М.И.Безбородовонь шачема шиста 110 кизонь топодемати

Миша срхкси оцю кис
Весть ащетяма кудса аньцек кафоненк—мон мезе-бди стаян, а сон тапай пря кагодонзон вельхксса: поренди карандаш пенц да куфксни. Вдруг кеподезе прянц и корхтай:
—Эх, Ольга, кодама пара улель, кда тейне сяда оцю грамота!..
Конешна, Миша содазе, сонь марязе, конашкава аф сатни грамотац. Содалине тянь монга и пичетькшнень тянкса мархтонза ряцок. Кеподине тевстон прязень и корхтан:
—Миша, а мезе ина шорси? Мяльце—архт хуш Москуву! Сон тага куфкстсь:
—Москуву! Ся пароль, да кода туят, кда тяшка семьясь, кда аш кинди, аш кшинди?
Няенкшнине, коза бабазе урятцезень ярмаконзон,—шкайнятнень фталу. Ламоль ярмактонза, и монь прязон шачсь мяль: сявомс ся ярмакнень и кучемс Мишань тонафнема. Тянь колга тяни и пшкядень Мишати. Но сон кафцьке кядьса атказась:
—Тянь колга нльне тят арьсекшне!—мярьгсь сон.—Туян тонафнема, мзярда монць добуван ярмакт.
И сон кармась старандама, шобдаста шобдас покась кузенцяса, тиендсь поткафт, кенкш петлят, кенкш кяцат, оржапнесь узерьхть, тяпкат, тиендсь косырьхть, лемехт, кшнинь ость, шиновандась шарыхть—кинди мезе эрявсь. Весть Тимокть мархта петсть кукуня мархта часттка. Мон и корхтан:
—Миша, тонафтомак мархтот покама моньге: туят тонафнема—лядан вастозт, карман ярмаконь сявома и тейтьке кучан, мзярда заняват.
Изь ту мялезонза, мярьгсь:
—Ольга, деряй мон сявихтень варданкакс?
Но весть сявомань кузенцяв, няфтезе, кода пиксомс кувалдаса: сон серептьф кшнить покасы молаткаса—«пок-пок! пок-пок!», а мон кувалдаса—«бамк!» да «бамк!». Монь виезе сатоль, а отькорьшизе—сядонга пяк.
Эстоньбере тяфта и кармаме эряма: шиньберьф Мишать мархта кузенцяса, илять—морафтома кудса. Миша тяни срхкафнесь спектакльхть, комсомол ялганзонды морафнезень Пушкинонь, Некрасовонь произведенияснон, морафнезень и сонцень од стихотворениянзон. Весть кода-бди илять куду самста Миша и мярьги: «Ольга, эх, кда тейне Пушкинонь талантонц!..» И кармась Пушкинонь колга азондома, кода сонга тюрсь козятнень, баярхнень, нльне сонцень оцязортьке каршес. Конешна, кле, сянкса поэтть сонценьге тапальхть эсонза всякайкс: и панцезь ичкози столицастост, и мезе аньцек ашесть тиенде, меколи стаки сазь пенц, кошардсть бродягай француз, и ся ляцезе...
—Ляцезе и юмась-арась ломанць?!
—Ляциенцты ашесть тие мезеньге кальдяв, а оцюдонга оцю поэтсь юмась. Тяфтама козятнень правдасна.
Мон эводень:
—Миша, а тонь мархтот стане аф тиихть? Вдь козялятнень правдасна тясонга стама!..
Сон ламос мезевок изь кашторда,  а тоса тага куфкстсь:
—Пушкин пяк грамотнаель, и то тапарязь...  А мон мезе? Конешна, могут тиемс кодама кельк кальдяв... Эряви, пяк эряви тонафнемс!
Мон аф весть ни няендине, кодама стакаль теенза стихонь сёрмадомась, арьсекшнень: «Кда улель сяда оцю грамотац, шять, тевоц сяда туль». Тянивок тякось сась прязон:
—Архт, Миша, тонафнема. Мон однян, тазан, маштан покама кузенцясонга—архт!
Весть сась Ельникаста весяласта и корхтай:
—Ольга,  тячи аде Слобдав, илять мольхтяма кинос,  удотама тозк, а ванды шобдава молян экзаменц, шять, сявсамазь тонафнема...
Мон кенярдень:  Миша срхкась тонафнема!
Туме. Эста васенцеда няине киноть: ласькондихть ломаннят, бта ков-бди кенордайхть, яфиесазь кядьснон, а аф корхтайхть мезевок. Ашень шарьхкоде: живойхть или кода?.. Миша азондозе, кле, ласькондихть аньцек ломанень цильфт, а оцю ошева улихть ни стама кинот, коса ломаннятне маштыхть корхтамонга.
Удоме заезжайса. Шобдава Миша тусь экзаменц, а мон мархтонза, сембе мяльневок мархтонзот; шаран—васта аф муян: шта, максови-аф ся экзаменць? Лиссь Миша—мзолфоц: сембе экзаменонзон максозень лац, аш ни кода кенярдень монга и туме куду пара мяльса.
...Мишань тума шиня Каньфкужеса ульсь престольнай праздник, авозезе срхкась тов гуляндама, и монь ашемань нолда Мишань ильхтема, кле, ащек кудса. Мон кулхцондыне, арьсень, тяни лядан эряма сонь инголенза, но потма ширева кяжиянь и срхкань суронь нума и бабати мярьгонь: «Сурось кенерсь,   пяяри—аш мзярда гуляндакшнемс». Теензовок аргоза рьвянянц мархта савсь тумс аф гуляндама, а суронь прафтома. Прафттама—мон пря аф кепсян, а синь видемихть и пеетькшнихть, шарьхкотть, монь лангсон, мес кучине мирдезень тонафнема. Конешна, мес Миша тусь, кадозе семьять тряма ськамонза Тимоконь,—синь кяжиясть аф аньцек Мишать, а и моньге лангозон. Вов и пеетькшнихть лангсон, авозсь станяк и мярьгсь: «Ну кодама рьвя вихцода паньцы мирденц кати-ков тонафнема!» Синь монь лувомазь простишкакс.
А Миша пачкодсь Слобдав—кучсь сёрма, пачкодсь Ковылкинав—кучезе омбоцеть, пачкодсь Пензав—кучезе колмоцеть. Морафтомост аф маштан, и синь тага рахсихть: нарошна кизефнесамазь: «Мезе сёрмады мирдце?»
Мезе сёрмады мирдезе... Ох, конашкава мялезе монценьге содамс, мезе сёрмады тоста тейне кельгомазе! Кода сон тоса эряй? Топодьста ли? Муськф ли? Шять, лажадсь ни? Ох, сёрмас аф содамась!.. Ну да лад, сай пинге—монга карман тонафнема. Пеетькшнеда-рахседа, а карман тонафнема!..
Тя мяльсь прястон изь тушенда, сембе учень—сайхть сяда цебярь пинкт, а сашендсть сяда кальдяфт... Соседоньке, Егор Васильевич Безбородов—Мишанди ялга и содай сёрмас. Молян теенза—сон морафтсы сёрмать, и монь сединязе сяда тёждялгоды: бта корхни мархтон сонць!