родной кяльса, кулхцондомс ба народнай мороньконь.
Мезень колга тя корхтай? А сянь, што шачема ширеда, эсь народцень койдонза-обуцядонза питни мезевок аш и коса афолеть  уле, мезе афолеть тиенде, сембось тя мзярдовок аф юкстави, ускозь-уски эсот.
Землякозень ня валонза эста токазь седиезень. Сяс и, улема, тячемс шарыхть прясон.
А вов лия пример.
—Шумбрат, Василий Иванович!—пшкядень тейне содаф аляти.
—Э-э, привет! Как живешь-поживаешь?—пеедезь отвечась сон каршезон.
Корхтаманьке лиссь тяфта: мон теенза—мокшекс, сон тейне—рузкс. И вдь тя алясь эряй аф косовок Америкаса, а Мордовияса. Кизошкада инголе ётась эряма Саранскяи.
Пяк курокста рузонь ломанькс арсихть кой-конат эздонк. Няендят-васьфтят тяфтама ломань мархта и арьсезеват: кода ладяви кяленьконь сяда товолдонь судьбац? Аралави, шта, сон зиянда-кальдявда?  Сяньге стака шарьхкодемс: кали можна юкстамс кяльцень, кда шачеть-касоть мокша  ломань ёткса? Монць аньцек коза ашень пачкотькшне. А кизефтесть, хуш фкявок валня юкстань? Аш. Мокшень кяльсь—монь ваймозе, кенярдемазе, пяк пара ялгазе. Седишкада кельгса сонь. И марян гордость, мес мон мокшан.
М.КИРДЯШКИНа.
Марян гордость эсь нациязень инкса
Аф кунара шабразе тейне азозе, што сон аф ёрай нолдамс квартиразонза переписчикнень, сяс мес пели синь лемстост  кармайхть якафнема эсь шобда тевснон салайхне-колайхне, лия афтерьксне. Кле, нона кизотнень кулендевсь аф фкя случай, мзярда «переписчикне» обжсезь сиренятнень, нельгондезь ярмакснон и питни паршиснон. Мон ялгазти тянь каршес отвечань, што, кда пелемс врьгазда, эста аш месть якамс виривок. Да и, монь койсон, можна тевс нолдамс и тяфтама возможностть. Кда тя или тона ломанць пели нолдамс переписчикть кудозонза или квартиразонза, эста тонац максси кизефкст кенкшть пачк.
Да и аф эряви пелендемс переписчикнень мархта путневи кизефкснень эзда. Паспорт или кодамовок лия документ киньге кядьста, кода содаф, аф кизефневи. Эрь ломанть колга сёрмадовихть ся даннайхне, конатнень азсыне сонць. Тяфта тиендеви сянкса, штоба ломаттне аф пелезь азондольхть эсь колгаст, синць няфтелезь эсь этническяй группаснон, эсь национальностьснон и стак тов. Монць, кепотьксонди, переписень листкяти аф виздезь, а гордостень марязь сёрматфтса: мон—мордвин-мокшан или мон—мордвинан.  И тя сяс, мес пяк кельгса эсь нациязень. И тернетядязь сембонь тиемс лацон. Эздонк кажнайсь должен шарьхкодемс эсь ответственностенц эсь народонц судьбанц инкса, сонь  тячиенц и вандыенц инкса.
В.РЕЗАЕВ.
23.09.2021 №37

 

