Поиск по сайту: 
 

Архив
 февраль 
 2019 
пн вт ср чт пт сб вс
    123
45678910
11121314151617
18192021222324
25262728   

 
 

 

Наука и жизнь

КРАСНОСЛОБОДСКЯЙ ПРОМЫШЛЕННАЙ ТЕХНИКУМСА АНОКЛАВИХТЬ СПЕЦИАЛИСТТ, КОНАТ ЭРЯВИХТЬ ТЯЧИЕНЬ РОССИЯТИ

Аф аньцек эсь республикастонк, но и лия региоттнень эзда иттне тонафнихть техникумса рабочай профессиятненди, конатненди тяни ули вешфкс. Кода ладяф тонафнемань процессь содамошинь касфнема тя учрежденияса, азонды техникумонь директорть учебно-воспитательнай работать коряс заместителец, мокшалясь Станислав Васильевич Кудашкин.
—Станислав Васильевич, эрь корхтаманьконь ушедсаськ техникумонтень колга. Инголи, кода содаф, сон каннесь училищань  лем, 2000 кизоня максфоль техникумонь статус. Мезсь полафтсь тяда меле?
—Тяни аф кода училищать пингста. Тонафнемась латцеви и начальнай профессиональнай образованиянь, и техникумонь программатнень коряс. Средняй профессиональнай образованиять коряс миньцонк эвондась «Электронные приборы и устройства» специальность. Аноклатама тястонь радиозаводти специалистт. Минь мархтост кирттяма кеме соткст, тоса и урокт етафнетяма. Тяфтама сотрудничествать кафта ширдень цебярец. Преподавателеньке улендихть и головной предприятияса, кона Москуса. Мес тоса? Да сяс, мес тоса сембе оборудованиясь тяниень пингонь. Од технологиятнень коряс тонафнесть мастероньке, технологоньке, тоса и аноклакшневсть тонафнемань программатне, технологическяй сембе процессне снимандафт видеос, тиевсть снимкат. Фкя валса азозь, тоса сотфт кеме содамошит, пуроптф опыт профессионалхнень эзда, мезсь нолдаф тевс тонафнемста.
—Азк, пожалуйста, мзяра од специалист ульсь тяддень выпусксонт?
—Сембоц кафксогемоньда лама специалист анокламе и нолдаме тевс.
—Кодама специальностьс коре?
—Повархт-кондитерхт, сварщикт, кинь строямаса машинань машинистт, связень операторхт и общестроительнай работань мастерхт.
—Станислав Васильевич, тиньцонт аноклаф сембе специалисттне мусть работама васта?
—Цёратнень оцюшкасна сявфтольхть армияв, лядыксне тердевихть сексень призывста. Целайнек выпускникне мушендыхть эстеест специальностьс коре тев. Вдь рабочай профессиятненди ульсь, ули и кармай улема вешфкс.
—Аф лама пингта ляткшни тонафнемань од кизоти. Кода арьсят, Станислав Васильевич, тонафнема примамать коряс планонте пяшкодеви?
—Аф ваномок демографическяй ширде ёшмотнень лангс, ширезонк тонафнема сайхнень лувкссна аф кири и планоньконь пяшкотькшнесаськ, катк, мярьктяма, тиендеви тя аф теждяста.
Миньцонк фкя пирьфсот и учебнай корпуссь, и мастерскойхне, и общежитиясь, мезсь, шарьхкотьф, пяк пара тонафнихненди. Сембе аудиториятне лац оборудовандафт, тяконь ули кода азомс мастерскойхнень колга. Общежитиятнень эсовок ули сембе эрявикссь. Эряйхть эсост ширде саф тонафнихне, а тястоконнетне занятияда-мезьда меле тушендыхть кудга.
—Эряйхть тонафнихне питнень апак пантт?
—Конешна. Семботь сявондьсы техникумсь эсь лангозонза. А нинге пяк цебярьхть спортивнай, тренажернай залхне и стак тов. А тяста и сатфксне. Кепотьксонди, Word skills стандарттнень коряс рабочай профессиянь республиканскяй чемпионатса тонафниеньке Василий Якомаскин кирпичнай кладкаса сатозе I вастть, а электроникать коряс призовой васта сатсь Антон Елисеев.
—Оцю преподавателень коллективонте?
—Сембоц комсь специалист трудендай тяса.
—Тядде мзяра идь примави ширезонт содамошинь касфнема?
—Сембе специальносттнень коряс эряви кочкамс 105 идь. Азсаськ, што конкурс аф кармай улема, примавихть сембе, кинь ули мялец тонафнемс Краснослободскяй промышленнай техникумса. Васенце курсонь сембе тонафнихненди пандови стипендия, а сяда тов—сявовихть мяльс тонафнемань результаттне. Шарьхкотьф «3» оценкаса тонафнихненди стипендия аф пандови.
Тяда ингольдень кизотнень ульсь возможность андомс иттнень питнефтома шити колмоксть, меле—шити кафксть, а тяни аньцек обедафнефт. Соцзащитань справкатнень мархта андовихть питнефтома.
—А эсь ярмакнень лангс ярхцамась питниста стяшенды?
—Ёфси аф. 25-30 цалковайсь сатомшка.
—Улема, студенттне каникулатнень пингста прдань кятть аф ащекшнихть, а, кда ули возможность—работайхть?
—Тонафнихнень оцюшкасна велень стирьхть и церат. Ламотне эздост покодихть. Кие комбайнас озси, кие токса работай. А тястоконнетнень ули возможностьсна трудендамс радиозаводса. Сварщикневок мушендыхть тев разнай предприятиятнень эса. Повархневок эрявкснихть тястонь кафетненди. Конашка вешфкссь кинь строяйхненди, содасасть тинць. Кода шарьхкотькшнесасть, кинь мялец работамс, тевфтома аф ляткшни.
—Кодама стака-сталма мархта сашендови васьфнемс техникумти?
—Сталмотне, кода и целайнек сембе странаса. Пара улель, кда касфтоволь финансированиясь. Штоба тячи работамс сембе вийса, ули сембоньке, но, штоба вииямс-эрекламс сяда тов, эрявихть средстват тяниень пингонь оборудованиянь добувамс. И нинге, штоба работальхть промышленнай предприятиятне, аф аньцек конатнень мархта сотрудничендатама, а сембе. Тяфта од ломаненьке афольхть тушенда ширге-куване, а синь ёньцна-вийсна кондястель эсь республикасонк.
—Спасиба.
Н.КУБАНЦЕВА.

