«РОССИЯТЬ МАРХТА БИЗНЕССЬ ЭРЯВИ ЛАДЯМС ТЯЧИ»

—Афкукс-аф угро-финскяй общностть и тячи пяк эрект сотксонза?
—Арьсян, тяфта, Мордовскяй госуниверситетса, кепотьксонди, 22 киза ни тонафневи венгерскяй кяльсь, ули марса работамать колга соглашения венгерскяй кота вуснень мархта—Сомбатхейть и будапештскяй ЭЛТЕ-ть эзда сявомок Сегедти молемс. Мяляфтовсь и ся, кода несколька кизода инголе Россиянь Президентсь Владимир Путин Саранскяйса финно-угорскяй нароттнень международнай фестивальсост кштизе чардашть венгерскяй мазы стирьхнень мархта. Но и монь улихть «Венгриять мархта сотксоне»: 1986 кизоня стройотрядса лезнеме строямс школа Сегедть маласа. Эста няине венгерскяй велеть, венгерскяй аграрнай отраслять уровененц и мезти тиньцтонт эряви тонафнемс.
—Мокшэрзянь делегациясь кемокстась лама соглашения венгерскяй компаниятнень мархта марса работамать коряс…
—Мордовия Республикась тяниень пингть—Россиянь велень хозяйствань производительхнень ёткса нилеце вастса вииямать коряс, мезть удалась сатомс венгерскяй партнерхнень мархта сотксонь кирдемать вельде. Кепотьксонди, Будапештса бизнес-форумса кемокстафтольхть мациень толгань переработкаса марса работамать коряс, кукурузань семеноводстваса соткснень келептемаснон коряс партнеронь соглашеният.
—Конашкава цебярь венгерскяй кукурузась?
—Минь ламоль предложениядонк и Германиять эзда, но тиннесь сяда салси мяль. Кда ваномс питнесь-качествась ширеть, венгерскяй предложениясь сяда выгоднай. Мациень касфнемась, конань колга лятфнефоль ни—тейнек тя тевсь од, эряви тонафнемс, но минь няйхтяма тя проектть эса оцю возможностть.
—А тянь каршес аф ащихть Евросоюзть санкциянза?
—Минь аф тиенттяма мезевок стама, мезсь поволь кодамовок санкция алу. Муме марса работамань, марстонь предприятиянь тиемань механизма. Но эряви сявондемс мяльс: санкциятне мзярдовок шумордавихть, вдь синь ащихть каршек и минь, и европеецнень интересснонды. Кда тячи тейнек сайхть венгерскяй фирмат, синь улихть васенцетнень ёткса, заняйхть пяк цебярь позицият. А вов эмбарготь етафтомдонза меле минь кармай тяфтама конкуренция, конань эса ули стака няфтемс пряцень и мумс эсь вастцень.
—Президентть Владимир Путинонь и венгерскяй премьерть Виктор Орбанонь договоренностьснон коряс, кафта ширдень соткснень мяльса кирдезь, башка мяль шарфнема Венгриять и российскяй региоттнень марстонь работаснонды. Ламоц ли  задачатне макссевихть Москуста, кодапт эсь решениянь возможностенте?
—Ну, тяса сембось тёждя. Владимир Владимирович тись база. Лиякс азомс, Президентсь—марса работамать инкса. Монга тянкса, а сяда тов эряви работамс. Москусь юкссесыне региоттнень кядьснон экономическяй сотксонь кирдемаса, и минь тянь сявондьсаськ мяльс.
—Мезень колга тя корхтай, велень хозяйствада башка?
—Мордовияса нинге советскяй пинкнень ульсть светотехникать мархта сотф цебярь традицият, тяни минь—тяконь лувксса венгерскяй инженерхнень лезксснон вельде—работатама отраслять виияфтоманц лангса. Тяда башка, ули кода виияфтомс эряма вастонь строямаса марстонь работать. Тяса, кода и стадионть строямаса, надиятама венгерскяй фирматнень лангс, вдь футболть коряс 2018 кизонь Миронь чемпионатть матченза ётайхть и Саранскяйса. Но азса нинге весть: тефне тиемат тяни и курокста—тя эрявикс пинге.
—Тон лятфтать футболть коряс Миронь чемпионатть колга, но тячи няйсаськ,  Францияса, мигранттнень самаснон и забастовкатнень сюнеда эвондакшни пелькс Европань чемпионатть ётафтоманц инкса. Тиньцонт тянь коряс сембось лац?
—Кодамовок прябалат аф кармайхть. Содасасть, народоньке эсь лацонне. Кда тянь вешсы странась, Родинась, тейнек ули кода юкстамс аф фкя лацонь сембе мяльхнень. Кда азомс фкя валса: тяда таколда, тя ули пяк цебярь чемпионат. Сада ширезонк командатнень лувксса, и кода болельщикт.