ФЕДОСЕЙКИТТНЕ ЭРЯЙХТЬ ЛАДЯЗЬ

Торбеевскяй райононь Варжеляй велень средняй общеобразовательнай школань директорсь Н.А.Маскаева азсь лама шнамань валда учительть Л.В.Федосейкинать колга. Мокшавась трудонь кельги, тевонь содай, оцю авторитетоц школаса, велеса, райононь учительхнень ёткса. Кельгсазь иттне и родительхне.
Людмила Васильевна шачсь и кассь Варжеляйса. Тяса аделась школа, получась высшай образования. И вов ни 29 киза тонафтсы шабатненди физикать. А мекольдень кизотнень вятьсыне черчениянь, астрономиянь, математикань урокнень. И аф кальдявста тя лисенди. Сонь учениконза фалу занцихть васенце вастт райононь олимпиадаса, аралакшнесазь районть честенц и республикаса. Людмила Васильевна вятьсы райононь физикань учительхнень методическяй объединенияснон. Сонь козя работань опытоц, конань пара мяльса азонкшнесы од тонафтыхненди. Примси участия эрь кодама пялькстоматнень, семинархнень эса. И сатни аф ёмла сатфкст.
Л.В.Федосейкинать цебярь семьяц. Пцтай 23 киза эряйхть мирденц, Виктор Степановичень, мархта. Сон аделазе Н.П.Огарёвонь лемса Мордовскяй госуниверситетонь велень хозяйствань институтть. Заняф строямань тевса. Тяни якай Москуву ярмаконь добувама. Кудсост фалу кельгома и фкя-фкянь шарьхкодема.
Федосейкиттне касфтсть колма цёрат. Евгений аделась Москувонь вуз, покоди столицаса. Сонцень семьяц. Сидеста сашендыхть инжикс Варжеляи, коса синь учсазь и пяк кельгсазь. Павел и Кирилл—столицань вузонь студентт. Синь сембось нинге инголе. Родительхнень гордостьсна и прянь шнафтома вастсна. Цёратне лац тонафнихть, няфнесазь  пряснон спортса, общественнай тевса.
Аф лядонды тевфтома и Людмила Васильевна. Мирдец Москуса. Сонць шиньберьф покодема вастса. А работада меле—кудонь тефт. Од мокшавась касфты колма племянницанзон эса. Ольгать, Юлять, Анять кулось алясна, Федосейкинать брадоц И.Семакин. А сонь рьванц сявозь родителень праванзон. Сяс стирнятне касфтовихть аканц семьяса. Лац тонафнихть школаса, фалу симтьфт-антфт, щафт-каряфт. Эряйхть аф ялгадост кальдявста. Федосейкиттне полафтозь и тядяснон, и аляснон.
—Стирнятне фалу весялат, шумбрат-тазат, сембосна ули,—корхтай Варжеляень школань директорсь Н.А.Маскаева.—Сяда цебярьста афи уленди,  шнамань валда башка азомс аш мезе.
—А инь главнайсь, синь лац тонафнихть,—поладозе школань завучсь Л.И.Чапайкина.—Шабатне пяк отькорьхть, активнайхть. Людмила Васильевна лезни теест физикаса, математикаса, лия предметтнень эса.
—Мирдце каршек ашезь аще, штоба сявомс стирнятнень семьязонт?—кизефтине тонафтыть.
—Меколанкт, тя сон сявфтезень стирнятнень семьяв,—отвечась Людмила Васильевна.—Монга кафта кядьса тянкса. Синь тейне родной ломатть. И ёфси аф муворуфт, што алясна кулось, а тядясна ялгафни «сяпинять» мархта.
Стирнятне синцьке аф лядондыхть ширеса кудонь тефнень эзда, сембоса лезнихть акаснонды, маштыхть пидема-панема, муськома и стама. Старандайхть аф обжамс, а аньцек кеподемс мяленц акаснон. Синь эздост касыхть аф кальдяв ломатть.
И.Иванов.
Снимкаса: Л.В.Федосейкина
учениконзон мархта.
Фотось авторть.
22.07.2021 №28

 

Мордовия Республикань культурань Заслуженнай работниксь М.И.БИКЕЕВА: «КЕЛЬГОМА ГАЗЕТАЗЕНЬ МАРХТА АФ ЯВОНДАН ЭРЯФОНЬБЕРЬФ»

Фкя праздникста телефонца гайфтень Старошайговскяй райононь Лемдяй мокшень велень эряйти, Мордовия Республикань культурань Заслуженнай работникти, сюреса, ёмла ожнаса сёрмадыти, зрнянь кядь мокшавати, «Мокшень правдать» пара ялганцты М.И.Бикеевати. Поздравляндамок фкя-фкянь, корхнемок эряфть-ащефть колга, «ажияньконь» шарфтоськ газетати. И Мария Ивановна эстокиге мярьгсь: «А мес инжикс ширезон ашеть сува Лемдяйса улемстот?! Кунара ни тердян эсот, а тон кудозень вакска ётать…» Васенда аф ламода абондонь, а меле отвечань, што ашелень мокшень тя велеса. «Кода ашелеть? Аф кунара морафтыне сёрматфцень библиотекареньконь Маринать колга»,—пшкядсь М.И.Бикеева. Эста ни талакодонь, што Мария Ивановна мяльса кирдьсы Лемдяень библиотекань библиотекарть Марина Борисовна Босинать квалма тяштьф материалозень, конань, валонзон коряс, лувозе педа-пес. Азыне М.И.Бикеевати, што Лемдяи повомс тейне мзярс ашезь удала, а Марина Борисовнань мархта корхнень телефонть и интернетть лезксонц вельде.
Лад арась мялезон. И аф аньцек сяс, што тяфтама ломанць, кода Мария Ивановна, вов ни мзяроце кизось цебярь азоравакс тернесамань ширезонза Лемдяи. А нинге сяс, што сон фалу лама киза мельцек сёрматфнесы и морафнесы «Мокшень правдать». Вов и тянивок кизефтине пара вайме мокшавать мезсь тушенды мялезонза газетаса и мезть лангс, койсонза, мокшень журналисттненди шарфтома сяда оцю мяль.

 

14.05.2021 №18

 

МОКШЕТНЕ МАНЬЧЖУРИЯНЬ СОПКАТНЕНЬ ЛАНГСА

Кронштадса путф памятник адмиралти С.О.Макаровонди, кона шавовсь 1904-1905 кизотнень русско-японскяй войнать пингста. Памятникть постаментонц лангса тяштьф: «Мяляфтк войнать».

 

Мезе минь содатама и мяляфттама земляконьконь, Мордовияса шачфнень, Россияти аф удалаф ся войнаса участиянь примамаснон колга.

 

1897 кизонь февральста пуроптфоль Инсарскяй резервнай батальонць. 1903 кизонь декабрьста сон тифоль кафта батальонцта ащи полкокс. Русско-японскяй войнать ушедомстонза сявомок тя полксь арась Инсарскяй 216 пехотнай полкокс и Чембарскяй 284 пехотнай полкокс. Оцязоронь Россияса полкнень лемсна сидеста макссевсть ся вастть коряс, коста сявондевсть ня полкненди призывникне. Инсарскяй полксь получазе эсь лемонц Пензенскяй губерниянь Инсарскяй уездть мяльса кирдезь.

 

Кда ваномс Мордовиять картанц, ули кода няемс, Пензенскяй областьса Инсарскяй районть шабрац Мокша ляйть лангса Мокшан ошть центранц мархта Мокшанскяй районць.

 

1904-1905 кизотнень русско-японскяй войнать пингста призывникнень ламошкасна вяре азф полкнень эса ульсть мокшет.

 

06.05.2021 №17

 

ШАЧЕМА МАСТОРТИ КЕЛЬГОМАТЬ АЗОНДСЫ РОДНОЙ КЯЛЬТЬ ВЕЛЬДЕ


 

ПАРА ТЕВЦЕ— МАЗЫ ЛЕМЦЕ

14.05.2020 №18

 

СЕРЬГЯТЬКС МОКШЕТНЕНДИ


 

 
 
 

 
НОВОСТИ

Зубово-Полянскяй райононь оцюнясь В.А.Поршин:«Эрь тевсонк васенце вастса ащи ломанць!»

Зубова Полянась васенцеда лятфневи 1680 кизоста сявомок Керенскяй засечнай чертань служилай ломаттнень Зубофнень фамилияснон коряс, синь тя ширеса азорхтольхть. Лемть омбоце пяльксоц пачфни, што тяса кужель, вирьса шуфттнень эзда ароптф вастоль. Сире пинкнень тияк ётнесть Шацк-Спасск алашань кись, Зубова Полянань почтовай станциясь. Машина кить строямста посёлкась вишкста кассь. Тяниень пингть Зубово-Полянскяй районца улихть оцю предприятият, конат лезнихть виияфнемс марнек Мордовиять экономиканц. Кепотьксонди, «Плайтерра» фанерань нолдай компаниясь и Вышинскяй деревообрабатывающай комбинатсь. Лама киза Зубова Поляна посёлкаса ноляй электроннай оборудования «Радиодеталь» заводсь. Оцю тефт тиендихть наказамань ётамань учреждениятне. Пцтай эрть эса улихть стамань цехт, шуфтонь и металлонь обработкать коряс производства. Аф кржа рабочай васта максси «Талина» компаниясь, кона мольфти районца аграрнай бизнес. Инголи моли технология мархта ня предприятиятне сявондихть работама сембе ширде аноклаф, квалифицированнай ломатть, сянкса зарплатавок пандыхть цебярь.
 
 

Корреспондентоньке аф кунара васьфнесь Зубово-Полянскяй райононь оцюнять Владислав Алексеевич Поршинонь мархта и кизефнезе, кода Мордовиянь инь оцю районца ётафневихть эряфс национальнай проекттне.

12.05.2022  № 18
 
 
 
 

МОРДОВИЯНЬ ОЦЮНЯСЬ ПОЗДРАВЛЯНДАЗЕНЬ ВЕТЕРАТТНЕНЬ

Шуваланяста, 5 майста, Артём Здунов васетькшнесь Мордовиянь ветеранскяй активть мархта. Васедемаса примасть участия республикань райононь ветеранскяй организациянь председательхне и члеттне.

 

Тяддень мартста организацияти топодсь 35 киза. Мордовиянь Оцюнясь азозе, што Ветеранонь советть оцю значенияц регионца, сон путни сатомшка оцю путкс од поколениять воспитандаманцты. Корхтафоль памятниконь тиемать коряс Военно-историческяй обществать мархта марстонь работать и Сурскяй рубежень строяйхненди музеень панжемать колга.

 

«Кда аф тинь советонте, тейнек улель стака ламоц важнай задачатнень пяшкодемста. Башка мяль тячи, конешна, эряви шарфнемс од ломаттнень воспитандамаснонды, сянди, мезе тиендеви школатнень эса. Интернетса лама аф видексонь информацияда, конань вельде ули кода тиемс кальдяв од ломаттненди, сяс кадондомс мялень апак шарфтт тя категориять аш кода»,—мярьгсь Артём Здунов васедемать панжемста.
 

12.05.2022  № 18
 

СЕДИЕНЬ ТАКОЛДОМА И ОЦЮ КЕНЯРДЕМА КАННИ ТЕЙНЕК 9 МАЕНЬ ШИСЬ!

Победань шиня Саранскяйса и Мордовиянь райоттнень эса ётафтовсть мероприятият, конат лемтьфтольхть 1941-1945 кизотнень Великай Отечественнай войнаса Сяськомать 77 кизонь топодеманцты.

 

Саранскяйса Победань площадьса ётафтовсь торжественнай митинг. Ся кизонь пелькс событиянь участникненди и свидетельхненди сюконяма, сяськиень поколенияти спасибань азома, сембонь сятнень лятфтама, кит тяни ашет мархтонк, сашендсть ошеряйхне и Мордовиянь столицань инжихне.

 

Торжественнай митингть панжемста Мордовиянь Оцюнясь Артём Здунов поздравляндазень пуромфнень странаньконь историяса Великай шить мархта: 

 

«77 кизода тяда инголе Советскяй народсь аралазе родной Отечестваньконь,  нолдазе воляс фашизмать  эзда ламоц странатнень и нароттнень. Республикасонк шачф-касф ломаттне тиендсть героень тефт сембе фронттнень эса: Брестскяй крепостть араламста, Москуть, Ленинградть, Севастопольть инкса ащемста, Сталинградть ала и Курскяй дугать лангса тюремста, Украинань, Белоруссиянь союзнай республикатнень и сембе Европать воляс нолдамста. Тылонь труженикне, аф ваномок ашушить и вачашить лангс, сатнезь Победать станокнень ваксса, паксяса, Сурскяй рубежса и госпитальхнень эса. Марса аватнень и сире ломаттнень мархта тылса стакат-сталмот кирдсть шабатне. Вечнай толть ваксса минь сюконяфнесаськ пряньконь сембонь сятнень лятфтаманкса, кие ашезь мрда войнаста, кие эреклафнезе народнай хозяйствать войнада меле. Сембось тя тиф минь инксонк, шабаньконь, сяськиень сай пингонь поколениятнень инкса!»

 

 
12.05.2022  № 18
 

«Бессмертный полк России» ООД-ть Мордовия Республикань региональнай отделениянц штабонц руководителец Н.А.КРУЧИНКИН: «ТЯДДЕ "БЕССМЕРТНЫЙ ПОЛК" ШЕСТВИЯСЬ КАРМАЙ АСЬКОЛЯМА МАРНЕК СТРАНАТЬ ЭЗГА!»

05.05.2022  № 17
 
 

Касы коронавируснай инфекцияса сярядихнень лувкссна

29 апрельста ётафтовсь коронавируснай инфекциять инголдаманц и келемоманцты кить персеманц коряс региональнай оперативнай штабть  заседанияц. Сонь работасонза примась участия Мордовиянь Оцюнясь Артём Здунов.

 

«Коронавируснай инфекцияса урмаськодомать мархта тефне Мордовияса ашесть полафта—300-та лама пациент пчксихть ковиднай госпитальхнень эса. Ваномс, штоба Маень праздникнень пингста массовай пуромксне афольхть ара урмаса сярятькстыхнень лувксснон касомаснонды туфталкс»,—мярьгсь регионть руководителец.

 

МР-нь Правительствать Председателенц заместителец Галина Лотванова азондсь эпидемиологическяй  тяниень пингонь ситуациять и коронавируснай инфекциять эзда населениять вакцинациянц мольфтеманц колга.

 

Ётай недялять коряс 19 процентта кассь госпитализированнайхнень лувкссна, сяда лама арась стационарса пчкафневи идьта. Коллективнай иммунитетсь кирсь и тячиень шити сон арась 52,7 процент.

 

05.05.2022  № 17
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин