МЗЯРДА МОРАЙ «КИЛЕЙНЕСЬ», ВАЙМОСЬКЕ МОРАЙ!

«Килейне» ансамбльть руководителец—Александр Павлович  Бурлаков  аделазе Н.П.Огаревонь  лемса  МГУ-нь филологическяй факультетть. Саратовскяй областень Хвалынскяй райононь Поповка велеса, коса ётафтовсь мокшэрзянь культурань фестивальсь, «Килейнесь» стане жа сашендсь Саратовань мокшэрзятнень ширес. Васедемстонк А.П.Бурлаков азондсь:
—23 киза ни покодян Сире Пичеур велень школаса. Вятян родной кялень и литературань, рузонь кялень и литературань урокт. Тяда башка, оцюнян школаньконь этнографическяй музейса, сисем кизот аноклакшнян культурань программат Досугонь кудсонк. Мярьголень тяфта, ваймамс пингозе пяк аш, сяс мес пяк кельгса эсь тевозень, мушендан эздонза ваймонь эрьгя.
Лама вастова учсеви фольклорнай коллективсь. Сон уленди концерт мархта Павловскяй райононь велетнень эзга, Павлов и Ульяновск ошнень эса. И аф аньцек эрзянь, но и рузонь сире мороса кеняртьфнесазь ваныхнень.
Тя творческяй коллективса комсь киза ни морсихть и педагокт, и культурань работникт, и велень пенсионерхт. А.П.Бурлаков арьси и коллективть вандыень шинц колга. Сяс оцю классонь тонафнихнень еткста кочкась мазы вайгяльса морай стирнят. Идень ансамбльть лемдезь «Эрзянкакс».
—Од ломаттне мяль вельде тонафнесазь сире пингонь эрзянь моротнень. Теест тяфта жа мала минценнесь и тя кеняртьфти. Сяс эряй надиямась, што ванфтовихть атянь-атяньконь, бабань-бабаньконь койсна-обуцясна и моросна.
Александр Павловичень рьвац Марина Филипповна, «Килейнеть» музыкальнай руководителец, инголи школаса вятсь музыкань урокт, тяни Сире Пичеур велень администрациянь оцюня. Синь марсот аф аньцек семьяса, но и кельгома ансамбльсост. Аф ли сянкса тя творческяй семьясь Настя стирьснон вете кизода инголе кучезь тонафнема «Искусство народного пения» Н.П.Огарёвонь лемса Мордовскяй госуниверситетонь Национальнай культурань институту. Виде, омбоце стирьсна Люда кочкась лия специальность—социолог-юрист. Колмоцесь, Софья стирнясна, тонафни школаса нилеце класса.  Акатне-сазорхне тядяснон, аляснон лаца тяфта жа пяк лац морайхть.
—Мзярда тердемазь мокшэрзянь фестивальс Саратовскяй области,—азонды А.П.Бурлаков,—кизефтине морай ялганень и сембе фкя вайгяльса мярьгсть: «Мольхтяма!»
Няелесть, кода лямбоста, кядень цяпазь васьфтезь «Килейнеть» Поповка велень Досугонь кудонь сценаса. И тя аф стак. Мзярда морай «Килейнесь», ваймоське морай!

Материалхнень
аноклазень