14.07.2016 №26
 
 
 

 
НОВОСТИ
 
 

ВАЛЕНТИН ВАСИЛЬЕВИЧ КОНАКОВ

2019 кизонь 27 январьста 80 кизонц лангса стакаста сярядемда меле тусь эряфста Валентин Васильевич Конаков—содаф государственнай и общественнай деятельсь, образованиянь и наукань пуроптысь, ученайсь.
Валентин Васильевич Конаков шачсь 1939 кизонь      9 июньцта Мордовскяй АССР-нь Атяшевскяй райононь Кулясово велеса крестьянонь семьяса.
Армияса служамда меле 1961 кизоня В.В.Конаков работась автомеханикокс Атяшевскяй «Сельхозтехникаса», а сяльде поступась Мордовскяй государственнай университету. Аделамок 1966 кизоня тонафнеманц, Валентин Васильевич кармась покодема образованиянь сфераса, 1966 кизоста сявомок 1979 кизоти молемс работась Мордовскяй государственнай университетса ассистентокс, старшай преподавателькс, металлонь технологиянь и машинань петемань кафедрань доцентокс, велень хозяйствань механизациянь факультетонь деканонь заместителькс. 1978 кизоня В.В.Конаков аделазе Московскяй лесотехническяй институтонь аспирантурать, теенза максфоль техническяй наукань кандидатонь лем.

31.01.2019  № 4
 

ДИПЛОПТ И ПРЕМИЯТ—АСУ ЛОМАТТНЕНДИ

Ётай недялять, 25 январьста, Российскяй студенчествань шиня Мокшэрзянь государственнай национальнай драматическяй театраса етась торжественнай пуромкс, конань пингста МР-нь Оцюнясь В.Д.Волков макссь казнет асу од ломаттненди. Мероприятияс пуромкшнесть аф фкя лацонь конкурсонь и олимпиадань сяськихне и призерхне, а стане жа  синь тонафтысна и тядясна-алясна.
Республикань Оцюнясь азозе, што асу од ломаттнень ширеснон кирдеманкса меля примафоль решения ладямс од премият школьниконь международнай и всероссийскяй олимпиадань сяськихненди и призерхненди.
«Международнай уровеньца сатфксонь сатоманкса премиять лувксоц 100 тежянь цалковайста сявомок 300 тежянь цалковайти молемс. Всероссийскяй олимпиадань мекольце этапонь сяськихне и призерхне получайхть 60 и 30 тежянень цалковай,—азозе Мордовиянь Оцюнясь.—Тядде лауреатокс арасть 43 школьниконьке. Тяда башка, казнет получайхть нинге 40 стирсь и церась, конат лац няфтезь пряснон  исследовательскяй тевса, социальнай и общественнай работаса, научно-техническяй творчествань и  профессиональнай мастерствань конкурснень эса».
31.01.2019  № 4
 

МОРДОВИЯНЬ ОЦЮНЯСЬ ВАНОНДОЗЕНЬ САРАНСКЯЙСА ОПТОВОЛОКОННАЙ ПРОИЗВОДСТВАТЬ ВИИЯФТОМАНЦ КОРЯС КИЗЕФКСНЕНЬ

Мордовиянь Оцюнясь Владимир Волков 22 январьста ётафтсь рабочай васедема «Оптиковолоконные системы» АО-ть генеральнай директоронц Андрей Николаевонь мархта. Ванондовсть предприятиять 2018 кизонь работань итогонза, а стане жа 2019 кизонди платтне. Ня кизефкснень ваномаса примась участия Правительствать Председателенц заместителец—промышленностень, наукань и од технологиянь министрсь Александр Седов.
Лятфтасаськ, оптическяй волокнань Саранскяй заводсь—фкясь и сякось странаса. Сон нолдафоль колма кизода инголе. Тя эсь лацонь производствать виияфтомань сембе этапонза етасть Россиянь промышленностень и торговлянь министрть  участиянц мархта. Владимир Волков аф весть васетькшнесь Денис Мантуровонь мархта, получсемок тя проектть, конанди вийс коре ладямс оптическяй волокнань производствать замкнутай цикланц марнек странать вешфксонзон мяльс сявозь, эряфс етафтоманц коряс республикать инициативанзонды ширень кирдема.
31.01.2019  № 4
 

МОКШЭРЗЯНЬ МАСТОРСЬ ТАГА ПУРОПТСЫНЕ ЭСЬ СТИРЕНЗОН И ЦЁРАНЗОН

Мордовскяй (мокшень и эрзянь) народть vii съездоц ётай тяддень
23-25 октябрьста республиканьконь столицаса
Мордовиянь Оцюнясь Владимир Волков 22 январьста Саранскяйса етафтсь мордовскяй (мокшень и эрзянь) народть VII съездонц, кона кармай тядде 23-25 октябрьста, етафтоманцты анокламать коряс совещания.
Совещанияса примасть участия Россиянь финно-угорскяй народонь Ассоциациять председателец Петр Тултаев, а тяфта жа мордовскяй народонь общественнай организациять Межрегиональнай представителенза, тяконь лувксса РФ-нь лия     субъекттнень эзда.
Владимир Волков мярьгсь, што мордовскяй народть съездоц работать важнай пяльксоц, кона мольфтеви властень оргаттнень и общественнай институттнень мархта традициятнень и межэтническяй ладямать ванфтоманц и ламолгофтоманц коряс—тя задачать путнесы странань Президентсь. Сай пингонь съездть инь главнай темац—«Мордовскяй (мокшень и эрзянь) народсь лама нациянь Россиять единай культурнай кодса».
31.01.2019  № 4
 
 

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

17.01.2019  № 2
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин